Daniel 1–7: Leksiyon 142

Daniel 1

“Si Daniel Dili Buot nga Hugawan Niya ang Iyang Kaugalingon”

Dihang makaatubang kita og mga sitwasyon nga mosulay sa atong determinasyon nga sundon ang mga sugo sa Ginoo, magpadala ba ta o mobarog nga malig-on? Isip mga sulugoon sa palasyo ni Hari Nabucodonosor, gisugo si Daniel ug ang iyang mga higala nga supakon ang mga balaod sa Ginoo bahin sa panglawas, pero lig-on silang mibarog. Kini nga leksiyon motabang sa mga estudyante nga palig-onon ang ilang pasalig nga tumanon ang Pulong sa Kaalam sa Ginoo.

Pagpangandam sa estudyante: Dapita ang mga estudyante nga tun-an ang kinatibuk-ang pagpasabot sa “Pulong sa Kaalam” diha sa Mga Hilisgotan ug mga Pangutana sa Librarya sa Ebanghelyo. Dapita sila nga hisgotan kon sa unsang paagi napanalanginan sila o ang uban tungod sa pagtuman sa Pulong sa Kaalam.

Posibleng mga Kalihokan sa Pagkat-on

Unsa ang imong buhaton?

Ikonsiderar ang pagsugod sa klase pinaagi sa paghulagway sa usa ka batan-on nga ganahang modawat og mga hagit nga mosuway og bag-ong mga butang, sama sa mosunod nga pananglitan. Pwede nimong ilisan ang ngalan ug ang kalihokan aron mas mohaom sa imong mga estudyante.

Si Mateo usa ka aktibong miyembro sa Ang Simbahan ni Jesukristo sa mga Santos sa Ulahing mga Adlaw. Nailhan siya nga ganahang mosuway og bag-ong mga butang, mao nga sagad siyang hagiton sa iyang mga higala nga himoon ang mosunod:

• Kausa gihagit siya sa usa ka higala nga moapil og marathon. Gidawat ni Mateo ang hagit.

• Kausa gihagit siya sa usa ka higala nga mosalom sa nag-ice nga linaw. Gidawat ni Mateo ang hagit.

• Kausa gihagit siya sa usa ka higala nga magpaila sa iyang kaugalingon ngadto sa bag-ong estudyante nga babaye sa eskwelahan. Gidawat ni Mateo ang hagit.

  Human mabasa ang sunod nga hagit, hunong kadiyot ug ipangutana ang naa sa ubos.

• Usa ka adlaw, gihagit si Mateo sa iyang mga higala nga moinom og makahubog nga ilimnon sa usa ka party.

• Sa imong hunahuna, unsa kahay himoon ni Mateo? Ngano man?

  Pwede nimong pangutan-on ang mga estudyante kon komon ba sa ilang lugar ang presyur nga supakon ang Pulong sa Kaalam. Pwede usab nilang ihulagway ang mga sitwasyon diin mapresyur sila sa pagsupak niini. Ikonsiderar ang pagdasig sa mga estudyante nga tingali misupak niini nga sugo nga hinumdoman nga tabangan sila sa Ginoo samtang moduol sila Kaniya aron maghinulsol. Pasaligi ang mga estudyante nga gimahal sila sa Ginoo ug gidapit sila nga padayong maningkamot.

  Aron susihon ang kaugalingon nilang pasalig nga tumanon ang Pulong sa Kaalam, pwedeng tubagon sa mga estudyante ang mosunod diha sa ilang journal sa pagtuon.

• Sa imong hunahuna, unsay imong himoon sa susamang sitwasyon? Ngano man?

• Sa imong hunahuna, unsa kahay imong himoon kon gitanyagan ka og mas komon nga butang sama sa kape o tsa?

Samtang imong tun-an ang Daniel 1 karon, paminawa ang mga hunahuna ug pagbati nga ihatag tingali kanimo sa Langitnong Amahan pinaagi sa Espiritu Santo. Pangita og mga paagi sa pagpalig-on sa imong pasalig nga tumanon ang Pulong sa Kaalam sa Ginoo.

Gituman ni Daniel ang Ginoo

Sa mga 606 BC, gisulong ni Nabucodonosor, hari sa Babilonia, ang Jerusalem ug gidala ingon nga binihag sa Babilonia ang pipila ka Israelinhon. Gisugo sa hari nga bansayon ang pipila sa Israelinhong kabatan-onan aron moserbisyo sa iyang panimalay. Lakip niining mga batan-on mao ang upat ka mga batan-on nga ginganlan og Daniel, Ananias, Misael, ug Azarias. Sa Babilonia, giilisan ang ilang mga ngalan og Beltesasar, Sadrac, Mesac, ug Abednego (tan-awa sa Daniel 1:1–7).

Samtang basahon sa mga estudyante ang mosunod nga mga bersikulo, ikonsiderar ang paghunong kadiyot human ang bersikulo 10 aron ipangutana ang mga pangutana sa ubos. Sa laing paagi, pwede nimong dapiton ang mga estudyante nga sundan diha sa ilang mga kasulatan samtang imong ipasalida ang bidyo nga “God Gave Them Knowledge” (anaa sa ChurchofJesusChrist.org) gikan sa time code 0:52 hangtod 5:15, nga mohunong kadiyot sa time code 4:18 aron hisgotan ang mga pangutana.

Basaha ang Daniel 1:5, 8–14, nga pangitaon kon unsay gisugo sa hari nga himoon ni Daniel ug sa iyang mga higala.

• Nganong mahagiton kini nga sugo para ni Daniel ug sa iyang mga higala?

• Sa imong hunahuna, nganong ang dili pagkaon ug pag-inom sa piho nga butang makaparisgo sa kasuko sa hari?

Pwede nimong pahinumdoman ang mga estudyante nga sa panahon ni Daniel, gisunod sa mga Israelinhon ang balaod ni Moises, nga naglakip og piho nga mga pagdili sa pagkaon (tan-awa sa Deuteronomio 14).

Mga panalangin sa pagtuman sa Ginoo

Tabangi ang mga estudyante nga madiskobrehan kon giunsa pagpanalangin sa Ginoo si Daniel ug ang iyang mga higala, pwede nimong parespareson ang mga estudyante. Samtang ilang basahon ang mosunod nga mga bersikulo, dapita ang usa ka managpares nga pangitaon kon sa unsang paagi gipanalanginan sa Ginoo si Daniel ug ang iyang mga higala sa pisikal nga paagi, ug dapita ang laing managpares nga pangitaon kon sa unsang paagi gipanalanginan sila sa Ginoo sa espirituhanong paagi. Dayon dapita ang mga managpares nga ipakigbahin ang ilang nakaplagan. Pamarkahi nila sa lahi nga paagi ang pisikal ug espirituwal nga mga panalangin (sama sa pag-highlight gamit ang lainlaing kolor o pagbadlis sa usa ug pag-highlight sa lain).

Basaha ang Daniel 1:15–20, pangitaa kon sa unsang paagi gipanalanginan sa Ginoo si Daniel ug ang iyang mga higala para sa ilang pagkamasulundon.

Dihang maila sa mga estudyante ang mga hiyas ug kinaiya ni Jesukristo, mapadako nila ang ilang tinguha sa pagsalig ug pagtuman Kaniya. Ang usa ka paagi sa pagtabang sa mga estudyante nga mahimo kini mao ang paghimo og makapasiksik nga mga pangutana, sama sa mosunod, aron pamalandongan sa mga estudyante.

(Alang sa dugang nga pagbansay sa paghimo og makapasiksik nga mga pangutana aron tabangan ang mga estudyante nga mailhan ang mga hiyas ug mga kinaiya ni Jesukristo, tan-awa sa “Paghimo og Makapasiksik nga mga Pangutana aron matabangan ang mga estudyante sa pagtino sa mga tahas, mga titulo, mga simbolo, ug mga hiyas ni Jesukristo” diha sa Pagpalambo sa mga Kahanas sa Magtutudlo.)

Basaha sa makausa pa ang mga bersikulo 15–20, pero niining higayona pamalandongi ang imong nakat-onan bahin sa Langitnong Amahan ug ni Jesukristo.

• Unsa ang gitudlo niini nga mga bersikulo kanimo mahitungod sa Dios?

• Sa unsang paagi kini nga pagsabot nakapalig-on sa imong tinguha nga mosalig ug motuman Kaniya?

Pwede nimong ipasabot nga sama sa panahon ni Daniel, gipadayag sa Ginoo ang balaod sa panglawas alang sa Iyang mga anak karon. Nailhan kini nga ang Pulong sa Kaalam (tan-awa sa Doktrina ug mga Pakigsaad 89).

Ang mosunod nga kalihokan motabang sa mga estudyante sa pagtuon sa Pulong sa Kaalam. Ikonsiderar ang paghatag og papel ug mga art supply ingon man sa mga kopya sa Alang sa Kalig-on sa mga Kabatan-onan: Usa ka Giya sa Paghimo og mga Pagpili para sa mga estudyante nga walay akses sa Librarya sa Ebanghelyo. Pwede nimong limitahan ang igahin nga oras para niini nga kalihokan aron naa pay oras para sa kasinatian sa ulahing bahin sa leksiyon.

Hunahunaa nga gihangyo ka sa paghimo og usa ka poster nga naghulagway sa usa ka butang nga talagsaon bahin sa imong relihiyon. Nakadesisyon ka nga maghimo og poster bahin sa Pulong sa Kaalam. Gamita ang pipila o ang tanan sa mosunod nga kapanguhaan aron makadesisyon kon unsa ang iapil:

1. Doktrina ug mga Pakigsaad 89:18–21

2. Daniel 1:15–20

3. “Pulong sa Kaalam” diha sa Giya ngadto sa mga Kasulatan o sa Mga Hilisgotan ug mga Pangutana (Librarya sa Ebanghelyo) o sa “Unsa man kaha ang gitudlo mahitungod sa … ?” nga seksiyon sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022)

4. “Ang Pulong sa Kaalam: Unsa ang Apil, Unsay Dili,” Liahona, Ago. 2019, 26–28

Seguroa nga maglakip ka og pahayag sa kamatuoran bahin sa Pulong sa Kaalam diha sa imong poster. Kini nga kamatuoran pwedeng gikan sa kasinatian ni Daniel o gikan sa ubang mga tinubdan.

Dapita ang mga estudyante nga ipakigbahin ang ilang mga poster ug mga pahayag sa kamatuoran ngadto sa klase. Apil sa mga kamatuoran nga ila tingaling ipakigbahin, ipasabot og maayo ang mosunod: Samtang atong sundon ang sugo sa Ginoo aron matuman ang Pulong sa Kaalam, panalanginan ta Niya sa pisikal ug sa espirituwal nga paagi.

(Pahinumdom: Sa Leksiyon 160: “Sukda ang Imong Nakat-onan 10,” tan-awon pag-usab sa mga estudyante ang mga poster nga ilang gihimo. Makatabang tingali ang pagkolekta sa mga poster o pag-display niini hangtod nga imong itudlo ang maong leksiyon aron maakses kini sa mga estudyante.)

Ang mga tawo nga wala pa makasabot sa katuyoan sa Pulong sa Kaalam tingali motan-aw niini nga wala kinahanglana nga mga pagdili nga gipatuman sa Simbahan. Paggahin og panahon sa pagpamalandong sa mga panalangin nga moabot sa pagtuman sa Pulong sa Kaalam ug sa mga resulta sa paglapas niini ngadto sa mga indibidwal, mga pamilya, ug sa katilingban.

• Sa imong hunahuna, sa unsang paagi ang Pulong sa Kaalam nagpakita sa gugma sa Dios ngadto sa Iyang mga anak?

Ipasalig karon nga tumanon ang Ginoo

Aron tabangan ang mga estudyante nga palig-onon ang ilang pasalig nga tumanon ang Pulong sa Kaalam sa Ginoo, pwede nimo silang dapiton nga kompletohon ang mosunod nga mga kapahayag diha sa ilang mga journal sa pagtuon. Samtang mangandam sila sa pagsulat, hangyoa sila nga ikonsiderar kon sa unsang paagi ang ilang pasalig sa pagsunod sa Pulong sa Kaalam makapalig-on sa ilang relasyon sa Langitnong Amahan ug ni Jesukristo.

Gusto nakong sundon ang Pulong sa Kaalam tungod kay …

Ang usa ka butang nga akong mahimo aron matabangan ko nga matuman ang Pulong sa Kaalam mao ang …

Pwede nimong taposon pinaagi sa pagpakigbahin sa imong pagpamatuod bahin ni Jesukristo ug sa mga panalangin nga imong nakita tungod sa pagsunod sa Pulong sa Kaalam.

Dugang nga mga Kapanguhaan

Nganong importante nga akong atimanon ang akong pisikal nga lawas?

Si Presidente Russell M. Nelson mipakigbahin:

Bisan og talagsaon kaayo ang inyong lawas, ang nag-unang katuyoan niini, sumala sa gipahayag na sa sayo pa, labihan pa gani ka mahinungdanon—nga magsilbi nga lawas sa inyong mahangturon nga espiritu.

Ang inyong espiritu nakaangkon og lawas ug nahimong buhi nga kalag nga magpuyo sa mortalidad ug sa kauban nga mga pag-antus ug pagsulay. Ang usa ka bahin niini nga pagsulay mao ang pagtino kon ang inyong lawas pagadumalaon ba sa espiritu nga nagpuyo niini.

Kon nakasabot kita sa atong kinaiya ug sa atong katuyoan dinhi sa yuta, ug nga ang atong mga lawas pisikal nga mga templo sa Dios, atong maamgohan nga usa ka pagpasipala ang pagpasulod sa lawas og bisan unsa nga makahugaw niini. (“Ang Inyong Lawas: Usa ka Talagsaong Gasa nga angay Mahalon,” Liahona, Ago. 2019, 5–6)

Sa unsang paagi nga ang pagpasalig sa pagsunod sa Pulong sa Kaalam makapanalangin kanako?

Si Elder Ronald A. Rasband sa Korum sa Napulog Duha ka Apostoles mipakigbahin:

Usa ka gabii sa batan-on pa ako, ang akong mama milingkod tupad kanako sa tiilan sa iyang higdaanan ug matinud-anong nakigsulti bahin sa kaimportante sa pagsunod sa Pulong sa Kaalam. “Nasayud ko gikan sa mga kasinatian sa uban, sa katuigang milabay,” miingon siya, “sa pagkawala sa espiritwalidad ug kasensitibo tungod sa pagsupak sa Pulong sa Kaalam.” Iyang gitutukan ang akong mga mata, ug akong gibati nga mituhop ang iyang mga pulong sa akong kasingkasing: “Pasaligi ko, Ronnie, karon [Ronnie iyang tawag nako], nga kanunay nimong sundon ang Pulong sa Kaalam.” Ligdong ko nga misaad niana ngadto kaniya, ug ako kanang gituman sa tanan niining mga katuigan.

Kana nga pasalig nakatabang kaayo kanako sa akong kabatan-onan ug sa misunod nga mga katuigan sa dihang nakig-uban ko sa mga negosyante diin sagad kaayo ang pag-inom. Nakahukom na kong daan sa pagsunod sa mga balaod sa Dios, ug wala gyud kini kausaban. Ang Ginoo miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” [Doktrina ug mga Pakigsaad 82:10]. Unsa ang Iyang gisulti niadtong mosunod sa Pulong sa Kaalam? Nga kita adunay saad sa kabaskug, kusog, kaalam, kahibalo, ug mga anghel nga manalipud kanato. (“Barogan ang Atong mga Saad ug mga Pakigsaad,” Liahona, Nob. 2019, 54–55)

Asa ko makakat-on og dugang bahin sa Pulong sa Kaalam?

Aron makakat-on og dugang bahin sa Pulong sa Kaalam, tan-awa ang Agosto 2019 nga edisyon sa Liahona.

Dugang nga mga Kalihokan sa Pagkat-on

Daniel 1:8. “Gituyo ni Daniel diha sa iyang kasingkasing”

Samtang tun-an sa mga estudyante ang istorya ni Daniel, makatabang kini kanila sa paghunahuna mahitungod sa iyang pasalig nga mosunod sa Ginoo. Ikonsiderar ang pagdapit sa mga estudyante nga markahan ang hugpong sa mga pulong nga “Gituyo ni Daniel diha sa iyang kasingkasing” diha sa Daniel 1:8. Dayon ipangutana ang mosunod:

• Sa imong hunahuna, kanus-a nakadesisyon si Daniel nga mosunod sa Ginoo?

• Sa unsang paagi ang maong desisyon nakaimpluwensiya sa pagsanong ni Daniel sa usa ka mahagiton nga sitwasyon?

Hisgoti ang panig-ingnan ni Daniel sa pagdesisyon nang daan nga tumanon ang Ginoo ug kon sa unsang paagi ang pagsunod sa maong panig-ingnan makatabang nato sa pagtuman sa Pulong sa Kaalam sa mahagiton nga mga kahimtang.

Pisikal ug espirituwal nga mga panalangin

Aron tabangan ang mga estudyante nga mailhan kon sa unsang paagi ang Ginoo makapanalangin ug mopanalangin kanato sa pisikal ug espirituwal nga paagi, pwede nimong ipasalida ang “A Brand New Year: Physical Health” gikan sa time code 0:53 hangtod 4:19.

Dayon, pwede nimong ipakigbahin ang mosunod nga mga pagtulun-an gikan ni Presidente Boyd K. Packer (1924–2015) sa Korum sa Napulog Duha ka Apostoles:

Akong nasayran … nga ang usa ka sukaranan nga katuyoan sa Pulong sa Kaalam may kalabotan sa pagpadayag. …

Kon ang usa ka tawo nga “ubos sa impluwensiya sa ilimnong makahubog” maglisod og paminaw sa simpleng panag-istorya, unsaon man nila pagtubag sa espirituwal nga mga pag-aghat nga motandog sa labing malumo nga mga pagbati?

Sama ka importante sa Pulong sa Kaalam ingon usab ang balaod sa kahimsog, nga kini mahimong mas importante nimo sa espirituwal kay sa pisikal nga paagi. (“Prayers and Answers,” Ensign, Nov. 1979, 20)

Ang Pulong sa Kaalam wala mosaad sa inyong hingpit nga kahimsog, apan kini nagtudlo kon unsaon nga mapabilin ang lawas nga inyong nadawat sa pagkatawo anaa sa labing maayong kondisyon ug ang inyong hunahuna alerto sa malumo nga espirituhanong mga pag-aghat. (“The Word of Wisdom: The Principle and the Promises,” Ensign, May 1996, 18)

• Unsa nga pisikal ug espirituwal nga mga panalangin ang nadawat nimo o sa imong kaila tungod sa pagtuman sa Pulong sa Kaalam?

Pwede nimong pahinumdoman ang mga estudyante nga moabot ang mga panalangin sa Ginoo sumala sa Iyang kabubut-on ug panahon.