Mga Kahanas sa Pagtuon sa Kasulatan: Leksiyon 167

Pagkaplag og mga Kamatuoran sa Ebanghelyo diha sa mga Kasulatan

Pagkat-on sa Pag-ila sa Doktrina ug mga Baroganan

Mahimong mas gamhanan ang pagtuon sa kasulatan kon aktibo kita nga mangita og mga kamatuoran sa ebanghelyo nga makapaduol nato sa Langitnong Amahan ug ni Jesukristo. Kini nga leksiyon motabang sa mga estudyante nga madugangan ang ilang abilidad sa pagpangita sa mga kamatuoran sa ebanghelyo diha sa mga kasulatan nga makatabang nila nga mas mapaduolsa Ginoo.

Pagpangandam sa estudyante: Dapita ang mga estudyante nga markahan o irekord sa ilang mga kasulatan ang usa ka butang nga ilang nakat-onan gikan sa ilang personal nga pagtuon sa kasulatan. Dayon pwede nilang hangyoon ang usa ka higala o sakop sa pamilya nga basahon ang mao ra nga tudling sa kasulatan, ipakigbahin ang ilang nakat-onan gikan niini, ug itandi ang mga panabot.

Posibleng mga Kalihokan sa Pagkat-on

Gipreserbar sa mga kasulatan ang mga kamatuoran sa ebanghelyo

Aron tabangan ang mga estudyante nga masabtan ang bili sa pagpangita og mga kamatuoran sa ebanghelyo diha sa mga kasulatan, makatabang tingali ang mosunod nga pagtandi sa paghatag og mapuslanong mga panabot kon sa unsang paagi gipreserbar sa mga istorya sa kasulatan ang mga kamatuoran sa ebanghelyo. Ikonsiderar ang pagdala og usa ka klase nga saging (o laing prutas nga naay panit) nga dili sagad kaonon diha sa inyong kultura. Hangyoa ang usa ka boluntaryo nga kaonon ang prutas. Human kini mapaniti sa estudyante ug makapaak og kausa, moaksiyon nga nakurat ka kon nganong wala niya kan-a og apil ang panit. Dayon ipangutana ang mosunod.

(Kon walay prutas, pwede nimong ipahaom kini nga seksiyon sa paghimo og samang panaghisgot pinaagi sa pagpakitag hulagway sa prutas o pagdrowing diha sa pisara.)

• Nganong importante gihapon ang panit sa saging bisag dili nato kini apilon og kaon?

  Pwede nimong tabangan ang mga estudyante nga masabtan nga ang panit moprotektar, mopreserbar, ug motabang aron magpabiling hinlo ang bahin sa prutas na atong kaonon.

  Dayon dapita ang mga estudyante sa pagpakigbahin sa ilang mga panabot mahitungod sa mosunod ngadto sa klase o sa usa ka kapares.

• Kon atong itandi ang mga istorya sa kasulatan ngadto sa panit sa saging, unsay girepresentahan sa bahin sa saging nga atong kaonon? (Sa laing pagkasulti, unsay giprotektahan, gipreserbar, ug gipabiling lunsay sa mga istorya para nato?)

Kon kinahanglan, ipasabot nga aron makakat-on og dugang gikan sa mga kasulatan, kinahanglang dili lang kutob sa mga istorya ang atong tan-awon aron madiskobrehan ang mga kamatuoran nga gusto sa Dios nga atong makat-onan. Ang mga istorya mismo ang mahimong sama sa panit nga naggunit ug nagpreserbar sa mga kamatuoran sa ebanghelyo nga maoy motabang nato nga mailhan ug mosunod kang Kristo.

Ipakigbahin ang mosunod nga pamahayag ug dapita ang mga estudyante nga pangitaon kon nganong importante ang pagpangita sa mga kamatuoran sa ebanghelyo samtang kita magtuon.

Si Elder David A. Bednar sa Korum sa Napulog Duha ka Apostoles mitudlo:

Nasayod ko nga ang doktrina ug mga baroganan sa ebanghelyo ni Jesukristo mao ang mga tinubdan nga pundasyon sa giya alang sa atong kinabuhi ug sa malungtarong kalipay sa pagkamortal ug sa kahangtoran. … Malipayon ko nga mosaksi nga ang atong buhi nga Manluluwas mao ang tinubdan kon asa nagagikan kining mga kamatuoran. (“Ang mga Baruganan sa Akong Ebanghelyo,” Liahona, Mayo 2021, 126)

• Unsaon nimo pag-summarize ang imong nakat-onan gikan ni Elder Bednar?

Pwede nimong tabangan ang mga estudyante nga mailhan ang kamatuoran gikan sa pamahayag ni Elder Bednar sama niini: Ang mga doktrina ug mga baroganan naggikan kang Jesukristo ug mao kini ang mga tinubdan sa direksiyon ug mahangtorong kalipay.

(Timan-i: Dili hisgotan niini nga leksiyon ang kalainan sa doktrina ug mga baroganan. Para sa mga katuyoan niini nga leksiyon, parehas nga hisgotan ang doktrina ug mga baroganan gamit ang mas malukpanong termino nga “mga kamatuoran sa ebanghelyo.” Adunay mga pamahayag diha sa Dugang nga mga Kapanguhaan niini nga leksiyon nga magamit nimo kon para nimo makatabang kini sa imong mga estudyante nga mailhan ang kalainan sa doktrina ug mga baroganan.)

Aron tabangan ang mga estudyante nga masusi ang ilang katakos sa pagpangita sa mga kamatuoran sa ebanghelyo diha sa mga kasulatan, pwede nimo silang dapiton nga hilom nga mamalandong sa mosunod nga mga pamahayag.

Gradohi gamit ang sukdanan nga 1–5 kon unsa ka tinuod ang mosunod nga mga pamahayag alang nimo. (1 = talagsa ra kaayo nga tinuod; 5 = halos perming tinuod)

• Ako masaligon sa akong abilidad sa pagpangita og mga kamatuoran sa ebanghelyo diha sa mga kasulatan.

• Regular kong nangita og mga kamatuoran diha sa mga kasulatan nga makapaduol nako sa Langitnong Amahan ug ni Jesukristo.

Dasiga ang mga estudyante nga tinguhaon ang Espiritu Santo aron tabangan sila nga mas mailhan ang mga kamatuoran sa mga kasulatan nga gipreserbar sa Langitnong Amahan para nato.

Para sa mosunod nga mga kalihokan, pwede nimong himoon og una ang “Hatagi og Kahulogan” ug “Modelo” nga mga bahin sa kahanas ug dayon dapita ang mga estudyante nga magdungan sa pagpraktis sa duha ka kahanas. Pwede nimong gamiton ang mga ideya sa kasulatan nga gilista diha sa “Pagpraktis” nga mga bahin sa kahanas.

Kahanas: Ilha ang mga kamatuoran nga klarong gipahayag

Hatagi og kahulogan

Ang usa ka klase sa kamatuoran sa ebanghelyo nga imong madiskobrehan sa imong pagtuon mao ang kamatuoran nga klarong gipahayag. Ang maong mga kamatuoran gipahayag gamit ang simpleng mga kapahayag o hugpong sa mga pulong diha sa kasulatan.

Modelo

Ipakita sa mga estudyante ang ehemplo sa kamatuoran nga klarong gipahayag pinaagi sa pagbasa sa mosunod nga kasulatan o usa sa imong paboritong mga bersikulo nga adunay kamatuoran nga klarong gipahayag.

Basaha ang Mga Panultihon 3:5–6, nga pangitaon ug markahan ang kamatuoran nga klarong gipahayag.

• Unsay imong gimarkahan?

  Mailhan tingali sa mga estudyante ang kamatuoran nga sama sa “Salig sa Ginoo sa bug-os mong kasingkasing … ug Iyang tultolan ang imong mga dalan.”

• Nganong importante para nimo ang kamatuoran nga imong gimarkahan?

Pagpraktis

Usa ka paagi nga makapraktis ang mga estudyante mao ang pagdapit nila sa pag-abli sa Mga Tudling sa Kasulatan sa Doktrinal nga Kahanas ug Importanteng Hugpong sa mga Pulong sa Kasulatan diha sa Mahinungdanon nga Dokumento sa Doktrinal nga Kahanas (2023). Dayon pwedeng ablihan sa mga estudyante ang pipila ka bersikulo nga pangitaon ang mga kamatuoran nga klarong gipahayag.

Human ang igong panahon aron makompleto sa mga estudyante ang kalihokan, pwede silang moadto sa usa ka kapares o gamayng grupo ug ipakigbahin ang (mga) kamatuoran nga ilang nailhan.

Kahanas: Ilha ang wala gipahayag sa dayag nga mga kamatuoran

Hatagi og kahulogan

Ang lain pang klase sa kamatuoran sa ebanghelyo nga imong madiskobrehan sa imong pagtuon mao ang wala gipahayag sa dayag nga mga kamatuoran. Kini nga mga kamatuoran wala gipahayag sa dayag sa dagkong mga tudling o istorya mao nga kinahanglan natong pamalandongan kon unsay gusto sa Langitnong Amahan nga atong makat-onan gikan niini. Makaplagan nato kini nga mga kamatuoran pinaagi sa pagpangutana sama sa mosunod.

Pwede nimong ipakita o ilista diha sa pisara kining mga pangutanaha.

• Aduna bay importanteng mga ideya, hugpong sa mga pulong o mga simbolo nga nagtudlo nimo og usa ka butang bahin sa Langitnong Amahan o ni Jesukristo?

• Aduna bay mga hinungdan ug epekto (kon/sa ato pa) nga mga relasyon niini nga istorya?

• Sa imong hunahuna nganong gidasig sa Dios ang tigsulat nga iapil kini nga mga hitabo o mga tudling?

Modelo

Ikonsiderar ang pagdapit og usa ka boluntaryo nga basahon og kusog ngadto sa klase ang Mga Numero 21:5–9. Mao kini ang asoy sa pagtulun-an ug pag-ayo sa Dios sa mga Israelita nga napaakan og malala nga mga bitin. Samtang naminaw sila, dasiga ang mga estudyante nga pangitaon ang wala gipahayag sa dayag nga mga kamatuoran diha sa asoy pinaagi sa pagsukna sa ilang kaugalingon sa mga pangutana nga gilista sa ibabaw.

Human sa pagbasa, hangyoa ang mga boluntaryo sa pagpakigbahin sa bisan unsang wala gipahayag sa dayag nga mga kamatuoran nga ilang nakaplagan. Pwede nimong awhagon ang mga estudyante nga magsulat og kamatuoran tupad niini nga mga bersikulo diha sa ilang mga kasulatan.

Apil sa posibleng wala gipahayag sa dayag nga mga kamatuoran niini nga asoy naglakip sa:

• Ang pagsulti batok sa Dios ug sa Iyang mga propeta sa kataposan moresulta sa kasub-anan.

• Ang propeta nagtudlo kanato ngadto ni Jesukristo.

• Maluluy-on ang Dios ug naghimog paagi alang kanato aron mamaayo.

Pwede nimong hisgotan nga gigamit ni Jesukristo kini nga asoy aron itudlo nga kadtong nagtuo ug nagsunod Kaniya makabaton og kinabuhing dayon (Juan 3:14–16).

Pagpraktis

Sa pagsugod niini nga kalihokan, ikonsiderar ang pagdrowing diha sa pisara og saging nga wala nahurot og panit.

Ikonsiderar ang pagpakita sa mosunod nga mga instruksiyon ug mga pakisayran sa kasulatan ug dapiton ang mga estudyante nga kompletohon ang kalihokan nga magtinagsa o uban ang usa ka pares. Samtang magtuon sila, dapita ang mga estudyante nga moduol sa pisara matag higayon nga aduna silay mailhan nga kamatuoran ug isulat kini tupad sa saging.

Pagpili og usa sa mga asoy sa kasulatan sa ubos aron tun-an, o lain pang asoy nga imong napili.

1. Samtang magbasa ka, markahi ang bisan unsang kamatuoran nga klarong gihisgotan diha sa mga kasulatan.

2. Dihang mahuman na ka sa pagbasa, irekord gamit ang kaugalingon nimong mga pulong, bisag usa ka wala gipahayag sa dayag nga kamatuoran nga imong nakat-onan gikan diha sa asoy.

3. Pamalandongi kon nganong importante para nimo ang mga kamatuoran nga imong nakaplagan ug kon unsa kahay gusto sa Langitnong Amahan nga paagi sa paggamit nimo niini.

1 Samuel 17:44–49 (giatubang ni David ang higanteng, si Goliat)

2 Mga Hari 6:14–18 (gipalibotan sa kasundalohan sa Siria ang lungsod aron dakpon si Eliseo)

Mga Maghuhukom 6:11–16 (panawagan ni Gideon aron luwason ang iyang katawhan gikan sa kasundalohon nga gustong mosakop nila)

Kon mahuman na ang mga estudyante, dapita sila sa paghisgot og mga kamatuoran nga makahuloganon para nila nga gisulat sa ubang estudyante diha sa pisara. Pwedeng ipakigbahin sa mga estudyante kon nganong importante para nila ang kamatuoran ug kon unsaon nila paggamit niana nga kamatuoran diha sa ilang kinabuhi. Pwede usab kang mangutana konaduna bay nakasinati nila nga natabangan nila sa pag-ila nga tinuod ang usa ka butang nga anaa sa pisara.

Panapos

Ikonsiderar ang pagpahinumdom sa mga estudyante bahin sa tumong sa personal nga pagtuon sa kasulatan nga ilang gihimo niini nga semester. Kon wala pa sila makatakda og tumong, awhaga sila pagbuhat niini.

Dapita ang mga estudyante nga hunahunaon kanunay ang ilang tumong samtang ilang tubagon ang mosunod nga mga pangutana diha sa ilang journal sa pagtuon. Dapita sila nga mahimong andam sa pagpahaom sa ilang tumong kon para nila kinahanglan nila kining himoon.

• Unsang mga kahanas ang mipatigbabaw nimo nga makatabang tingali sa imong personal nga pagtuon sa kasulatan o pagtuon sa kasulatan uban ang pamilya?

• Sa unsang paagi makatabang ang pagpangita ug pagpamalandong sa mga kamatuoran sa ebanghelyo diha sa imong pagtuon sa kasulatan aron mas maduol ka sa Manluluwas?

Ikonsiderar ang pagdapit og usa o sobra pa nga estudyante kada adlaw para sa sunod nga mga leksiyon aron ipakigbahin ang usa ka kamatuoran nga ilang nakaplagan diha sa ilang personal nga pagtuon sa kasulatan o pagtuon sa kasulatan uban ang pamilya. Pangita og laing mga kahigayonan sa umaabot nga mga leksiyon aron makapadayon ang mga estudyante sa pagpraktis niining importante nga kahanas.

Dugang nga mga Kapanguhaan

Sa unsang paagi makatabang nato ang pagtuon sa mga kasulatan aron makadawat og pagpadayag gikan sa Langitnong Amahan?

Si Elder D. Todd Christofferson sa Korum sa Napulog Duha ka Apostoles mipasabot:

Tungod kay kini nagpasabot sa doktrina ni Kristo, ang mga kasulatan giubanan pinaagi sa Balaang Espiritu, kansang tahas mao ang paghatag og saksi sa Amahan ug sa Anak (tan-awa sa 3 Nephi 11:32). Busa, ang pagbasa sa mga kasulatan maoy usa ka paagi nga kita makadawat sa Espiritu Santo. Dayag lang, ang kasulatan gihatag pinaagi sa Espiritu Santo gikan pa sa sinugdanan (tan-awa sa 2 Pedro 1:21; D&P 20:26–27; 68:4), ug ang samang Espiritu makapamatuod sa iyang kamatuoran kanimo ug kanako. Tun-i ang mga kasulatan sa mabinantayon nga paagi, nga may katuyoan. Hinuktoki ug pag-ampo niini. Ang mga kasulatan mga pagpadayag, ug kini modala og dugang pagpadayag. (“Ang Panalangin sa Kasulatan,” Liahona, Mayo 2010, 35)

Unsa ang baroganan sa ebanghelyo?

Si Elder Richard G. Scott (1928–2015) sa Korum sa Napulog Duha ka Apostoles mipasabot:

Ang mga baroganan lig-on nga mga kamatuoran, nga mahimong magamit sa daghang nagkalainlaing mga kahimtang. Ang usa ka tinuod nga baroganan naghimo og klaro nga mga desisyon bisan naa sa labing makalibog ug mapugsanon nga mga kahimtang. (“Acquiring Spiritual Knowledge,” Ensign, Nob. 1993, 86)

Unsa ang doktrina?

Ang Pagtudlo sumala sa Pamaagi sa Manluluwas miingon:

Ang dokrina usa ka mahangtorong kamatuoran—makaplagan diha sa mga kasulatan ug sa mga pulong sa mga propeta sa ulahing mga adlaw—nga nagpakita kanato sa paagi nga mahimong sama sa atong Amahan sa Langit ug mobalik ngadto Kaniya. (Pagtudlo sumala sa Pamaagi sa Manluluwas [2022], 20)

Unsaon nako sa paghimo sa akong pagtuon sa kasulatan nga mas epektibo?

Si Presidente Jeffrey R. Holland sa Korum sa Napulog Duha ka Apostoles mitudlo:

Pamalandongi [ug] susiha ang matag pulong, matag bahandi sa kasulatan. … Hupti kini ngadto sa kahayag, ug ituyok kini, tan-awa pag-ayo kon unsa ang repleksiyon ug mobalda didto. … Ang maong pagsusi mahimong makalot sa usa ka bahandi nga natago sa usa ka uma: usa ka perlas nga labing bililhon; usa ka perlas nga labawng bililhon. (“Students Need Teachers to Guide Them” [pakigpulong ngadto sa Church Educational System satellite broadcast, Hunyo 20, 1992], 4)

Si Presidente Thomas S. Monson (1927–2018) midasig:

Magmahimong pamilyar sa mga leksiyon nga gipangtudlo sa mga kasulatan. … Pagtuon niini sama nga kini nakig-istorya kaninyo, kay kini mao ang kamatuoran. (“Himoa ang Imong Kaugalingon nga Labing Maayo,” Liahona, Mayo 2009, 68)

Si President Mark L. Pace, Kinatibuk-ang Presidente sa Sunday School, miingon:

Aron mas labing epektibo, ang inyong mga kasinatian sa kasulatan kinahanglan nga inyong kaugalingon. Ang pagbasa o pagpaminaw mahitungod sa mga kasinatian sa uban ug mga panglantaw makatabang, apan dili makadala sa susama nga makakabig nga gahom. Walay ikapuli sa panahon nga inyong gigahin diha sa mga kasulatan, nga maminaw sa Espiritu Santo nga mamulong direkta kaninyo. (“Pagkakabig Mao Ang Atong Tumong,” Liahona, Mayo 2022, 111)

Dugang nga mga Kalihokan sa Pagkat-on

Pagpangita og dili kaayo klaro nga mga kamatuoran sa kasulatan

Aron tabangan ang mga estudyante nga masabtan nga makatabang nila ang mas lawom nga pagpangita diha sa kasulatan aron makaplagan ang dili kaayo klaro nga mga kamatuoran, pwede nimong ipakita ang hulagway sa Manluluwas nga parehas sa mosunod. Hangyoa ang mga estudyante nga isulat dayon ang unang butang nga ilang nakat-onan bahin kang Jesukristo base sa hulagway. Dayon hatagi silag dugang usa o duha ka minuto aron mas hunahunaon pag-ayo bahin sa hulagway ug isulat ang dugang mga panabot nga ilang nakat-on gikan niini.

Dapita ang pipila ka estudyante nga ipakigbahin ang orihinal nga kamatuoran nga ilang nakat-onan bahin kang Kristo. Dayon tugoti sila nga ipakigbahin ang dugang mga kamatuoran nga ilang nakaplagan ug kon unsay ilang nakita sa hulagway o nahinumdoman gikan sa asoy nga nakatabang nila nga makat-onan kini nga mga kamatuoran.

Tabangi ang mga estudyante nga makita ang koneksyon nga, sama sa hulagway, ang pipila ka kamatuoran sa kasulatan daling makita, samtang ang uban nagkinahanglan og mas daghang panahon, paghunahuna, ug paningkamot aron makaplagan.

Mga kasinatian sa kabatan-onan sa pag-ila sa mga kamatuoran diha sa mga kasulatan

Diha sa mga seksiyon nga “Modelo” diha sa leksiyon makatabang tingali sa mga estudyante ang pagkadungog og mga kasinatian sa kabatan-onan nga nag-ila og mga kamatuoran diha sa mga kasulatan. Pwede nimong ipasalida ang bidyo nga “Identifying Doctrines and Principles: Students’ Testimonies” (2:39). Human sa bidyo, pwede nimong hangyoon ang mga estudyante nga ipakigbahin ang ilang mga kasinatian dihang ilang nakita ang kamatuoran diha sa kasulatan nga mipanalangin sa ilang kinabuhi.

Lain nga paagi sa pagsugod sa leksiyon

Ipasalida ang bidyo nga “Flecks of Gold” gikan sa time code 0:00 hangtod 2:26. Bahin kini sa usa ka tawo nga nangitag bulawan kinsa nakakat-on sa kaimportante sa pagtigom og gagmayng tipik sa bulawan sulod sa daghang panahon kaysa pagpangita lang sa dili komon, dagkong piraso sa bulawan. Dapita ang mga estudyante sa paghunahuna kon unsay kalabotan niini nga istorya ngadto sa ilang pagtuon sa kasulatan.