Mga Kahanas sa Pagtuon sa Kasulatan: Leksiyon 166

Pagpunting kang Jesukristo diha sa mga Kasulatan

Pagpangita sa mga Simbolo ug mga Hiyas sa Manluluwas

Usa sa pangunang mga katuyoan sa mga kasulatan mao ang pagtabang nato nga makat-on bahin sa Langitnong Amahan ug kang Jesukristo. Ang pagkat-on bahin kang Jesukristo maoy importanteng paagi aron makakat-on usab kita bahin sa Langitnong Amahan. Kon mas daghang kita og makat-onan bahin Nila, mas molambo ang atong hugot nga pagtuo Kanila. Kini nga leksiyon gidisenyo aron tabangan ang mga estudyante sa pagpunting sa Manluluwas samtang magtuon sa mga kasulatan.

Pagpangandam sa estudyante: Dapita ang mga estudyante nga pangitaon ang mga panglantaw nga ilang nakat-onan bahin sa Langitnong Amahan ug kang Jesukristo samtang sila personal nga magtuon sa kasulatan o magtuon sa kasulatan uban ang ilang pamilya. Dapita sila sa pagsulod sa klase nga andam ipakigbahin ang ilang nakat-onan.

Posibleng mga Kalihokan sa Pagkat-on

Ang Katuyoan sa mga Kasulatan

Ikonsiderar ang pagdrowing og target diha sa pisara.

Dapita ang usa o duha ka estudyante nga molabay og humok nga butang diha sa target. Human niini nga mga pagsulay, papasa ang target. Kon gusto nimo, pwede nimong hangyoon ang usa ka estudyante nga sulayan og igo ang target bisag wala na kini sa pisara. (Moresulta kini og kalibog.) Pwede kang mangutana kon unsay ilang gibati bahin sa kalihokan dihang wala na silay target.

• Nganong maayo nga adunay target o katuyoan ang usa ka kalihokan?

• Unsa ang target o katuyoan sa pagtuon sa kasulatan?

Pwedeng ipakigbahin sa mga estudyante ang lain-laing tubag. Kon gusto ka, pwede nimong idrowing pag-usab ang target ug isulat ang pipila sa mga tubag nga gipakigbahin sa mga estudyante bahin sa katuyoan sa pagtuon sa kasulatan diha sa sulod sa target o tupad niini.

Ipasabot nga ang pagsabot sa katuyoan sa mga kasulatan makatabang diha sa atong pagtuon niini.

Basaha ang mosunod nga pamahayag gikan kang Elder D. Todd Christofferson sa Korum sa Napulog Duha ka Apostoles, nga pangitaon ang pangunang katuyoan sa mga kasulatan.

Sa kataposan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila “sa bugtong tinuod nga Dios, ug kang Jesukristo, nga [Iyang] pinadala” (Juan 17:3). (“Ang Panalangin sa Kasulatan,” Liahona, Mayo 2010, 34)

• Unsaon nimo pag-summarize ang katuyoan sa mga kasulatan?

  Isulat ang mosunod nga kamatuoran diha sa pisara: Ang pangunang katuyoan sa kasulatan mao ang pagpalambo sa atong hugot nga pagtuo sa Langitnong Amahan ug kang Jesukristo. Pwede kang magdrowing og arrow gikan niini nga kamatuoran paingon sa tunga sa target.

• Sa unsang paagi ang pagkahibalo niini nga katuyoan makaimpluwensiya sa atong paagi sa pagtuon sa mga kasulatan?

• Nganong importante ang padayong pagpaningkamot sa pagpalambo og hugot nga pagtuo sa Langitnong Amahan ug ni Jesukristo?

Pamalandongi kon unsay imong gitutokan samtang nagtuon ka sa mga kasulatan. Para nimo, unsa ka kamaayo sa pagtutok sa pagpalambo sa imong hugot nga pagtuo sa Langitnong Amahan ug kang Jesukristo samtang nagtuon ka sa mga kasulatan?

Samtang nagkat-on ka sa mga kahanas sa pagtuon sa kasulatan niini nga leksiyon, tinguhaa ang tabang sa Espiritu Santo aron mailhan kon unsaon paggamit kini nga mga kahanas sa pagpalambo sa imong hugot nga pagtuo sa Langitnong Amahan ug kang Jesukristo.

Hisgotan niini nga leksiyon ang duha ka kahanas sa pagtuon sa kasulatan nga makatabang sa mga estudyante nga magpunting sa Manluluwas. Mapuslanon tingali ang pagpasabot nga kay hingpit nga nahiusa ang Langitnong Amahan ug si Jesukristo, samtang nagkat-on ta bahin sa Manluluwas, magamit pod ang maong mga hiyas ngadto sa Amahan (tan-awa ang Juan 6:38; 10:30; 14:7–9). Ang mga kahanas niini nga leksiyon motabang nato nga magpunting kang Jesukristo. Kini nga pagpunting motabang usab nato nga makakat-on bahin sa Langitnong Amahan.

Para sa matag kahanas, imong hatagan og kahulogan ang kahanas, ipakita kini, ug dayon hatagi og kahigayonan ang mga estudyante sa pagpraktis niini.

Kahanas: Pagpangita og mga simbolo sa Manluluwas ug pagpamalandong sa kahulogan niini

Kahulogan

Ang mga kasulatan puno og mga simbolo sa Manluluwas. Ang simbolo sa Manluluwas maoy usa ka butang o aytem nga mopahinumdom nato sa tahas sa Manluluwas sa atong kinabuhi. Para niini nga kahanas, himoa ang mosunod:

Ikonsiderar ang pagsulat sa mosunod nga mga lakang diha sa pisara:

1. Pangitaa ang mga simbolo nga magpahinumdom nimo sa Manluluwas.

2. Pangutan-a ang inyong kaugalingon sa mosunod nga mga pangutana:

   • Sa unsang paagi ang Manluluwas parehas niini nga simbolo?

   • Sa unsang paagi ang pagtandi sa Manluluwas niini nga simbolo motabang nako nga masabtan kon sa unsang paagi makatabang sa akong kinabuhi ang Manluluwas?

Ipakita

Ipakita kini nga kahanas pinaagi sa paghimo niini uban ang tibuok klase. Ang paghimo niini makatabang sa mga estudyante nga masabtan kon unsa kini ug kon unsaon kini paghimo.

Pinaagi ni propeta Jeremias, gigamit sa Ginoo ang usa ka gamhanang simbolo aron tudloan kita bahin Kaniya. Basaha ang Jeremias 2:13; 17:13, nga pangitaon ang usa ka simbolo sa Manluluwas.

• Sa unsang paagi ang Manluluwas parehas niini nga simbolo? (usa ka tinubdan sa buhi nga tubig)

  Kon naglisod sa pagtubag ang mga estudyante, pwede nimong ipangutana ang usa sa mosunod:

  • Unsa ang pipila ka paagi sa paggamit sa tubig? (Makatagbaw sa kauhaw, aron tabangan kitang mabuhi, panghinlo, ug makapresko og balik.) Sa unsang paagi ang Manluluwas parehas sa tubig niining mga paagiha?

  • Sa unsang paagi ang Manluluwas parehas ka importante sa tubig? Nganong kinahanglan nato Siya sama sa kanunay kita nga nagkinahanglan sa tubig?

  • Nganong gitandi sa Ginoo ang iyang kaugalingon sa tinubdan sa tubig imbes sa lim-aw o uban pang tinubdan?

  • Sa unsang paagi ang pagtandi sa Manluluwas niini nga simbolo motabang nimo nga masabtan kon sa unsang paagi Siya makatabang sa imong kinabuhi?

Pagpraktis

Hatagi og kahigayonan ang mga estudyante sa pagpraktis niini nga kahanas sa ilang kaugalingon o uban ang gagmayng grupo kon para nimo makabenepisyo sila niini. Pwede nimong papilion ang mga estudyante og usa sa mga kasulatan sa ubos o sa uban pang kasulatan nga imo tingaling ihatag.

Basaha ang usa sa mosunod nga mga kasulatan. Pangita og simbolo sa Manluluwas ug isukna sa imong kaugalingon ang duha sa mga pangutana diha sa pisara.

2 Samuel 22:2–4

Isaias 25:4 (Timan-i: Ang pulong thou nagtumong sa Ginoo.)

Malaquias 3:2–3

Dapita ang pipila ka mga estudyante sa pagpakigbahin sa ilang nakaplagan. Pangita og mga paagi aron pasalamatan ug pagkomplemento sa ilang paningkamot. Kon naglisod ang mga estudyante, pasaligi sila nga OK ra na; nagkinhanglan nga praktisan kini nga mga kahanas.

Kahanas: Pagpangita kon unsay atong makat-onan bahin sa Manluluwas gikan sa Iyang mga aksiyon ug mga pulong

Kahulogan

Makapunting pod tkia sa Manluluwas samtang magtuon kita sa mga kasulatan pinaagi sa pagpangita sa Iyang mga aksiyon ug mga pulong diha sa kasulatan. Atong mapamalandongan ang atong makat-onan bahin Kaniya gikan sa Iyang mga aksiyon ug mga pulong, ug kon sa unsang paagi ang atong makat-onan bahin Kaniya makatabang sa atong kinabuhi.

Pwede nimong ipakita ang mosunod nga mga lakang diha sa pisara aron masundan sa mga estudyante.

1. Pangitaa ang mga pulong ug aksiyon sa Manluluwas.

2. Pangutan-a ang inyong kaugalingon sa mosunod nga mga pangutana:

   • Unsay gitudlo kanako niini nga mga pulong o mga aksiyon bahin sa Manluluwas?

   • Sa unsang paagi kini nga mga pulong o mga aksiyon motabang nako nga makasabot kon sa unsang paagi makatabang sa akong kinabuhi ang Manluluwas?

Ipakita

Makakat-on kita bahin sa Manluluwas pinaagi sa pagtuon sa istorya ni Sadrac, Mesac, ug Abednego. Kining tulo ka matarong nga tawo gitambog ngadto sa nagkalayong hudno kay midumili sila sa pagsimba sa bulawang estatuwa nga gihimo ni hari Nabucodonosor (tan-awa ang Daniel 3:13–22).

Ikonsiderar ang pagpasabot sa mga estudyante nga usahay kinahanglan nilang basahon pag-ayo, nga pangitaon kon unsay giingon o gihimo sa Ginoo. Ang mosunod nga mga bersikulo mao ang mga ehemplo.

Basaha ang Daniel 3:23–25, nga pangitaon kon unsay gihimo sa Manluluwas niini nga mga bersikulo.

Ikonsiderar ang pagpakita sa hulagway nga “Si Sadrac, Mesac, ug Abednego diha sa nagkalayong hudno.”

Kon kinahanglan, pwede nimong ipasabot nga mitindog uban ni Sadrac, Mesac, ug Abednego ang Manluluwas o ang langitnong mensahero nga Iyang gipadala.

• Unsay gitudlo niini nga aksiyon kanimo bahin sa Manluluwas?

• Sa unsang paagi kini nga aksiyon motabang nako nga masabtan kon sa unsang paagi makatabang sa akong kinabuhi ang Manluluwas?

Gikan niini nga kasinatian makat-onan nato nga suportahan kita sa Ginoo sa atong mga pagsulay (tan-awa sab ang Alma 36:3, 27; Doktrina ug mga Pakigsaad 3:8; 24:8).

Pagpraktis

Aron praktison kini nga kahanas, basaha ang usa sa mosunod nga hut-ong sa mga bersikulo, nga pangitaon kon unsay giingon o gihimo sa Ginoo, dayon suknaa ang imong kaugalingon sa duha ka pangutana nga kauban niini nga kahanas.

Exodo 14:21–22, 30. Ang mga anak ni Israel naipit tali sa Ehiptohanong kasundalohan ug sa Pulang Dagat.

1 Samuel 16:6–7. Gisulayan ni Samuel pag-ila ang sunod nga hari sa Israel.

Isaias 1:16–18. Nakasala ang katawhan ni Israel.

Isaias 53:3–5. panagna bahin sa Pag-ula sa Manluluwas.

Dapita ang pipila ka mga estudyante sa pagpakigbahin sa ilang nakaplagan. Kon mapuslanon, pangutana: “Sa unsang paagi ang pagkasayod niini nga hiyas sa Manluluwas motabang nimo sa pagpakita og hugot nga pagtuo Kaniya?”

Panapos

• Sa unsang paagi kini nga mga kahanas motabang tingali nimo sa imong pagtuon sa kasulatan?

Taposa pinaagi sa pagpakigbahin sa kaugalingon nimong mga hunahuna bahin sa Manluluwas ug niini nga mga kahanas. Dapita ang mga estudyante nga mangita og mga paagi sa paggamit niini nga mga kahanas sa ilang pagtuon sa kasulatan. Pananglitan, pwede silang magbaton og journal sa pagtuon para sa ilang nakat-onan bahin sa Langitnong Amahan ug kang Jesukristo.

Dugang nga mga Kapanguhaan

Sa unsang paagi ang pagpunting sa ehemplo sa Manluluwas motabang nato sa atong inadlawng pagkinabuhi?

Si Chad H. Webb, kanhi nga tigdumala sa Seminaries and Institutes of Religion, mitudlo sa mga magtutudlo sa seminary ug institute:

[Si Jesus] ang hingpit nga ehemplo, ang representasyon ug pagpahayag sa tanan nga mga baroganan sa ebanghelyo…. Ang pagtutok sa Iyang hingpit nga ehemplo nagdapit usab sa Espiritu Santo sa pagpamatuod kabahin Niya.…

Usa ka estudyante bag-o lang nga gipangutana [kon sa unsang paagi ang Manluluwas maoy usa ka] ehemplo sa kalumo. Ang iyang mga hunahuna ug mga pagbati misangput ngadto sa malumong paagi nga ang Manluluwas kanunay nga mitratar kaniya. Kini nga kasinatian, diha sa klasehanan, nakamugna diha kaniya og lawom nga tinguha nga mahimong mas Kristohanon ug mas malumo ngadto sa mga tawo nga nagdepende kaniya, sama nga nagdepende siya sa Ginoo. (“Kami Naghisgot kang Kristo, Kami Nalipay diha kang Kristo,” [pakigpulong nga gihatag sa tinuig nga sibya sa pagbansay sa Seminaries and Institutes of Religion, Hunyo 12, 2018])

Dugang nga mga Kalihokan sa Pagkat-on

Kahanas: Pagpangita sa mga ngalan ug mga titulo ni Jesukristo

Kon makatabang, ikonsiderar ang paggamit sa mosunod ingon nga dugang kahanas sa pagtuon sa kasulatan.

Hatagi og kahulogan ang kahanas: Ang lain pang mapuslanong kahanas sa pagtuon sa kasulatan mao ang pagkat-on bahin sa Manluluwas gikan sa Iyang mga ngalan ug mga titulo.

Ipakita ang kahanas: Basaha ang Isaias 40:28 (o uban pang bersikulo nga imong gipili), nga pangitaon ang usa o kapin pang ngalan o titulo ni Jesukristo.

• Unsay atong makat-onan mahitungod ni Jesus gikan niini nga lahilahi nga mga ngalan o mga titulo?

• Unsa nga titulo ang labing makahuloganon para nimo? Sa unsang paagi ang pagsabot sa titulo motabang nimo sa imong kinabuhi?

Pananglitan, dihang masabtan nato nga ang Manluluwas mao ang Tiglalang, mopalambo kini sa atong hugot nga pagtuo nga kaya Niyang atimanon ug tabangan ang tanan Niyang linalang, lakip na kita. Makadangop usab kita Niya para sa tabang samtang maningkamot kita nga mahimong mamugnaon.

Pagpraktis: Basaha ang pipila o tanan sa mosunod nga mga tudling sa kasulatan ug isulat sa imong journal sa pagtuon ang bisan unsang ngalan o titulo nga imong makaplagan. Pamalandongi kon unsay imong makat-onan bahin ni Jesus gikan sa ngalan o titulo ug sa unsang paagi Siya makatabang sa imong kinabuhi: Job 19:25; Job 32:8; Isaias 7:14; 9:6. Para sa tabang aron masabtan ang ngalan o titulo, ikonsiderar ang pagtan-aw sa mga footnote o pagpangita niini sa mga kapanguhaan nga sama sa Giya ngadto sa mga Kasulatan o sa Bible Dictionary.

Mga pagtandi

Kon makatabang, pwede nimong ipasabot nga mogamit pod ang Ginoo og mga pagtandi aron tudloan ta bahin Kaniya. Parehas kini sa mga simbolo. Dapita ang mga estudyante nga basahon ang Isaias 54:5, nga pangitaon sa mga estudyante ang sumpay sa: “Kay ang imong Magbubuhat mao ang imong .” Pahibaloa ang mga estudyante nga sa tibuok Daang Tugon, gitandi sa Ginoo sa kaminyoon ang Iyang relasyon niadtong nakigsaad.

• Sa unsang paagi ang relasyon sa Ginoo kanato nahisama sa kaminyoon?

Kon maglisod og tubag ang mga estudyante, pwede kang mangutana:

• Nganong ang pakigsaad sa kaminyoon lahi kay sa ubang relasyon?

• Unsaon nimo paghulagway ang gugma ug dedikasyon sa usa ka kapikas ngadto sa iyang kapikas—bisan kon dili perpekto ang ilang kapikas? Unsa ang nagsimbolo sa pasalig ug gugma sa Ginoo nganhi kanato? (Tan-awa ang Mga Taga-Efeso 5:25.)

• Sa unsang paagi ang pagsabot sa pakigsaad nga gugma sa Ginoo kanato motabang nato sa pagpakita og hugot nga pagtuo Kaniya?