Mga Kahanas sa Pagtuon sa Kasulatan: Leksiyon 170

Pagtandi

Paghimo og mga Pagtandi aron Mailhan ang Natagong mga Kamatuoran gikan sa mga Kasulatan

Usa ka anghel ang misulti ni Nephi nga ang mga kasulatan adunay mga kamatuoran nga “yano ug labing bililhon” (1 Nephi 13:26). Apan, lisod usahay ang pag-ila niini nga mga kamatuoran o ang pagbati nga makahuloganon kini. Ang paghimo og mga pagtandi sa lainlaing mga istorya, mga ideya, ug katawhan diha sa kasulatan mao ang usa ka kahanas nga makatabang nato sa pag-ila sa bililhong mga kamatuoran gikan ni Jesukristo ug aron mapanalanginan gikan sa Iyang mga pulong. Kini nga leksiyon makatabang sa mga estudyante nga mohimo og mga pagtandi sa mga kasulatan aron mailhan ang natagong mga kamatuoran.

Pagpangandam sa estudyante: Dapita ang mga estudyante nga tun-an ang Moises 4:1–2, nga pangitaon ang mga kapareha ug kalainan nga ilang makita tali kang Jesukristo ug kang Satanas. Dapita sila nga pamalandongan kon nganong mapuslanon ang paghimo og mga pagtandi diha sa mga kasulatan.

Posibleng mga Kalihokan sa Pagkat-on

Asukar ug asin

Ikonsiderar ang pagdala og asukar ug asin diha sa klase ug patilawa og gamay ang usa o duha ka estudyante sa matag usa niini. Pwede usab kang magpakita og litrato niini, sama sa gipakita sa ubos. Ingon nga alternatibo, pwede usab nimong himoon ang parehas nga kalihokan gamit ang tam-is nga ilimnon, sama sa juice, ug aslom nga sama sa suka.

• Sa unsang paagi magkaparehas ang asin ug asukar? Sa unsang paagi kini managlahi?

• Sa unsang paagi ang pagtandi sa asin ngadto sa asukar makatabang ninyo aron mas masabtan pag-ayo kining duha?

Sa samang paagi, samtang mohimo kita og mga pagtandi diha sa mga kasulatan, mas masabtan ug makadayeg kita sa daghan nga bililhong mga pagtulun-an sa Manluluwas. Mas makita nato kon sa unsang paagi mapanalanginan Niya ang atong kinabuhi kon magkinabuhi kita base niini nga mga pagtulun-an.

Samtang magkat-on kamo bahin niini nga himan sa pagtuon sa kasulatan, mahimong abli sa mga impresyon gikan sa Espiritu Santo nga makatabang ninyo sa pag-ila kon unsaon ninyo paghimo nga mas makahuloganon ang inyong pagtuon sa mga kasulatan.

Kahanas: Paghimo og mga Pagtandi

Aron tabangan ang mga estudyante nga makat-onan kini nga kahanas sa pagtuon sa kasulatan, giorganisar kini nga leksiyon sa mosunod nga mga seksiyon: “Hatagi og kahulogan” (pagpasabot sa kahanas), “Modelo” (paghatag sa mga estudyante og mga pananglitan ug paggiya nila sa paghimo sa kahanas), ug “Pagpraktis“ (paghatag og higayon sa mga estudyante nga praktison ang kahanas).

Hatagi og kahulogan

Basaha o i-summarize ang mosunod.

Ang paghimo og mga pagtandi sa mga kasulatan nagpasabot sa pagbantay sa mga kaparehas ug sa mga kalahian sa mga istorya, mga ideya, o katawhan. Kini nga mga pagtandi makatabang nato sa pag-ila sa natagong mga kamatuoran (mga kamatuoran nga dili tingali nato mabantayan dayon). Pwede natong itandi ang usa lang ka mga bersikulo, mga kapitulo, o ang daghang basahon.

Makatabang ang pagsukna sa kaugalingon sa mosunod nga pangutana aron makahimo og pagtandi panahon sa imong pagtuon sa kasulatan:

Ikonsiderar ang pagpakita sa mosunod nga mga pangutana. Gamiton kini sa mga estudyante sa tibuok leksiyon.

• Sa unsang paagi ang mga istorya, mga ideya, o katawhan niini nga asoy magparehas? Sa unsang paagi kini managlahi?

• Unsay akong makat-onan niini nga pagtandi?

• Sa unsang paagi makatabang nako karon ang akong nakat-onan gikan niini nga pagtandi?

• Sa unsang paagi makatabang nako ang akong nakat-onan nga mas higugmaon o sundon ang Ginoo?

Modelo

Aron maandam ang imong mga estudyante sa pagpraktis niini nga kahanas sa ilang kaugalingon, makatabang ang paggiya una nila gamit ang usa ka asoy sa kasulatan. Ionsiderar ang paghimo niini pinaagi sa paggamit sa asoy sa premortal nga Konseho sa Langit, nga ikonsiderar ang mga aksiyon ni Jesukristo ug ni Satanas. Pwede nimong gamiton ang laing asoy, sama sa usa sa mosunod:

• Ang katawhan sa panahon ni Enoc (Moises 7:17–19) ug ang katawhan sa panahon ni Noe (Moises 8:28–30)

• Ang pagpili ni Abraham ug Lot kon asa nga bahin sa yuta mopuyo (Genesis 13:8–13)

Ikonsiderar ang pagpakita sa hulagway sa ubos ug sa pagdapit sa mga estudyante nga ipakigbahin ang ilang nahibaloan bahin sa hitabo.

Sa premortal nga Konseho sa Langit, gipresentar sa Langitnong Amahan ang Iyang plano sa kaluwasan sa Iyang mga anak. Ang Iyang plano nagkinahanglan og manluluwas.

Ikonsiderar ang pagbase sa upat ka pangutana nga gipakita ganina ug dapita ang mag estudyante nga irekord ang ilang mga tubag diha sa journal sa pagtuon samtang ilang basahon ang mosunod nga mga bersikulo.

Basaha ang Moises 4:1–2, nga mangita kon giunsa pagtubag ni Jesukristo ug ni Satanas ngadto sa Dios.

Dapita ang mga estudyante sa pagpakigbahin sa ilang mga tubag sa kada pangutana.

Samtang ipakigbahin sa mga estudyante ang ilang nakat-onan gikan sa pagtandi sa Manluluwas ug kang Satanas, ila tingaling ipakigbahin ang mga kamatuoran nga sama sa mosunod:

• Mapaubsanong gitinguha ni Jesukristo ang pagbuhat sa kabubut-on sa Langitnong Amahan. Hakogong gitinguha ni Satanas ang kaugalingon niyang dungog ug himaya.

• Sukad sa sinugdan, gipili sa Langitnong Amahan si Jesus aron mahimong Manluluwas sa kalibotan. Mirebelde si Satanas sa Langitnong Amahan ug ni Jesukristo.

Pagpraktis

Pwedeng kompletohon sa mga estudyante kini nga kalihokan sa pagpraktis nga indibidwal, managpares, o sa ginagmayng grupo.

Apil sa “Dugang nga mga Kalihokan sa Pagkat-on” niini nga leksiyon ang dugang nga mga kapilian.

Pagpili og usa sa mga kapilian sa pagtuon sa ubos. Gamita ang gipakita nga mga pag-aghat aron tabangan kamo sa pagtandi ug pag-ila sa makahuloganong mga kamatuoran.

Mga kapilian sa pagtuon:

1. Ang report sa 12 ka espiya. Nagpadala si Moises og 12 ka espiya aron susihon ang yuta sa Canaan aron makita kon unsang klase ang yuta ug ang mga tawo didto (tan-awa ang Mga Numero 13:17–20). Pagbalik nila, lahi ang gihatag nga report sa 10 ka espiya kay sa nila ni Caleb ug ni Josue (laing duha pa ka espiya). Basaha ang Mga Numero 13:26–33; 14:6–9, nga itandi ang managlahing report.

2. Ang pagmando ni Hari Solomon. Si Harig Solomon ang mipuli sa paghari human mamatay ang iyang amahan, nga si David. Paglabay sa panahon nausab ang mga tinguha ni Solomon ug ang mga saad sa Ginoo ngadto kaniya. Basaha ang 1 Mga Hari 3:3, 7–12; 11:4–6, 9–11, nga itandi ang mga tinguha ni Solomon ug ang mga saad sa Ginoo ngadto Kaniya sa sinugdanan ug sa ulahing bahin sa iyang pagmando.

3. Mga magbalantay sa Israel. Pinaagi sa Iyang propeta nga si Ezequiel, gitambagan sa Ginoo ang mga lider sa Israel, nga nagtawag kanila nga “mga magbalantay sa Israel” (Ezequiel 34:2). Basaha ang Ezequiel 34:2–6, 11–16, nga itandi ang mga magbalantay sa Israel ngadto sa Ginoo, ang atong Maayong Magbalantay.

Human makompleto sa mga estudyante ang kalihokan, pwede nilang ipakigbahin ang ilang mga tubag sa gipakita nga mga pangutana ngadto sa laing estudyante, kapares, o grupo nga nagtuon og laing istorya. Dayon dapita ang pipila ka estudyante sa pagpakigbahin ngadto sa klase. Pwede usab nga isulat sa pisara sa mga moboluntaryo ang mga kamatuoran nga ilang nakaplagan ug ipasabot kon nganong makahuloganon kini para nila.

Ang mosunod mao ang mga ehemplo sa mga kamatuoran nga ipakigbahin tingali sa mga estudyante:

1. Lig-onon kita sa Ginoo samtang pilion nato nga lantawon ang atong mga hagit uban ang hugot nga pagtuo imbes magduda.

2. Panalanginan kita sa Ginoo samtang ato Siyang higugmaon labaw pa kay sa atong paghigugma sa mga butang niining kalibotana.

3. Mas mahisama kita sa Ginoo samtang atong tabangan ug atimanon ang uban.

Kon naa pay panahon, pwede nimong dapiton ang mga estudyante nga padayon sa pagpraktis sa pagtandi gamit ang usa ka istorya o seksiyon sa kasulatan nga ilang pilion. Dayon pwede nilang ipakigbahin ang ilang nakat-onan sa paghimo niana nga mga pagtandi.

Panapos

Samtang imnyng tun-an ang mga kasulatan, pangita og mga paagi nga inyong magamit ang kahanas sa pagtandi. Pananglitan, dihang magtuon kamo bahin sa usa ka tawo nga nakahimo og sayop nga desisyon, ikonsiderar ang laing tawo diha sa mga kasulatan nga nakahimo og matarong nga desisyon. Kon nakita nimo nga gisalikway ang usa sa mga propeta sa Ginoo, ikonsiderar kon anaa kay mahinumdoman nga panahon dihang gidawat sa katawhan ang Iyang mga propeta.

Pwede ninyong irekord ang inyong mga makaplagan diha sa inyong mga kasulatan o sa inyong journal sa pagtuon.

• Sa unsang paagi ang inyong nakat-onan karon makaimpluwensiya diha sa inyong personal nga pagtuon sa kasulatan?

Ikonsiderar ang pagtapos pinaagi sa imong pamatuod sa mga kasulatan ug sa mga kamatuoran nga naa niini.

Sa mosunod nga mga leksiyon makatabang tingali ang pag-follow up sa pagpraktis sa mga estudyante niini nga kahanas sa pagtuon sa kasulatan.

Dugang nga mga Kapanguhaan

Unsa pay makatabang nako aron mas makabenepisyo ko sa akong pagtuon sa kasulatan?

Si Elder Richard G. Scott (1928–2015) sa Korum sa Napulog Duha ka Apostoles mipasabot:

Samtang nagtinguha kamo og espirituhanong kahibalo, pangitaa ang mga baroganan. Sa mabinantayong paagi ilahi kini gikan sa detalye nga gigamit sa pagpasabut niini. … Ang usa ka tinuod nga baroganan naghimo og klaro nga mga desisyon bisan naa sa labing makalibog ug mapugsanon nga mga kahimtang. Takos ang bililhong paningkamot sa pag-organisar sa kamatuoran nga atong gitigom ngadto sa yano nga mga pamahayag sa baroganan. Nakasulay ko sa paghimo ana uban ang pagkuhag espirituwal nga kahibalo. (“Acquiring Spiritual Knowledge,” Ensign, Nov. 1993, 86)

Si Elder David A. Bednar sa Korum sa Napulog Duha ka Apostoles mitudlo:

Ang kombinasyon nga moabli sa pultahan sa vault ngadto sa tinago nga mga bahandi sa kasulatan naglakip og dakong matang sa pagtrabaho—nga yano, sa kinaraan, nga kakugi. … Dili kita makalaom nga moani og buhong nga pag-ani sa kasulatan hangtod nga mabayran nato ang kantidad sa regular ug makugihon nga pagtuon. … Ang mga bahandi sa kasulatan nga gitinguha nato sa atong kinabuhi dili pweding mahulaman o mapagamit o second hand nga pagkaangkon. Kinahanglang magkat-on ang matag usa kanatosa pag-abli sa pultahan sa vault pinaagi sa paggamit sa baroganan sa pagpaningkamot. (“Tungod kay Kita Nakakita Nila,” Liahona, Abr. 2006, 20)

Dugang nga mga Kalihokan sa Pagkat-on

Ang ehemplo sa Manluluwas sa pagtandi

Aron hatagan og gibug-aton ang kaimportante sa pagkat-on gikan sa mga pagtandi diha sa pagtuon sa kasulatan, pwede nimong ipasabot nga kanunay gamiton sa Manluluwas ang mga pagtandi diha sa Iyang pagpanudlo. Dapita ang mga estudyante sa pagpakigbahin og mga ehemplo nga ilang mahunahuna nga gihimo ni Niya. Kon kinahanglan sila og tabang, ikonsiderar ang pagpakigbahin sa mosunod nga mga ehemplo:

• Ang biyuda nga naghulog og duha ka diyot ngadto sa panudlanan itandi ngadto sa dato nga naghulog og daghan(tan-awa ang Marcos 12:41–44)

• Ang pari ug Levita gitandi ngadto sa maayong Samarianhon (tan-awa ang Lucas 10:30–37)

• Ang duha ka anak nga lalaki sa sambingay mahitungod sa anak nga nawala (tan-awa ang Lucas 15:11–32)

Dapita ang mga estudyante sa pagpakigbahin sa ilang nakat-onan gikan niini nga mga pagtandi.

Dugang nga mga pagtandi diha sa kasulatan

Kon makabenepisyo ang imong mga estudyante gikan sa lainlaing mga ehemplo diha sa mga seksiyon nga “Modelo” o “Praktisa” niini nga leksiyon, ikonsiderar ang paggamit sa bisan hain sa mosunod nga mga asoy:

• Ang katawhan sa panahon ni Enoc ug sa panahon ni Noe. Basaha ang Moises 7:17–19 ug Moises 8:28–30, nga itandi ang panaghiusa ug mga aksiyon tali niining duha ka katilingban.

• Jacob ug Esau. Basaha ang Genesis 25:27–34, nga itandi ang mga tinguha sa kaluha nga lalaki. (Timan-i: Ang anak nga lalaki nga nakabaton sa katungod sa pagkapanganay maoy makapanunod sa mga katigayonan sa iyang amahan ug mahimong espirituwal nga lider ug tigsangkap sa pamilya.)

• Ang makasasala nga si Hari David ug ang mahinulsolong si Hari David. Basaha ang 2 Samuel 11:2–5, 14–17 ug Salmo 51:1–4, 10–12, nga itandi ang mga kinaiya ug mga tinguha ni David dihang nakasala siya ngadto sa iyang mga tinguha dihang nangayo siyag pasaylo.

Pagtandi sa Basahon ni Mormon

Alang sa ehemplo gikan sa Basahon ni Mormon sa mga pagtandi aron mailhan ang natagong mga kamatuoran, ikonsiderar ang pagdapit sa mga estudyante nga itandi si Nephi ngadto ni Laman ug Lemuel. Kon kinahanglan nila og tabang, pwede nimo silang dapiton nga tun-an ang panglantaw ni Nephi sa ilang panaw diha sa 1 Nephi 17:1–6, ug ang panglantaw ni Laman ug Lemuel sa mao ra nga panaw diha sa 1 Nephi 17:20–21. Dapita ang mga estudyante sa pagpakigbahin sa mga leksiyon nga ilang nakat-onan gikan niini nga pagtandi.

Para sa uban pang mga ehemplo nga nagpakita sa kalainan ni Nephi ug sa iyang mga igsoong si Laman ug Lemuel, ikonsiderar ang pagpakigbahin niini nga pamahayag ni Elder Dale G. Renlund sa Korum sa Napulog Duha ka Apostoles diha sa “Nga Ako Unta Makadala sa Tanan nga mga Tawo ngari Kanako” gikan sa time code 1:58 hangtod 3:52. Pwedeng ilista sa mga estudyante ang mga kalainan nga ilang makita ug dayon hisgotan unsa nga mga kamatuoran ang ilang nakat-onan.