Moises 7: Leksiyon 16

Moises 7:1–21

“Ang Ginoo Mitawag sa Iyang mga Katawhan og Zion”

Gitawag sa Dios si Enoch isip propeta sa pagsangyaw sa mensahe sa ebanghelyo. Nagpundok ang mga tawo nga mipili sa pagsunod kang Enoch, ug gipanalipdan sila sa Ginoo gikan sa pagkadaotan sa ilang palibot. Sa kataposano, nahimo silang malipayon ug balaang siyudad nga gitawag sa Ginoo og “Zion” (Moises 7:18). Kini nga leksiyon makatabang sa mga estudyante nga makaugmad og Kristohanon nga mga hiyas nga nabatonan ni Enoch ug sa iyang katawhan.

Pagpangandam sa estudyante: Dapita ang mga estudyante nga hunahunaon ang ilang nangagi nga adlaw ug ang mga epekto sa ilang mga aksiyon ngadto sa ubang tawo.

Mga Posibleng Kalihokan sa Pagkat-on

Kalig-on pinaagi sa konektadong mga gamot

Paghunahuna og paagi kon unsaon pagsugod sa klase pinaagi sa pagtabang sa mga estudyante nga mailhan ang kusog nga naggikan sa pagkanahiusa sa uban. Ang mosunod maoy usa ka paagi nga mahimo nimo kini.

• Sa imong hunahuna unsa ka taas motubo ang kinatas-ang klase sa kahoy?

Ang kinatas-ang mga kahoy sa kalibotan mao ang mga redwood tree. Kaya niining motubo hangtod sa kapin sa 92 metros ang gitas-on.

• Aron masuportahan ang ingon niini ka taas nga kahoy, unsa kahay dagway sa gamot sa redwood?

Makapahingangha, ang mga gamot sa mga redwood naa lay mga 1–2 ka metros ang giladmon. Pero, ang mga gamot niini mokatap og pipila ka gatos ka metros (kapin 100 metros) ug magkabalikos sa mga gamot sa ubang kahoy. Kining interkoneksyon makapahimo sa mga redwood nga magbarog nga lig-on sulod sa gatosan ka tuig taliwala sa mga hangin ug mga baha (tan-awa ang Richard H. Winkel, “Web of Friendship,” New Era, Ago. 2003, 10–11).

• Sa imong hunahuna unsay atong makat-onan gikan sa mga redwood nga makaimpluwensiya sa atong mga pamilya, mga eskwelahan, ug mga ward o mga branch?

• Para nimo nganong gusto sa Ginoo nga makabaton og kusog pinaagi sa ubang tawo nga anaa sa atong palibot og diha Kaniya usab?

  Aron tabangan ang mga estudyante nga makaakses kon unsa sila ka konektado ngadto sa mga tawo sa ilang palibot, dapita ang mga estudyante nga tubagon ang mosunod nga mga pangutana diha sa ilang mga journal sa pagtuon:

• Giunsa ka pagtabang ug pagsuportar sa uban, ilabina sa imong mga paningkamot nga mapaduol sa Manluluwas? (Pwede kining diha sa imong pamilya, ward o branch, mga grupo sa barkada, komunidad, ug uban pa.)

• Giusa nimo pagsulay sa pagsuporta ug pagtabang ang uban nga mas mobati nga maduol sa Manluluwas?

Samtang tun-an sa mga estudyante kini nga leksiyon, dapita silang mahimong sensitibo sa mga impresyon sa Espiritu Santo. Matudloan sila sa Espiritu Santo kon unsaon nila pagpauswag sa ilang nabati nga kalig-on uban sa Dios ug sa ubang tawo sa ilang palibot.

Kalig-on diha sa Zion

Sa usa ka panan-awon, gitawag sa Ginoo si propeta Enoch aron isangyaw ang paghinulsol ug bunyag sa pipila ka siyudad. Nagtigom ang mga tawo nga misunod kang Enoch.

Basaha ang Moises 7:13, 16–17, nga mangita sa kalainan sa mga tawo nga naningkamot sa pagsunod sa Ginoo ug niadtong misukol kanila.

• Unsa ang mipatigbabaw kanimo bahin sa mga panalangin nga gihatag sa Ginoo sa katawhan nga naningkamot sa pagsunod Kaniya?

Aron mas masabtan kon unsay kalainan sa katawhan sa Ginoo, basaha ang Moises 7:18–21. (Makatabang pod tingali nga ipasabot nga ang pagkatinunglo nagpasabot nga gipugngan ang mga panalangin tungod sa pagkadili-matarong. Tan-awa usab sa “Tunglo, Tunglo, Mga” sa Giya ngadto sa mga Kasulatan.)

Ang Moises 7:18 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Tabangi ang mga estudyante nga masabtan unsa ang ilang gitun-an. Sa paghimo niini, pwede nimo silang dapiton nga magdrowing sa ilang mga journal og usa ka simpleng representasyon sa ilang nakat-onan gikan sa bersikulo 18. Dayon pwedeng ipakigbahin sa mga estudyante ang ilang gidrowing ngadto sa ilang mga pares, kagrupo, o sa klase ug kon nganong gidrowing nila ni.

• Unsa imong nakat-onan gikan sa katawhan sa Ginoo gikan sa bersikulo 18?

• Unsa kaha ang buot ipasabot sa pagkahimong “usa sa kasingkasing ug usa sa hunahuna”?

Tabangi ang mga estudyante nga mailhan ang kamatuoran nga sama sa ang katawhan sa Ginoo naningkamot nga mahiusa, matarong mga magkinabuhi, ug nagpakabana sa mga kabos nga naa sa ilang taliwala. Pwede nimong ipasabot nga mao usab kini ang mga kinaiya sa Manluluwas. Ang pagkahimong katawhan sa Ginoo nagpasabot nga mahimong mas mahisama Kaniya.

Pagkahimong katawhan sa Ginoo

Aron tabangan ang mga estudyante nga mas masabtan kon sa unsang paagi mahimong magkahiusa, matarong nga magkinabuhi, ug magpakabana sa mga tawong nanginahanglan, ikonsiderar ang paghangyo sa mga estudyante nga magtinabangay sa mosunod nga handout uban ang gagmayng grupo. Pwede silang maningkamot nga tabangan ug suportahan ang usag usa sa tibuok kalihokan. Sa ubos mao ang duha ka paagi nga magamit tingali nimo nga handout:

• Dapita ang mga estudyante nga bahinon ang mga seksiyon sa handout tali sa ilang mga sakop sa grupo ug tun-an ang ilang seksiyon sa ilang kaugalingon. Human matapos ang ilang seksiyon, pwedeng ipakigbahin sa mga estudyante ang ilang nakat-onan.

• Ipapilit sa bungbong ang mga kopya sa mga seksiyon sa handout ug dapita ang gagmayng mga grupo nga motuyok sulod sa lawak aron kompletohon ang matag seksiyon nga magkauban.

Dapita ang daghang estudyante nga ipakigbahin ang ilang nakat-onan o gitun-an nga makahuloganon kanila. Pwede usab nimo silang pangutan-on kon sa unsang paagi ang pagtuon uban sa grupo nakapadugang sa pagsabot sa mga estudyante.

• Sa unsang paagi nga gipanag-ingnan sa Manluluwas ang mga kinaiya sa Zion panahon sa Iyang kinabuhi?

Aron ipakita ang usa ka ehemplo sa Kristohanon nga mga hiyas sa Zion, pwede nimong ipakigbahin ang bidyo nga “Charity: An Example of the Believers” (4:50), nga naa sa Gospel Library. Ikonsiderar ang pagdapit sa mga estudyante nga mangita kon sa unsang paagi kini nga mga batan-ong babaye nagpakita og maayong panig-ingnan sa Zion.

Paghimo og plano

Dapita ang mga estudyante sa paghunahuna sa ilang mga impresyon panahon sa leksiyon ug sa pagrekord sa ilang mga tubag sa mosunod nga mga pangutana diha sa ilang journal sa pagtuon:

• Unsa ang usa ka Kristohanon nga hiyas sa Zion nga imong gibati nga makapauswag sa imong kinabuhi? (Pwede kining diha sa panimalay, sa simbahan, o kauban ang ubang tawo.)

• Unsay sugdan nimog himo karong semanaha nga makapalig-on sa maong Kristohanon nga hiyas? (Pwede kining bahin sa imong mga tumong para sa programa sa Kabataan ug Kabatan-onan.)

Sag-uloha

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang importante nga hugpong sa mga pulong sa kasulatan para sa “Moises 7:18” mao “Ang Ginoo mitawag sa iyang mga katawhan og Zion, tungod kay sila usa sa kasingkasing ug usa sa hunahuna.” Ang mga ideya alang sa mga kalihokan sa pagsag-ulo anaa sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsaon nato pagkahimong nahiusa kon gibati nato nga wala kita mahisakop?

Si Elder D. Todd Christofferson sa Korum sa Napulog Duha ka Apostoles mitudlo:

Usa ka pagbati sa pagkasakop importante sa atong pisikal, mental, ug espiritwal nga kaayohan. Apan medyo posible nga usahay ang matag usa kanato tingali mobati nga kita walay labot. Sa mga higayon nga walay kadasig, kita mahimong mobati nga kita dili takos sa taas nga sumbanan sa Ginoo o sa gilaoman sa uban. Kita tingali dili matuyo nga makapahamtang og mga pagdahom sa uban, o gani sa atong kaugalingon—nga dili ang gidahom sa Ginoo. Kita tingali sa igmat nga paagi mosulti nga ang bili sa kalag gibase sa piho nga mga kalamposan o mga calling, apan kini dili ang sukdanan sa atong kahimtang diha sa mga mata sa Ginoo. “Apan ang Ginoo nagatan-aw sa kasingkasing” [1 Samuel 16:7]. Siya nagpakabana sa atong mga tinguha ug mga pangandoy ug kon unsa ang atong mahimong dangatan. …

Ang … bahin sa doktrina sa pagkasakop adunay kalabotan sa atong kaugalingong mga tampo. Bisan og kita panagsa ra nga maghunahuna bahin niini, kadaghanan sa atong pagkasakop naggikan sa atong pagserbisyo ug sa mga sakripisyo nga atong gihimo alang sa uban ug alang sa Ginoo. Ang pagpalabi og tutok sa atong personal nga mga panginahanglan o sa atong kaugalingong kahupayan makababag nianang pagbati sa pagkasakop. (“Ang Doktrina sa Pagkasakop,” Liahona, Nob. 2022, 54, 55)

Sa unsang paagi kita mahiusa bisan pa man sa atong mga kalainan?

Si Elder Quentin L. Cook sa Korum sa Napulog Duha ka Apostoles mitudlo:

Ang pagkahiusa mapalambo kon ang mga tawo tagdon uban sa dignidad ug pagtahod, bisan og managlahi sila sa dayag nga mga kinaiya. …

Uban sa atong doktrina nga magamit sa tanan, mahimo kitang tinubdan sa pagkahiusa ug magsaulog sa pagkalahi-lahi. Ang pagkahiusa ug pagkalahi-lahi dili mga katugbang. Makakab-ot kita og mas dakong pagkahiusa samtang mag-amuma kita og kahimtang sa paglakip sa tanan og pagtahod sa pagkalahi-lahi. …

Ang kultura sa ebanghelyo ni Jesukristo [wala] … gitino pinaagi sa kolor sa panit sa usa ka tawo o kon asa ang usa ka tawo nagpuyo. Samtang nagmaya kita sa managlahi nga mga kultura, kinahanglan nga biyaan nato ang mga aspeto niadto nga mga kultura nga nagsumpaki sa ebanghelyo ni Jesukristo. (“Mga Kasingkasing Nabugkos diha sa Pagkamatarong ug Pagkahiusa,” Liahona, Nob. 2020, 18, 19, 21)

Dugang nga mga Kalihokan sa Pagkat-on

Laing paagi sa pagsugod sa leksiyon

Pwede nimong dapiton ang mga estudyante nga handurawon nga adunay eskwelahan o grupo sa mga tawo duol nila nga diin ang tanan mahigalaon, dili dalo, nagkahiusa, ug matarong. Pwede nimong hisgotan ang mosunod:

• Nganong gusto kitang interesado nga mahimong bahin sa usa ka eskwelahan o grupo nga sama niini?

• Sa imong hunahuna naa kaha kini nga eskwelahan o grupo karon? Ngano o nganong wala?

Sultihi ang mga estudyante nga gitabangan sa Ginoo si propeta Enoch sa pagtukod og grupo sa mga tawo nga sama niini. Gitawag sila sa Ginoo og Zion. Pwede nimong ipangutana ang mosunod:

• Kon makadungog ka sa pulong Zion, unsay imong mahunahunaan?

Paghimo sa imong panimalay nga mas sama sa Zion

Pwede nimong tabangan ang mga estudyante nga makita kon unsaon paggamit sa ilang panimalay ang baroganan sa Zion. Ikonsiderar ang pagdapit sa mga estudyante kon unsaon nila pagtabang ang ilang pamilya nga (1) mahiusa sa kasingkasing ug hunahuna, (2) magpuyo sa pagkamatarong, ug (3) mas epektibong magpakabana alang sa usag usa. Hisgoti ang mosunod nga pangutana:

• Unsa man ang pipila ka mga paagi nga inyong mahimo ang inyong panimalay nga mas sama sa Zion niining semanaha?

Pwede kang magsulat og tulo ka baroganan sa Zion diha sa pisara, ug pwedeng ilista sa mga estudyante ang mga ideya.

Pagtandi sa Zion ngadto sa mga tawo sa 4 Nephi 1

Human sa pagbisita sa Manluluwas sa mga Nephita ug Lamanita sa Basahon ni Mormon, ang mga tawo nagpuyo sa daghang mga katuigan sa komunidad nga naghatag og maayong panig-ingnan sa mga baroganan sa Zion.

Dapita ang mga estudyante nga maghimo og talaan sa ilang mga journal nga adunay tulo ka kolum nga adunay nakasulat nga Panaghiusa, Pagkamatarong, ug Pag-atiman sa mga kabos. Pwedeng tun-an sa mga estudyante ang 4 Nephi 1:1–3, 11–18, nga mangita kon sa unsang paagi gipakita sa mga Nephita ug Lamanita kini nga mga kinaiya sa Zion. Pwede nilang irekord ang ilang mga panabot diha sa tukma nga kolum diha sa ilang talaan.