Moises 7: Leksiyon 17

Moises 7:22–47

Panan-awon ni Enoch

Kanus-a ka mibati sa kaluoy sa Dios diha sa imong kinabuhi? Mipakita ang Ginoo kang Enoch og usa ka panan-awon sa kasaysayan sa yuta gikan sa iyang kaugalingong adlaw hangtod sa Milenyum. Nakat-onan ni Enoch sa tiunay nga paagi bahin sa personal nga gugma sa Langitnong Amahan alang sa Iyang mga anak. Kini nga leksiyon makatabang sa mga estudyante nga mobati sa kaluoy ug gugma sa Dios alang sa tanan Niyang mga anak.

Pagpangandam sa estudyante: Dapita ang mga estudyante sa paghunahuna sa mga kasinatian ug mga kasulatan nga makatabang nilang mailhan unsa sama ang Langitnong Amahan. Pwede usab silang makahangyo sa mga ginikanan o kasaligang mga lider o mga higala sa pagpakigbahin sa ilang mga kasinatian o mga kasulatan ngadto kanila. Dapita ang mga estudyante nga mosulod nga andam sa pagpakigbahin.

Posibleng mga Kalihokan sa Pagkat-on

Nanlimbasog nga mobati sa kaluoy ug gugma sa Dios

Aron maandam ang mga estudyante nga makat-on og dugang mahitungod sa Dios ug sa Iyang kinaiya, basaha o ipakita ang mosunod nga mga sitwasyon:

Naghunahuna si Caleb kon ang Dios nag-atiman lang ba sa mga tawo nga nagbuhat sa unsay matarong.

Nabalaka si Zoe basin masuko ang Dios mahitungod sa mga pagpili nga gibuhat sa usa ka tawo nga suod niya. Nabalaka siya nga basin gusto Niya nga silotan sila.

Si Olivia wala maghunahuna nga gibati niya ang gugma sa Dios.

• Ngano kaha nga ingon niini ang gibati niining mga tawhana?

Pagpili og usa niini nga mga sitwasyon aron pamalandongan samtang mopadayon ka niini nga leksiyon.

Aron matabangan ang mga estudyante nga mahimong madawaton sa impluwensiya sa Espiritu Santo sa tibuok niini nga leksiyon, awhaga sila sa pagpamalandong sa mosunod nga mga pangutana:

• Unsa ang imong nahibaloan mahitungod sa Langitnong Amahan nga makatabang nimo kon ikaw adunay susama nga mga problema?

• Unsa ang imong mga pangutana mahitungod sa Langitnong Amahan?

Tinguhaa ang tabang sa Ginoo aron mahibaloan ug mabati ang Iyang gugma alang kanimo ug sa tanan Niyang mga anak.

Ang panan-awon ni Enoch niadtong wala madala ngadto sa langit

Ikonsiderar ang pag-summarize sa mosunod sa imong kaugalingong mga pulong:

Hinumdomi nga pinaagi sa tabang ug giya sa Ginoo, si Enoch mitukod sa siyudad sa Zion. Ang katawhan sa Zion nahiusa diha sa Ginoo, nagpuyo sa pagkamatarong, ug nag-amuma sa usag usa (tan-awa sa Moises 7:16–19). Diha sa usa ka panan-awon, ang Ginoo mipakita kang Enoch nga Siya modala sa katawhan sa Zion ngadto sa langit tungod sa ilang hugot nga pagtuo ug pagkamatarong (tan-awa sa Moises 7:20–21). Si Enoch usab “nakakita sa nahibilin sa mga katawhan” (Moises 7:22), nagpasabot niadtong katawhan nga nahibilin sa yuta tungod kay dili sila mosunod sa Manluluwas.

Basaha ang Moises 7:23–26, nga mangita sa unsay nakita ni Enoch.

• Unsay inyong nakat-onan kabahin ni Satanas?

• Ngano sa inyong hunahuna importante nga masabtan kini nga mga butang mahitungod ni Satanas?

Nakita ni Enoch kon unsa ang reaksyon sa Dios sa pagkadaotan

Dayon si Enoch adunay malumo nga kasinatian samtang mitan-aw siya sa Dios nga nagtan-aw sa mga tawo nga mipili sa dili pagsunod Kaniya.

Mahimo nimong ipasabot nga si Enoch nakakita kang Jehova, o ni Jesukristo. Sukad sa Pagkapukan ni Adan, si Jehova mao ang nagpakita ug nakigsulti sa mga propeta. Niini nga mga okasyon, kanunay Siya nga mosulti nga daw Siya ang Amahan. Ang panaghiusa sa Amahan ug Anak mao nga ang mga pagbati sa Manluluwas nagrepresentar usab sa Amahan. Busa, kon unsay matun-an sa mga estudyante bahin niini nga panan-awon tali ni Enoch ug ni Jehova makatabang usab kanila nga makat-on bahin sa Langitnong Amahan.

Samtang basahon sa mga estudyante ang mosunod nga mga bersikulo, mahimo nimong awhagon sila sa pagbasa og hinay, mohunong aron mamalandong sa unsay ilang gibasa, ug seguro basahon pa ang mga bersikulo labaw sa kausa. Ang pagbasa niini nga paagi makatabang sa mga estudyante sa pagdapit sa Espiritu aron motudlo nila og dugang kabahin sa ilang Langitnong Amahan.

Basaha ang Moises 7:28–33 ug markahi ang mga pulong o mga hugpong sa mga pulong nga makatabang nimo nga mas mahibaloan ug masabtan ang Langitnong Amahan.

• Unsa ang imong nakat-onan mahitungod sa Dios gikan niini nga mga bersikulo?

Ikonsiderar ang pagsulat sa “Ang Dios …” diha sa pisara ug pangutan-a ang mga estudyante sa paghuman niini nga pamahayag sa unsay ilang nakat-onan. Pag-awhag og lain-laing tubag. Ang pipila sa tubag mahimong maglakip sa:

• nahigugma kanato pag-ayo (mga bersikulo 28–33).

• naglalang sa uniberso nga magamit nato (bersikulo 30).

• makiangayon, maluluy-on, ug mabination (bersikulo 30).

• mihatag kanato og kabubut-on (bersikulo 32).

• nagtinguha nga kita maghigugmaay sa usag usa (bersikulo 33).

• nagtinguha nga kita mopili Kaniya (bersikulo 33).

Samtang ang mga estudyante mopakigbahin sa unsay ilang nakit-an, ikonsiderar ang pagpangutana og follow-up nga mga pangutana sama sa:

• Nganong kana nga kamatuoran mahitungod sa Langitnong Amahan makahuloganon nganha kanimo?

• Sa unsang paagi nga ang pagkahibalo niana nga kamatuoran makatabang sa tawo sa sitwasyon nga imong gipili? Sa unsang paagi kini makatabang kanimo?

Gamit ang kasinatian ni Enoch, mitudlo si Presidente Jeffrey R. Holland sa Korum sa Napulog Duha ka Apostoles nga ang Manluluwas nagpakita kanato kon sama sa unsa ang Langitnong Amahan ug unsa kadako ang Iyang paghigugma kanato. Siya mipakigbahin sa mosunod nga panabot mahitungod sa Langitnong Amahan:

Taliwala sa dakong panan-awon sa katawhan diin ang langit nakita niyang naabli, si Enoch, nga nag-obserbar sa mga panalangin ug mga hagit sa pagkamortal, milingi ngadto sa Amahan ug dili makatuo nga nakakita Kaniya nga nagbakho. Siya natingala nga miingon ngadto niining labing gamhanan nga Nilalang diha sa uniberso: “Sa unsa nga paagi ikaw makabakho?” …

Kanang nag-inusara, makatandog nga talan-awon nakahatag og labaw pa sa pagtudlo sa tinuod nga kinaiya sa Dios kay sa bisan unsang teyolikanhong sinulat mahitungod sa relihiyon. …

Unsa ka dako nga ehemplo nga dili malimtan ang pagpangga ug pagkalambigit sa Dios sa atong mga kinabuhi! Unsa nga kaguol sa usa ka ginikanan kon ang Iyang mga anak wala mopili Kaniya ni “sa ebanghelyo sa Dios” nga Iyang gipadala! [Mga Taga-Roma 1:1. Pagkasayon sa paghigugma sa usa ka tawo nga nag-inusarang nahigugma kanato! …

Mohatag ko sa akong personal nga pagsaksi niining adlawa sa usa ka personal, buhi nga Dios, kinsa nakaila sa atong mga ngalan, naminaw ug nagtubag sa mga pag-ampo, ug nagpangga kanato sa kahangtoran isip mga anak sa Iyang espiritu. (“Ang Kahalangdon sa Dios,” Liahona, Nob. 2003, 71)

Dapita ang mga estudyante sa pagpakigbahin kon unsay mipatigbabaw ngadto kanila gikan sa pamahayag ni Presidente Holland.

Ikonsiderar ang pagsulat sa mosunod nga mga pangutana diha sa pisara. Dapita ang mga estudyante sa paghisgot sa mga pangutana diha sa gagmay nga mga grupo. Dapita usab sila sa paghisgot kon unsaon paggamit kini nga mga ideya ngadto sa mga senaryo nga ilang gipili sa sinugdanan sa leksiyon. Samtang motubag ang mga estudyante, paglakaw-lakaw diha sa lawak ug paminawa ang pipila sa ilang tubag.

• Ngano kaha nga ang Langitnong Amahan magbakho alang kanato kon kita dili maghigugmaay sa usag usa?

• Ngano kaha nga Siya magbakho alang kanato kon kita dili mopili nga mosunod ug mohigugma Kaniya?

• Unsa ang pipila ka bakak nga gusto ni Satanas nga atong tuohan mahitungod sa mga pagbati sa Dios ngari kanato?

Human maghisgot ang mga estudyante niini nga mga pangutana, ikonsiderar ang pagpangutana kon unsay ilang nadungog sa laing estudyante nga makatabang sa pagpakigbahin diha sa tibuok klase. Kini nagtugot sa mga estudyante sa pagrebyo sa mga tubag samtang nagdayeg usab sa usag usa alang sa ilang mga tubag. Mahimo usab nimong itudlo ang makatabang nga mga tubag nga imong nadungog.

Nakita ni Enoch ang kinabuhi ug misyon sa Manluluwas

Ang Ginoo dayon mipakita kang Enoch nga ang mga tawo nga nahibilin sa yuta kinsa dili gusto nga maghinulsol mamatay diha sa usa ka lunop (tan-awa sa Moises 7:34–44). Agig tubag, nagbakho si Enoch. Ang Ginoo dayon mihupay ni Enoch, nga nag-ingon, “Pagmaya sa imong kasingkasing, ug pagmalipayon; ug tan-awa” (Moises 7:44).

Basaha ang Moises 7:44–47, nga mangita kon unsay gipakita sa Ginoo kang Enoch aron siya mahupay. Mahimong makatabang nga masayod nga “ang Pagkamatarong” (mga bersikulo 45 ug 47) mao ang titulo ni Jesukristo.

• Ngano sa imong hunahuna nga ang pagkakita niini nga mga butang makapalipay sa kalag ni Enoch? (bersikulo 47).

• Sa unsang paagi nga ang pagpadala ni Jesukristo nagpakita sa kaluoy ug gugma sa Amahan?

Kon makatabang, mahimo nimong hisgotan kon sa unsang paagi ang Manluluwas motabang sa tanang anak sa Dios, bisan ang mga tawo nga daotan ug nangamatay sa Lunop. Tabangi ang mga estudyante nga makasabot nga bisan ang daotan nangamatay sa Lunop ug kinahanglang mag-antos sa ilang mga sala didto sa kalibotan sa espiritu, mahimo gihapon silang maghinulsol pinaagi sa Manluluwas (tan-awa sa Moises 7:38–39; 1 Pedro 3:18–20).

Pagbati sa gugma sa Dios

Sa pagtapos, dapita ang mga estudyante sa pagtinguha og tabang pinaagi sa Espiritu Santo samtang ilang buhaton ang mosunod nga kalihokan. Sa laing paagi, mahimong mosulat ang mga estudyante ngadto sa usa ka tawo sa ilang kinabuhi nga tingali nanginahanglan nga mobati sa kaluoy ug gugma sa Langitnong Amahan.

Pagsulat og usa ka sulat aron matabangan ang tawo diha sa senaryo nga imong gipili sa sinugdanan sa leksiyon. Isip kabahin sa imong sulat, ilakip ang mosunod:

• Unsay imong nakat-onan gikan sa Moises 7 mahitungod sa kaluoy ug gugma sa Langitnong Amahan. Paglakip og piho nga hugpong sa mga pulong o mga bersikulo nga imong gibati nga labihan ka mahinungdanon.

• Ubang mga kasulatan o mga kasinatian nga nakatabang nimo nga mobati sa kaluoy ug gugma sa Dios.

• Dugang nga mga ideya nga sa imong hunahuna mahimong makatabang niini nga tawo nga mobati sa gugma sa Dios.

Taposa pinaagi sa pagdapit sa mga estudyante sa pagpakigbahin sa ilang mga hunahuna, mga kasinatian, ug mga pagbati. Ikonsiderar ang pagdugang sa imong kaugalingon nga pagpamatuod bahin sa gugma sa Amahan.

Dugang nga mga Kapanguhaan

Kinsa ang nakita ni Enoch?

Nakita ni Enoch si Jehova, o Jesukristo, nga naglihok alang sa Amahan. Usa sa mga sangpotanan sa Pagkapukan mao nga ang katawhan gisalikway gikan sa presensya sa Amahan (tan-awa sa Moises 4:29, 31; 5:1, 4). Uban ang eksepsiyon sa pagpaila sa Iyang Anak, ang pagpakita sa Amahan ngadto sa tawo pinaagi sa Anak (tan-awa sa Joseph Fielding Smith, Doctrines of Salvation, 1:27). Pinaagi lamang sa buhat sa Anak, si Jesukristo, nga ang katawhan makaangkon pag-usab sa presensya sa Amahan (tan-awa sa Alma 11:44; Helaman 14:15–17; Hubad ni Joseph Smith, Juan 1:19).

Si Presidente Jeffrey R. Holland sa Korum sa Napulog Duha ka Apostoles mipasabot:

Ubos sa direksiyon ug sa awtoridad nga gihatag sa Amahan (Elohim), ang Anak (Jehova/Jesus) mahimong molihok isip ang Amahan…. Si Kristo makahimo sa bisan unsang panahon ug sa bisan asa nga dapit sa pagsulti ug paglihok alang sa Amahan pinaagi sa hiyas sa “balaanong pagtugyan sa awtoridad” nga gihatag sa Amahan kaniya. (Christ and the New Covenant: The Messianic Message of the Book of Mormon 1997], 183–184)

Moises 7:28. Nganong ang Dios magbakho?

Si Presidente M. Russell Ballard (1928–2023) sa Korum sa Napulog Duha ka Apostoles mitudlo:

Kita mga anak sa Dios. Matag usa kanato bililhon ngadto sa punto nga ang Ginoong Dios nga Makagagahom magdala sa hingpit nga kalipay kon kita magmatinud-anon, o magaluha kon kita magmasupilon. (“The Atonement and the Value of One Soul,” Liahona, May 2004, 87)

Unsa ka dako ang gugma sa Dios alang kanato?

Si Presidente Dieter F. Uchtdorf, nga kaniadto sa Unang Kapangulohan, mitudlo:

Paghunahuna og usa ka labing lunsay, gugma nga labing makabuntog sa tanan nga inyong mahunahuna. Karon pilo-piloa kana nga gugma sa walay sukod nga kantidad—mao kana ang sukod sa gugma sa Dios alang kaninyo [tan-awa sa Isaias 54:10; Jeremias 31:3].

… Bisan kita dili hingpit, hingpit ang gugma sa Dios kanato. Bisan kita dili perpekto, perpekto ang gugma Niya kanato. Bisan og gibati nato ingon og nawala ug walay kompas, ang gugma sa Dios hingpit nga naglibot kanato.

Iya kitang gihigugma tungod kay Siya puno sa walay sukod nga balaan, lunsay ug dili mahulagway nga gugma. Importante kita sa Dios dili tungod sa atong résumé apan tungod kay kita Iyang mga anak. Siya naghigugma kanatong tanan, bisan kadtong adunay mga depekto, sinalikway, maulawon, masulub-on, o nangaparot. Hilabihan kadako ang gugma sa Dios nga Iyang gihigugma bisan ang mapahitas-on, hakog, arogante, ug ang daotan.

Ang gipasabot niini mao, nga bisan unsa man ang atong kahimtang karon, adunay paglaom alang kanato. Bisan unsa ang atong mga pag-antos, bisan unsa ang atong kasaypanan, ang atong walay kataposang manggiluy-ong Langitnong Amahan nagtinguha nga kita mopaduol Kaniya aron Siya makapaduol kanato [tan-awa sa Doktrina ug mga Pakigsaad 88:63]. (“Ang Gugma sa Dios,” Liahona, Nob. 2009, 22–23)

Moises 7:30. Unsay buot ipasabot sa hugpong sa mga pulong nga “ug gani ikaw anaa gihapon diha”?

Si Elder Neal A. Maxwell (1926–2004) sa Korum sa Napulog Duha ka Apostoles mipasabot:

Si Enoch, kang kinsa gipadayag pag-ayo sa Ginoo, midayeg sa Dios taliwala sa kadaghan sa Iyang mga gilalang, miingon sa dakong kasiguroan, “‘Gani ikaw anaa gihapon diha” (Moises 7:30; tan-awa usab sa Jeremias 10:12).

Kining susamang espesyal nga kasegurohan posible nga makakita sa tagsa-tagsa kanato pinaagi sa tanang kapanahonan ug kahimtang sa atong kinabuhi. Ang Dios sa tibuok kalibotan tinuod nga nanginlabot sa atong ginagmay, tinagsa nga kalibotanong kasinatian! Taliwala sa Iyang lapad kaayo nga kaharian, Siya sa gihapon nakaihap kanato, nakaila kanato, ug sa hingpit nahigugma kanato (tan-awa sa Moises 1:35; Juan 10:14). (“Yet Thou Art There,” Ensign, Nov. 1987, 30)

Dugang nga mga Kalihokan sa Pagkat-on

Usa ka tsart nga nagtandi kang Satanas ug sa Dios

Kon makaayo sa mga estudyante ang pagtan-aw sa kalainan tali ni Satanas ug sa Dios, ikonsiderar ang paghimo og tsart nga sama sa mosunod. Samtang ang mga estudyante mopadayon sa leksiyon, mahimo nilang pun-on sa unsay ilang nakat-onan mahitungod ni Satanas ug sa Dios.

Satanas	Dios

Mahimo nimong dapiton ang mga estudyante sa pagtandi sa napuno nga mga kolum ug ipakigbahin ang kalainan nga nahimo niini sa ilang mga kinabuhi aron masabtan kining mga butanga mahitungod ni Satanas ug sa Langitnong Amahan.

Mga Titulo sa Manluluwas

Dapita ang mga estudyante sa pagpangita sa mga titulo sa Manluluwas diha sa Moises 7:39, 45, 47 ug sa pagtuon o pagpamalandong kon unsay ipasabot niini. Pangutan-a ang mga estudyante kon unsay ilang nakat-onan mahitungod sa Manluluwas ug nganong makahuloganon kini kanila.

Pag-uswag ni Enoch

Dapita ang mga estudyante sa pagpakigbahin nganong gusto nila nga mahimong mas sama sa Langitnong Amahan ug ni Jesukristo. Ipasabot nga samtang si Enoch nakakita ug nakigsulti ni Jesukristo, o ni Jehova, kinsa namulong ug nagrepresentar sa Langitnong Amahan, si Enoch nahimong mas sama Kanila. Basaha ang Moises 7:28–52, nga mangita sa mga paagi nga si Enoch misugod sa pagbati ug paglihok sama sa Langitnong Amahan ug ni Jesukristo. Pipila sa mga panabot naglakip nga sama sa Dios, si Enoch nagbakho alang sa katawhan nga nakasala (tan-awa sa Moises 7:41, 44) ug nagmaya diha sa Pag-ula ni Jesukristo (tan-awa sa Moises 7:45–47). Siya usab nangamuyo alang sa kaluoy para sa mga tawo ug mihangyo sa Dios nga dili na magpadala og laing baha human kang Noe. Ang Diyos kinabubut-ong miuyon (tan-awa sa Moises 7:50–51).