លោកុប្បត្តិ ១៩ ៖ « កុំឲ្យមើលមកក្រោយឡើយ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ១៩ ៖ ‹ កុំឲ្យមើលមកក្រោយឡើយ › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១៨–២៣ ៖ មេរៀនទី ២៦
លោកុប្បត្តិ ១៩
« កុំឲ្យមើលមកក្រោយឡើយ »
ព្រះអម្ចាស់តែងតែខ្វល់ខ្វាយអំពីឥទ្ធិពលអាក្រក់ក្នុងជីវិតរបស់យើង ។ សមាជិកគ្រួសាររបស់ឡុត បានរងឥទ្ធិពលអាក្រក់ដែលបានឡោមព័ទ្ធពួកគេនៅក្នុងទីក្រុងសូដុំម ។ មេរៀននេះអាចជួយសិស្សចៀសវាងពីឥទ្ធិពលអាក្រក់ក្នុងជីវិតរបស់ពួកគេ ដើម្បីឲ្យពួកគេអាចធ្វើតាមព្រះវរបិតាសួគ៌ និងព្រះយេស៊ូវគ្រីស្ទកាន់តែពេញលេញ ។
ការរៀបចំខ្លួនរបស់សិស្ស ៖ សូមអញ្ជើញសិស្សឲ្យគិតអំពីឥទ្ធិពលក្នុងជីវិតរបស់ពួកគេ ឬការល្បួងដែលពួកគេប្រឈមមុខដែលរារាំងពួកគេមិនឲ្យធ្វើតាមព្រះវរបិតាសួគ៌ និងព្រះយេស៊ូវគ្រីស្ទ ។ សូមអញ្ជើញពួកគេឲ្យគិតអំពីមូលហេតុដែលពួកគេត្រូវដកឧបសគ្គទាំងនេះចេញពីជីវិតរបស់ពួកគេ និងរបៀបដែលពួកគេអាចធ្វើកិច្ចការនោះបាន ។
សកម្មភាពរៀនសូត្រដែលអាចមាន
ជម្រើសតូចៗដែលមានផលវិបាកធំ
អែលឌើរ ម៉ាស៊ីម៉ូ ឌី ហ្វីអូ នៃពួកចិតសិបនាក់បានចែកចាយសេចក្ដីពិតដ៏សំខាន់មួយអំពីឥទ្ធិពលដែលជម្រើសរបស់យើងអាចមាន ៖
ការសម្រេចចិត្តដែលយើងធ្វើជារៀងរាល់ថ្ងៃ ទោះជាវាតូចក្ដី ប៉ុន្តែវាតែងតែមានផលប៉ះពាល់ពិតប្រាកដ និងផលវិបាកដ៏ធំសម្រាប់សេចក្ដីល្អ ឬសេចក្ដីអាក្រក់ ។ ( « Small Choices, Big Consequences » Ensign ខែ សីហា ឆ្នាំ ២០១៩ ទំព័រ ៣៤ )
-
តើគំរូមួយចំនួននៃការជ្រើសរើសតូចៗដែលយើងធ្វើដែលអាចមានផលវិបាកធំៗមានអ្វីខ្លះ ?
បើចាំបាច់ សូមពិចារណាចែកចាយឧទាហរណ៍ពីរបី ដូចជាប្រព័ន្ធផ្សព្វផ្សាយសង្គមដែលយើងប្រើ ប្រភេទមិត្តភក្ដិដែលយើងជ្រើសរើស ឬការជ្រើសរើសដែលយើងធ្វើចំពោះការសិក្សាព្រះគម្ពីរ ការចូលរួមព្រះវិហារ ឬការអធិស្ឋាន ។ គំរូផ្សេងទៀតអាចទាក់ទងកាន់តែច្រើនទៅនឹងសិស្សរបស់អ្នក ។ សូមអញ្ជើញសិស្សឲ្យពិភាក្សាអំពីរបៀបដែលការជ្រើសរើសទាំងនេះអាចមានផលវិបាកដ៏ធំ សម្រាប់សេចក្ដីល្អ ឬអាក្រក់ ។
បន្ទាប់មក សូមចែកចាយឃ្លាខាងក្រោមនេះដើម្បីជួយសិស្សត្រៀមខ្លួនខាងវិញ្ញាណសម្រាប់មេរៀនថ្ងៃនេះ ។
សូមគិតអំពីការជ្រើសរើសដែលអ្នកកំពុងធ្វើនាពេលបច្ចុប្បន្នដែលជួយអ្នកឲ្យធ្វើតាមព្រះវរបិតាសួគ៌ និងព្រះយេស៊ូវគ្រីស្ទ ។ សូមគិតអំពីការជ្រើសរើសដែលអាចនាំអ្នកឲ្យចាកចេញពីទ្រង់ទាំងទ្វេផងដែរ ។ ពេលអ្នកសិក្សានៅថ្ងៃនេះ សូមផ្ដោតទៅលើចំណាប់អារម្មណ៍ខាងវិញ្ញាណដែលអ្នកទទួលបានអំពីរបៀបដែលអ្នកអាចខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។
ឡុតបោះត្រសាលរបស់គាត់ឆ្ពោះទៅរកទីក្រុង សូដុំម
ព្រះគម្ពីរសញ្ញាចាស់មានដំណើររឿងមួយអំពីបុរសម្នាក់ឈ្មោះ ឡុត ត្រូវជាក្មួយប្រុសរបស់អ័ប្រាហាំ ។ ឡុត និងគ្រួសាររបស់គាត់រស់នៅទីក្រុង សូដុំមដែលត្រូវបានស្គាល់ថា មានភាពទុច្ចរិតខ្លាំង( សូមមើល លោកុប្បត្តិ ១៣:១៣; ១៨:២០; អេសេគាល ១៦:៤៩–៥០; យូដាស ១:៧–៨ ) ។ វាគឺជាការជ្រើសរើសតូចមួយដែលហាក់ដូចជាបាននាំឡុត និងគ្រួសាររបស់គាត់ឲ្យរស់នៅក្នុងទីក្រុងសូដុំម ។
សូមអញ្ជើញសិស្សឲ្យចែកចាយអ្វីដែលពួកគេដឹងអំពីកាលៈទេសៈដែលនាំឲ្យឡុត រស់នៅក្នុងក្រុង សូដុំម ។ ការពន្យល់ខាងក្រោមនេះអាចត្រូវបានប្រើតាមដែលចាំបាច់ ។
ក្រោយពីអ័ប្រាហាំ ឡុត និងក្រុមគ្រួសាររបស់ពួកគេបានផ្លាស់លំនៅពីស្រុកអេស៊ីព្ទ ទៅស្រុកកាណាន នោះមានការខ្វែងគំនិតគ្នារវាងអ្នកចិញ្ចឹមសត្វរបស់អ័ប្រាហាំ និងអ្នកចិញ្ចឹមសត្វរបស់ ឡុត លើដីចិញ្ចឹមសត្វរបស់ពួកគេ ។ ដើម្បីជួយបញ្ចៀសការឈ្លោះប្រកែកគ្នាថែមទៀត អ័ប្រាហាំ និង ឡុត បានបំបែកក្រុមគ្រួសាររបស់ពួកគេ ហើយបានសម្រេចចិត្តរកទីកន្លែងរស់នៅរៀងៗខ្លួន( សូមមើល លោកុប្បត្តិ ១៣:៨–៩ ) ។
ជាជាងអានខគម្ពីរខាងក្រោមរួមគ្នា សិស្សអាចអានវាជាមួយដៃគូ ។ ដៃគូអាចអានខគម្ពីរទាំងនេះ ហើយគូររូបភាពដែលបង្ហាញពីសកម្មភាពរបស់ឡុត និងអ័ប្រាហាំ ។
សូមអាន លោកុប្បត្តិ ១៣:១០–១៣, ១៨ ដោយរកមើលទីកន្លែងដែលគ្រួសារនីមួយៗសម្រេចចិត្តរស់នៅ ។ ( នៅក្នុងខគម្ពីរទាំងនេះ អាប់រ៉ាម សំដៅទៅលើអ័ប្រាហាំ ។ ក្រោយមក ព្រះអម្ចាស់បានប្ដូរឈ្មោះរបស់លោកទៅជាអ័ប្រាហាំ ដូចដែលបានកត់ត្រានៅក្នុង លោកុប្បត្ដិ ១៧:៥ ) ។
-
តើអ្នកបានសង្កេតឃើញភាពខុសគ្នាអ្វីខ្លះរវាងការសម្រេចចិត្តរបស់គ្រួសារនីមួយៗ ?
-
តើការសម្រេចចិត្តអ្វីខ្លះដែលមនុស្សម្នាក់អាចធ្វើនៅសព្វថ្ងៃនេះ ដែលវាអាចស្រដៀងគ្នាទៅនឹង ឡុត បានបោះត្រសាលរបស់គាត់ទៅរកទីក្រុង សូដុំម ? តើអ្នកអាចផ្ដល់ដំបូន្មានអ្វីខ្លះនៅក្នុងស្ថានភាពទាំងនេះ ?
ប្រសិនបើសិស្សពិបាកគិតអំពីការសម្រេចចិត្តសម័យទំនើបដែលស្រដៀងគ្នាទៅនឹងឡុត កំពុងបោះត្រសាលរបស់គាត់ទៅរកទីក្រុងសូដុំម នោះអ្នកអាចចែកចាយឧទាហរណ៍មួយចំនួន បន្ទាប់មកអនុញ្ញាតឲ្យសិស្សផ្តល់ដំបូន្មានសម្រាប់ស្ថានភាពទាំងនេះ ។ ឧទាហរណ៍អាចរួមបញ្ចូលការប្រើភាសាមិនស្អាតស្អំ ការជ្រើសរើសប្រព័ន្ធផ្សព្វផ្សាយសង្គមដែលមានមាតិកាមិនសមរម្យ ការបន្ទាបបទដ្ឋាននៃការស្លៀកពាក់ ឬភាពថ្លៃថ្នូរដើម្បីចូលចំណោម ឬចំណាយពេលជាមួយមិត្តភក្តិដែលមិនគោរពការបង្រៀនរបស់ព្រះអង្គសង្គ្រោះ ។
ការបំផ្លាញទីក្រុងសូដុំម និងកូម៉ូរ៉ា
ឡុត និងគ្រួសាររបស់គាត់មិនបានបន្តរស់នៅក្នុងត្រសាលដែលពួកគេបានបោះឆ្ពោះទៅទីក្រុងសូដុំមនោះទេ ។ នៅទីបំផុត ពួកគេបានផ្លាស់ ហើយ « នៅ ក្រុងសូដុំម » ( លោកុប្បត្តិ ១៤:១២ បានបន្ថែមការគូសបញ្ជាក់ ) ។
សិស្សអាចធ្វើសេចក្ដីយោងបទគម្ពីរ លោកុប្បត្តិ ១៤:១២ ជាមួយនឹង លោកុប្បត្ដិ ១៣:១២ នៅក្នុងគម្ពីររបស់ពួកគេ ។ ប្រសិនបើសិស្សបានបង្កើតគំនូរមួយនៅដើមមេរៀន អ្នកក៏អាចអញ្ជើញពួកគេឲ្យធ្វើបច្ចុប្បន្នភាពគំនូររបស់ពួកគេដើម្បីឆ្លុះបញ្ចាំងពីទីតាំងថ្មីរបស់ឡុតផងដែរ ។
ពួកអ្នកស្រុកសូដុំម និងក្រុងកូម៉ូរ៉ាដែលនៅជិតនោះបានបដិសេធព្យាការីដែលព្រះអម្ចាស់បានចាត់ឲ្យមកព្រមានពួកគេ ( សូមមើល Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២០៣ ) ។ ដោយសេចក្តីមេត្តាករុណារបស់ទ្រង់ ព្រះអម្ចាស់បានចាត់សារទូតទៅទីក្រុងសូដុំមដើម្បីព្រមានឡុត និងគ្រួសាររបស់គាត់ឲ្យចាកចេញមុនពេលទីក្រុងនោះត្រូវបានបំផ្លាញចោល ( សូមមើល លោកុប្បត្តិ ១៩:១២–១៣ ) ។ ពីព្រោះប្រជាជននោះបានបដិសេធពួកព្យាការី ហើយបានបន្តក្នុងសេចក្ដីទុច្ចរិត ពួកគេត្រូវបានបំផ្លាញចោល ។
សូមអាន លោកុប្បត្តិ ១៩:១៤–១៩, ២៤–២៦ ដោយរកមើលរបៀបដែលឡុត និងគ្រួសាររបស់គាត់បានឆ្លើយតបទៅនឹងការណែនាំឲ្យចាកចេញពីទីក្រុងនោះឲ្យបានឆាប់រហ័ស ។
-
តើអ្នកចាប់អារម្មណ៍អ្វីខ្លះនៅក្នុងខគម្ពីរទាំងនេះ ? ហេតុអ្វី ?
-
តើខគម្ពីរទាំងនេះបង្រៀនអ្នកអ្វីខ្លះអំពីព្រះអម្ចាស់ ?
អ្នកក៏គួរសួរសិស្សពីអ្វីដែលពួកគេកំពុងរៀន ដែលអាចជួយមនុស្សម្នាក់ដែលមានអារម្មណ៍ថាវាមិនអីទេដើម្បីចូលរួមក្នុងទង្វើទុច្ចរិតដ៏តូចមួយនោះ ។
ដើម្បីជួយសិស្សឲ្យយល់ពីមូលហេតុដែលភរិយារបស់ឡុតបានប្រែក្លាយជា « បង្គោលអំបិល » ( ខទី ២៦ ) វាអាចជួយពន្យល់ថា ភរិយារបស់ឡុតប្រហែលជាមិនគ្រាន់តែក្រឡេកមើលក្រោយប៉ុណ្ណោះទេ តែប្រហែលជាបានត្រឡប់ទៅទីក្រុង សូដុំមវិញ ( សូមមើល លូកា ១៧:២៨–៣២ ) ។ អ្នកក៏អាចចែកចាយសេចក្តីថ្លែងការណ៍ដូចខាងក្រោមដោយប្រធាន ជែហ្វ្រី អ័រ ហូឡិន ផងដែរ ។
ប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានចែកចាយហេតុផលដែលអាចមាន ដែលភរិយារបស់ឡុតបានប្រែទៅជា « បង្គោលអំបិល » ( ខទី ២៦ ) ៖
តាមមើលទៅ អ្វីដែលភរិយារបស់ ឡុត បានធ្វើខុសគឺថា នាងមិនគ្រាន់តែ គិតចង់ ត្រឡប់ក្រោយវិញនោះទេ គឺនាងមានបំណងប្រាថ្នាចង់ ត្រឡប់ ទៅវិញតែម្តង ។ …
វាអាចទៅរួចដែលថាភរិយារបស់ឡុត ងាកត្រឡប់មើលក្រោយដោយការអាក់អន់ចិត្តនឹងព្រះអម្ចាស់ចំពោះអ្វីដែលទ្រង់បានបង្គាប់ឲ្យនាងបោះបង់ចោលនោះ ។ ( « Remember Lot’s Wife » [ ការប្រជុំធម្មនិដ្ឋាននៅសាកលវិទ្យាល័យព្រិកហាំយ៉ង់នៅថ្ងៃទី ១៣ ខែ មករា ឆ្នាំ ២០០៩ ] ទំព័រ ២ នៅលើគេហទំព័រ speeches.byu.edu )
សូមពិចារណាអញ្ជើញសិស្សឲ្យពិភាក្សាសំណួរខាងក្រោមជាមួយដៃគូ ឬក្រុមតូចមួយ មុនពេលពួកគេចែកចាយចម្លើយរបស់ពួកគេជាមួយសិស្សក្នុងថ្នាក់ ។
-
តើសេចក្ដីពិតមួយចំនួនអ្វីខ្លះដែលអ្នករៀនមកពីដំណើររឿងរបស់ឡុត និងគ្រួសាររបស់គាត់ ដែលអាចអនុវត្តចំពោះស្ថានភាពដែលអ្នកប្រឈមមុខក្នុងជីវិតរបស់អ្នក ?
ដោយប្រើពាក្យសម្តីផ្ទាល់ខ្លួន សិស្សអាចស្វែងរកសេចក្ដីពិតដូចខាងក្រោម ៖
ការអនុញ្ញាតឲ្យឥទ្ធិពលអាក្រក់ចូលក្នុងជីវិតរបស់យើង—សូម្បីតែតូចក្ដី—ក៏វាអាចនាំយើងចេញពីព្រះយេស៊ូវគ្រីស្ទបានដែរ ។
ក្នុងនាមជាសិស្សរបស់ព្រះយេស៊ូវគ្រីស្ទ យើងគួរតែគេចចេញពីអំពើទុច្ចរិត ហើយកុំបែរមើលក្រោយឡើយ ។
ដើម្បីជួយសិស្សឲ្យយល់កាន់តែច្បាស់ និងទទួលអារម្មណ៍ពីសារៈសំខាន់នៃសេចក្តីពិតទាំងនេះ សូមពិចារណាពិភាក្សាសំណួរដូចខាងក្រោម ។
-
តើអ្វីអាចជួយអ្នកឲ្យស្គាល់ពីឥទ្ធិពលតូចតាច ដែលនឹងនាំអ្នកចេញឆ្ងាយពីព្រះវរបិតាសួគ៌ និងព្រះយេស៊ូវគ្រីស្ទ ?
-
តើព្រះអង្គសង្គ្រោះអាចជួយយើងឲ្យទុកចោលកំហុសអតីតកាលរបស់យើង ហើយឈានទៅមុខដោយសេចក្ដីជំនឿយ៉ាងដូចម្ដេច ?
សូមអញ្ជើញសិស្សឲ្យចែកចាយបទពិសោធន៍ដែលពួកគេមានដែលទាក់ទងនឹងសេចក្ដីពិតដែលអ្នកកំពុងពិភាក្សា ។ អ្នកក៏អាចចែកចាយអំពីបទពិសោធន៍របស់អ្នកផ្ទាល់ផងដែរ ។
អនុវត្តវានៅក្នុងជីវិតរបស់អ្នក
ដើម្បីជួយសិស្សអនុវត្តសេចក្ដីពិតដែលពួកគេបានសិក្សា សូមដាក់បង្ហាញនូវការណែនាំ និងសំណួរដូចខាងក្រោមនេះ ។ សូមអញ្ជើញសិស្សឲ្យស្វែងរកការបំផុសគំនិតពីព្រះដើម្បីទទួលស្គាល់ការផ្លាស់ប្ដូរដែលទ្រង់ចង់ឲ្យពួកគេធ្វើ ។
សូមគិតពីសកម្មភាពដែលអ្នកបានទទួលការបំផុសគំនិតឲ្យធ្វើ ដោយសារតែអ្វីដែលអ្នកបានសិក្សានៅថ្ងៃនេះ ។ នៅក្នុងសៀវភៅកំណត់ហេតុការសិក្សារបស់អ្នក សូមសរសេរផែនការមួយសម្រាប់អ្វីដែលអ្នកនឹងធ្វើ និងពេលណាដែលអ្នកនឹងធ្វើវា ។ បើចាំបាច់ សំណួរខាងក្រោមអាចជួយអ្នកបង្កើតផែនការមួយ ៖
-
តើអ្វីខ្លះទៅដែលទំនងជាការសម្រេចចិត្តតូចតាចដែលអ្នកកំពុងធ្វើនាពេលបច្ចុប្បន្ននេះ ដែលនៅទីបំផុតអាចនាំអ្នកចេញពីព្រះវរបិតាសួគ៌ និងព្រះយេស៊ូវគ្រីស្ទ ? តើអ្នកនឹងធ្វើការផ្លាស់ប្ដូរអ្វីខ្លះ ?
-
តើអ្នកនឹងធ្វើអ្វីខ្លះដើម្បីទុកកំហុសពីអតីតកាលចោល ហើយឈានទៅមុខដោយសេចក្ដីជំនឿលើព្រះយេស៊ូវគ្រីស្ទ ?
សូមពិចារណាថ្លែងទីបន្ទាល់អំពីសេចក្ដីពិតដែលអ្នកបានសិក្សានៅថ្ងៃនេះ ។ សូមលើកទឹកចិត្តសិស្សឲ្យធ្វើសកម្មភាពតាមផែនការរបស់ពួកគេ ។