« បុព្វកថានៃសៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« បុព្វកថានៃសៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
បុព្វកថានៃសៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
គោលបំណងនៃថ្នាក់សិក្ខាសាលា និងថ្នាក់វិទ្យាស្ថានសាសនាគឺ « ដើម្បីជួយយុវវ័យ និងយុវមជ្ឈិមវ័យឲ្យមានការប្រែចិត្តជឿកាន់តែខ្លាំងទៅលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ហើយមានភាពស័ក្តិសមដើម្បីទទួលពរជ័យទាំងឡាយនៃព្រះវិហារបរិសុទ្ធ ហើយរៀបចំខ្លួន រៀបចំក្រុមគ្រួសារ និងអ្នកដទៃទៀតសម្រាប់ជីវិតដ៏នៅអស់កល្បជានិច្ច ជាមួយនឹងព្រះវរបិតារបស់ពួកគេដែលគង់នៅស្ថានសួគ៌ » ( « គោលបំណងថ្នាក់សិក្ខាសាលា និងថ្នាក់វិទ្យាស្ថានសាសនា » [ ឆ្នាំ២០២២ ] បណ្ណាល័យដំណឹងល្អ ) ។
ដើម្បីជួយសម្រេចគោលបំណងនេះ សៀវភៅសិក្សានេះផ្តល់ឲ្យសិស្សនូវបទពិសោធន៍នៃការរៀនសូត្រជាច្រើនតាមរយៈមេរៀនពីរប្រភេទផ្សេងគ្នា ៖ មេរៀនព្រះគម្ពីរសញ្ញាចាស់ និងមេរៀននៃការរៀបចំជីវិត ។ មេរៀនព្រះគម្ពីរសញ្ញាចាស់ដែលត្រូវគ្នានឹងបណ្តុំបទគម្ពីរបានគូសបញ្ជាក់ជារៀងរាល់សប្តាហ៍នៅក្នុង ចូរមកតាមខ្ញុំ—សម្រាប់គេហដ្ឋាន និងសាសនាចក្រ ។ មេរៀននៃការរៀបចំជីវិតជួយសិស្សឲ្យរៀនទាញយកកម្លាំងមកពីព្រះយេស៊ូវគ្រីស្ទ ហើយអនុវត្តតាមការបង្រៀនរបស់ទ្រង់ ដើម្បីត្រៀមខ្លួនសម្រាប់បញ្ហាប្រឈមមុខទាំងឡាយក្នុងជីវិត ។
តាមរយៈការប្រើការផ្ដល់យោបល់ក្នុងការបង្រៀនដែលមាននៅក្នុងមេរៀនទាំងនេះ និងការធ្វើតាមការណែនាំរបស់ព្រះវិញ្ញាណ នោះអ្នកអាចជួយសិស្សឲ្យទាញយកព្រះចេស្ដានៃព្រះយេស៊ូវគ្រីស្ទ នៅក្នុងទិដ្ឋភាពជាច្រើននៃជីវិតរបស់ពួកគេ ។ អ្នកក៏នឹងជួយពួកគេឲ្យរៀបចំខ្លួនសម្រាប់អនាគតរបស់ពួកគេដោយសេចក្ដីជំនឿលើព្រះយេស៊ូវគ្រីស្ទផងដែរ ។
សៀវភៅសិក្សាសម្រាប់គ្រូបង្រៀននេះមាននៅលើអនឡាញនៅក្នុងបណ្ណាល័យដំណឹងល្អនៅឯគេហទំព័រ ChurchofJesusChrist.orgដែលអាចទាញយកជា ភី.ឌី.អែហ្វ. បាន ។ កំណែដែលបានបោះពុម្ពនៃ សៀវភៅសិក្សានេះអាចត្រូវបានស្នើសុំពីអ្នកសម្របសម្រួល ឬអ្នកគ្រប់គ្រងកម្មវិធីក្នុងមូលដ្ឋានរបស់អ្នក ។
ឧបករណ៍ទាំងឡាយដែលជួយអ្នកឲ្យរៀបចំខ្លួនបង្រៀន
សម្រាប់ទាំងមេរៀនព្រះគម្ពីរសញ្ញាចាស់ និងមេរៀននៃការរៀបចំជីវិត ឧបករណ៍ខាងក្រោមនឹងជួយអ្នកឲ្យរៀបចំខ្លួនបង្រៀន ។
ព្រះគម្ពីរ
ការសិក្សាបណ្តុំបទគម្ពីរដែលមានមកជាមួយ ចូរមកតាមខ្ញុំ គឺជាវិធីដ៏សំខាន់មួយសម្រាប់រៀបចំដើម្បីបង្រៀនសិស្ស ។ មេរៀនមាននៅក្នុងសៀវភៅសិក្សានេះត្រូវការគ្រូបង្រៀនដែលជាអ្នកដែលសិក្សាព្រះគម្ពីរជាទៀងទាត់ ហើយដែលស្វែងរកភាពជាដៃគូនៃព្រះវិញ្ញាណបរិសុទ្ធ ។ នៅពេលអ្នកធ្វើដូច្នេះ អ្នកអាចមានទំនុកចិត្តថា តាមរយៈព្រះវិញ្ញាណរបស់ទ្រង់ ព្រះវរបិតាសួគ៌នឹងបំផុសគំនិតអ្នកអំពីរបៀបប្រើប្រាស់សម្ភារទាំងនេះ ដើម្បីបំពេញតម្រូវការសិស្សរបស់អ្នក ។
ទិដ្ឋភាពទូទៅ
ទិដ្ឋភាពទូទៅគឺត្រូវបានផ្តល់ជូននៅដើមសប្តាហ៍នីមួយៗនៃមេរៀនព្រះគម្ពីរសញ្ញាចាស់ និងនៅផ្នែកនីមួយៗនៃមេរៀនការរៀបចំជីវិត ។ ទិដ្ឋភាពទូទៅទាំងនេះផ្តល់ព័ត៌មានមេរៀនជាក់លាក់ដើម្បីជួយអ្នករៀបចំសម្ភារបង្រៀនជាមុន រួមមានដូចខាងក្រោម ៖
-
គោលបំណងមេរៀន ( ទាំងនេះក៏ត្រូវបានបញ្ចូលជាប្រយោគចុងក្រោយនៃបុព្វកថានៃមេរៀននីមួយៗផងដែរ )
-
គំនិតយោបល់អំពីការរៀបចំសិស្ស
-
បញ្ជីនៃមេរៀនដែលមានប្រើវត្ថុ សំណៅមេរៀន រូបភាព វីដេអូ ឬសម្ភារផ្សេងៗទៀតដែលប្រហែលជាត្រូវរៀបចំទុកជាមុន
សូមស្វែងរកទិដ្ឋភាពទូទៅប្រចាំសប្តាហ៍សម្រាប់មេរៀនសប្តាហ៍ក្រោយដែលអ្នកនឹងបង្រៀន ។
-
តើអ្នករកឃើញព័ត៌មានអ្វីខ្លះនៅទីនេះដែលមានប្រយោជន៍សម្រាប់អ្នកដើម្បីដឹងទុកជាមុន ?
-
តើអ្នកអាចប្រើព័ត៌មាននេះដោយរបៀបណានៅពេលអ្នករៀបចំខ្លួនដើម្បីបង្រៀន ?
គន្លឹះក្នុងការបង្រៀន
ទិដ្ឋភាពទូទៅនីមួយៗនៅខាងដើមមេរៀនព្រះគម្ពីរសញ្ញាចាស់ មាននូវគន្លឹះក្នុងការបង្រៀនដែលពន្យល់អំពីការអនុវត្ត ឬគោលការណ៍ដែលបានណែនាំចេញពី ការបង្រៀនតាមរបៀបរបស់ព្រះអង្គសង្គ្រោះ ៖ សម្រាប់អ្នកទាំងអស់ដែលបង្រៀននៅគេហដ្ឋាន និងសាសនាចក្រ ។ គន្លឹះទាំងនេះត្រូវបានគូសសម្គាល់ដោយរូបតំណាងនេះ ៖ ។ នៅពេលអ្នកមានអារម្មណ៍ថាត្រៀមខ្លួនរួចហើយ សូមព្យាយាមធ្វើតាមការអនុវត្ដ និងគោលការណ៍ទាំងនេះនៅពេលកំពុងបង្រៀន ។ អ្នកនឹងសម្គាល់ឃើញថាការដាក់បញ្ចូលការផ្ដល់យោបល់ទាំងនេះអាចជួយធ្វើឲ្យសមត្ថភាពបង្រៀនរបស់អ្នកប្រសើរឡើង ។
គន្លឹះក្នុងការបង្រៀនភាគច្រើនចង្អុលទៅមេរៀនដែលយកគំរូតាមការអនុវត្ត ឬគោលការណ៍ដែលបានណែនាំ ។ រូបតំណាងការបំពាក់បំប៉ន នៅក្នុងមេរៀននេះរំលេចឧទាហរណ៍អំពីរបៀបប្រើគន្លឹះនោះ ។ គន្លឹះក្នុងការបំពាក់បំប៉នទាំងនេះបង្ហាញពី ជំនាញការអភិវឌ្ឍគ្រូបង្រៀនដែលអាចជួយអ្នកស្វែងយល់បន្ថែមអំពីការអនុវត្តដែលបានណែនាំ ឬគោលការណ៍ដែលបានសង្កត់ធ្ងន់ ។ ការប្រើប្រាស់ការអនុវត្ត និងគោលការណ៍ទាំងនេះអាចជួយអ្នកឲ្យអភិវឌ្ឍសមត្ថភាពបង្រៀនរបស់អ្នក ។
សូមពិនិត្យមើលគន្លឹះក្នុងការបង្រៀននៅក្នុងទិដ្ឋភាពទូទៅសម្រាប់មេរៀនក្នុងសប្តាហ៍បន្ទាប់ដែលអ្នកនឹងបង្រៀន ។
-
តើអ្នកអាចអនុវត្តការផ្ដល់យោបល់ក្នុងការបង្រៀននេះដោយរបៀបណា ?
ការផ្ដល់យោបល់ស្តីពីល្បឿនបង្រៀន
ទិដ្ឋភាពទូទៅភាគច្រើនសម្រាប់ប្រភេទមេរៀននៃការរៀបចំជីវិត រួមមានការផ្តល់យោបល់អំពីល្បឿនបង្រៀន ។ យោបល់ទាំងនេះផ្ដល់ជាគំនិតថាតើមេរៀនទាំងនេះអាចរួមបញ្ចូលទៅត្រង់ណានៅក្នុងសេចក្ដីណែនាំស្ដីពីល្បឿនបង្រៀន ។ អ្នកសម្របសម្រួល និងអ្នកគ្រប់គ្រងកម្មវិធីអាចប្រើការផ្តល់យោបល់ទាំងនេះនៅពេលពួកគេបង្កើតសេចក្តីណែនាំអំពីល្បឿនបង្រៀនរបស់ពួកគេ ។
ឧទាហរណ៍ សូមមើលការផ្តល់យោបល់អំពីល្បឿនបង្រៀននៅក្នុងទិដ្ឋភាពទូទៅ សម្រាប់ការស្ថាបនាភាពខ្លួនទីពឹងខ្លួន ។
ការរៀបចំសិស្ស
ទិដ្ឋភាពទូទៅនីមួយៗមានរួមនូវយោបល់សម្រាប់ការអញ្ជើញសិស្សឲ្យរៀបចំគំនិត និងដួងចិត្តរបស់ពួកគេសម្រាប់មេរៀននីមួយៗផងដែរ ។ អ្នកអាចពិនិត្យមើលគំនិតទាំងនេះនៅដើមសប្តាហ៍ ហើយជ្រើសរើសប្រកបដោយការអធិស្ឋាននូវគំនិតដែលអ្នកមានអារម្មណ៍ថានឹងជួយសិស្សរបស់អ្នកបានល្អបំផុត ។ អ្នកមិនចាំបាច់ប្រើគ្រប់យោបល់អំពីការរៀបចំសិស្សនោះទេ ។ អ្នកអាចបត់បែនវា ឬបង្កើតគំនិតផ្ទាល់ខ្លួនរបស់អ្នក ។ ការអញ្ជើញដែលបានផ្តល់យោបល់ទាំងនេះត្រូវបានរៀបចំឡើងដើម្បីផ្តល់ដល់សិស្សយ៉ាងហោចណាស់មួយថ្ងៃមុនបទពិសោធន៍រៀនសូត្រនេះ ។
សូមពិនិត្យមើលគំនិតសម្រាប់ការរៀបចំសិស្សនៅក្នុងទិដ្ឋភាពទូទៅសម្រាប់មេរៀនក្នុងសប្តាហ៍បន្ទាប់ដែលអ្នកនឹងបង្រៀន ។ សូមពិចារណាថាគំនិតមួយណាដែលអ្នកនឹងប្រើ កែសម្រួល ឬមិនប្រើ ។ ប្រសិនបើអ្នកសម្រេចចិត្តអញ្ជើញសិស្សរបស់អ្នកឲ្យរៀបចំខ្លួន តើអ្នកនឹងចែកចាយគំនិតរៀបចំខ្លួននេះជាមួយពួកគេដោយរបៀបណា ? ឧទាហរណ៍ អ្នកអាចចែកចាយវាដោយផ្ទាល់មាត់ ឬបង្ហាញវានៅចុងបញ្ចប់ថ្នាក់មុន ។ បើសមស្រប អ្នកអាចផ្ញើវាតាមរយៈកម្មវិធី Wise ឬកម្មវិធីផ្ញើសារ ។
សកម្មភាពរៀនសូត្រដែលអាចមាន
មេរៀននីមួយៗមាននូវគំនិតទាំងឡាយអំពីរបៀបដែលអ្នកអាចទទួលបានបទពិសោធន៍នៃការរៀនសូត្រ ។ ដើម្បីឲ្យសិស្សរបស់អ្នកមានបទពិសោធន៍ល្អបំផុតតាមដែលអាចធ្វើទៅបាន សូមប្រើមាតិកានៃផ្នែកនេះធ្វើជាការណែនាំជាជាងប្រើអត្ថបទ ។ ប្រសិនបើអ្នកទើបតែចាប់ផ្តើមធ្វើជាគ្រូបង្រៀនថ្នាក់សិក្ខាសាលា វាអាចជាការល្អបំផុតក្នុងការចាប់ផ្តើមដោយការធ្វើតាមសកម្មភាពការរៀនសូត្រដែលបានផ្តល់ជូនឲ្យបានដិតដល់ ។ ជាមួយបទពិសោធន៍កាន់តែច្រើន អ្នកនឹងមានសមត្ថភាពកាន់តែខ្លាំងក្នុងការកែសម្រួលមាតិកានៃសៀវភៅសិក្សានេះឲ្យសមស្របបំផុត ដើម្បីបំពេញតាមតម្រូវការរបស់សិស្សអ្នក ។
សកម្មភាពរៀនសូត្រដែលបានស្នើជាច្រើននឹងអញ្ជើញសិស្សឲ្យប្រើសៀវភៅកំណត់ហេតុការសិក្សា ។ សៀវភៅកំណត់ហេតុការសិក្សាជា ភី.ឌី.អែហ្វ. ដែលសិស្សអាចប្រើមាននៅលើគេហទំព័រ ChurchofJesusChrist.org/si/seminary/manuals ។ នៅកន្លែងដែលមាន សិស្សក៏អាចប្រើមុខងារសៀវភៅកត់ត្រាក្នុងកម្មវិធីបណ្ណាល័យដំណឹងល្អ ដើម្បីឆ្លើយតបនឹងសំណួរសម្រាប់ការជញ្ជឹងគិតនៅក្នុងមេរៀនទាំងឡាយ ។
សេចក្ដីណែនាំអំពីការបង្រៀន
នៅក្នុងមេរៀននេះ អ្នកនឹងសម្គាល់ឃើញប្រអប់ដែលមានសេចក្ដីណែនាំសម្រាប់គ្រូបង្រៀន ។ សេចក្តីណែនាំទាំងនេះត្រូវបានរៀបរៀងឡើងដើម្បីជួយអ្នកឲ្យចេះរៀបចំ និងប្រើប្រាស់សកម្មភាពរៀនសូត្រដែលបានស្នើនៅក្នុងមេរៀន ។ សេចក្ដីណែនាំទាំងនេះអាចពន្យល់អំពីគោលបំណងនៃសកម្មភាពមេរៀន ឬផ្តល់យោបល់អំពីរបៀបបត់បែនមាតិកាមេរៀនដើម្បីបំពេញតម្រូវការរបស់សិស្សឲ្យកាន់តែប្រសើរឡើង ។ យោបល់ទាំងនេះអាចរួមបញ្ចូលវិធីសាស្រ្ត សំណួរ ឬសកម្មភាពផ្សេងៗដែលជួយអ្នកឲ្យកែសម្រួលមាតិកា និងសកម្មភាពតាមការចាំបាច់ ។
សូមពិនិត្យមើលឡើងវិញនូវសេចក្ដីណែនាំអំពីការបង្រៀនមួយចំនួននៅក្នុងមេរៀនដែលអ្នកនឹងបង្រៀនក្នុងពេលឆាប់ៗនេះ ។
-
តើអ្នកកត់សម្គាល់អ្វីខ្លះអំពីរបៀបដែលសេចក្ដីណែនាំអំពីការបង្រៀនទាំងនេះអាចជួយអ្នករៀបចំខ្លួនដើម្បីបង្រៀន ?
ធនធានបន្ថែមទាំងឡាយ
មេរៀនភាគច្រើនមាននូវផ្នែក « ធនធានបន្ថែមទាំងឡាយ » នៅចុងបញ្ចប់នៃមេរៀននោះ ។ ផ្នែកនេះដាក់បញ្ចូលព័ត៌មានដែលអាចជួយឲ្យការរៀនសូត្រកាន់តែមានភាពស៊ីជម្រៅ ។ អ្នកអាចស្វែងរកសំណួរដែលសិស្សអាចមាន និងសេចក្តីថ្លែងការណ៍ដោយថ្នាក់ដឹកនាំសាសនាចក្រ ដែលអាចជួយឆ្លើយតបនូវសំណួរទាំងនេះ ។ សេចក្ដីថ្លែងការណ៍ទាំងនេះពីថ្នាក់ដឹកនាំសាសនាចក្រអាចដាក់បញ្ចូលនៅក្នុងមេរៀនបាន ។ ផ្នែកនេះគឺមានតែនៅក្នុងកម្មវិធីបណ្ណាល័យដំណឹងល្អ ឬបណ្ណាល័យដំណឹងល្អតាមអនឡាញនៅលើគេហទំព័រ ChurchofJesusChrist.orgប៉ុណ្ណោះ ។ ផ្នែក « ធនធានបន្ថែមទាំងឡាយ » មិនបានដាក់បញ្ចូលនៅក្នុងកំណែ ភី.ឌី.អែហ្វ. របស់សៀវភៅសិក្សាសម្រាប់គ្រូបង្រៀននោះទេ ។
សូមមើលថាតើមេរៀនដែលអ្នកបង្រៀនបន្ទាប់មានដាក់បញ្ជូល « ធនធានបន្ថែមទាំងឡាយ » ដែរឬទេ ។
-
តើមានធនធាននៅក្នុងផ្នែកនេះ ដែលអាចមានអត្ថប្រយោជន៍ក្នុងការចែកចាយជាមួយសិស្សរបស់អ្នកដែរឬទេ ?
សកម្មភាពរៀនសូត្របន្ថែម
ផ្នែកនេះក៏បានដាក់បញ្ចូលនៅចុងបញ្ចប់នៃមេរៀនផងដែរ ដែលមាននូវគំនិតបន្ថែមសម្រាប់ការទទួលបានបទពិសោធន៍នៃការរៀនសូត្រផងដែរ ។ សកម្មភាពរៀនសូត្រទាំងនេះរួមមាន របៀបដើម្បីបត់បែនសកម្មភាពបច្ចុប្បន្នក្នុងមេរៀន ឬរបៀបបង្រៀនសម្ភារ ដែលមិនបានបញ្ចូលក្នុងមេរៀន ។ សកម្មភាពរៀនសូត្របន្ថែមមាននៅក្នុងសៀវភៅសិក្សាសម្រាប់គ្រូបង្រៀនលុះត្រាណាតែអ្នកកំពុងចូលប្រើវាតាមរយៈកម្មវិធីបណ្ណាល័យដំណឹងល្អ ឬបណ្ណាល័យដំណឹងល្អតាមអនឡាញនៅលើគេហទំព័រ ChurchofJesusChrist.orgតែប៉ុណ្ណោះ ។ ផ្នែកនេះមិនបានដាក់បញ្ចូលនៅក្នុងកំណែ ភី.ឌី.អែហ្វ. នៃសៀវភៅសិក្សាសម្រាប់គ្រូបង្រៀនទេ ។
ប្រសិនបើមេរៀនបន្ទាប់របស់អ្នកដាក់បញ្ចូលផ្នែក « សកម្មភាពរៀនសូត្របន្ថែម » សូមពិនិត្យមើលសកម្មភាពទាំងនេះ ។
-
តើមានអ្វីដែលអ្នកគិតថានឹងមានអត្ថប្រយោជន៍ដើម្បីប្រើជាមួយសិស្សរបស់អ្នកបន្ថែមពីលើ ឬជំនួសឲ្យសកម្មភាពរៀនសូត្រដែលមានក្នុងផ្នែកសំខាន់នៃមេរៀននេះឬទេ ?
មេរៀនព្រះគម្ពីរសញ្ញាចាស់ និងមេរៀននៃការរៀបចំជីវិត
សិស្សគួរតែបានរៀនទាំងមេរៀនព្រះគម្ពីរសញ្ញាចាស់ និងមេរៀននៃការរៀបចំជីវិតពេញមួយឆ្នាំ ។ ព័ត៌មានខាងក្រោមអាចជួយអ្នកឲ្យយល់ពីគោលបំណងនៃមេរៀនផ្សេងៗគ្នានៅក្នុងសៀវភៅសិក្សាសម្រាប់គ្រូបង្រៀន ។
មេរៀនព្រះគម្ពីរសញ្ញាចាស់
មេរៀនព្រះគម្ពីរសញ្ញាចាស់ ដែលត្រូវគ្នានឹងបណ្តុំបទគម្ពីរដែលបានគូសបញ្ជាក់ជារៀងរាល់សប្តាហ៍នៅក្នុង ចូរមកតាមខ្ញុំ ។ មេរៀនទាំងនេះផ្តល់ឱកាសដល់សិស្សដើម្បីមានបទពិសោធន៍ការសិក្សាដ៏ស៊ីជម្រៅអំពីព្រះបន្ទូលរបស់ព្រះនៅក្នុងព្រះគម្ពីរសញ្ញាចាស់ ។ មេរៀនការអនុវត្តចំណេះចំណានខាងគោលលទ្ធិ និងមេរៀនវាយតម្លៃការរៀនសូត្ររបស់អ្នក គឺបានរួមបញ្ចូលនៅក្នុងផ្នែកមេរៀនព្រះគម្ពីរសញ្ញាចាស់នៃសៀវភៅសិក្សានេះ ។
មេរៀនការអនុវត្តចំណេះចំណានខាងគោលលទ្ធិ
មេរៀនការអនុវត្ដចំណេះចំណានខាងគោលលទ្ធិ មានបំណងជួយសិស្សដើម្បីធ្វើកិច្ចការឆ្ពោះទៅរកការសម្រេចបាននូវលទ្ធផលនៃចំណេះចំណានខាងគោលលទ្ធិ ។ លទ្ធផលទាំងនេះរួមមានការជួយសិស្សឲ្យធ្វើដូចខាងក្រោម ៖
រៀន និងអនុវត្តគោលការណ៍ដ៏ទេវភាពទាំងឡាយដើម្បីទទួលបានចំណេះដឹងខាងវិញ្ញាណ ។
ចេះចាំវគ្គបទគម្ពីរចំណេះចំណានខាងគោលលទ្ធិ និងគោលលទ្ធិនៃដំណឹងល្អរបស់ព្រះយេស៊ូវគ្រីស្ទ ដែលវគ្គបទគម្ពីរនោះបង្រៀន ។
ការចេះស្ទាត់វគ្គបទគម្ពីរដែលបានជ្រើសរើស និងគោលលទ្ធិនៃដំណឹងល្អរបស់ព្រះយេស៊ូវគ្រីស្ទដែលវគ្គបទគម្ពីរទាំងនេះបង្រៀនមានន័យថាសិស្សនឹងអាចធ្វើដូចខាងក្រោម ៖
ស្គាល់ ហើយយល់អំពីគោលលទ្ធិដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិ ។
ពន្យល់គោលលទ្ធិបានច្បាស់ៗ ដោយប្រើវគ្គបទគម្ពីរចំណេះចំណានខាងគោលលទ្ធិដែលទាក់ទងនានា ។
អនុវត្តតាមគោលលទ្ធិនៃដំណឹងល្អនៃព្រះយេស៊ូវគ្រីស្ទ និងគោលការណ៍ទាំងឡាយនៃការទទួលបានចំណេះដឹងខាងវិញ្ញាណនៅក្នុងការជ្រើសរើសប្រចាំថ្ងៃរបស់ពួកគេ និងក្នុងការឆ្លើយតបចំពោះសំណួរខាងគោលលិទ្ធ បញ្ហាផ្ទាល់ខ្លួនរបស់ពួកគេ បញ្ហាសង្គម និងបញ្ហា និងសំណួរទាក់ទងនឹងប្រវត្ដិសាស្ដ្រ ។
ចងចាំ និងដឹងពីទីតាំងវគ្គបទគម្ពីរចំណេះចំណានខាងគោលលទ្ធិ ហើយទន្ទេញចាំឃ្លាបទគម្ពីរគន្លឹះទាំងឡាយ ។
កម្មវិធីចំណេះចំណានខាងគោលលទ្ធិ អាចជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ ។ កម្មវិធីនេះត្រូវបានរៀបចំឡើង ដើម្បីជួយសិស្សទន្ទេញចាំសេចក្តីយោងបទគម្ពីរ និងឃ្លាបទគម្ពីរគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិនីមួយៗ ។ អ្នកប្រហែលជាចង់ប្រើកម្មវិធីនេះនៅក្នុងថ្នាក់ ហើយលើកទឹកចិត្តសិស្សឲ្យទាញយកកម្មវិធីនេះតាមឧបករណ៍ផ្ទាល់ខ្លួនរបស់ពួកគេ ប្រសិនបើអាចធ្វើបាន ។ មានកម្មវិធីសម្រាប់ឧបករណ៍ iOS និង Android ។
សម្រាប់ព័ត៌មានបន្ថែមអំពីគោលបំណងនៃចំណេះចំណានខាងគោលលទ្ធិ សូមមើល « What Is Doctrinal Mastery? » ( ៣:៥៦ ) មាននៅលើគេហទំព័រ ChurchofJesusChrist.org ។
សម្រាប់ព័ត៌មានបន្ថែមអំពីរបៀបជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ សូមមើល« ការបំពាក់បំប៉នចំណេះចំណានខាងគោលលទ្ធិ » នៅក្នុង ការបំពាក់បំប៉នកម្មវិធីសិក្សាថ្នាក់សិក្ខាសាលា ។
មេរៀនវាយតម្លៃការរៀនសូត្ររបស់អ្នក
ការវាយតម្លៃគឺជាផ្នែកសំខាន់នៃការរៀនសូត្រ ។ ឱកាសដើម្បីផ្អាក និងឆ្លុះបញ្ចាំងពីការរៀនសូត្រអាចជាបទពិសោធន៍វិជ្ជមានសម្រាប់សិស្ស ។ ការវាយតម្លៃតាមកាលកំណត់អាចលើកទឹកចិត្ដសិស្សនៅក្នុងការរីកចម្រើន និងការអភិវឌ្ឍជាបន្ដបន្ទាប់របស់ពួកគេដើម្បីក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។ តាមរយៈការវាយតម្លៃការរៀនសូត្ររបស់ពួកគេ សិស្សអាចក្លាយជាអ្នកចូលរួមយ៉ាងសកម្មក្នុងដំណើរការសិក្សា និងមានការទទួលខុសត្រូវបន្ថែមទៀតចំពោះការរៀនសូត្ររបស់ពួកគេ ។
មេរៀនវាយតម្លៃការរៀនសូត្ររបស់អ្នកផ្តល់ឲ្យសិស្សនូវឱកាសដើម្បី ពន្យល់គោលលទ្ធិគន្លឹះ ចេញពីព្រះគម្ពីរសញ្ញាចាស់គិតពិចារណាពីអារម្មណ៍ អាកប្បកិរិយា និងបំណងប្រាថ្នារបស់ពួកគេភ្ជាប់ទំនាក់ទំនងទៅនឹងផែនការរបស់ព្រះវរបិតាសួគ៌ និងដំណឹងល្អនៃព្រះយេស៊ូវគ្រីស្ទ និង រំឭកផែនការ ឬគោលដៅនានាដែលពួកគេខិតខំបំពេញ ដើម្បីអនុវត្តនូវអ្វីដែលពួកគេកំពុងរៀន និងបង្កើនភាពជាសិស្សនៃព្រះយេស៊ូវគ្រីស្ទរបស់ពួកគេបានកាន់តែខ្លាំងឡើង ។ មេរៀនទាំងនេះអាចជួយសិស្សឲ្យស្គាល់ការរីកចម្រើនរបស់ពួកគេ និងស្វែងរកកត្តានានាដើម្បីរីកចម្រើនបន្ថែមសម្រាប់ពេលអនាគត ។ សិស្សនឹងទទួលបានក្រេឌីតសម្រាប់វគ្គសិក្សា តាមរយៈការចូលរួមរៀនយ៉ាងហោចណាស់ឲ្យបានមួយមេរៀននៃមេរៀនវាយតម្លៃការរៀនសូត្ររបស់អ្នកនៅពាក់កណ្តាលនៃវគ្គសិក្សានីមួយៗ ។
សម្រាប់ព័ត៌មានបន្ថែមអំពីរបៀបអនុវត្តមេរៀនវាយតម្លៃការរៀនសូត្ររបស់អ្នក សូមមើល « ការបំពាក់បំប៉នអំពីការវាយតម្លៃ » នៅក្នុងការបំពាក់បំប៉នកម្មវិធីសិក្សាថ្នាក់សិក្ខាសាលា ។
មេរៀននៃការរៀបចំជីវិត
មេរៀននៃការរៀបចំជីវិតផ្ដល់ដល់សិស្សនូវឱកាសដើម្បីអនុវត្ដការបង្រៀនរបស់ព្រះអង្គសង្គ្រោះចំពោះចំណុចខាងក្រោម ៖
-
ទប់ទល់នឹងសំណួរពិបាកៗ និងឧបសគ្គក្នុងកាលៈទេសៈនៃជីវិត
-
ធ្វើការជ្រើសរើសដ៏បំផុសគំនិត ដោយប្រើការបង្រៀនរបស់ព្រះយេស៊ូវគ្រីស្ទ និងពួកព្យាការីរបស់ទ្រង់ ។
-
ស្ថាបនាភាពខ្លួនទីពឹងខ្លួនដើម្បីចិញ្ចឹមបីបាច់ខ្លួនពួកគេ និងគ្រួសាររបស់ពួកគេ ។
-
មានសុខភាពខាងផ្លូវកាយ និងខាងសតិអារម្ម៍ល្អជាងមុន ។
-
ដាក់ផែនការរៀបចំសម្រាប់ការអប់រំ និងការងារនាពេលអនាគត ។
-
អភិវឌ្ឍជំនាញដើម្បីជោគជ័យនៅសាលា ។
-
រៀបចំខ្លួនសម្រាប់ការបម្រើជាអ្នកផ្សព្វផ្សាយសាសនា និងការបម្រើក្នុងសាសនាចក្រ ។
-
រៀបចំខ្លួនដើម្បីចុះ និងរក្សាសេចក្តីសញ្ញាក្នុងព្រះវិហារបរិសុទ្ធ ។
សូមព្យាយាមបង្រៀនមេរៀននៃការរៀបចំជីវិតឲ្យបានពីរមេរៀនជារៀងរាល់សប្តាហ៍ ។ សប្តាហ៍ខ្លះអ្នកអាចបង្រៀនច្រើនជាងនេះ ហើយសប្ដាហ៍ខ្លះទៀតអ្នកអាចបង្រៀនតិចជាង ប៉ុន្តែជាមធ្យមអ្នកគួរតែព្យាយាមបង្រៀនពីរមេរៀនក្នុងមួយសប្ដាហ៍ឲ្យបានញឹកញាប់តាមដែលអាចធ្វើទៅបាន ។ ការណ៍នេះនឹងផ្ដល់ឱកាសឲ្យសិស្សបានរៀនគ្រប់មេរៀនទាំងអស់ក្នុងអំឡុងឆ្នាំសិក្សា ។
សូមប្រាកដថាអ្នកទទួលបានច្បាប់ចម្លងនៃសេចក្តីណែនាំស្តីពីល្បឿនបង្រៀន ដែលបានផ្ដល់ឲ្យអ្នកដោយអ្នកសម្របសម្រួល ឬអ្នកគ្រប់គ្រងកម្មវិធីរបស់អ្នក ។
សម្រាប់ព័ត៌មានបន្ថែមអំពីមេរៀននៃការរៀបចំជីវិត សូមមើល « ការបំពាក់បំប៉នអំពីការរៀបចំជីវិត » នៅក្នុងការបំពាក់បំប៉នកម្មវិធីសិក្សាថ្នាក់សិក្ខាសាលា ។