Daniel 1–7: Leksiyon 144

Daniel 3

“Kon Kabubut-on sa Dios … Luwason kami Niya. … Apan Kon Dili”

Usahay milagroso kitang luwason sa Ginoo gikan sa atong mga pagsulay. Usahay pod dili ta Niya luwason sa paagi o sa panahon nga gilaoman nato. Sa bisan asa nga paagi, makapaningkamot kita nga mahimong sama ni Sadrac, Mesac, ug Abed-nego ug mosalig sa Ginoo, bisan kon sa unsang paagi ug kanus-a Niya pilion nga panalanginan ta. Kini nga leksiyon makatabang sa mga estudyante nga mobati og tinguha sa pagsalig ni Jesukristo bisan unsa pay mahitabo.

Pagpangandam sa estudyante: Dapita ang mga estudyante sa paghunahuna og matinud-anong mga disipulo ni Kristo nga milagrosong giluwas gikan sa ilang mga pagsulay. Dayon, ipahunahuna nila ang ubang matinud-anong mga disipulo nga wala maluwas. Pwede nilang pamalandongan kon unsay gitudlo niini nga mga asoy kanila bahin sa pagsalig sa Ginoo.

Posibleng mga Kalihokan sa Pagkat-on

Pagbaton og hugot nga pagtuo diha ni Jesukristo

Ikonsiderar ang pagsugod sa klase pinaagi sa pagpakigbahin sa mosunod nga asoy bahin sa anak ni Elder Bowen, si Tyson.

Pahinumdom: Ang bidyo nga bersiyon sa pahayag naglakip og dugang impormasyon nga wala sa nasulat nga pahayag.

Si Elder Shayne M. Bowen sa Seventy mipakigbahin sa mosunod nga personal nga kasinatian:

Dihang [ang akong anak nga] si Tyson walo na ka bulan, nakatulon [nakahanggab] siya og chalk nga iyang nakit-an sa carpet. Ang chalk mibara sa tutunlan ni Tyson, ug wala na siya kaginhawa. Ang iyang magulang nga lalaki midala kang Tyson sa taas, nakuyawan nga nagsinggit, “Ang bata dili na moginhawa. Ang bata dili na moginhawa.” Among gisugdan ang paghatag og CPR ug mitawag sa 911.

Ang mga paramedic miabot ug gidala og dali si Tyson sa ospital. Sa hulatanan nga lawak padayon kami sa pag-ampo samtang nangamuyo kami sa Dios og milagro. (“Tungod Kay Ako Buhi, Kamo Usab Mabuhi,” Liahona, Nob. 2012, 16)

• Sa unsang paagi ang lainlaing posibleng resulta niini nga sitwasyon makaapektar sa hugot nga pagtuo sa pamilya ngadto sa Dios?

Si Elder Bowen mipadayon:

Human sa daw walay kataposang pagpaabot, ang doktor misulod sa lawak ug miingon, “Pasensya kaayo. Wala na gyud kami mahimo. Buhata unsay inyong gusto dinhi, ayaw kabalaka sa oras.” Milakaw dayon siya.

Pagsulod namo sa lawak diin naghigda si Tyson, nakita namo ang among pinangga nga patay na. …

Nianang higayuna morag natapos ang among kalibotan. (“Tungod Kay Ako Buhi, Kamo Usab Mabuhi,” Liahona, Nob. 2012, 16)

Sama sa mga Bowen, nakasinati na tingali ka og mga higayon diin wala ka panalangini sa Ginoo sa paagi nga imong gilaoman. Pamalandonga ang mga kasinatian nimo o sa imong pamilya diin gibati nimo nga gipanalanginan o wala ka panalangini sa Ginoo sa resulta nga imong gusto.

Makatabang tingali ang pagpakita sa mosunod nga mga pangutana.

Pangutan-a ang imong kaugalingon sa mosunod nga mga pangutana:

• Sa unsang paagi ang imong mga kasinatian nakaimpluwensiya sa imong hugot nga pagtuo sa Langitnong Amahan ug ni Jesukristo?

• Gibati ba nimo nga makasalig ka Nila, bisan unsa pa nga mga panalangin ang imong madawat o dili madawat? Ngano o nganong dili?

Samtang magtuon ka sa Daniel 3 karon, hatagig pagtagad ang bisan unsang impresyon gikan sa Espiritu Santo nga makatabang sa pagpalig-on sa imong hugot nga pagtuo sa Langitnong Amahan ug kang Jesukristo bisan unsa pay mahitabo.

Usa ka lisod nga desisyon

Ikonsiderar ang pagsulat sa mosunod nga mga ngalan diha sa pisara: Sadrac, Mesac, ug Abed-nego. Ipakita ang hulagway sa bulawang imahe ug dapita ang mga estudyante nga ipakigbahin ang ilang nahibaloan bahin niini nga asoy. Pwede nimong i-summarize ang konteksto sa ubos gamit ang kaugalingon nimong mga pulong.

Ang hari sa Babilonia, si Nabucodonosor, mihimo og dakong bulawan nga imahe, o estatuwa. Kini gibana-bana nga 90 pye (27.4 metros) ang gihabogon ug 9 pye (2.74 metros) ang gilapdon (tan-awa sa Daniel 3:1). Gisugo sa hari ang tanan nga mohapa ug mosimba sa imahe kon motukar ang piho nga musika (tan-awa sa Daniel 3:4–5). Ang mga tawo nga dili mosimba sa bulawang imahe, itambog sa “nagdilaab nga hudno” (Daniel 3:6).

Base sa mahitabo sa dili pagsimba niini nga imahe, pamalandonga kon unsa kahay imong himoon kon tua pa ka didto.

Gipili ni Sadrac, Mesac, ug Abed-nego nga pasidunggan ang Dios pinaagi sa dili pagsimba sa imahe (tan-awa sa Daniel 3:12).

Aron tabangan ang mga estudyante sa pagtuon sa mosunod nga mga bersikulo, pwede nimong dapiton ang lima ka andam nga mga estudyante nga mobasa sa mga papel ni Nabucodonosor, Sadrac, Mesac, Abed-nego, ug ang tig-asoy. Ang mga estudyante nga mobasa sa papel ni Sadrac, Mesac, ug Abed-nego pwedeng mobasa og tag-usa ka bersikulo sa Daniel 3:16–18.

Basaha ang Daniel 3:13–18, nga pangitaon kon unsay imong nakat-onan gikan niini nga mga tawo bahin sa hugot nga pagtuo kang Jesukristo.

• Unsang mga leksiyon ang imong nakat-onan bahin sa hugot nga pagtuo diha kang Jesukristo?

  Tabangi ang mga estudyante nga makita nga makapakita kita sa atong hugot nga pagtuo kang Jesukristo pinaagi sa pagsalig Kaniya, bisan unsa pay mahitabo.

  Ikonsiderar ang pagdapit sa mga estudyante nga markahan ang hugpong sa mga pulong nga “luwason kami Niya” (bersikulo 17). Ipasabot nga ang pagkaila sa Dios mahimong mopanalanginan kanato sa unsay atong gilaoman nagpakita sa hugot nga pagtuo diha Kaniya.

  Dayon dapita ang mga estudyante nga markahan ang hugpong sa mga pulong nga “apan kon dili” (bersikulo 18). Pangutan-a ang mga estudyante kon unsay ilang nakat-onan bahin sa hugot nga pagtuo diha sa Dios gikan sa kaandam niining mga tawhana nga dawaton nga posibleng dili pilion sa Dios nga panalanginan sila sa unsay ilang gilaoman.

• Unsay kalainan tali sa pagbaton og hugot nga pagtuo kang Jesukristo batok sa hugot nga pagtuo sa mahitabo?

• Unsa ang modernong mga kahimtang diin ang usa ka tawo kinahanglang magpakita og hugot nga pagtuo ngadto kang Jesukristo kay sa pagtuo sa unsay mahitabo?

Ang resulta sa atong hugot nga pagtuo

Ikonsiderar ang pagpakita sa hulagway sa nagdilaab nga hudno nga naa sa sinugdanan sa leksiyon. Pwedeng tun-an sa mga estudyante ang mosunod nga mga bersikulo ug hisgotan ang mga pangutana sa ubos nga magkapares o sa gagmayng grupo.

Basaha ang Daniel 3:19–28, nga markahan ang mga pulong o hugpong sa mga pulong nga nakapadayeg nimo sa kasinatian ni Sadrac, Mesac, ug Abed-nego.

Aron tabangan ang mga estudyante nga mahanduraw kini nga mga bersikulo, pwede nimong ipasalida ang video nga “Shadrach, Meshach, and Abed-nego” (1:39), nga anaa sa ChurchofJesusChrist.org.

• Unsay ganahan kaayo nimo niini nga asoy?

• Unsay imong makat-onan bahin sa Dios gikan niini nga asoy?

Makatabang tingali ang pagpasabot nga bisan og giluwas sa Dios si Sadrac, Mesac, ug Abed-nego, tingali dili kita Niya kanunayng luwason gikan sa negatibo nga mga resulta. Aron mapakita kini, pwedeng kompletohon sa mga estudyante ang mosunod nga kalihokan.

Paghunahuna og mga asoy sa kasulatan diin ang mga tawo nagpakita og hugot nga pagtuo kang Jesukristo ug nakasinati gihapon og negatibong mga resulta.

Ikonsiderar ang pagsulat og Apan kon dili … diha sa pisara. Dayon pwedeng ilista sa mga estudyante sa ilawom niining hugpong sa mga pulong ang mga tawo nga ilang mahunahunaan. Kon naa pay oras, pwede nilang pangitaon ang mga asoy niining mga tawhana diha sa mga kasulatan, nga pangitaon ang mga ebidensiya nga misalig sa Dios kining mga tawhana. Ang mosunod maoy mga pananglitan nga pwede nimong ihatag sa mga estudyante kon gikinahanglan: Nephi (tan-awa sa 1 Nephi 18:10–16), Abinadi (tan-awa sa Mosiah 17:9–20), Joseph ug Hyrum Smith (tan-awa sa Doktrina ug mga Pakigsaad 135:1), o daghan pang matarong nga mga indibidwal (tan-awa sa Mga Hebreohanon 11:36–40).

• Sa unsang paagi kini nga mga asoy makatabang nimo nga mosalig sa Ginoo bisan unsa pay mahitabo?

• Unsay imong nahibaloan bahin sa Langitnong Amahan ug kang Jesukristo nga makatabang nimo sa pagsalig Kanila bisan unsa pay mahitabo?

Pagsalig kang Kristo

Ikonsiderar ang pagpahinumdom sa mga estudyante sa kasinatian ni Elder Bowen. Ang mosunod nga pahayag makatabang nilang makita kon sa unsang paagi misalig gihapon siya sa Ginoo bisan pa sa nahitabo niya.

Si Elder Bowen mipadayon sa pagpakigbahin sa iyang kasinatian:

Sa dihang gibati nako ang pagmahay, kasuko, ug kalooy sa kaugalingon nga misanap kanako, nag-ampo ko nga mausab ang akong kasingkasing. Pinaagi sa personal kaayo nga sagradong kasinatian, ang Ginoo mihatag kanako og bag-ong kasingkasing, ug bisan kon subo ug sakit kini, nausab ang akong panglantaw. Akong nasayran nga wala ko hikawi apan adunay dakong panalangin nga naghulat kanako kon ako magmatinud-anon.

Nausab ang akong kinabuhi, ug nagtan-aw ko sa unahan nga may paglaum, imbis molingi sa kawalay paglaum. …

Ako mopamatuod nga tungod Niya, gani ang atong Manluluwas nga si Jesukristo, kadtong mga pagbati sa kasubo, pag-inusara, ug kawalay paglaum usa ka adlaw pagatuhopon sa hingpit nga kalipay. Ako mopamatuod nga kita makasalig Kaniya. (“Tungod Kay Ako Buhi, Kamo Usab Mabuhi,” Liahona, Nob. 2012, 17)

• Sa unsang paagi nakatabang nimo ang kasinatian ni Elder Bowen?

• Kanus-a ka o ang imong kaila nagpakita og hugot nga pagtuo sa Langitnong Amahan ug kang Jesukristo pinaagi sa pagsalig Kanila bisan unsa pay mahitabo?

Sa imong journal sa pagtuon, isulat kon unsay makatabang nimo nga mosalig sa Langitnong Amahan ug ni Jesukristo bisan unsa pay mahitabo. Pwede nimong iapil kon sa unsang paagi ang mga leksiyon nga imong nakat-onan gikan sa Daniel 3 makatabang nimo sa mga pagsulay nga imong maatubang o kon unsay gilaoman nimong mahinumdoman sa umaabot.

Pwede nimong dapiton ang andam nga mga estudyante nga mopakigbahin. Ikonsiderar ang pagtapos pinaagi sa kaugalingon nimong pagpamatuod o pagbati bahin sa pagsalig diha sa Ginoo.

Dugang nga mga Kapanguhaan

Nganong usahay makasinati ko og negatibong mga hitabo human sa pagpakita og hugot nga pagtuo?

Si Presidente Jeffrey R. Holland sa Korum sa Napulog Duha ka Apostoles mitudlo:

Ang hugot nga pagtuo nagpasabot nga mosalig sa Dios sa maayo ug sa dautang mga panahon, bisan og naglakip kini sa mga pag-antos hangtod atong makita ang Iyang mga bukton nga ipadayag tungod og alang kanato. Posibleng lisod kana sa moderno natong kalibotan diin daghan ang nagtuo nga ang pinakamaayo sa kinabuhi mao ang paglikay sa tanang pag-antos, nga walay usa ang angayng maghingutas sa bisan unsa. Apan kana nga pagtuo dili gayod mosangpot aron “mahingkod kita sama sa kahingkod ni Kristo” [Mga Taga-Efeso 4:13]. …

… Ang Kristiyanidad makahupay, apan sa kasagaran dili komportable. Ang dalan sa pagkabalaan ug kalipay dinhi ug human dinhi layo ug usahay batoon. Nagkinahanglan og panahon ug determinasyon ang pagsubay niini. Apan siyempre, ang ganti sa paghimo niini dako ug mahinungdanon kaayo. (“Naghulat sa Ginoo,” Liahona, Nob. 2020, 116–17)

Unsay ipasabot sa pagpakita og hugot nga pagtuo kang Jesukristo dihang mag-atubang ko og mga pagsulay?

Si Elder David A. Bednar sa Korum sa Napulog Duha ka Apostoles mipasabot:

Ang lig-on nga pagtuo diha sa Manluluwas mao ang maaghup nga pagdawat sa Iyang kabubut-on ug tukmang panahon diha sa atong mga kinabuhi—bisan og ang sangpotanan dili mao ang atong gilauman o gusto. (“That We Might ‘Not … Shrink’ (D&C 19:18)” [Church Educational System devotional for young adults, March 3, 2013], Gospel Library)

Daniel 3:18. Unsay akong makat-onan bahin sa hugot nga pagtuo gikan sa hugpong sa mga pulong nga “apan kon dili”?

Si Elder Dennis E. Simmons sa Seventy mipakigbahin:

Kita kinahanglan gayod nga adunay sama sa hugot nga pagtuo nila ni Sadrac, Mesac, ug Abed-nego.

Ang atong Dios moluwas kanato gikan sa pagtamay ug paggukod, apan kon dili. … Ang atong Dios moluwas kanato gikan sa sakit ug balatian, apan kon dili. … Siya moluwas kanato gikan sa pag-inusara, kapit-os, o kahadlok, apan kon dili. … Ang atong Dios moluwas kanato gikan sa mga panghadlok, mga pasangil ug sa walay kasiguroan, apan kon dili. … Siya moluwas kanato gikan sa pagkamatay o pagkasakit sa atong mga minahal, apan kon dili, … kita mosalig diha sa Ginoo.

Ang atong Dios mosiguro nga kita makadawat og hustisya ug kaangayan, apan kon dili. … Siya mosiguro nga kita gihigugma ug giila, apan kon dili. … Kita makadawat og hingpit nga kauban ug matarong ug masulundon nga mga anak, apan kon dili, … kita magbaton og hugot nga pagtuo diha ni Ginoong Jesukristo, nasayod nga kon kita mobuhat sa tanan nga atong mahimo, kita makahimo, diha sa Iyang panahon ug diha sa Iyang pamaagi, mahimong maluwas ug madawat ang tanan nga anaa Kaniya. (“Apan Kon Dili …,” Liahona, Mayo 2004, 75)

Dugang nga mga Kalihokan sa Pagkat-on

Laing paagi sa pagsugod

Para sa laing paagi sa pagsugod sa leksiyon, ikonsiderar ang pagsulat sa mosunod nga hugpong sa mga pulong diha sa pisara:

Mosalig ko sa Dios basta dili ko mag-antos.

Mosalig ko sa Dios basta tubagon Niya ang akong mga pag-ampo sa paagi nga akong gilaoman.

• Ngano kaha nga matental man ang mga tawo sa paghunahuna niini nga paagi?

• Sa unsang paagi kini nga panghunahuna makaapektar sa relasyon sa usa ka tawo ngadto sa Langitnong Amahan ug kang Jesukristo?

Aron tabangan ang mga estudyante nga susihon ang ilang pagsalig sa Dios, ikonsiderar ang pagdapit nila nga pamalandongan ang mosunod nga mga pangutana sa pagsukod sa kaugalingon:

• Unsaon nimo paghulagway ang imong pagsalig sa Dios? Ngano man?

• Unsa ka dako ang imong pagsalig Kaniya dihang ang mga butang dili mahitabo sama sa imong gilaoman?

Usa ka modernong adlaw nga pananglitan

Aron tabangan ang mga estudyante nga makita ang usa ka modernong adlaw nga pananglitan sa mga kamatuoran nga gitudlo sa Daniel 3, ikonsiderar ang pagpasalida sa bidyo nga “I Was Waiting for God to Answer Me | His Grace” gikan sa time code 0:00 hangtod 3:26. Pwedeng pangitaon sa mga estudyante kon sa unsang paagi ang babaye diha sa bidyo nagpakita og hugot nga pagtuo sa Ginoo, bisan pa nga siya wala luwasa gikan sa iyang pag-antos. Pwede nimong ipasalida kini nga bidyo sa dili pa nimo mahuman ang istorya ni Elder Bowen sa kataposan sa leksiyon.

“Buhata Unsa ang Matarung”

Aron tabangan ang mga estudyante nga mosalig sa Ginoo bisan unsa pay mga sangpotanan, pwede nimo silang dapiton nga kantahon o paminawon ang himno nga “Buhata Unsa ang Matarung” (4:12). Pwede silang mopili og mga pulong o hugpong sa mga pulong nga makatabang nila nga mosalig sa Manluluwas bisan unsa pay mga sangpotanan.

Pagbarog nga lig-on sa atong hugot nga pagtuo kang Jesukristo

Aron hatagan og gibug-aton ang kaimportante sa pagbarog nga lig-on sa atong hugot nga pagtuo kang Kristo, dapita ang mga estudyante nga ipasabot kon sa unsang paagi ang atong kalibotan karon parehas sa Babilonia sa panahon ni Daniel. Pananglitan, pwede nilang ipakigbahin kon unsa nga mga tentasyon ang ilang nakita sa ilang palibot o kon sa unsang paagi sila napresyur sa pagkompromiso sa ilang mga sumbanan. Pwede nimo silang dapiton nga pamalandongan kon napresyur ba sila sukad nga ikompromiso ang ilang mga sumbanan o mga pagtuo.

Human matun-i ang Daniel 3, pwede nimong ipangutana ang mosunod:

• Unsay imong nakat-onan gikan niining mga tawhana nga makatabang nimo sa pagsalig sa Ginoo dihang mag-atubang ka og pagsupak, tentasyon, o pagpamugos sa pagkompromiso sa imong mga sumbanan?