Apendiks

Sukda ang Imong Nakat-onan, Bahin 2

Isaias 1–2; 6; 9; 11–12; 29; 49; 53; 58; 61; Mga Salmo 23–24; Daniel 1–3; 6; Malaquias 3

Ang paggahin og panahon sa pag-ila sa paglambo ug espirituwal nga pag-uswag makapalig-on sa atong mga relasyon sa Langitnong Amahan ug ni Jesukristo ug modasig nato nga magpabilin sa dalan sa pakigsaad. Kini nga leksiyon makatabang nimo sa pagsusi sa imong espirituhanong paglambo gikan sa imong pagtuon sa Isaias 1–2; 6; 9; 11–12; 29; 49; 53; 58; 61; Mga Salmo 23–24; Daniel 1–3; 6; Malaquias 3. Pangita og mga oportunidad sa pagpakigbahin sa pipila sa inyong mga tubag uban sa mga higala o uban sa mga sakop sa pamilya.

Pahinumdom: Sa dili pa kompletohon kini nga pagsukod, seguroa nga kompletohon ang gikinahanglan nga mga pagbasa kon wala pa nimo kini mahimo: Isaias 1–2; 6; 9; 11–12; 29; 49; 53; 58; 61; Mga Salmo 23–24; Daniel 1–3; 6; Malaquias 3.

Mas maayo og usa ka porsento

Sobra sa usa ka siglo, ang team sa national cycling sa Great Britain nanlimbasog ug nakadaog og pipila lamang ka medalya sa mga kompetisyon sa Olympic. Apan niadtong 2003, ang coach sa team nakakaplag og usa ka porsento nga kalamboan nga puwede nilang mahimo sa nataligam-an ug wala damha nga mga dapit aron mahimong mas maayo ang team. Isip resulta, sukad niadtong 2003, ang mga siklista nga Briton nakadaog sa Tour de France og unom ka higayon. Nadaog usab nila ang labing daghang cycling gold medal sa 2020 Summer Olympics (tan-awa sa Michael A. Dunn, “Mas Maayo og Usa ka Porsento,” Liahona, Nob. 2021).

Si Elder David A. Bednar sa Korum sa Napulog Duha ka Apostoles mipasabot:

Ang gamay, makanunayon, magtubo sa espirituhanong pag-uswag mao ang mga lakang nga buot sa Ginoo nga atong buhaton. (“Limpyo nga mga Kamot ug Putli nga Kasingkasing,” Liahona, Nob. 2007, 82)

Mahimo ninyong isulat ang inyong mga tubag sa mosunod nga mga pangutana diha sa journal sa pagtuon o ipakigbahin kini sa usa ka higala o sakop sa pamilya:

• Unsa ang pipila ka espirituhanong mga impresyon nga inyong nadawat gikan sa Espiritu Santo bag-ohay lang? Giunsa ninyo sa paglihok niini?

• Unsa ang pipila ka gagmayng espirituhanong mga pag-uswag ang inyong gihimo sa inyong pagkadisipulo ni Jesukristo?

• Unsa ang pipila ka bahin diin kinahanglan pa ninyong mohimo og gagmayng espirituhanong mga pag-uswag?

Ipasabot ang mga titulo ug mga tahas ni Jesukristo

Samtang magtuon kita sa mga pulong sa Ginoo diha sa Daang Tugon, magkat-on kita og dugang pa mahitungod sa Iyang mga titulo ug mga tahas. Gamita kini nga dayagram sa pagbuhat sa mosunod:

1. Isulat ang “Jesukristo” diha sa tunga sa sirkulo.

2. Diha sa ubang mga sirkulo, isulat ang pipila ka mga titulo ug mga tahas ni Jesukristo nga inyong natun-an diha sa Daang Tugon ug usa ka bersikulo diin inyo kining nakaplagan. Mahimo kamong modugang og mga sirkulo alang sa matag titulo nga inyong makaplagan. Mahimong makatabang ang pagrebyo sa Isaias 9:6–7; 53:3–5. (Mahimo kang makakita og ubang mga titulo ug mga tahas diha sa Isaias 7:14; 33:22; 40:28; 43:3; 48:17; Jeremias 17:13; Ezequiel 34:11–13. Mahimo usab nimong tan-awon ang Ang mga Ngalan ni Kristo nga makita sa ChurchofJesusChrist.org.)

Samtang mamalandong kamo kon unsa ang gitudlo sa mga titulo ug mga tahas ni Jesukristo kanato mahitungod Kaniya, pagpili og usa ka titulo o tahas nga labing mahinungdanon kaninyo. Tutoki kana nga titulo o tahas samtang inyong tubagon ang usa sa mosunod nga mga pangutana:

• Unsa ang gitudlo niini nga titulo o tahas nganha kaninyo mahitungod ni Jesukristo?

• Unsa nga mga kahimtang sa inyong kinabuhi ang makabenepisyo gikan sa paghinumdom niini nga titulo o tahas ni Jesukristo?

• Giunsa ninyo pagkakita sa Manluluwas nga nagtuman niini nga titulo o tahas sa inyong kinabuhi o sa mga kinabuhi sa uban karon?

Ipasabot ang mga panagna bahin sa Daang Tugon kalabot sa Pagpahiuli sa ebanghelyo ni Jesukristo sa ulahing mga adlaw

Paghunahuna nga kamo adunay usa ka higala nga interesado sa pagkat-on pa og dugang mahitungod sa Ang Simbahan ni Jesukristo sa mga Santos sa Ulahing mga Adlaw. Ganahan kamong mopakita sa inyong higala nga ang Biblia nagtudlo mahitungod sa Pagpahiuli sa ebanghelyo ni Jesukristo. Paghunahuna kon unsa kaha ang inyong ipakigbahin sa inyong higala. Dayon, rebyoha ang mosunod nga mga tudling sa doktrinal nga kahanas. Ilha ang usa ka aspeto sa Pagpahiuli nga gipanagna diha sa Daang Tugon nga inyong mapakigbahin sa inyong higala.

Isaias 29:13–14

Ezequiel 37:15–17

Daniel 2:44–45

• Unsaon ninyo sa pagpasabot kining panagna sa Daang Tugon ngadto sa inyong higala?

• Unsa ang gitudlo niini nga panagna nganha kaninyo mahitungod sa Manluluwas ug sa Iyang Simbahan?

Irekord ang inyong mga tubag diha sa inyong journal sa pagtuon o pagpraktis og pakigbahin kon unsaon ninyo pagpasabot sa panagna ngadto sa usa ka higala, sakop sa pamilya, o sa inyong magtutudlo.

Mobati og dugang nga tinguha sa pagbuntog sa sala pinaagi sa Pag-ula ni Jesukristo

Sa Isaias 1:18, ang Ginoo migamit og hulagway aron sa pagtabang kanato nga makasabot unsa ang buhaton sa Manluluwas sa atong kinabuhi samtang atong buntogon ang sala pinaagi sa Iyang Pag-ula. Paghunahuna nga gihangyo kamo sa paghatag og tulo ngadto sa lima ka minuto nga pakigpulong mahitungod sa pagbuntog sa sala pinaagi sa Pag-ula ni Jesukristo. Pagsulat og mubo nga latid sa unsay makita sa inyong pakigpulong nga naglakip sa mosunod:

1. Unsay inyong nakat-onan gikan sa Daang Tugon. Ang pipila ka ehemplo mahimong maglakip sa Isaias 1:18 ug Isaias 53:3–5.

2. Unsa ang gitudlo sa Espiritu kaninyo mahitungod sa Manluluwas ug paghinulsol.

3. Ang inyong mga pagbati mahitungod ni Jesukristo ug sa Iyang sakripisyo nga nakapahimo niini nga posible aron malimpyohan sa atong mga sala.