Malaquias

Malaquias

Kinatibuk-ang Pagpasabot

Pinaagi ni propetang Malaquias, misaad ang Ginoo nga kon mobayad kita sa ikapulo, hatagan kita Niya og mas daghang panalangin nga labaw pa sa atong madawat (tan-awa ang Malaquias 3:10). Gipanagna usab ni Malaquias nga ipahiuli sa Manluluwas ang mga yawe sa pagselyo aron “pabalikon ang kasingkasing sa mga amahan ngadto sa mga bata [anak], ug ang kasingkasing sa mga bata [anak] ngadto sa ilang mga amahan” (Malaquias 4:6).

Paghimo og luwas nga palibot diin gitahod ang tanang tigkat-on ug sayri nga adunay bili ang ilang mga kontribusyon. Gitudloan sa Manluluwas ang tanang tawo, lakip ang mga tawo kinsa nakasala o sinalikway. Mipasiugda Siya niining sama nga kinaiya sa pagdawat ug paghigugma diha sa Iyang mga sumusunod. Samtang magtudlo ka, pangita og mga paagi nga matabangan ang mga estudyante nga mobati nga gihangop ug gidawat. Tabangi silang masayod nga importante ug adunay bili ang ilang pag-apil sa klase. Aron makakat-on og dugang bahin kon giunsa kini paghimo sa Manluluwas, tan-awa ang “Gipaniguro sa Manluluwas Nga ang Tanan Mibati nga Gitahod ug Gihatagan og Bili” (Pagtudlo Sumala sa Pamaagi sa Manluluwas [2022], 13–14). Alang sa ehemplo kon unsaon pagtabang ang mga estudyante aron masayod nga gihatagan og bili ang ilang mga tampo, tan-awa ang Leksiyon 160: “Sukda ang Imong Nakat-onan 10.”

Pangandam sa pagtudlo

Ang mosunod nga impormasyon naghatag og mga ideya kon unsa ang gikinahanglan nimong andamon sa matag leksiyon.

Malaquias 3

Katuyoan sa leksiyon: Aron tabangan ang mga estudyante nga tinguhaon ang pagtuman sa balaod sa Ginoo sa ikapulo.

• Pagpangandam sa estudyante: Dapita ang mga estudyante nga mangandam sa pagpakigbahin og usa ka istorya diin gipanalanginan ang usa ka tawo tungod kay mituman sa sugo sa Ginoo sa pagbayad sa ikapulo. Kon makatabang, pwedeng pangutan-on sa mga estudyante ang ilang mga ginikanan o lider sa Simbahan o mangita og mga istorya diha sa Librarya sa Ebanghelyo.

• Bidyo: “Ang Pinulongan sa Ebanghelyo” (12:27) gikan sa time code 6:10 hangtod 6:41 ug 6:42 hangtod 7:40

• Mga aytem nga ipakita: Usa ka bandehado, usa ka tasa, usa ka pitsel nga tubig

• Handout: “Ang Balaod sa Ginoo sa Ikapulo”

Malaquias 4

Katuyoan sa leksiyon: Aron tabangan ang mga estudyante nga mobaling sa ilang mga kasingkasing ngadto sa ilang mga ginikanan, mga katigulangan ug umaabot nga kaliwatan.

• Pagpangandam sa estudyante: Dapita ang mga estudyante nga mogahin og pipila ka minuto sa pagsusi sa FamilySearch.org o sa FamilySearch Tree app. Pananglitan, pwede nilang ilik ang mga paryente diha sa ilang family tree aron makakat-on og dugang bahin nila. O pwede nilang kompletohon ang pipila ka kalihokan sa family history nga anaa sa website o sa menu nga “Dugang Pa” diha sa app. Kon walay akses niini nga mga kapanguhaan ang mga estudyante, pwede silang makig-istorya sa usa ka ginikanan o sakop sa pamilya aron makakat-on bahin sa usa ka katigulangan.

• Bidyo: “Pinaagi sa Kamot ni Elias nga Propeta” (3:32) gikan sa time code 0:00 hangtod 0:35

• Hulagway: usa ka templo

• Sulod nga ipakita: ang ikaduhang pamahayag gikan kang Elder D. Todd Christofferson sa Korum sa Napulog Duha ka Apostoles

• Mga materyal alang sa mga estudyante: Mga kopya sa Alang sa Kalig-on sa mga Kabatan-onan: Usa ka Giya sa Paghimo og mga Pagpili; Tema sa Young Women ug Tema sa Korum sa Aaronice nga Pagkapari

Sukda ang Imong Nakat-onan 10

Katuyoan sa leksiyon: Aron tabangan ang mga estudyante sa pagpamalandong sa mga tumong nga ilang gitakda ug sa paglambo nga ilang nasinati panahon sa ilang bag-ohay nga pagtuon sa Daang Tugon.

• Pagpangandam sa estudyante: Dapita ang mga estudyante nga mosulod sa klase nga andam ipakigbahin ang usa ka hulagway nga nagrepresentar sa mga talento o kahanas nga ilang naugmad, mga paagi nga sila milambo, o ang ilang mga kasinatian sa milabayng tuig o kapin pa. Kon wala silay makitang hulagway, pwede ra silang mohatag og ehemplo nga ipakigbahin.

• Mga hulagway: Pipila ka hulagway sa mga hitabo sa kasulatan diha sa Daang Tugon nga nagpakita sa Manluluwas o sa Iyang gahom (apil sa pipila ka ehemplo ang hulagway sa Manluluwas panahon sa Paglalang; Moises ug ang bitin nga naa sa sungkod; ang Manluluwas diha sa hudno uban ni Sadrac, Mesac, ug Abednego; ug si Daniel nga midumili sa karne ug bino sa hari).