Apendiks

Mga Kalihokan sa Pagsukod sa Imong Nakat-onan alang sa mga Leksiyon sa Pagpangandam sa Kinabuhi

Dihang mahuman na nimo og tudlo ang usa sa mga kategoriya sa mga leksiyon sa Pagpangandam sa Kinabuhi, ikonsiderar ang pagtabang sa mga estudyante nga pamalandongan ang ilang nakat-onan ug pag-uswag. Sa paghimo niini, mahimo nimong ilakip ang usa o dugang pa sa mosunod nga mga kalihokan sa umaabot nga leksiyon sa Pagsukod sa Imong Nakat-onan. Pwedeng ipahaom kini nga mga kalihokan nga labing makatubag sa mga panginahanglan sa imong mga estudyante.

Mga Kahanas sa Pagtuon sa Kasulatan

Ipakita ang abilidad sa paggamit sa mga kasulatan sa pagdawat og tabang ug inspirasyon

Paghunahuna og makapadasig nga paagi sa pagtabang sa mga estudyante nga maandam sa pagpamalandong sa mga kahanas sa pagtuon sa kasulatan nga ilang gigamit bag-ohay lang sa pag-andam nila nga madawat ang tabang gikan sa Langitnong Amahan. Pangita og mga paagi nga mohimo niini nga makapadasig ug may kalabotan sa mga estudyante. Pwede nimong buhaton ang butang nga sama sa pag-ila og mga kahanas sa epektibong pagpangita diha sa internet (sama sa kalihokan sa ubos) o, kon ang mga estudyante nakasinati sa paggamit sa AI, makahisgot sila bahin sa mga kahanas sa paghimo og epektibo nga AI prompt.

Ikonsiderar ang mosunod nga senaryo:

Pananglitan nag-andam ka og usa ka proyekto sa eskwelahan ug kinahanglan nga mogamit sa internet para sa mga kapanguhaan.

• Unsa nga mga kahanas ang imong nakat-onan nga mahimong labi ka epektibo ang pagpangita diha sa internet?

Dapita ang mga estudyante nga ilista diha sa pisara ang mga kahanas sa pagtuon sa kasulatan nga ilang nakat-onan. Tupad sa kada kahanas pwede silang mopakigbahin kon giunsa niini nga mga himan ang tingali nakatabang nila nga madawat ang tabang ug inspirasyon gikan sa Ginoo. Mga kahanas nga tingali nakat-onan sa imong klase maglakip sa:

• Pag-tutok diha ni Jesukristo

• Pagpangita og mga simbolo ni Jesukristo

• Paghimo og mga pagtandi

• Pagdapit sa Espiritu Santo pinaagi sa pag-ampo, pagwagtang sa mga makabalda, ug pagpamalandong

• Pagmarka o pag-highlight sa mga pulong ug hugpong sa mga pulong

• Pahimo og mubo nga mga sulat

• Pag-cross-reference o pag-link sa mga bersikulo

• Pag-ila sa gipasabot o klaro nga gipahayag nga mga kamatuoran

Kon ang imong klase nagkat-on ug nagpraktis og dugang nga mga kahanas, pwede nimong idugang kini sa lista nga gihimo sa mga estudyante.

Aron matabangan ang mga estudyante nga mapakita ang kahanas sa pagtuon sa kasulatan nga ilang nakat-onan, pagpili og tudling sa kasulatan nga praktisan sa mga estudyante. Kini mahimong usa ka tudling sa doktrinal nga kahanas o usa ka makahuloganong tudling nga wala matun-i sa mga estudyante sa seminary.

Ipakita ang inyong abilidad sa paggamit sa mga kahanas sa pagtuon sa kasulatan sa pagdawat og tabang ug inspirasyon gikan sa Ginoo pinaagi sa paghimo sa mosunod:

1. Basaha ang tudling sa pipila ka higayon.

2. Tinoa kon hain sa mga kahanas sa pagtuon sa kasulatan ang inyong gamiton sa pagtinguha og pagsabot o inspirasyon ug sa paglista niini nga kahanas diha sa inyong journal sa pagtuon.

3. Praktisa ang matag usa niini nga kahanas gamit ang tudling nga inyong gipili.

4. Irekord diha sa inyong journal sa pagtuon ang imong nakat-onan pinaagi sa paggamit niini nga mga kahanas.

Kon mahuman na ang mga estudyante, pwede nimo silang ipapakigbahin diha sa klase o sa gagmayng mga grupo kon asa nga mga kahanas ang ilang gigamit ug unsa ang ilang nakat-onan gikan sa kasinatian. Samtang mopakigbahin ang mga estudyante, mahimo kang mangutana og follow-up nga mga pangutana bahin kon giunsa paglakip niini nga mga kahanas sa ilang personal nga pagtuon sa kasulatan makatabang nila nga mapaduol ngadto sa Langitnong Amahan ug ni Jesukristo.

Alang sa Kalig-on sa mga Kabatan-onan: Paghimo og mga Pagpili

Dawata ang kusog gikan sa Ginoo sa paghimo og dinasig nga mga pagpili

Ikonsiderar ang pagsulat sa pulong nga Mga Pagpili diha sa pisara. Ipakita sa mga estudyante ang mosunod nga mga aytem ug hangyoa sila nga ipakigbahin ang importante nga pagpili o mga pagpili nga nalakip niana nga aytem. (Ang matag aytem nagrepresentar og leksiyon diha sa Alang sa Kalig-on sa mga Kabatan-onan nga kategoriya.)

Usa ka cell phone

Usa ka patriyarkal nga panalangin

Usa ka Alang sa Kalig-on sa mga Kabatan-onan nga giya nga basahon

Usa ka papel nga giulohan og “Mga Tumong,” nga dunay pipila ka tumong nga nasulat niini

Diha sa inyong journal sa pagtuon, paggahin og usa ka minuto sa paglista og importanteng mga pagpili nga inyong nahimo, o nakigbisog sa paghimo, sa miaging pipila ka semana. Mahimong maglakip sila sa mga pagpili nga gilakip sa mga aytem nga makita, sama sa teknolohiya, patriarkal nga mga panalangin, mga hilisgotan sa Alang sa Kalig-on sa mga Kabatan-onan, o pagtakda og mga tumong. Irekord ang inyong mga tubag sa mosunod nga mga pangutana:

• Giunsa ninyo pagtinguha ang kalig-on, tabang, o giya sa Ginoo sa paghimo og mga pagpili bag-ohay lang?

• Sa unsang paagi ninyo nabati ang Iyang kalig-on, tabang, o giya sa paghimo og dinasig nga mga pagpili?

• Unsa nga mga hagit ang inyong giatubang o mahimong atubangon samtang maghimo niining dinasig nga mga pagpili?

Human ang mga estudyante adunay panahon sa pagpamalandong ug pagsulat, ikonsiderar ang pagdapit og pipila ka boluntaryo sa pagpakigbahin. Samtang ang mga estudyante mopakigbahin kon sa unang paagi sila mibati sa kalig-on sa Ginoo, hatagi og pagtagad ang kaandam sa Ginoo nga motabang kanato. Samtang ang mga estudyante mopakigbahin sa mga hagit nga ilang gisinati, dapita ang klase sa paggahin og panahon sa pagpamalandong kon sa unsang paagi sila matabangan. Pwede tingali silang mangita sa mga kasulatan o mga pahayag diha sa Alang sa Kalig-on sa mga Kabatan-onan nga giya nga basahon o pagpamalandong sa ilang kaugalingong mga kasinatian. Dapita sila nga mopakigbahin.

Dapita ang mga estudyante sa pagtapos niini nga kalihokan pinaagi sa pagsulat sa unsay ilang gibati nga gusto sa Ginoo nga ilang buhaton isip ilang sunod nga lakang.

Pagtukod og Pagbarog sa Kinaugalingong Paningkamot

Pagtukod og pagbarog sa kinaugalingong paningkamot sa paagi sa Ginoo

Ikonsiderar ang pagpakita og hulagway nga nagpasabot ni Jose sa Ehipto ug pagdapit sa mga estudyante sa paghinumdom sa unsay ilang nakat-onan bahin sa pagbarog sa kinaugalingong paningkamot gikan sa pagtuon sa iyang istorya (tan-awa sa Genesis 37–47). Mahimong makatabang nila ang pagtan-aw sa mubo nga mga sulat diha sa ilang mga journal o sa mga kasulatan samtang mamalandong sila sa unsay ilang nakat-onan.

Tingali ikonsiderar nimo ang paghatag og pipila, o tanan, sa mosunod nga mga pakisayran sa kasulatan alang sa mga estudyante nga ma-refer:

• Genesis 41:37–43, 49, 54–55 (si Jose sa Ehipto nagtipig og lugas alang sa umaabot nga kagutom tungod kay nakadawat siya og pagpadayag gikan sa Ginoo)

• Genesis 45:4–11; 47:11–12 (si Jose sa Ehipto mipanalangin sa iyang pamilya tungod sa iyang mga paningkamot sa pagtukod og pagbarog pinaagi sa kinaugalingong paningkamot)

• Malaquias 3:8–11 (pagtuman sa balaod sa Ginoo sa ikapulo)

• Moises 4:23–25; 5:1 (sila si Adan ug Eva nagtrabaho alang sa ilang pagkaon imbes ihatag kini sa Dios ngadto kanila)

Pamalandongi ang mosunod nga mga pangutana ug ikonsiderar ang pagrekord sa inyong mga nahunahunaan diha sa inyong journal sa pagtuon:

• Sa unsang mga paagi nga kamo mas nakaugmad og pagbarog pinaagi sa kinaugalingong paningkamot?

• Unsa kaha nga mga hagit ang inyong giatubang sa pag-ugmad og pagbarog pinaagi sa kinaugalingong paningkamot?

• Sa unsang paagi ninyo madapit ang Dios sa pagtabang ninyo nga padayong makaugmad og pagbarog pinaagi sa kinaugalingong paningkamot?

Ikonsiderar ang pagdapit sa pipila ka mga estudyante sa pagpakigbahin sa ilang mga hunahuna.

Pisikal ug Emosyonal nga Kahimsog

Gamita ang mga baroganan ug mga kahanas aron mahimong mas himsog sa emosyonal ug pisikal nga paagi

Ikonsiderar ang pagpakita og litrato sa usa ka kahoy nga gihuros sa hangin, o pwede kang magdrowing og kahoy diha sa pisara. Kon ang mga estudyante nagdrowing og kahoy sa ilang mga journal sa pagtuon nga ilang gitun-an sa Leksiyon 181: “Pagtukod og Emosyonal nga Kalig-on diha sa Ginoo,” dapita sila sa pagrebyo sa emosyonal nga mga hagit nga ilang gisulat sa ilang kahoy.

Sa laing paagi, ang mga estudyante mahimong mosulat palibot sa bag-ong drowing sa kahoy og pipila ka emosyonal nga mga hagit nga ilang nasinati o mahimong masinati sa umaabot.

• Sa unsang paagi ang emosyonal nga mga hagit nga atong nasinati sa kinabuhi morag sama sa mga alimpulos?

• Unsay inyong nakat-onan bag-ohay lang sa seminary kon unsaon sa pag-atubang ang emosyonal nga mga hagit?

  Samtang ang mga estudyante mopakigbahin, pangita og mga oportunidad sa pagpamatuod nga atong mabuntog ang emosyonal nga mga kalisod pinaagi sa pagsalig sa kalig-on ug gahom nga gisaad sa Langitnong Amahan ug ni Jesukristo (tan-awa sa Helaman 5:12).

• Unsa ang pipila ka baroganan o kahanas nga imong gisulayan paggamit aron makadawat og emosyonal nga kalig-on gikan sa Langitnong Amahan ug ni Jesukristo?

• Unsa ang nakatabang? Unsay inyong nakat-onan o gusto gihapong sulayan?

Kon mopakigbahin ang mga estudyante og mga kalisod o mga hagit, tinguhaa ang inspirasyon aron mahibalo kon unsaon sa pagtabang. Ang mga sakop sa klase mahimong motabang sa usag usa pinaagi sa pagpakita og kapuangod ug pagsabot.

Pagpangandam alang sa Umaabot nga Edukasyon ug Pagpanarbaho

Sabta ang kaimportante sa tibuok kinabuhi nga temporal ug espirituwal nga edukasyon

Ang mosunod nga kalihokan mohatag og higayon sa mga estudyante sa pagpasabot sa kaimportante sa tibuok kinabuhi nga espirituhanon ug temporal nga edukasyon.

Dapita ang mga estudyante sa paghunahuna sa mosunod nga senaryo. Pwede kang mohimo og mga kausaban sa senaryo aron mohaom sa mga panginahanglan sa imong klase.

Gihangyo kamo nga mamulong sa usa ka kalihokan sa kabatan-onan sa pagsugod sa tuig ting-eskwela. Ang kalihokan gituyo sa pagpalig-on sa pagtuo sa Langitnong Amahan ug ni Jesukristo. Ang hilisgotan nga gihatag kaninyo mao ang “Ang kaimportante sa espirituhanon ug temporal nga edukasyon sa pagsunod sa Langitnong Amahan ug ni Jesukristo.”

Pagsulat og outline alang sa duha- ngadto sa tulo-ka minuto nga pagpamulong. Ikonsiderar ang mosunod isip kabahin sa inyong outline:

• Ang kaimportante sa espirituhanon ug temporal nga edukasyon sa plano sa Langitnong Amahan

• Usa o daghan sa mga kasulatan o mga pahayag sa propeta nga nagsuporta sa inyong mensahe. (pananglitan, Doktrina ug mga Pakigsaad 88:77–80)

• Usa sa kasinatian nga nasinati ninyo o sa uban nga nakatabang ninyo nga mobati sa kaimportante sa tibuok kinabuhi nga pagkat-on

Human sa igong panahon, pwede nimong dapiton ang mga estudyante sa pagpakigbahin sa ilang mga outline sa gagmayng mga grupo o dapita ang pipila ka boluntaryo sa pagpakigbahin diha sa klase.

Paghimo og plano para sa umaabot nga edukasyon ug pagpanarbaho

Kon ang mga estudyante adunay oportunidad sa paghimo og mga plano alang sa umaabot nga espiritwal ug temporal nga edukasyon, dapita sila sa pagrebyo sa mga plano nga ilang gihimo. Kon ang mga estudyante wala makahimo og mga plano, dapita sila sa paggahin niini nga higayon sa paghimo og plano kon unsaon nila sa pagpadayon sa espiritwal ug temporal nga edukasyon sa paagi nga malakip ang Ginoo sa ilang mga plano.

Mga pangutana nga makatabang sa panaghisgotan naglakip sa mosunod:

• Unsaon ninyo paglakip o unsaon ninyo nga malakip ang Langitnong Amahan ug si Jesukristo sa inyong mga plano?

• Unsa nga mga pangutana ang anaa gihapon ninyo mahitungod sa umaabot nga mga opsiyon sa espiritwal o temporal nga edukasyon?

• Unsa ang sunod nga mga lakang ang inyong buhaton isip kabahin sa imong plano?

Pagmalamposon sa Pag-eskwela

Gamita ang mga kahanas aron magmalamposon sa pag-eskwela

Ikonsiderar ang pagsulat sa mosunod nga mga ulohan sa leksiyon diha sa pisara:

Paglakip sa Ginoo diha sa inyong pagkat-on

Pag-angkon og responsibilidad alang sa inyong pagkat-on

Pag-organisar og mga buluhaton ug mga prayoridad

Pagbuntog sa paglangay-langay

Dapita ang mga estudyante sa pagbasa sa mga ulohan ug mamalandong kon unsaon nila paggamit kini nga mga kahanas sa ilang buluhaton sa eskwelahan. Aron mahimo kini, pwede nimong dapiton sila sa paghimo sa mosunod.

Pagdrowing og duha ka stick figure ug mga speech bubble. Paghunahuna og duha ka tawo nga naghisgot og butang nga gusto ninyong mapalambo aron magmalampuson sa pag-eskwela.

Sa unang bulȃ, kompletoha ang kapahayag nga: “Kon bahin sa pag-eskwela, naglisod ko sa ”

Sa ikaduhang bulȃ, kompletoha ang mosunod sa unsay inyong gisulayan nga buhaton sa paggamit sa mga baroganan ug mga kahanas nga inyong nakat-onan bag-ohay lang sa seminary nga motabang ninyo nga magmalamposon sa pag-eskwela:

“Ania ang pipila ka butang nga akong nasulayan …”

“Naningkamot ko nga magpadayon o mag-usab …”

Pwede nimong dapiton ang pipila ka boluntaryo sa pagpakigbahin sa ilang mga drowing diha sa klase. Awhaga ang mga estudyante sa pagpaminaw og maayo sa ilang mga klasmeyt. Pangutana kon duna ba silay bisan unsang dugang nga mga kasinatian o mga baroganan gikan sa mga leksiyon nga mahimong makatabang. Samtang ang mga estudyante maminaw sa usag usa, tingali mabati nila nga naaghat sa Espiritu Santo sa pagsulay og pipila sa mga kahanas nga nakit-an sa uban nga makatabang.

Misyonaryo nga Pagpangandam

Pagbati og dugang nga tinguha nga ipakigbahin ang ebanghelyo ni Jesukristo ngadto sa uban

Sa pag-andam sa mga estudyante sa pagpamalandong sa ilang mga pagbati bahin sa pagpakigbahin sa ebanghelyo ni Jesukristo ngadto sa uban, ikonsiderar ang mubo nga pagrebyo sa pipila sa mga butang nga ilang nakat-onan o nagamit gikan sa mga leksiyon sa pagpangandam sa misyonaryo. Pananglitan, kon ang mga estudyante magtuon sa Leksiyon 198: “Pagpili nga Moserbisyo og Misyon,” pwede kang maggunit og samin ug mangutana sa mosunod.

• Unsa nga mga kasinatian ang inyong nasinati sa pagpakigbahin sa ebanghelyo ni Jesukristo ngadto sa uban gamit “ang pagbinayloay nga kalidad sa panag-istoryahanay?” Unsa ang pipila sa ubang mga paagi nga inyong nasulayan sa pagpakigbahin sa ebanghelyo bag-ohay lang?

Samtang ang mga estudyante nakigbahin sa ilang mga kasinatian, mahimo usab kang mangutana kon hain sa mga kamatuoran nga ilang gipakigbahin mahitungod sa Manluluwas o hain nga mga pagdapit ang ilang gihatag. Mahimo nimong pahinumdoman ang mga estudyante nga sa Leksiyon 197: “Pagpakigbahin sa Ebanghelyo sa Natural nga mga Paagi” mangita sila og mga kamatuoran bahin ni Jesukristo nga madasigon silang mopakigbahin ngadto sa mga tawo nga ilang gimahal (tan-awa sa Isaias 1:18; 25:4, 8–9; 40:28–31; 43:25; 54:10).

Pamalandongi ang mga butang nga mahimo ninyong nakat-onan o nagamit gikan sa mga leksiyon sa pagpangandam sa misyonaryo. Dayon tubaga ang mosunod nga mga pangutana diha sa inyong journal sa pagtuon:

• Nabati ba ninyo ang tinguha sa pagpakigbahin sa ebanghelyo ni Jesukristo ngadto sa uban nga milambo, mikunhod, o mipabilin nga mao gihapon?

• Unsa sa inyong hunahuna ang nakatampo sa paagi nga inyong nabati mahitingod sa pagpakigbahin sa ebanghelyo?

Ikonsiderar ang pagdapit sa pipila ka boluntaryo sa pagpakigbahin sa unsay ilang gisulat. Awhaga ang mga estudyante nga mopadayon sa pagpangita sa tinguha ug mga oportunidad sa pagpakigbahin sa ebanghelyo ni Jesukristo ngadto sa uban.

Pagpangandam alang sa Templo

Mobati og dugang tinguha sa paghimo og mga pakigsaad uban sa Dios diha sa templo

Ikonsiderar ang paggamit sa usa o daghan sa mosunod nga mga kalihokan aron tabangan ang mga estudyante sa pagsukod sa ilang tinguha sa paghimo og mga pakigsaad uban sa Ginoo diha sa templo.

Dapita ang mga estudyante sa pagpamalandong sa mga baroganan nga ilang nakat-onan gikan sa mga leksiyon sa Pagpangandam alang sa Templo. Mahimo nilang rebyohon ang ilang mga kasulatan ug mga journal sa pagtuon aron mahinumdoman ang unsay ilang nakat-onan mahitungod sa mga balaod sa sakripisyo ug pagkamasulundon, sa unsang paagi nagtudlo ang templo kabahin ni Jesukristo, ug unsaon sa pagpangandam nga takos nga mosulod sa templo pinaagi sa pagtuon sa mga pangutana sa rekomend sa templo. Kon gikinahanglan, pwede nimong ihatag ang mosunod:

Rebyoha ang mosunod nga mga pakisayran sa kasulatan ug pamahayag ni Presidente Russell M. Nelson mahitungod sa mga panalangin nga anaa niadtong mosimba diha sa templo:

Exodo 25:8; 1 Mga Hari 6:12–13; Hageo 2:6–9

[N]iadtong moserbisyo ug mosimba sa balay sa Ginoo … makapaabot nga makadawat og mga tubag sa pag-ampo, personal nga pagpadayag, mas lig-on nga pagtuo, kusog, kahupayan, dugang nga kahibalo, ug dugang nga gahom. (“Magmaya sa Gasa sa mga Yawe sa Pagkapari,” Liahona, Mayo 2024, 121)

Human ang mga estudyante adunay kahigayonan sa pagrebyo sa ilang mga kasulatan ug mubo nga mga sulat, ipakita ang mosunod sa pagtabang sa mga estudyante nga pamalandongan kon sa unsang paagi ang ilang tinguha nga himoon ang mga pakigsaad uban sa Dios diha sa Iyang balay naapektohan pinaagi niini nga mga leksiyon.

Pilia ang usa sa mosunod:

1. Ipakigbahin ang usa ka litrato sa templo ug ipakigbahin kon sa unsang paagi ang templo nagpahinumdom kaninyo bahin kang Jesukristo. Kon gikinahanglan, makapangita kamo og hulagway diha sa media gallery sa temples.ChurchofJesusChrist.org. Ipakigbahin ang inyong mga hunahuna ug mga pagbati bahin sa paghimo ug pagtuman sa mga pakigsaad uban sa Langitnong Amahan diha sa Iyang templo.

2. Sa usa sa mga leksiyon sa pagpangandam alang sa templo inyong nakat-onan ang bahin sa kaimportante sa pagpangandam nga takos nga mosulod sa templo. Naa ba kamoy nakat-onan o gibati niining bag-ohay lang nga nakaimpluwensiya sa inyong tinguha sa paghimo ug pagtuman og mga pakigsaad uban sa Langitnong Amahan diha sa templo? Kon mao, pagsulat og mubo nga sulat sa inyong kaugalingon diha sa inyong journal sa pagtuon.

Mga Pagtulun-an sa mga Lider sa Simbahan

Pagsabot ug paggamit sa mga pagtulun-an sa mga lider sa Simbahan sa ilang kinabuhi

Sa tibuok kurso, ang mga estudyante adunay mga oportunidad nga tun-an ug gamiton ang mga pagtulun-an nga gikan sa mga lider sa Simbahan. Alang niini nga kalihokan, pwede nimong pahinumdoman ang mga estudyante sa piho nga mga pakigpulong nga inyong gitun-an isip usa ka sa klase. Ikonsiderar ang pagsulat sa mga ulohan sa mga pakigpulong diha sa pisara. Dapita ang mga estudyante nga magpili og usa sa mga pakigpulong ug rebyohon ang mensahe ug bisan unsang mubo nga mga sulat nga ilang gitun-an. Bahina ang mga estudyante nga magkapares, kon posible uban ang usa ka tawo nga mipili og laing pakigpulong. Ipakigbain sa matag pares ang ilang tubag sa mosunod nga duha ka pangutana.

• Unsaon ninyo pag-summarize ang mensahe sa pakigpulong nga inyong gipili?

• Ngano kaha nga kana nga mensahe importante alang sa mga tin-edyer karon?

Human mopakigbahin ang matag pares, dapita ang mga estudyante sa paghunahuna kon giunsa nila pagsulay sa paggamit sa mga pagtulun-an sa pakigpulong nga ilang gipili. Mahimo nimong pangutan-on sila mahitungod sa mga kalampusan o mga kapakyasan nga ilang naangkon sa dihang gigamit kini nga mga pagtulun-an.