« ការអនុវត្តចំណេះចំណានខាងគោលលទ្ធិទី ២ ៖ ការយល់ដឹង និងការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ការអនុវត្តចំណេះចំណានខាងគោលលទ្ធិទី ២ ៖ ការយល់ដឹង និងការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១៨–២៣ ៖ មេរៀនទី ២៨
ការអនុវត្តចំណេះចំណានខាងគោលលទ្ធិទី ២
ការយល់ដឹងពីគោលលទ្ធិ និងការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិអាចជួយសិស្សឲ្យស្ថាបនាគ្រឹះសម្រាប់ជីវិតរបស់ពួកគេនៅលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយសិស្សឲ្យយល់អំពីសេចក្តីពិតដែលបានបង្រៀននៅក្នុងវគ្គចំណេះចំណានខាងគោលលទ្ធិ ហើយអនុវត្តតាមគោលការណ៍ដ៏ទេវភាពនៃការទទួលបានចំណេះដឹងខាងវិញ្ញាណ ។
ការរៀបចំខ្លួនរបស់សិស្ស ៖ សូមអញ្ជើញសិស្សឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិដែលពួកគេចង់ស្វែងយល់កាន់តែច្បាស់ ។ បន្ទាប់មក សូមអញ្ជើញពួកគេឲ្យសិក្សាវគ្គនោះ ជញ្ជឹងគិតអំពីអត្ថន័យរបស់វា ហើយពិចារណាពីមូលហេតុដែលគោលលទ្ធិដែលបានបង្រៀននោះមានសារៈសំខាន់ ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ យល់ដឹង
សូមពិចារណាអញ្ជើញសិស្សឲ្យជញ្ជឹងគិតពីគ្រាមួយដែលពួកគេមានការលំបាកក្នុងការរៀនសូត្រ ឬធ្វើអ្វីមួយថ្មី ។ ឧទាហរណ៍អាចរួមបញ្ចូលការរៀនភាសាថ្មី ការហាត់ឧបករណ៍ ឬការលេងកីឡា ។ សិស្សអាចចែកចាយអ្វីដែលជួយពួកគេឲ្យរៀន និងយកឈ្នះលើបញ្ហាប្រឈមនៃការរៀនអ្វីថ្មី ។ ប្រសិនបើសិស្សមិនបានចែកចាយទេ អ្នកអាចបន្ថែមថា វាអាចមានអត្ថប្រយោជន៍ដើម្បីអត់ធ្មត់ និងចៀសវាងការប្រៀបធៀបការរីកចម្រើនរបស់អ្នកជាមួយអ្នកដទៃ ។
ដូចគ្នានេះដែរ ការរៀនសូត្រជំនាញថ្មីអាចជាការពិបាក ភាសានៃបទគម្ពីរ ជួនកាលអាចធ្វើឲ្យពួកគេពិបាកយល់ ។
-
តើមានអ្វីខ្លះដែលបានជួយអ្នក ឬអ្នកដទៃទៀតយល់កាន់តែច្បាស់អំពីភាសានៃបទគម្ពីរ ?
របៀបមួយដើម្បីបង្កើនការយល់ដឹងរបស់យើងអំពីវគ្គបទគម្ពីរ គឺត្រូវសិក្សាបទគម្ពីរដោយយកចិត្តទុកដាក់ ដោយប្រើឧបករណ៍សិក្សាព្រះគម្ពីរដើម្បីស្វែងយល់ និងបញ្ជាក់ពីភាសា និងអត្ថន័យ ។
សូមពន្យល់ថា នៅក្នុងមេរៀនផ្នែកនេះ សិស្សនឹងមានឱកាសយល់កាន់តែស៊ីជម្រៅអំពីវគ្គចំណេះចំណានខាងគោលលទ្ធិ ដែលពួកគេបានសិក្សារហូតមកដល់ពេលនេះ នៅក្នុងឆ្នាំនេះ ។ អ្នកអាចបង្ហាញសេចក្តីយោងចំណេះចំណានខាងគោលលទ្ធិនៃព្រះគម្ពីរសញ្ញាចាស់ចំនួនប្រាំមួយដំបូង និងឃ្លាបទគម្ពីរគន្លឹះ ដែលមាននៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។ សូមអញ្ជើញសិស្សឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិដែលពួកគេចង់ស្វែងយល់បន្ថែម ។
សម្រាប់សកម្មភាពសិក្សានេះ សិស្សអាចធ្វើការរៀងៗខ្លួន ឬជាក្រុមតូចៗជាមួយសិស្សផ្សេងទៀតដែលបានជ្រើសរើសវគ្គបទគម្ពីរដូចគ្នា ។ សូមពិចារណាបង្ហាញការណែនាំខាងក្រោម ។
-
សូមអានវគ្គចំណេះចំណានខាងគោលលទ្ធិយឺតៗ និងដោយយកចិត្តទុកដាក់ ដោយការអញ្ជើញយាងព្រះវិញ្ញាណបរិសុទ្ធដោយការអធិស្ឋាន ដើម្បីជួយបង្កើនការយល់ដឹងរបស់អ្នក ។ គូសចំណាំពាក្យ ឬឃ្លាណាមួយដែលអ្នករកឃើញថាមានអត្ថន័យ ។
-
សូមសរសេរសំណួរណាមួយដែលអ្នក ឬអ្នកដទៃទៀតអាចមានអំពីភាសា ឬអត្ថន័យនៃខគម្ពីរនោះ ។
-
សូមប្រើឧបករណ៍សិក្សាព្រះគម្ពីរដែលមានដើម្បីស្វែងរកនិយមន័យ ការបញ្ជាក់ន័យ សេចក្តីយោងឆ្លង សេចក្តីថ្លែងការណ៍ពីថ្នាក់ដឹកនាំសាសនាចក្រ ឬព័ត៌មានណាផ្សេងទៀតដែលអាចបន្ថែមការយល់ដឹងពីខគម្ពីរ ឬពាក្យ ឬឃ្លាដែលអ្នកបានគូសចំណាំ ។
-
ពិភាក្សាពីអ្វីដែលវគ្គបទគម្ពីរបង្រៀនអំពីព្រះវរបិតាសួគ៌ និងព្រះយេស៊ូវគ្រីស្ទ ។ អ្នកគិតថា ហេតុអ្វីបានជាវាសំខាន់សម្រាប់ក្មេងជំទង់ដើម្បីដឹង និងយល់ពីវគ្គបទគម្ពីរនេះ ?
ឧទាហរណ៍នៃលំនាំការសិក្សាបទគម្ពីរនេះ សូមមើលវីដេអូ « Analyzing a Passage » ( ៨:១២ ) ដែលមាននៅលើគេហទំព័រ ChurchofJesusChrist.org ។
បើមានពេលវេលាគ្រប់គ្រាន់ សិស្សអាចចែកចាយជាមួយអ្នកដទៃនូវអ្វីដែលពួកគេបានរកឃើញ និងរបៀបដែលវាបង្កើនការយល់ដឹងរបស់ពួកគេអំពីវគ្គបទគម្ពីរនេះ ។ ម៉្យាងទៀត សិស្សអាចអនុវត្តពន្យល់ពីគោលលទ្ធិនៃវគ្គបទគម្ពីរដល់ដៃគូ ដោយប្រើការយល់ដឹងបន្ថែមដែលពួកគេទទួលបានតាមរយៈសកម្មភាពសិក្សានេះ ។
អ្នកអាចលើកទឹកចិត្តសិស្សឲ្យប្រើបច្ចេកទេសទាំងនេះនៅក្នុងកិច្ចខិតខំប្រឹងប្រែងសិក្សាព្រះគម្ពីរផ្ទាល់ខ្លួនរបស់ពួកគេ ។
ពេញមួយថ្ងៃ សូមពិចារណាវគ្គចំណេះចំណានខាងគោលលទ្ធិដែលអ្នកបានជ្រើសរើស ដោយរកមើលចំណាប់អារម្មណ៍ពីព្រះវិញ្ញាណបរិសុទ្ធបង្រៀនអ្នកពីរបៀបដែលបទគម្ពីរនោះអាចផ្ដល់ពរដល់ជីវិតរបស់អ្នក ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
ចំណែកនៅសល់នៃមេរៀននេះផ្តោតទៅលើការជួយសិស្សឲ្យអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ទៅនឹងស្ថានភាពដែលទាក់ទង ។ មុនពេលបន្ត វាអាចមានអត្ថប្រយោជន៍ដើម្បីអញ្ជើញសិស្សឲ្យរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ សកម្មភាពរំឭកឡើងវិញដែលបានណែនាំនេះមាននៅក្នុងផ្នែកមួយនៃឧបសម្ព័ន្ធដែលមានចំណងជើងថា « សកម្មភាពរំឭកចំណេះចំណានខាងគោលលទ្ធិឡើងវិញ » ។ ការពិពណ៌នាអំពីគោលការណ៍ទាំងឡាយមាននៅក្នុងកថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។
សូមចាំថា មេរៀនអនុវត្តចំណេះចំណានខាងគោលលទ្ធិ មិនមែនចង់ណែនាំពីមាតិកាថ្មីនោះទេ ។ មេរៀនអនុវត្តចំណេះចំណានខាងគោលលទ្ធិផ្ដល់ឱកាសដល់សិស្សដើម្បីរំឭកពីអ្វីដែលពួកគេបានរៀនឡើងវិញ អនុវត្តការពន្យល់ពីអ្វីដែលបានរៀន ហើយអនុវត្តវាទៅនឹងសាច់រឿងដែលទាក់ទង ។ ការណ៍នេះអាចបង្កើនសមត្ថភាពរបស់សិស្សដើម្បីចងចាំ និងប្រើគោលការណ៍នៃគោលលទ្ធិសំខាន់ៗក្នុងជីវិតរបស់ពួកគេ ។
ដើម្បីជួយសិស្សអនុវត្តគោលការណ៍នៃការទទួលបានចំណេះដឹងខាងវិញ្ញាណ សូមពិចារណាបង្ហាញសាច់រឿងដូចខាងក្រោមនេះ ។ អ្នកអាចបត់បែនសាច់រឿងលម្អិតឲ្យសមស្របតាមតម្រូវការនៃសិស្សរបស់អ្នកបំផុត ។
ជំនួសឲ្យសាច់រឿងនេះ អ្នកអាចប្រើវីដេអូនេះបាន « Find Answers through Jesus » ( ១:០៤ ) ។
មិត្តរបស់អ្នកអេនឌី បានចែកចាយថា គាត់មានអារម្មណ៍មិនពេញចិត្តនឹងជីវិតរបស់គាត់នោះទេ ។ គាត់បានចំណាយពេលច្រើននៅលើទូរសព្ទ លេងហ្គេមវីដេអូ និងដើរលេងជាមួយមិត្តភក្តិ ប៉ុន្តែគាត់យល់ថា គាត់មិនមានពេលច្រើនសម្រាប់ព្រះ ឬគ្រួសាររបស់គាត់នោះទេ ។ ថ្មីៗនេះ គាត់ងឿងឆ្ងល់ថា តើជីវិតរបស់គាត់មានគោលបំណង និងអត្ថន័យជាងអ្វីដែលគាត់កំពុងឆ្លងកាត់ពេលបច្ចុប្បន្ននេះឬយ៉ាងណា ។
សូមបង្ហាញនៅលើក្ដារខៀននូវគោលការណ៍ចំនួនបីនៃការទទួលបានចំណេះដឹងខាងវិញ្ញាណ និងសំណួរដូចខាងក្រោមនេះ ។ សូមពិចារណាចាត់សិស្សជាក្រុមតូចៗ ឲ្យពិភាក្សាអំពីគោលការណ៍ និងរបៀបដែលពួកគេអាចតំណាងឲ្យគោលការណ៍ទាំងនោះដោយផ្ទាល់ភ្នែក ។ សូមអញ្ជើញសិស្សឲ្យបង្កើតកូនសៀវភៅ ឬប័ណ្ណប្រកាស ដែលអាចជួយនរណាម្នាក់ឲ្យប្រើគោលការណ៍នៃការទទួលបានចំណេះដឹងខាងវិញ្ញាណ ដើម្បីដោះស្រាយកង្វល់របស់ពួកគេ ។ អ្នកអាចចែកក្រដាស និងសម្ភារសិល្បៈផ្សេងៗ ។ សិស្សអាចបត់ក្រដាសនោះជាបីផ្នែក ហើយបង្ហាញពីគោលការណ៍មួយនៅលើផ្នែកនីមួយៗនៃកូនសៀវភៅនោះ ។ សូមលើកទឹកចិត្តសិស្សឲ្យមានភាពច្នៃប្រឌិតក្នុងការបង្ហាញពីគោលការណ៍ទាំងបីនេះ ។
ប្រសិនបើចាំបាច់ សំណួរខាងក្រោមនេះអាចជួយសិស្សយល់កាន់តែច្បាស់អំពីរបៀបអនុវត្តគោលការណ៍នៃការទទួលបានចំណេះដឹងខាងវិញ្ញាណ ។ សូមចាំថា សកម្មភាពនេះគឺមានគោលបំណងផ្តល់ឱកាសឲ្យសិស្សអនុវត្តការចែកចាយនូវអ្វីដែលពួកគេបានរៀន ។ ខណៈដែលអ្នកជាគ្រូបង្រៀន អ្នកអាចជួយសម្របសម្រួលការពិភាក្សារបស់ពួកគេ និងផ្តល់ជំនួយតាមតម្រូវការ សូមព្យាយាមឲ្យអស់ពីសមត្ថភាពដើម្បីបង្កើតបរិយាកាសមួយ ដែលសិស្សអាចដឹកនាំការពិភាក្សា ។
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
-
តើការរក្សាទស្សនវិស័យដ៏អស់កល្បមួយ អាចមានអត្ថប្រយោជន៍ក្នុងស្ថានភាពនេះយ៉ាងដូចម្ដេច ?
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
-
តើវគ្គចំណេះចំណានខាងគោលលទ្ធិ សេចក្ដីយោងបទគម្ពីរផ្សេងទៀត ឬសេចក្ដីថ្លែងការណ៍ពីថ្នាក់ដឹកនាំសាសនាចក្រណាមួយខ្លះ ដែលអាចមានអត្ថប្រយោជន៍ដល់អេនឌី និងស្ថានភាពរបស់គាត់ ?
សូមពិចារណាលើកទឹកចិត្តសិស្សឲ្យប្រើបណ្ណាល័យដំណឹងល្អដើម្បីស្វែងរកប្រភពបី ឬជាច្រើនទៀត ដែលពួកគេនឹងណែនាំឲ្យអេនឌីសិក្សា ។ ប្រសិនបើសិស្សត្រូវការជំនួយ សូមស្វែងរកសេចក្តីយោងបទគម្ពីរ នោះអ្នកអាចផ្ដល់ខគម្ពីរដូចជា លោកុប្បត្តិ ១២:១–៣; ម៉ូសេ ១:៦, ៣៩; ម៉ូសេ ៦:២៦–៣៣ និង អ័ប្រាហាំ ៣:២២–២៣ ។
ធ្វើសកម្មភាពដោយសេចក្តីជំនឿ
-
តើមានរឿងជាក់លាក់អ្វីខ្លះដែលអេនឌីអាចធ្វើដើម្បីមើលឃើញពីអត្ថន័យ និងគោលបំណងដ៏ធំនៃជីវិតរបស់គាត់ ?
សូមផ្តល់ឱកាសដល់សិស្សឲ្យចែកចាយប័ណ្ណប្រកាស ឬកូនសៀវភៅរបស់ពួកគេជាមួយក្រុមផ្សេងទៀត ។
ដើម្បីបញ្ចប់ថ្នាក់ អ្នកអាចផ្តល់ឱកាសដល់សិស្សឲ្យឆ្លើយតបសំណួរដូចខាងក្រោមនេះ ដូចជាការពិភាក្សា ឬកត់ត្រាគំនិតរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។
-
តើការយល់ដឹងអ្វីខ្លះដែលអ្នករកឃើញថាមានអត្ថន័យកាលដែលអ្នកបានសិក្សានៅថ្ងៃនេះ ?
-
តើគោលការណ៍នៃការទទួលបានចំណេះដឹងខាងវិញ្ញាណអាចជួយអ្នកចូលកាន់តែជិតព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?