Daniel 1–7: Leksiyon 145

Daniel 6

Pagpangita og mga Kamatuoran sa Ebanghelyo diha sa mga Kasulatan

Unsa nga istorya gikan sa Daang Tugon ang nagtudlo nimo og makahuloganong baroganan sa ebanghelyo? Gigamit ni Jesukristo Mismo ang Daang Tugon aron tabangan ang Iyang mga disipulo nga masabtan ang Iyang mga pagtulun-an (pananglitan, tan-awa sa Lucas 4:24–27). Usa sa kusganon kaayong istorya nga nagpakita og daghang kamatuoran sa ebanghelyo mao ang asoy sa hugot nga pagtuo ug pagsalig sa Ginoo ni Daniel, bisan nag-atubang sa langob sa mga liyon. Kini nga leksiyon makatabang sa mga estudyante nga mailhan ug mapakigbahin ang mga kamatuoran sa ebanghelyo gikan sa Daniel 6.

Pagpangandam sa estudyante: Dapita ang mga estudyante sa pagpamalandong sa mga istorya sa kasulatan nga ilang nakat-onan gikan sa ilang pagtuon sa Daang Tugon karong tuiga. Pwede silang mopili og istorya nga makahuloganon para nila ug sa pagpangandam sa pagpakigbahin og usa ka kamatuoran sa ebanghelyo diin ang istorya nakatabang nila nga masabtan.

Posibleng mga Kalihokan sa Pagkat-on

Ang leksiyon sa istorya

Aron tabangan ang mga estudyante nga magbansay sa pag-ila sa leksiyon sa usa ka istorya, pagpili og lokal nga pabula o sikat nga folktale. Pananglitan, pwede nimong gamiton ang istorya nga sama sa “The Ugly Duckling.” Sa laing paagi, pwede nimong ipasalida ang bidyo nga “Things That Matter Most” gikan sa time code 0:00 hangtod 0:22, nga anaa sa ChurchofJesusChrist.org. Dayon ipangutana ang mosunod:

• Unsa nga mensahe ang gitudlo niini nga istorya?

• Sa unsang paagi ikapakita sa maong mensahe ang kamatuoran bahin kang Jesukristo o sa Iyang ebanghelyo?

Sama ra nga makakita kita og mga kamatuoran sa komon nga mga pabula ug mga istorya, makakat-on kita sa pagpangita og importanteng mga kamatuoran sa ebanghelyo diha sa dinasig nga mga asoy sa kasulatan nga gitipigan sa Langitnong Amahan ug ni Jesukristo para nato.

Aron tabangan ta nga masabtan kon sa unsang paagi ang mga istorya sa kasulatan motudlo og mga kamatuoran sa ebanghelyo, si Elder Jay E. Jensen sa Seventy mitudlo:

Samtang ikaw magbasa ug magtuon niini nga mga istorya [sa kasulatan], ikaw makakita og usa ka pulong, hugpong sa mga pulong, o usa ka baroganan nga magamit nato karon sama sa nangagi. Samtang ikaw magpadayon sa imong mainampoong pagtuon, ang ubang mga baroganan magkaanam og kaklaro. Kon inyong usahon ang mga baroganan, kamo nagsugod sa paghimo og koneksyon sa mga propeta ug sa mga tawo kinsa nagpuyo sa nangagi—sila-didto-kaniadto—ug sa atong panahon—ako diri-karon. (“Mga Istorya sa Kasulatan isip mga Sumbanan sa Atong mga Kinabuhi,” Liahona, Hulyo 2009, 21)

• Unsay mipatigbabaw kanimo gikan sa mensahe ni Elder Jensen?

• Unsa nga istorya sa Daang Tugon ang nakatabang nimo nga mas masabtan si Jesukristo o ang Iyang ebanghelyo?

Ang mosunod nga pagsukod sa kaugalingon makatabang sa mga estudyante nga mabansay karon ang ilang kahanas sa pagpili sa parte sa pag-ila sa mga kamatuoran diha sa kasulatan.

Sa sukdanan nga 1 hangtod 5, gradohi ang imong kompiyansa sa paggamit sa mosunod nga mga kahanas sa pagtuon sa kasulatan:

• Mailhan nako ang mga kamatuoran sa ebanghelyo sa usa ka istorya sa kasulatan.

• Sayon ra nakong makita kon unsay gitudlo sa usa ka istorya sa kasulatan bahin ni Jesukristo.

• Magamit nako sa akong kinabuhi ang mga istorya sa kasulatan.

• Epektibo nakong mapakigbahin ngadto sa uban ang akong nakat-onan gikan sa mga istorya sa kasulatan.

Imong tun-an karon ang istorya sa basahon ni Daniel ug ipasabot ang unsay imong nakat-onan gikan niini. Pwede kang magpunting sa imong mga paningkamot sa katakos nga para nimo dili kaayo ka maayo. Dapita ang Espiritu Santo nga tabangan ka nga molambo ang imong abilidad sa pag-ila sa mga kamatuoran diha sa mga istorya sa kasulatan ug aron tudloan ang uban sa unsay imong nakat-onan bahin ni Jesukristo, sa Iyang kinabuhi, ug sa Iyang ebanghelyo.

Si Daniel gihulog ngadto sa langob sa mga liyon

Daghang tuig human gibihag sa Babilonia si Daniel ug ang iyang mga higala, ang nasod gipildi sa taga-Media ug taga-Persia. Si Dario, nga taga-Media, gihimong hari sa Babilonia (tan-awa sa Daniel 5:30–31).

Ang mosunod nga kalihokan makatabang sa mga estudyante nga mabansay sa pag-ila sa mga kamatuoran sa ebanghelyo diha sa mga istorya sa kasulatan pinaagi sa pagtuon sa asoy ni Daniel nga gihulog ngadto sa langob sa mga liyon (tan-awa sa Daniel 6). Makatabang tingali sa mga estudyante nga makabaton og mubong kinatibuk-ang pagpasabot sa istorya sa dili pa sila mangita og mga kamatuoran sa ebanghelyo diha niini. Ang mosunod mao ang pipila sa mga paagi nga imong ma-summarize ang istorya:

1. Pwede nimong hangyoon ang mga estudyante nga ipakigbahin ang istorya, nga grupo-grupohon sila aron basahon ang usa ka seksiyon. Dayon, pwedeng i-summarize sa kada grupo ang ilang bahin sa istorya para sa klase. Ang usa ka paagi sa pagbahin sa istorya mao ang:

   Daniel 6:1–5

   Daniel 6:6–11

   Daniel 6:12–17

   Daniel 6:18–23

   Daniel 6:24–28

2. Pwede nimong i-summarize ang tibuok istorya para sa klase. Kon anaa, pwede nimong gamiton ang mga imahe nga naa sa artikulo nga “Daniel and the Lions” (Friend, Nov. 2018, FJ4–FJ6) o ang video nga “Daniel and the Lions’ Den” (1:46), nga anaa sa ChurchofJesusChrist.org, nga makatabang nimo sa pag-summarize sa istorya.

Aron tabangan ang mga estudyante nga mabansay sa pag-ila sa mga baroganan sa ebanghelyo gikan sa mga istorya sa kasulatan, gamita ang handout nga “Ang mga Istorya sa Kasulatan Nagtudlo og mga Kamatuoran sa Ebanghelyo.” Tungod kay ang mga estudyante mopresentar sa ilang nakat-onan ngadto sa klase, labing maayo tingali nga makigtinabangay sila sa usa ka pares o sa gagmayng grupo. Ikonsiderar ang pagpares sa mga estudyante nga makulbaan tingali sa pagpresentar ngadto sa mga estudyante nga mas komportable sa paghimo niini.

Samtang gamiton sa mga estudyante ang handout sa pagpangandam sa ilang mga leksiyon, pwede kang molibot sa klasrom aron makita kon unsa nga mga kamatuoran sa ebanghelyo ang ilang nakaplagan. Kon naglisod sila, ikonsiderar kon unsaon nimo sila pagtabang sa pag-ila sa mga kamatuoran diha sa asoy. Ang mga pananglitan sa mga kamatuoran nga ila tingaling mailhan mao ang:

• Isip mga disipulo ni Kristo, makaatubang kita og mga pagsupak tungod sa atong mga pagtuo (Daniel 6:1–5).

• Panalanginan sa Ginoo ang atong mga paningkamot kon mobarog kita sa presyur sa kalibotan. (Daniel 6:6–16).

• Samtang atong buhaton ang unsay matarong ug mosalig sa Ginoo, makaimpluwensiya sa uban atong matarong nga panig-ingnan (Daniel 6:16–28).

Ipakigbahin ang imong nakat-onan

Human makompleto sa mga estudyante ang handout, dapita sila nga ipakigbahin ngadto sa laing grupo o sa klase ang leksiyon nga ilang giandam. Kon dili ipakigbahin sa mga estudyante ang mga parte sa istorya nga nagpahinumdom nila kang Jesukristo, pwede nimong ipasabot ang pipila ka pagtandi sama sa mosunod:

• Parehong gituman ni Daniel ug ni Jesus ang kabubut-on sa Langitnong Amahan, bisan nag-atubang og kamatayon (tan-awa sa Daniel 6:7, 10; Juan 6:38).

• Parehong milagrosong nakagawas nga buhi si Daniel ug si Jesus gikan sa usa ka gahong nga gitabonan og bato (tan-awa sa Daniel 6:17, 23; Marcos 15:46; 16:4–6).

Pwede nimong dasigon ang mga estudyante nga dad-on sa balay ang mga leksiyon nga ilang giandam ug ipakigbahin kini ngadto sa usa ka sakop sa pamilya o higala.

Sa pagtapos sa klase, ikonsiderar ang pagpakigbahin kon sa unsang paagi ka napanalanginan sa mga mensahe ni Jesukristo o sa Iyang ebanghelyo gikan sa mga istorya sa kasulatan. Dapita ang mga estudyante nga padayong pangitaon ang mga impresyon gikan sa Espiritu Santo aron tabangan sila nga makita ang mga kamatuoran sa ebanghelyo diha sa ilang personal nga pagtuon sa kasulatan.

Dugang nga mga Kapanguhaan

Unsaon nato pagpakita ang kaisog ni Daniel karon?

Si Presidente Thomas S. Monson (1927–2018) mipakigbahin:

Ang kaisog makita sa daghang matang. Ang Kristiyanong tagsulat nga si Charles Swindoll misulat: “Ang kaisog dili lang sa panggubatan … o sa maisogong manakop og kawatan sa inyong balay. Ang tinuod nga pagsulay sa kaisog mas hilom. Mao kini ang pagsulay sa kaugalingon, sama sa magpabiling matinud-anon bisan walay nagtan-aw, … mag-inusarang magbarog kon kamo wala masabti” [Hal Urban, Choices That Change Lives (2006), 122]. Modugang ko nga kining kaisog sa kaugalingon naglakip sa pagbuhat sa matarong nga butang bisan og kita nahadlok, pagpanalipod sa atong mga gituohan bisan sa risgo nga biay-biayon, ug mopadayon niadto nga mga gituohan bisan hulgaon nga mawad-an og mga higala o kahimtang sa katilingban. Siya kinsa magbarog nga makanunayon alang nianang unsay matarong kinahanglang morisgo usahay bisan ang uban mobiay-biay.

Samtang nagserbisyo sa United States Navy sa Ikaduhang Gubat sa Kalibutan, akong nakat-unan ang maisug nga mga binuhatan, kaisug sa makuyaw nga kahimtang, ug mga ehemplo sa kaisug. Usa niini nga dili gayod nako makalimtan mao ang mahilom nga kaisog sa 18 anyos nga seaman—dili nato kauban sa tinuohan—kinsa wala mahadlok nga mag-ampo. Sa 250 ka mga tawo sa pundok, siya lamang ang moluhod matag gabii sa kilid sa iyang higdaanan, taliwala sa mga dili matuohon nga mobiay-biay niya. Sa pagduko, siya nag-ampo ngadto sa Dios. Wala gayod siya mahadlok. Wala gayod siya magduha-duha. Duna siyay kaisog. (“Magmakusganon Ka ug Magmaisug,” Liahona, Mayo 2014, 67)

Si Presidente Jeffrey R. Holland sa Korum sa Napulog Duha ka Apostoles miingon:

Moabot ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong higayon magkinahanglan og kaisog ug maayong pamatasan sa inyong bahin. …

… Tingali maghunahuna mo kon may bili ba ang maisugong pagpanalipod sa pagka-moral atol sa inyong pag-high school o magmisyon diin ang inyong gitamod pag-ayo nga mga gituohan biay-biayon o makigbatok sa katilingban nga usahay motamay sa pagpakabuhi nga dunay relihiyosong debosyon. Oo, may bili kini. …

… Pagmalig-on. Pagpuyo nga matinud-anon sa ebanghelyo bisan og ang uban sa inyong palibot dili matinud-anon. Panalipdi ang inyong mga tinuohan uban sa maayong pamatasan ug kamanggiloy-on, [apan] panalipdi kini. (“Ang Bili—ug mga Panalangin—sa Pagkadisipulo,” Liahona, Mayo 2014, 6, 7, 9)

Dugang nga mga Kalihokan sa Pagkat-on

Si Jesus nanudlo gamit ang mga istorya sa kasulatan gikan sa Daang Tugon

Sa dili pa andamon ang ilang mga leksiyon gikan sa Daniel 6, makabenepisyo tingali ang mga estudyante sa pagkakita nga sagad mogamit si Jesukristo og mga istorya gikan sa Daang Tugon aron itudlo ang mga kamatuoran sa ebanghelyo ngadto sa Iyang mga tigpaminaw. Dapita ang mga estudyante nga tun-an ang usa sa mosunod nga mga tudling sa kasulatan, nga pangitaon kon giunsa paggamit ni Jesus ang mga istorya sa Daang Tugon aron itudlo ang importanteng mga kamatuoran:

• Mateo 12:38–40 (Jonas; tan-awa sa Jonas 1:17)

• Mateo 24:36–39 (Noe; tan-awa sa Genesis 6:13–22)

• Lucas 4:24–27 (usa ka babaye sa Sarefat; tan-awa sa 1 Mga Hari 17:1, 8–16; ug Naaman; tan-awa sa 2 Mga Hari 5:1–14)

• Lucas 17:28–33 (asawa ni Lot; tan-awa sa Genesis 19:24–26)

• Doktrina ug mga Pakigsaad 121:7–10 (Job; tan-awa ang pagbangotan ni Job bahin sa pagtratar kaniya sa iyang mga higala sa Job 6:14–15)

Human marebyo sa mga estudyante ang tudling nga ilang gipili, pwede kang magsugod og panaghisgot gamit ang mga pangutana nga sama sa mosunod:

• Unsa kaha nga mensahe ang gitudlo ni Jesus gamit ni nga estorya?

• Sa unsang paagi kini nga istorya sa Daang Tugon makatudlo sa tigpaminaw ngadto sa Manluluwas ug sa Iyang ebanghelyo?

Ang personal nga “langob sa mga liyon”

Ikonsiderar ang paggrupo-grupo sa mga estudyante ug pagdrowing og usa ka liyon diha sa pisara para sa kada grupo. Dapita ang kada grupo nga hisgotan ang lainlaing “langob sa mga liyon” (mga hagit) nga mahimong atubangon sa usa ka tawo tungod sa pagpili nga magmatinud-anon karon. Human ang igong panahon, dapita ang usa ka estudyante sa kada grupo sa pag-adto sa pisara ug butangan og label ang usa ka liyon sa mga hagit nga gihisgotan sa ilang grupo. Hangyoa ang mga estudyante nga ipakigbahin ang usa ka matinud-anong aksiyon nga mahimo sa usa ka tawo sa pagtubag sa mga hagit. Pwedeng hisgotan sa mga estudyante ang mga pangutana nga sama sa mosunod:

• Nganong pilion man nimo ang pagkamatinud-anon ngadto sa Ginoo bisan og nakahibalo ka nga makasinati tingali ka og pipila niini nga mga hagit isip resulta?

• Kanus-a ang Ginoo mitabang kanimo o sa tawo nga imong nailhan nga makalahutay o makabuntog sa usa ka hagit nga miabot isip resulta sa pagkamatinud-anon ngadto Kaniya?

Dapita ang mga estudyante sa pagpamalandong og mga sitwasyon sa ilang kinabuhi diin posibleng makasinati sila og mga hagit tungod sa pagkamatinud-anon ngadto sa Ginoo. Awhaga sila nga magmatinud-anon ngadto sa Ginoo niadto nga mga sitwasyon, ug pagpamatuod nga kon sila magmatinud-anon, ang Ginoo motabang kanila.

Mga panig-ingnan sa moral nga kaisog

Aron tabangan ang mga estudyante nga makita kon sa unsang paagi panalipdan sa Ginoo ang iyang mga sulugoon sa atong panahon, pwede nimong ipakigbahin ang usa sa mga pananglitan nga gilista sa ubos. Kon imong himoon, seguroa nga imong klarohon nga bisan og naay mga higayon nga panalipdan sa Dios ang mga matarong, gipahinumdoman kita sa Alma 60:13 nga naay mga higayon nga itugot sa Ginoo nga mag-antos bisan ang mga matarong.

Duha ka sister nga mga misyonaryo ang milagrosong gipanalipdan gikan sa kadaotan. Gipakigbahin ni Elder Christofferson sa Korum sa Napulog Duha ka Apostoles kini nga istorya diha sa “When Thou Art Converted” (time code 8:44 hangtod 10:02).

Usa ka 19 anyos nga si Joseph F. Smith nag-atubang og bangis nga manggugubot nga panon kinsa nangutana kon miyembro ba siya sa Ang Simbahan ni Jesukristo sa mga Santos sa Ulahing mga Adlaw: “Preparation of Joseph F. Smith: True Blue, Through and Through” (1:31).

Usa ka isog nga instructor sa militar ang nangutana kang Elder Larry Echo Hawk sa Seventy kon mituo ba siya sa Basahon ni Mormon: “Come unto Me, O Ye House of Israel,” (time code 0:00 hangtod 3:05).