Apendiks

Sukda ang Imong Nakat-onan, Bahin 1

Moises 1–5; Abraham 1–3; Genesis 37; 39; 41

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga pagsukod makatabang ninyo nga mahinumdom ug magtimbang-timbang kon sa unsang paagi ang inyong mga kasinatian sa pagtuon sa Moises 1–5; Abraham 1–3; and Genesis 37; 39; 41 nakatabang ninyo nga mouswag sa espirituhanong paagi ug mas mapaduol ngadto kang Jesukristo. Pangita og mga oportunidad sa pagpakigbahin sa pipila sa inyong mga tubag uban sa mga higala o uban sa mga sakop sa pamilya.

Pahinumdom: Sa dili pa kompletohon kini nga pagsukod, seguroa sa pagkompleto ang gikinahanglang mga pagbasa kon wala pa ninyo kini mahimo: Moises 1–5; Abraham 1–3; Genesis 37; 39; 41.

Unsay inyong nakat-onan? Sa unsang paagi kamo naglambo?

Hunahunaa ang mahitungod sa proseso sa usa ka liso nga nahimong usa ka bulak.

• Unsa ang pipila ka butang ang gikinahanglan sa usa ka liso sa pagtuman sa iyang potensyal?

• Sa unsang mga paagi ang proseso sa pagkahimong mas sama sa Langitnong Amahan ug ni Jesukristo susama sa proseso sa usa ka liso sa pagkahimong usa ka bulak?

Paggahin og pipila ka minuto sa pagsulat sa inyong journal sa pagtuon mahitungod sa inyong pag-uswag nga mahimong mas mahisama sa Langitnong Amahan ug ni Jesukristo samtang kamo nagtuon sa Daang Tugon. Sa inyong pagsulat, ang Espiritu Santo makatabang ninyo sa paghinumdom sa mga kamatuoran nga inyong nakat-onan. Ang Espiritu makatabang usab kaninyo nga makaila sa mga paagi nga kamo nag-uswag sa espirituwal nga paagi.

Pagpasabot sa mga epekto sa Pagkapukan ug sa tahas ni Jesukristo isip atong Manunubos

Importante nga masabtan ang Pagkapukan isip kabahin sa plano sa Langitnong Amahan ug ang tahas sa Manluluwas isip atong Manunubos gikan sa mga epekto sa Pagkapukan. Pagpili og usa sa mga hilisgotan sa ubos. Rebyoha ang Moises 4:6–13; 22–25; 5:5–12, ug paghunahuna kon sa unsang paagi nimo mapasabot ang hilisgotan nga imong gipili.

1. Ang pagpili ni Adan ug Eva nga misangpot sa Pagkapukan

2. Ang mga epekto sa Pagkapukan alang ni Adan ug Eva ug sa tanang anak sa Langitnong Amahan

3. Sa unsang paagi ang Manluluwas nagtubos kanato gikan sa mga epekto sa Pagkapukan

Irekord sa inyong journal sa pagtuon unsaon ninyo sa pagpasabot sa hilisgotan nga inyong gipili ug sa pagpraktis sa pagpasabot niini nga mga hilisgotan ngadto sa usa ka sakop sa pamilya, higala, o sa inyong magtutudlo sa seminary.

Pagdugang sa atong tinguha nga tumanon ang atong balaanong pagkatawo ug katuyoan

Pagdrowing og porma sa usa ka tawo nga mahimong magrepresentar kaninyo. Niini nga porma, o duol niini, isulat ang mga kamatuoran mahitungod sa inyong balaanong pagkatawo nga inyong nakat-onan bag-ohay lang sa Daang Tugon. Kon mahimo, himoa kining personal nga mga pamahayag pinaagi sa paggamit og “nako” o “ako.” Hunahunaa ang paggamit og pipila o tanan sa mosunod nga mga kasulatan nga inyong bag-ohay nga natun-an aron sa pagtabang kaninyo:

Abraham 3:22–23

Moises 1:1–11

Moises 1:12–24

Genesis 1:26–27

Dayon pagpili og usa sa mosunod nga mga kalihokan aron makompleto:

Opsiyon A: Paghulagway og pipila ka sitwasyon diin ang pagkasayod niini nga mga kamatuoran mahimong makatabang sa usa ka tawo. Ipasabot kon sa unsa nga paagi nga kini nga mga kamatuoran makatabang sa matag sitwasyon.

Opsiyon B: Kompletoha ang mosunod nga mga hugpong sa mga pulong:

Ang pagkasayod niining mga kamatuoran makatabang kanako kon

• Ako maghunahuna mahitungod sa akong kaugalingon kay …

• Ako mag-atubang og pagsulay kay …

• Ako makigsandurot sa uban kay …

• Ako mohimo og mga desisyon kay …

Pag-apil sa pagpundok sa Israel

Diha sa Daang Tugon, atong nakat-onan ang mahitungod sa saad sa Ginoo ngadto sa balay ni Israel nga nailhan isip ang Pakigsaad ni Abraham. Basaha ang Abraham 2:8–11 sa pagrebyo kon unsa kini nga pakigsaad. Si Presidente Russell M. Nelson miawhag sa kabatan-onan sa Simbahan sa pagtabang sa uban nga mosulod niini nga pakigsaad uban sa Ginoo. Mao kini ang gitawag isip ang pagpundok sa Israel. Si Presidente Nelson mipakigbahin kon sa unsang paagi kita makaapil niini:

Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel (“Ipatigbabaw ang Dios Labaw sa Tanan,” Liahona, Nob. 2020, 93).

Paghunahuna mahitungod kon unsaon ninyo pag-apil sa pagpundok sa Israel pinaagi sa paghimo og dayagram sama sa mosunod diha sa inyong journal sa pagtuon. Ilista ang inyong mga hunahuna ug mga pagbati diha sa matag sirkulo.

Padayon nga tinguhaon ang tabang sa Espiritu Santo aron masayod sa mga paagi nga kamo makaapil sa pagpundok sa Israel. Bisan og wala kaayo kamoy nahimo sa pagtabang sa pagpundok sa Israel, mahimo kamong magsugod karon. Ang Ginoo mopanalangin kaninyo ug sa uban samtang mobuhat kamo sa inyong plano.