Malaquias: Leksiyon 160

Sukda ang Imong Nakat-onan 10

Amos–Malaquias

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Langitnong Amahan ug ni Jesukristo. Kini nga leksiyon makatabang sa mga estudyante nga mamalandong sa ilang mga tumong nga gitakda ug sa paglambo nga ilang nasinati atol sa ilang bag-ohay nga pagtuon sa Daang Tugon.

Pagpangandam sa estudyante: Dapita ang mga estudyante nga mosulod sa klase nga andam ipakigbahin ang usa ka hulagway nga nagrepresentar sa mga talento o kahanas nga ilang naugmad, mga paagi nga sila milambo, o ang ilang mga kasinatian sa milabayng tuig o kapin pa. Kon wala silay makitang hulagway, pwede ra silang mohatag og ehemplo nga ipakigbahin.

Posibleng mga Kalihokan sa Pagkat-on

Ang imong klase tingali nagtutok sa managlahing mga resulta sa Amos hangtod sa Malaquias gikan sa resulta ang gisukod niini nga leksiyon. Kon mao, ipahiangay ang mga kalihokan base sa mga resulta nga imong gipili aron masukod ang paglambo nga nasitian sa mag estudyante. Usab, ikaw wala laomi nga mohimo sa tanang kalihokan. Pwede nimong pilion ang mga kalihokan nga may kalabotan o mapahimuslan sa imong mga estudyante.

Niini nga leksiyon, makabaton og higayon ang mga estudyante nga masukod ang ilang paglambo sa mosunod nga bahin:

1. Ipasabot ang tahas sa mga propeta. (Timan-i: Kini nga kalihokan gibase sa mga pagtulun-an sa Leksiyon 138: Ezequiel 3 ug Leksiyon 149: “Amos 3; 7.”)

2. Ipasabot ang mga titulo, mga tahas, mga kinaiya, ug mga simbolo ni Jesukristo. (Timan-i: Kini nga kalihokan gibase sa katibuk-ang pagtuon sa Daang Tugon.)

3. Tumana ang sugo nga sundon ang Pulong sa Kaalam. (Timan-i: Kini nga kalihokan gibase sa mga pagtulun-an sa Leksiyon 142: “Daniel 1.”)

Pwede nimong pulihan ang bisan asa niini nga mga kalihokan og mga kalihokan sa pagsukod para sa mga leksiyon sa Pagpangandam sa Kinabuhi. Ang mga pagsukod para sa mga leksiyon sa Pagpangandam sa Kinabuhi anaa sa apendiks.

Ang imong paglambo

Sa pagsugod sa leksiyon, dapita ang mga estudyante nga magpakita og mga hulagway nga nagrepresentar sa mga talento o mga kahanas nga ilang naugmad, mga paagi nga sila milambo, o ilang mga kasinatian sa milabayng tuig o sobra pa. Kon walay hulagway ang mga estudyante, pwede silang makigbahin og usa ka ehemplo. Ikonsiderar ang pagpakita og hulagway nga nagpakita kon sa unsang paagi ka milambo sa imong kinabuhi.

• Nganong maayo nga mohunong usahay ug ilhon ang atong nakat-onan o kon sa unsang paagi kita milambo?

Dapita ang mga estudyante nga pamalandongan ang mga paagi nga milambo sila sa espirituwal ug naduol sa Langitnong Amahan ug kang Jesukristo sa milabayng tuig. Dapita ang mga estudyante nga magdrowing diha sa ilang mga journal sa pagtuon og duha ka kahon nga parehas sa mosunod:

Sulod sa kada kahon, pag-drowing o pagsulat og usa ka paagi nga para nimo milambo o naduol ka sa Langitnong Amahan ug kang Jesukristo sa tibuok tuig. Mahisama kini og “hulagway” sa imong mga kasinatian. Kini naglakip sa:

• Mga paagi nga naningkamot kang mahisama sa Langitnong Amahan ug kang Jesukristo. Apil tingali niini ang imong mga tumong o plano sa tibuok tuig. Kon anaa kay mga plano samtang nagtuon sa mga kasulatan, ikonsiderar ang pag-apil sa maong mga kasulatan.

• Mga kasulatan o mga pagtulun-an nga nakatabang o nakapalig-on nimo. Pwede pod nimong iapil ang mga bersikulo o mga kapitulo nga ipakigbahin sa uban.

• Mga kasinatian sa imong paglambo, sama sa pagdawat og mga tubag sa mga pag-ampo, pagserbisyo sa uban, pagbati sa tabang sa Ginoo panahon sa pagsulay, o nadasig sa ehemplo nga gikan sa kasulatan o sa usa ka classmate.

Dapita ang pipila ka mga estudyante sa pagpakigbahin sa ilang gidrowing o gisulat. Tungod kay kini ang kataposan niini nga kurso sa pagtuon, makatabang nga daghang estudyante ang mopakigbahin.

Samtang mopakigbahin ang mga estudyante, pangita og mga paagi nga matabangan silang masayod nga imong gihatagan og bili ang ilang mga tubag. Sa dili pa mopakigbahin ang mga estudyante pwede kang mosulti og sama sa “Ganahan kaayo kitang makadungog kang Olivia” o “Ganahan kaayo ko sa mga panglantaw ug mga kasinatian ni Joseph.” Makatabang ang pag-atubang sa mga estudyante ug pagtan-aw sa ilang mata samtang nakigbahin sila. Human sila mopakigbahin, makatabang usab ang kinasingkasing nga “salamat” o “nalipay kaayo kong madungog ang imong panglantaw”. Para sa dugang pagbansay niini, tan-awa ang “Paghimo og palibot diin ang tanan gitahod ug nahibalo nga ang ilang mga tampo gihatagan og bili”diha sa Pagpalambo sa mga Kahanas sa Magtutudlo.

Kon gibati nimo nga maayong maggahin og panahon alang niini nga kalihokan para sa dakong bahin sa leksiyon, pwede nimong hatagan og higayon ang kada estudyante nga ipakigbahin ang usa ka butang nga ilang gidrowing o gisulat. Pananglitan, pwede nimong ihan-ay patuyok ang mga lingkoranan ug mohangyo nga mobulontaryo nga mouna. Dayon ipasunod na ang naglibot nga mga estudyante aron makigbahin. Tugoti ang mga estudyante nga mobalibad kon dili sila gustong makigbahin. Samtang makigbahin sila, pangita og paagi sa pag-ila sa paningkamot sa estudyante, pagpamatuod sa Manluluwas, ug pagpasiugda sa gahom sa kasulatan.

Ipasabot ang tahas sa mga propeta sa Ginoo

Nakat-onan tingali sa mga estudyante ang tahas sa mga propeta sa Ginoo diha sa Leksiyon 138: “Ezequiel 1–3; 33” ug Leksiyon 149: “Amos 3; 7.” Ikonsiderar ang paghatag sa mga estudyante og pipila ka minuto nga rebyohon ang ilang nakat-onan niini nga mga leksiyon. Pwede kini nilang himoon pinaagi sa pagrebyo sa Ezequiel 3:10–11, 16–17; Amos 3:7, uban sa ilang mga mubong sulat diha sa ilang mga kasulatan o mga journal bahin sa tahas sa mga propeta.

Aron ipaila ang mosunod nga kalihokan, pwede nimong ipasabot nga gibutang sa online sa Simbahan ang mga kapanguhaan para niadtong mga tawo nga gustong makakat-on bahin sa pihong mga hilisgutan. Ang usa ka kapanguhaan mao ang Mga Hilisgotan ug mga Pangutana diha sa Librarya sa Ebangheyo.

Gamita ang mosunod nga mga instruksiyon sa pagsulat og tulo ka kapahayag nga entry bahin sa mga propeta nga magamit diha sa Librarya sa Ebanghelyo:

1. Ibase ang imong unang kapahayag sa imong nakat-onan bahin sa tahas sa mga propeta gikan sa Ezequiel 3:10–11, 16–17.

2. Ibase ang ikaduhang kapahayag sa imong nakat-onan bahin sa tahas sa mga propeta gikan sa Amos 3:7.

3. Ibase ang ikatulong kapahayag sa uban pang butang nga imong nakat-onan sa imong pagtuon sa Daang Tugon bahin sa tahas sa mga propeta.

Human masulat sa mga estudyante ang ilang entry, pwede nimong ipakita ang mosunod nga bahin sa entry bahin sa mga propeta gikan sa Mga Hilisgutan ug mga Pangutana. Dapita ang mga estudyante sa pagbasa niini ug tan-awon kon anaa ba silay gustong idugang sa ilang entry.

Sama sa mga propeta kaniadto, ang mga propeta karon nagpamatuod kang Jesukristo ug nagtudlo sa Iyang ebanghelyo. Gibutyag nila ang kabubut-on ug tinuod nga kinaiya sa Dios. Nagsulti sila sa maisugon ug klaro nga paagi, manghimaraut sa sala ug magpahimangno sa mga sangputanan niini. Usahay, sila mahimong madasig sa pagpanagna sa umaabot nga mga panghitabo alang sa atong kaayohan. (Mga Hilisgutan ug mga Pangutana, “Propeta,” Librarya sa Ebanghelyo)

Ikonsiderar ang pagbahinbahin sa mga estudyante sa ginagmayng grupo aron ipakigbahin ang ilang gisulat. Pwede nimong dapiton ang pipila ka estudyante nga andam ipakigbahin ngadto sa klase ang usa o kapin pa sa ilang mga kapahayag.

Mga titulo, mga tahas, ug mga simbolo ni Jesukristo

Ipakita ang pipila ka hulagway sa mga hitabo sa kasulatan sa Daang Tugon nga nagpakita sa Manluluwas o sa Iyang gahom. Ang mosunod nga mga hulagway mao ang pipila ka mga ehemplo:

• Unsay gitudlo sa matag hulagway kanato bahin kang Jesukristo?

Kini nga mga hulagway nagpakita kon sa unsang paagi gilalang sa Manluluwas ang kalibotan; giayo ang katawhan nga mitan-aw sa bitin diha sa sungkod; gisuportahan si Sadrac, Mesac, ug Abednego diha sa nagkalayong hudno; ug gipatak-om ang mga baba sa mga leyon. Kon mapuslanon, pahinumdomi ang mga estudyante nga ang bitin diha sa sungkod nagsimbolo sa Manluluwas diha sa krus (tan-awa ang Juan 3:14).

Diha sa imong journal sa pagtuon, pagsulat og usa o duha ka butang nga imong nakat-onan bahin sa Manluluwas karong tuiga nga mapuslanon para nimo. Kini nga mga butang pwedeng gikan sa usa ka istorya gikan sa Daang Tugon, o pwedeng usa kini sa mga titulo sa Manluluwas, simbolo Niya, o usa sa Iyang mga tahas. Kon posible, pag-apil og usa ka pakisayran nga kasulatan uban sa imong panglantaw. Ipasabot kon nganong makahuloganon para nimo kini nga panglantaw.

Dapita ang pipila ka mga estudyante sa pagpakigbahin. Pangita og mga paagi aron matabangan ang mga estudyante nga mopamatuod sa Manluluwas ug sa daghan Niyang tahas sa atong kinabuhi.

Pagsunod sa Pulong sa Kaalam sa Ginoo

Ikonsiderar ang pagpakita sa mosunod nga hulagway ug pangutan-on ang mga estudyante kon unsay ilang nahinumdoman bahin sa asoy nga naa sa Daniel 1. O pwede nimong dapiton ang mga estudyante nga rebyohon ang mga poster bahin sa Pulong sa Kaalam nga ilang gihimo sa Leksiyon 142: “Daniel 1” o sulayan sa paghinumdom kon unsay ilang gilakip niini.

• Unsay imong nahinumdoman niini nga istorya?

Sa Leksiyon 142: “Daniel 1,” nakat-onan sa mga estudyante nga ang pagtuman sa Pulong sa Kaalam sa Ginoo magdala og pisikal ug espirituwal nga mga panalangin. Ingon nga bahin sa maong leksiyon, mahimo nimong dapiton ang mga estudyante nga kompletohon ang mosunod nga kapahayag diha sa ilang mga journal sa pagtuon: “Ang usa ka butang nga akong mahimo aron matabangan ko nga matuman ang Pulong sa Kaalam mao ang …”

Aron matabangan ang mga estudyante nga susihon ang ilang mga paningkamot, pwede nimo silang dapiton nga rebyohon kon giunsa nila pagkompleto ang maong pamahayag. Dayon ipakita ang usa o kapin pa sa mosunod.

Tubaga ang usa o kapin pa sa mosunod nga mga pangutana diha sa imong journal sa pagtuon:

• Unsang mga paningkamot ang imong gihimo aron tumanon ang Pulong sa Kaalam?

• Unsay imong mga nasinati samtang naningkamot sa pagsunod sa Pulong sa Kaalam?

• Nakita ba nimo ang panalangin sa Dios kanimo o uban nga pisikal o espirtuwal pinaagi sa pagtuman sa Pulong sa Kaalam?

Ikonsiderar ang pagdapit sa mga boluntaryo nga ipakigbahin ang ilang mga hunahuna. Pwede usab nimong awhagon ang mga estudyante nga ipahiangay ang ilang mga paningkamot o mopasalig pag-usab nga tumanon ang Pulong sa Kaalam kon gikinahanglan.