Moises 7: Leksiyon 18

Moises 7:53–69

Ang Hari sa Zion Mopatunhay sa Iyang Katawhan

Usa sa mga titulo sa Manluluwas mao “ang Hari sa Zion” (Moises 7:53). Siya nagbantay sa Iyang katawhan, ug diha sa ulahing mga adlaw Siya mopatunhay kanila gikan sa dakong kalisdanan nga mahitabo. Kini nga leksiyon makatabang sa mga estudyante nga makaila ug makadayeg unsa ang gibuhat sa Ginoo aron matabangan silang mabuntog ang mga pagsulay sa atong panahon.

Pagpangandam sa estudyante: Dapita ang mga estudyante sa pagtambong sa klase nga andam sa pagpakigbahin og tudling gikan sa Basahon ni Mormon nga nakatabang nila dihang nag-atubang sila og mga pagsulay.

Posibleng mga Kalihokan sa Pagkat-on

Dakong mga kalisdanan diha sa ulahing mga adlaw

Dapita ang mga estudyante nga maghanduraw sa usa ka dakong unos nga moabot sa inyong siyudad. Kon makatabang, tingali pwede nimong ipakita ang usa ka imahe sa usa ka dakong unos.

• Unsa ang pipila ka dakong mga pagsulay o mga kalisod sa ulahing mga adlaw? Sa unsa nga paagi kini nga mga pagsulay ug mga kalisod makompara ngadto sa usa ka unos?

• Unsa ang pipila ka pamaagi aron maluwas gikan niini nga mga unos?

Dapita ang mga estudyante sa pagpamalandong sa ilang mga pagbati mahitungod niining unos ug ang ilang paningkamot aron maluwas. Ang mosunod nga pagsukod sa kaugalingon mao ang usa ka paagi nga mahimo nimo kini:

Pamalandongi kon unsa ka tinuod ang mosunod nga mga pamahayag alang kanimo:

• Ako nasayod unsa ang gibuhat sa Ginoo aron pagtabang kanako sa unos (mga pagsulay ug mga kalisod) nga akong giatubang.

• Ako mapasalamaton sa gibuhat sa Ginoo ug kinasingkasing nga gusto sa Iyang tabang.

Dapita ang mga estudyante nga magtinguha og inspirasyon gikan sa Espiritu Santo samtang sila magtuon. Ang Espiritu Santo makatudlo mahitungod sa mga paagi nga ang Ginoo makatabang sa mga estudyante sa unos nga ilang giatubang.

Ang Hari sa Zion

Si Enoch ug ang iyang katawhan nagtukod og “Dakbayan sa Pagkabalaan, gani ang Zion” (Moises 7:19). Ang Ginoo misaad nga sila “magpuyo sa kalinaw hangtod sa hangtod” (Moises 7:20). Dayon si Enoch nakakita ug naghilak tungod sa kadaot nga moabot atol sa Lunop. Nagtinguha sa kahupayan, si Enoch nangutana kon ang Ginoo ba adunay kaluoy sa mga tawo kinsa miabot human sa Lunop. Agig tubag, ang Ginoo mitudlo mahitungod sa ug gipakita si Enoch sa Manluluwas ug sa Iyang Pag-ula (tan-awa sa Moises 7:42–57).

Basaha ang Moises 7:53, nga mangita giunsa sa Manluluwas paghulagway ang Iyang Kaugalingon.

• Sa unsang paagi ang mga butang nga gipakigbahin sa Ginoo niini nga bersikulo nakahupay kang Enoch?

Dapita ang mga estudyante sa pagmarka ug paghisgot sa lainlain nga mga titulo, ug mga tahas ni Jesukristo diha sa bersikulo 53. Kini nga leksiyon magtutok sa Iyang titulo nga “Hari sa Zion.” Pwede ka mosukna og follow-up nga mga pangutana mahitungod niini nga titulo sama sa:

• Sa unsang paagi si Jesukristo sama sa usa ka gamhanan ug mahigugmaon nga hari kanato?

• Unsa ang laing mga hugpong sa mga pulong gikan niini nga bersikulo nga naghulagway sa mga panalangin nga imo tingaling ganahan gikan sa pagsunod sa Hari sa Zion?

Ikonsiderar ang pagpahinumdom sa mga estudyante nga ang Zion gilangkoban ni bisan kinsa nga, sama sa katawhan ni Enoch, mga “putli og kasingkasing” (Doktrina ug mga Pakigsaad 97:21)—katawhan kinsa sama sa Ginoo.

Ang Ginoo mopatunhay sa Iyang katawhan

Si Enoch nangutana sa Ginoo kon moanhi ba Siya pag-usab sa kalibotan. Ang Ginoo mipakita kang Enoch sa kataposang mga adlaw ug sa mga butang nga Iyang buhaton alang sa mga tawo nga naningkamot sa pagsunod Kaniya.

Basaha ang Mioses 7:60–61, nga mangita kon unsay gisaad sa Ginoo nga buhaton.

• Unsa kaha sa imong hunahuna ang gipasabot alang sa Ginoo sa “pagpatunhay” sa katawhan nga naningkamot sa pagsunod Kaniya?

Samtang basahon sa mga estudyante ang Moises 7:62 sama sa gisulti sa ubos, puwede kang motabang nga makita nila unsa kaaktibo ang Dios sa pagpatunhay sa Iyang katawhan. Ang usa ka paagi sa pagbuhat niini mao ang pagdapit sa mga estudyante nga hatagan og pagtagad ang matag gamit sa pulong nga Ako ug ang punglihok [verb] nga nagsunod niini. Pwede usab nimong dapiton sila nga bantayan kanus-a ang Ginoo mogamit sa ako o akoa ug unsa nga mga pulong ang nalambigit niini.

Bisan nakita ni Enoch sa panan-awon ang makadaot nga lunop sa panahon ni Noe, ang Ginoo mipakita dayon ni Enoch sa mga pamaagi nga Iyang mapundok ang katawhan ngadto Kaniya ug pagpatunhay kanila.

Basaha ang Moises 7:62, nga mangita sa unsay buhaton sa Ginoo sa pagpatunhay sa Iyang katawhan.

• Unsa ang pipila ka butang nga buhaton sa Ginoo aron mapatunhay ang Iyang katawhan?

  Isulat ang mosunod nga hugpong sa mga pulong sa pisara: Aron mapatunhay ang Iyang katawhan sa ulahing mga adlaw, ang Ginoo mo…

  Samtang tubagon sa mga estudyante, isulat sa pisara ang mosunod nga mga hugpong mga pulong:

  mopakanaog sa matarong gikan sa langit.

  mopadala sa kamatuoran gikan sa yuta.

  pagpundok sa Iyang katawhan ngadto sa Zion (tan-awa usab sa Doktrina ug mga Pakigsaad 115:6).

• Unsa ang pipila ka paagi nga tumanon sa Ginoo kini nga panagna sa atong panahon?

Pagkamatarong gikan sa langit ug kamatuoran gikan sa yuta aron sa pagpundok kanato ngadto sa Zion

Aron matabangan ang mga estudyante nga makasabot sa tulo ka lainlain nga aspeto niini nga kamatuoran, pwede nimong isulat ang matag usa sa pisara “Pagkamatarong gikan sa langit,” “Kamatuoran gikan sa yuta,” ug “Zion” ang matag usa sa managlahi nga mga kulom. Ang mosunod mga kapahayag ug mga imahe nga konektado sa matag aspeto. Isulat sa lahi nga papel ang matag kapahayag o ipakita ang mga imahe. Ang mga estudyante pwede dayon motukma sa kapahayag o sa imahe sa usa sa mga ulohan nga anaa sa pisara.

Pagkamatarong gikan sa langit

• Nadawat ni Joseph Smith ang Unang Panan-awon.

• Gitugyan ni Juan Bautista ang Aaronic nga Pagkapari ngadto ni Joseph Smith.

• Gitugyan ni Pedro, Santiago ug Juan ang Melchizedek nga Pagkapari ngadto ni Joseph Smith.

• Ang Ginoo mipadayag sa Doktrina ug mga Pakigsaad.

• Ang Ginoo mopadayag sa Iyang pulong pinaagi sa Iyang mga propeta sa modernong panahon.

Kamatuoran gikan sa yuta

• Nadawat ug gihubad ni Joseph Smith ang bulawang mga palid.

Zion

• Kita tanan kabahin sa usa ka ward o branch.

Tabangi ang mga estudyante nga makapamalandong sa kaimportante sa unsay gibuhat sa Ginoo. Usa ka paagi sa pagbuhat nimo niini mao ang pagdapit sa mga estudyante sa pagkompleto sa mosunod diha sa ilang mga journal sa pagtuon. Kon imong gigamit ang naunang kalihokan, ang mga estudyante pwede nga mopili sa bisan unsa nga nakalista sa pisara.

Ilha ang duha ka paagi nga ang Ginoo nagpatunhay sa Iyang katawhan gikan sa mga kalisdanan sa atong panahon ug tubaga ang mosunod nga mga pangutana. Kon mahimo, paghunahuna og piho nga ehemplo. Pwede nimong masulti ang kasinatian diha sa pagkapari, usa ka tudling gikan sa Basahon ni Mormon, usa ka kasinatian sa imong ward o branch, ug uban pa.

• Sa unsa nga paagi kini nga mga ehemplo nakatabang kanimo nga mas makaila sa Manluluwas?

• Sa unsang paagi kini makatabang sa mga kalisdanan sa kataposang mga adlaw?

Dapita ang pipila ka estudyante sa pagpakigbahin sa ilang mga tubag.

Pangita og mga paagi nga matabangan ang mga estudyante nga makaila ug magpasalamat sa tanan nga gibuhat sa Ginoo sa pagtabang nila sa mga pagsulay ug mga kalisod sa kataposang mga adlaw. Usa ka paagi nga imo kining mabuhat mao ang pagpaminaw pag-ayo unsa ang isulti sa mga estudyante ug iasoy unsa ang matudlo kanato mahitungod sa karakter ug kinaiyahan sa Ginoo. (Alang sa dugang nga pagbansay sa pagtabang sa mga estudyante nga masayod ug mabati ang gugma sa Ginoo, tan-awa sa “Tabangi ang mga Tigkat-on sa Pagpalig-on sa Ilang Relasyon ngadto sa Langitnong Amahan ug Kang Jesukristo” sa Pagpalambo sa mga Kahanas sa Magtutudlo.)

Dugang nga mga Kapanguhaan

Mapatunhay ba ang matag matinuoron nga tawo gikan sa tanan nga kalisdanan sa kataposang mga adlaw?

Si Propeta Joseph Smith (1805–1844) mitudlo:

[Akong] gipasabot ang mahitungod sa pagbalik sa Anak sa Tawo; nga usab kini usa ka sayop nga pagtuo nga ang mga Santos makalingkawas sa tanang mga paghukom, samtang ang daotan mag-antos; kay ang tanang tawo ubos sa pag-antos, ug ‘ang matarong maglisod sa pag-ikyas’ [tan-awa sa D&P 63:34]; bisan pa man daghang mga Santos makaikyas, kay ang matarong mabuhi pinaagi sa hugot nga pagtuo [tan-awa sa Habacuc 2:4]; unya daghang mga matarong mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios. (Mga Pagtulun-an sa mga Presidente sa Simbahan: Joseph Smith [2007], 304)

Sa unsang paagi ang Dios mopadala sa pagkamatarong gikan sa langit ug kamatuoran gikan sa yuta?

Si Presidente Ezra Taft Benson (1899–1994) mitudlo:

Ang Basahon ni Mormon migawas gikan sa yuta, puno sa kamatuoran, nagsilbi nga maoy pinaka-“sukaranang bato sa atong relihiyon” (tan-awa sa Pasiuna sa Basahon ni Mormon). Ang Dios mipadala usab sa pagkamatarong gikan sa langit. Ang Amahan Mismo mipakita uban sa Iyang Anak ngadto ni Propeta Joseph Smith. Si anghel Moroni, Juan Bautista, Pedro, Santiago, ug daghan pang mga anghel gisugo gikan sa langit sa pagpahiuli sa gikinahanglang mga gahom ngadto sa gingharian. Dugang pa, nakadawat si Propeta Joseph Smith og pagpadayag human sa usa ka pagpadayag gikan sa kalangitan atol niadtong unang lisod kaayong mga katuigan sa paglambo sa Simbahan. Kini nga mga pagpadayag gipatunhay alang kanato diha sa Doktrina ug mga Pakigsaad.

Kining duha ka buhat sa kasulatan, dayon, mahimog dakong himan sa kamot sa Ginoo alang sa pagpatunhay sa Iyang katawhan sa ulahing mga adlaw. (“The Gift of Modern Revelation,” Ensign, Oct. 1986, 79–80)

Sa unsang paagi ako mapanalanginan sa pagpundok sa Zion ug sa iyang mga stake?

Si Presidente Dallin H. Oaks sa Unang Kapangulohan mitudlo:

Uban sa paghimo og mga stake ug sa pagtukod og mga templo diha sa kasagaran sa mga nasod nga adunay dako-dako nga populasyon sa mga matinud-anon, ang sugo karon dili ang pagpundok sa usa ka dapit apan sa pagpundok diha sa mga stake sa atong kaugalingong mga yutang pinuy-anan. Diha ang mga matinud-anon makatagamtam sa hingpit nga mga panalangin sa kahangtoran sulod sa balay sa Ginoo. Diha, sa ilang kaugalingong mga yutang pinuy-anan, makasunod sila sa sugo sa Ginoo sa pagpalapad sa mga utlanan sa Iyang katawhan ug mopalig-on sa mga stake niini (tan-awa sa Doktrina ug mga Pakigsaad 101:21; 133:9, 14). Niini nga paagi, ang mga stake sa Zion, “alang sa usa ka pagpanalipod ug alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta” (Doktrina ug mga Pakigsaad 115:6). (“Pagpangandam alang sa Ikaduhang Pag-anhi,” Liahona,, Mayo 2004, 8)

Si Elder D. Todd Christofferson sa Korum sa Napulog Duha ka Apostoles mipahayag:

Kita kinahanglang moila nga ang pagpalig-on sa Zion mahitabo sa sunod-sunod nga panahon—“usa ka adlaw sa kaligutgut, usa ka adlaw sa pagsunog, usa ka adlaw sa pagkaawaaw, sa pagdangoyngoy, sa pagbangutan, sa pagbasol; ug ingon sa usa ka alimpulos kini moabut diha sa ibabaw sa tibuok yuta, nag-ingon ang Ginoo” [Doktrina ug mga Pakigsaad 112:24]. Ug nga, ang panagpundok sa mga stake mahimong “usa ka panalipod, ug alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta” [Doktrina ug mga Pakigsaad 115:6]. …

Kining mahinungdanon ug kataposan nga dispensasyon nagmakanunayon sa pagtubo—ang Zion diha sa yuta, gihiusa sa Zion gikan sa kahitas-an atol sa mahimayaong pagbalik sa Manluluwas. Ang Simbahan ni Jesukristo gisugo sa pag-andam—ug nag-andam—sa kalibotan alang nianang panahona. (“Pagpangandam alang sa Pagbalik sa Ginoo,” Liahona, Mayo 2019, 83-84)

Moises 7:62. Sa unsang paagi kami makatabang sa pagkamatarong ug kamatuoran nga “mosilhig sa yuta ingon nga usa ka lunop”?

Si Elder David A. Bednar sa Korum sa Napulog Duha ka Apostoles midapit:

Unsay nakab-ot na niini nga dispensasyon sa pagpahayag sa mga mensahe sa ebanghelyo pinaagi sa mga social media channel usa ka maayo nga sinugdanan—apan usa lamang ka hinay nga dagayday. Ako karon modapit kaninyo sa pagtabang sa pag-usab sa dagayday ngadto sa usa ka baha. Sugod niining adlawa, ako moawhag kaninyo sa paglukop sa yuta sa mga mensahe nga puno sa pagkamatarong ug kamatuoran—mga mensahe nga tinuod, makapalig-on, ug dalaygon—ug tinuod nga molukop sa yuta ingon sa usa ka lunop (tan-awa sa Moises 7:59–62). (“Paglukop sa Yuta pinaagi sa Social Media,” Liahona, Agosto 2015, 53)

Dugang nga mga Kalihokan sa Pagkat-on

Moises 7:53. “Ang Bato sa Langit”

Kon mobati kamo nga makabenepisyo ang inyong mga estudyante gikan sa pagtuon sa titulo ug tahas sa Manluluwas isip Bato sa Langit, ikonsiderar ang mosunod. Puwede nimong gamiton ang 2 Nephi 31:17–20 aron tabangan ang mga estudyante nga makasabot sa hugpong sa mga pulong nga “kinsa ang mosulod diha sa ganghaan og mosaka pinaagi kanako dili gayod mapukan” (Moises 7:53). Ang mga estudyante pwede nga makadiskobre unsa ang ganghaan, unsa ang dalan, ug sa unang paagi kini naggiya padulong ni Jesukristo. Pwede usab nimong gamiton ang Helaman 5:12 aron hisgotan sa unsang paagi nga dili kita mapukan kon magtukod kita sa atong pundasyon diha ni Jesukristo.

Ipakigbahin ang ebanghelyo ni Jesukristo pinaagi sa social media

Pwede nimong ipakita ang pamahayag ni Elder David A. Bednar diha sa Dugang nga mga Kapanguhaan o ipasalida ang bidyo “To Sweep the Earth as with a Flood” (2:56). Pangutan-a ang mga estudyante unsa ang mga ebidensiya nga ilang nakita nga mga mensahe sa ebanghelyo diha sa social media nga misilhig sa yuta sama sa lunop. Hatagi og panahon ang mga estudyante diha sa klase aron makahimo ug makapakigbahin og usa ka mensahe diha sa social media mahitungod sa ebanghelyo ni Jesukristo. Dapita ang pipila ka mga estudyante nga ipakigbahin sa klase ang ilang mensahe nga gihimo. Pwede usab nimong dapiton ang mga estudyante nga mo-follow sa social media nga mga account sa Unang Kapangulohan, ang Korum sa Napulog Duha ka Apostoles, ug uban nga mga lider sa Simbahan. Ang mga estudyante makakita sa mga ehemplo kon giunsa sa pagpakigbahin sa mga lider ang ebanghelyo ni Jesukristo gamit ang social media.

Moises 7:62. “Kay diha ang akong tabernakulo”

Ang mga estudyante tingali makabenepisyo gikan sa pagtan-aw sa unsang paagi ang Ginoo miestablisar sa Iyang tabernakulo sa Bag-ong Jerusalem. Hisgoti ang kaimportante sa templo diha sa Zion ug ang kahilwasan nga atong makita diha sa balay sa Ginoo. Pwede nimong gamiton ang pamahayag gikan ni Presidente Dallin H. Oaks diha sa Dugang nga mga Kapanguhaan isip kabahin sa panaghisgotan.