« លោកុប្បត្ដិ ២២ ៖ និមិត្តរូបអំពីព្រះយេស៊ូវគ្រីស្ទ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្ដិ ២២ ៖ និមិត្តរូបអំពីព្រះយេស៊ូវគ្រីស្ទ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១៨–២៣ ៖ មេរៀនទី ២៧
លោកុប្បត្តិ ២២
និមិត្តរូបអំពីព្រះយេស៊ូវគ្រីស្ទ
ចិត្តគំនិតក្នុងជីវិតរមែងស្លាប់របស់យើងប្រហែលជាមិនអាចយល់បានពេញលេញនូវព្រះបញ្ញត្តិដ៏គួរឲ្យសោកសៅដែលព្រះបានប្រទានដល់អ័ប្រាហាំ ឲ្យបូជាកូនប្រុសរបស់លោកគឺអ៊ីសាកឡើយ ។ យ៉ាកុបដែលជាព្យាការីសាសន៍នីហ្វៃបានបង្កើនការយល់ដឹងរបស់យើងអំពីនិមិត្តសញ្ញាដ៏មានឥទ្ធិពលនៃបទបញ្ញត្តិនេះ នៅពេលលោកបានបង្រៀនថា ការបូជានោះគឺជា « និមិត្តរូបអំពីព្រះ និងព្រះរាជបុត្រាបង្កើតតែមួយរបស់ទ្រង់ » ( យ៉ាកុប ៤:៥ ) ។ មេរៀននេះអាចជួយសិស្សឲ្យទទួលសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះពួកគេ ។
ការរៀបចំខ្លួនរបស់សិស្ស ៖ សូមអញ្ជើញសិស្សឲ្យស្វែងរកបទគម្ពីរមួយដែលពួកគេរកឃើញដែលបានជួយពួកគេឲ្យស្គាល់សេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះយើង ។ សូមឲ្យពួកគេត្រៀមខ្លួនចែកចាយវានៅក្នុងថ្នាក់រៀន ។
សកម្មភាពរៀនសូត្រដែលអាចមាន
សេចក្តីស្រឡាញ់របស់ព្រះ
សូមពិចារណាចាប់ផ្តើមមេរៀននេះដោយចែកចាយសេចក្តីថ្លែងការណ៍ខាងក្រោមនេះ ។
ប្រធាន ឌៀថើរ អេហ្វ អុជដូហ្វ ដែលកាលនោះជាសមាជិកម្នាក់នៅក្នុងគណៈប្រធានទីមួយបានពិពណ៌នាអំពីសេចក្ដីស្រឡាញ់ដែលព្រះវរបិតាសួគ៌មានចំពោះបុត្រាបុត្រីរបស់ទ្រង់ ៖
សូមគិតពីសេចក្ដីស្រឡាញ់ដ៏សុទ្ធសាធបំផុតដែលអ្នកអាចស្រមៃឃើញ ។ ឥឡូវនេះ សូមគុណសេចក្ដីស្រឡាញ់នោះនឹងចំនួនអនន្ត—នោះគឺជារង្វាស់នៃសេចក្ដីស្រឡាញ់របស់ព្រះចំពោះអ្នក ។
ព្រះមិនបានទតមើលតែសំបកក្រៅនោះទេ ។ ខ្ញុំជឿជាក់ថា ទ្រង់មិនខ្វល់ឡើយ ទោះជាយើងរស់នៅក្នុងវិមាន ឬខ្ទម ទោះជាយើងមានរូបរាងសង្ហា ឬមិនស្រស់ស្អាត ទោះបីជាយើងជាមនុស្សល្បីឈ្មោះ ឬគ្មានកេរ្តិ៍ឈ្មោះក្ដី ។ ទោះជាយើងគ្មានលក្ខណៈសម្បត្តិគ្រប់គ្រាន់ក្ដី ក៏ព្រះស្រឡាញ់យើងអស់ពីព្រះទ័យទ្រង់ដែរ ។ ទោះជាយើងមិនបានល្អឥតខ្ចោះ ក៏ព្រះស្រឡាញ់យើងយ៉ាងល្អឥតខ្ចោះដែរ ។ ទោះជាយើងមានអារម្មណ៍ថាវង្វេងផ្លូវ ហើយគ្មានត្រីវិស័យនាំផ្លូវក្ដី ក៏សេចក្ដីស្រឡាញ់របស់ព្រះឱបក្រសោបយើងទាំងស្រុងដែរ ។ ( « The Love of God » Liahona ខែ វិច្ឆិកា ឆ្នាំ ២០០៩ ទំព័រ ២២ )
-
បន្ថែមពីលើពាក្យដែលប្រធាន អុជដូហ្វ បានប្រើ តើមានពាក្យ ឬឃ្លាណាខ្លះផ្សេងទៀតដែលអ្នកអាចប្រើដើម្បីពិពណ៌នាអំពីសេចក្ដីស្រឡាញ់របស់ព្រះចំពោះយើង ?
ដើម្បីជួយសិស្សធ្វើឲ្យមេរៀនសមស្របទៅនឹងជីវិតរបស់ពួកគេ សូមអញ្ជើញពួកគេឲ្យពិចារណាថាតើពួកគេមានអារម្មណ៍ ឬទទួលស្គាល់សេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទដែលមានចំពោះពួកគេញឹកញាប់ប៉ុនណា ។ អ្នកក៏អាចអញ្ជើញពួកគេឲ្យពិចារណាអំពីសំណួរដែលពួកគេមាននាពេលបច្ចុប្បន្នអំពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទផងដែរ ។
សូមលើកទឹកចិត្តសិស្សនៅពេលពួកគេសិក្សានៅថ្ងៃនេះ ឲ្យយកចិត្តទុកដាក់ទៅលើចំណាប់អារម្មណ៍ពីព្រះវិញ្ញាណបរិសុទ្ធដែលអាចជួយពួកគេឲ្យទទួលអារម្មណ៍ពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ ។
ការបើកសម្ដែងសេចក្ដីស្រឡាញ់របស់ព្រះ
ព្រះគម្ពីរមានការបង្រៀនជាច្រើនដែលរៀបរាប់អំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះយើង ។ គំរូមួយគឺនៅក្នុង យ៉ូហាន ៣:១៦ ។
សូមអាន យ៉ូហាន ៣:១៦ ដោយរកមើលការបើកបង្ហាញដ៏អស្ចារ្យបំផុតនៃសេចក្ដីស្រឡាញ់របស់ព្រះវរបិតាសួគ៌ ។
តើអ្នកនឹងសង្ខេបអ្វីដែលអ្នកបានរកឃើញដោយរបៀបណា ?
សិស្សអាចចែកចាយអ្វីមួយដូចជា ព្រះវរបិតាសួគ៌បានបង្ហាញពីសេចក្ដីស្រឡាញ់របស់ទ្រង់ចំពោះយើងតាមរយៈការលះបង់ព្រះរាជបុត្រារបស់ទ្រង់គឺព្រះយេស៊ូវគ្រីស្ទ ។
-
តើពលិកម្មធួនរបស់ព្រះអង្គសង្គ្រោះបង្ហាញពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះយើងយ៉ាងដូចម្ដេច ?
អ័ប្រាហាំត្រូវបានបង្គាប់ឲ្យបូជាកូនប្រុសរបស់លោក
សូមពន្យល់ថា នៅថ្ងៃនេះសិស្សនឹងសិក្សាអំពីដំណើររឿងមួយដែលអាចបង្រៀនយើងអំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទបានបង្ហាញតាមរយៈដង្វាយធួនរបស់ព្រះអង្គសង្គ្រោះ ។
សូមពិចារណាបង្ហាញរូបភាពខាងក្រោមនេះ ។
-
តើអ្នកដឹងអ្វីខ្លះអំពីបទពិសោធន៍នេះក្នុងជីវិតរបស់អ័ប្រាហាំ និងអ៊ីសាក ?
បន្ទាប់ពីសិស្សចែកចាយចម្លើយរបស់ពួកគេ សូមពន្យល់ដូចខាងក្រោមនេះ ។
ដំណើររឿងរបស់អ័ប្រាហាំ និងអ៊ីសាកអាចបង្រៀនយើងអំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទបានបង្ហាញចំពោះយើងតាមរយៈពលិកម្មធួនរបស់ព្រះអង្គសង្គ្រោះ ។
សូមអាន យ៉ាកុប ៤:៥ ដោយរកមើលអ្វីដែលយ៉ាកុបបានបង្រៀនអំពីដំណើររឿងនេះ ។
-
តើអ្នកបានរកឃើញអ្វីខ្លះ ?
នៅពេលសិស្សសិក្សាអំពីដំណើររឿងរបស់អ័ប្រាហាំ និងអ៊ីសាក នៅក្នុង លោកុប្បត្ដិ ២២ សូមអញ្ជើញពួកគេឲ្យយកចិត្តទុកដាក់ទៅលើអ្វីដែលដំណើររឿងនេះអាចបង្រៀនពួកគេជានិមិត្តរូបអំពីព្រះវរបិតាសួគ៌ និងព្រះយេស៊ូវគ្រីស្ទ ។
ដើម្បីឲ្យសិស្សរៀបចំខ្លួនបែបនេះ សូមពិចារណាបង្កើតជាជួរឈរពីរនៅលើក្ដារខៀន ។ ចំណងជើងជួរឈរទីមួយ អ័ប្រាហាំ និងអ៊ីសាក និងជួរឈរមួយទៀត ព្រះវរបិតាសួគ៌ និងព្រះយេស៊ូវគ្រីស្ទ ។ អ្នកក៏អាចអញ្ជើញសិស្សឲ្យបង្កើតតារាងនេះនៅក្នុងសៀវភៅកំណត់ហេតុការសិក្សារបស់ពួកគេផងដែរ ។
សិស្សអាចបំពេញសកម្មភាពសិក្សាខាងក្រោមដោយខ្លួនឯង ឬជាមួយដៃគូ ។ សូមពិចារណាចែកចាយឧទាហរណ៍មួយពីតារាងដែលបានបំពេញ ( ដែលមាននៅពេលក្រោយក្នុងមេរៀននេះ ) មុនពេលសិស្សចាប់ផ្ដើមការសិក្សារបស់ពួកគេ ។
សូនអានប្រកបដោយការអធិស្ឋាន លោកុប្បត្តិ ២២ ៖ ១–១៤ ដោយរកមើលភាពស្រដៀងគ្នាទៅនឹងព្រះវរបិតាសួគ៌ និងព្រះយេស៊ូវគ្រីស្ទ ។ គូសចំណាំនូវឃ្លាបទគម្ពីរដែលមានអត្ថន័យ ។ សូមកត់ត្រាគំនិតរបស់អ្នកអំពីអ្វីដែលឃ្លាទាំងនេះបង្រៀនអ្នកអំពីព្រះវរបិតាសួគ៌ និងព្រះយេស៊ូវគ្រីស្ទ ។
តារាងខាងក្រោមនេះមានឧទាហរណ៍ពីការយល់ដឹងដែលសិស្សអាចរកឃើញខណៈដែលពួកគេសិក្សាដំណើររឿងនេះ ។ តាមតម្រូវការ អ្នកអាចប្រើគំរូទាំងនេះដើម្បីជួយសិស្សក្នុងការសិក្សារបស់ពួកគេ ។ ឧទាហរណ៍ អ្នកអាចចែកចាយការយល់ដឹងអំពីស្រុកម៉ូរីយ៉ា ( សូមមើល លោកុប្បត្តិ ២២ ៖ ២ ) មុន ឬក្រោយពេលសិស្សសិក្សា ។
|
អ័ប្រាហាំ និង អ៊ីសាក |
ព្រះវរបិតាសួគ៌ និងព្រះយេស៊ូវគ្រីស្ទ |
|---|---|
|
លោកុប្បត្តិ ២២ ៖ ២, ១២——« កូនឯងតែ ១ » |
ព្រះយេស៊ូវគ្រីស្ទ គឺជាព្រះរាជបុត្រាទ្រង់តែ ១ របស់ព្រះវរបិតាសួគ៌ ( សូមមើល យ៉ូហាន ៣:១៦ ) ។ |
|
លោកុប្បត្តិ ២២ ៖ ២—« ស្រុកម៉ូរីយ៉ា » |
« តាមប្រពៃណីទីកន្លែងនេះត្រូវគេស្គាល់ថាជាកន្លែងដែល អ័ប្រាហាំបូជាអ៊ីសាកគឺ … នៅក្នុងតំបន់ដូចគ្នាដែលព្រះវរបិតានឹងធ្វើយញ្ញបូជានៃព្រះរាជបុត្រារបស់ទ្រង់ » ( Old Testament Student Manual កំណែទី ៣ [ ឆ្នាំ ២០០៣ ] ទំព័រ ៧៧ ) ។ |
|
លោកុប្បត្តិ ២២:២—« ដង្វាយដុត » |
ដង្វាយដុតគឺជាទម្រង់នៃការបូជាសត្វ ។ ការបូជាសត្វគឺជានិមិត្តរូបអំពីព្រះយេស៊ូវគ្រីស្ទ ( សូមមើល ម៉ូសេ ៥:៤–៧ ) ។ |
|
លោកុប្បត្តិ ២២:៦—« យកឧសដែលសម្រាប់ដង្វាយដុតដាក់ឲ្យអ៊ីសាកជាកូនលី » |
ព្រះគ្រីស្ទបានលីឈើឆ្កាងរបស់ទ្រង់ ( សូមមើល យ៉ូហាន ១៩:១៦–១៨ ) ។ |
|
លោកុប្បត្តិ ២២:៧–៨—« កូនចៀមដែលសម្រាប់ជាដង្វាយដុត នោះព្រះទ្រង់នឹងផ្គត់ផ្គង់ឲ្យ » |
ព្រះវរបិតាសួគ៌បានចាត់ព្រះបុត្រារបស់ទ្រង់ ជាកូនចៀមនៃព្រះ ជាពលិកម្មធួន ( សូមមើល យ៉ូហាន ១:២៩ ) ។ |
|
លោកុប្បត្តិ ២២:៩—« ចងអ៊ីសាកជាកូនដាក់លើឧស នៅលើអាសនា » |
ព្រះគ្រីស្ទត្រូវបានគេដំដែកគោលភ្ជាប់នឹងឈើឆ្កាង ( សូមមើល នីហ្វៃទី១ ១១:៣៣ ) ។ |
បន្ទាប់ពីសិស្សមានពេលសិក្សាហើយ សូមទុកឱកាសឲ្យពួកគេចែកចាយនូវអ្វីដែលព្រះវិញ្ញាណបានបង្រៀនពួកគេ នៅពេលពួកគេសិក្សាខគម្ពីរទាំងនេះ ។ អ្នកអាចសួរសំណួរដូចខាងក្រោម ជាផ្នែកមួយនៃការពិភាក្សានេះ ។
-
តើយើងអាចរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទនៅក្នុងដំណើររឿងអំពីអ័ប្រាហាំ និងអ៊ីសាក ?
-
តើនិមិត្តសញ្ញាមួយចំនួនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទដែលមានអត្ថន័យបំផុតចំពោះអ្នក ? ហេតុអ្វី ?
សេចក្ដីស្រឡាញ់របស់ព្រះចំពោះខ្ញុំ
សូមទុកឱកាសឲ្យសិស្សជញ្ជឹងគិតពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះពួកគេ ។ ដើម្បីរៀបចំឲ្យពួកគេជញ្ជឹងគិត អ្នកអាចច្រៀង ឬស្តាប់ទំនុកតម្កើងមួយដែលផ្តោតទៅលើសេចក្ដីស្រឡាញ់នោះ ដូចជា« ព្រះស្នេហ៍យើងទើបចាត់បុត្រាទ្រង់ »( ទំនុកតម្កើង ល.រ ១១១) ។
អ្នកក៏អាចឲ្យសិស្សយោងទៅសេចក្ដីថ្លែងការណ៍មកពីប្រធាន ដាល្លិន អេក អូកនៅក្នុងធនធានបន្ថែមទាំងឡាយផងដែរ ។
-
តើការចងចាំសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះអ្នកអាចជះឥទ្ធិពលលើជីវិតរបស់អ្នកយ៉ាងដូចម្ដេច ?
-
តើអ្វីខ្លះដែលបានជួយ ឬអាចជួយអ្នកឲ្យទទួលអារម្មណ៍នូវសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ ?
សូមបញ្ចប់មេរៀននេះដោយអញ្ជើញសិស្សឲ្យគិតអំពីអ្វីដែលពួកគេបានរៀន និងអារម្មណ៍ដែលពួកគេមាននៅថ្ងៃនេះអំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះពួកគេ ។ សូមអញ្ជើញពួកគេឲ្យកត់ត្រាគំនិត និងចំណាប់អារម្មណ៍ខាងវិញ្ញាណរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ សូមពិចារណាចែកចាយទីបន្ទាល់របស់អ្នកអំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានចំពោះយើងម្នាក់ៗ ។ សូមលើកទឹកចិត្តសិស្សឲ្យស្វែងរកបទពិសោធន៍ដែលនឹងជួយពួកគេឲ្យទទួលអារម្មណ៍នូវសេចក្ដីស្រឡាញ់របស់ព្រះចំពោះពួកគេយ៉ាងខ្ជាប់ខ្ជួន ។