Moises 1; Abraham 3: Leksiyon 6

Moises 1:27–42

“Kini ang Akong Buhat ug ang Akong Himaya”

Sa direksyon sa Langitnong Amahan, gilalang ni Jesukristo ang dili maihap nga mga kalibotan. Ang kinanindotan sa mga linalang sa Langitnong Amahan mao ang Iyang espiritung mga anak. Kini nga leksiyon makatabang sa mga estudyante nga mahimong mobati nga mapasalamaton sa Langitnong Amahan ug sa Iyang buluhaton nga ipahinabo ang pagka-imortal ug kinabuhing dayon ang tanan Niyang anak.

Pagpangandam sa estudyante: Dapita ang mga estudyante sa pagpamalandong sa kadaghan sa mga linalang sa Langitnong Amahan ug sa gugma sa Langitnong Amahan para sa matag usa niini. Ang usa ka paagi sa paghimo nila niini mao ang pagsud-ong sa kalangitan sa masanag nga kagabhion ug paghunahuna unsa ang gibati sa Langitnong Amahan para kanila taliwala sa daghang bituon, mga planeta, ug mga galaksiya nga Iyang gilalang.

Mga Posibleng Kalihokan sa Pagkat-on

Mga anak sa Dios

Ikonsiderar ang pagdala sa klase og gamay nga sudlanan nga adunay balas ug usa ka gamayng sudlanan nga adunay tubig. Hangyoa ang usa ka estudyante sa pagduol sa atubangan sa klase ug sa pagtuslo sa iyang tudlo ngadto sa sudlanan nga may tubig ug dayon ituslo ang basa nga tudlo ngadto sa sudlanan nga may balas. Laing paagi, pwede pod nimong ipakita sa mga estudyante ang mosunod nga litrato. Dayon hangyoa ang mga estudyante nga banabaon kon pila ka buok ang grano sa balas nga anaa sa mga kamot sa maong tawo.

Basaha ang Moises 1:27–29, nga mangita kon unsa ang gitandi ni Moises ngadto sa balas sa baybayon ug kon ngano.

• Unsa ang nagpatigbabaw alang kanimo bahin niini nga panan-awon?

Aron tabangan ang mga estudyante nga makadayeg sa gidaghanon sa mga linalang sa Dios, ikonsiderar ang pagpasalida sa “This Is My Work and Glory,” nga anaa sa ChurchofJesusChrist.org, gikan sa time code 0:53 hangtod 1:31.

Aron matabangan ang mga estudyante nga mapamalandongan sa ilang kaugalingon sa mga linalang sa Dios ug sa pag-andam sa ilang hunahuna nga matudloan sa Espiritu Santo, dapita silang kompletohon ang mosunod nga pagsukod sa kaugalingon nga nakat-onan.

Tubaga ang mosunod nga mga pangutana diha sa imong journal sa pagtuon:

• Nganong gilalang sa Dios ang uniberso?

• Nganong gilalang kita sa Dios?

• Unsay akong gibati para sa Dios ug sa Iyang gibuhat para nako?

Dapita ang mga estudyante nga dugangan ang ilang mga tubag diha sa tibuok leksiyon. Pahinumdomi sila nga makatabang ang pagrekord sa ilang mga gihunahuna diha sa journal sa pagtuon aron madapit ang impluwensiya sa Espiritu Santo sa ilang pagkat-on.

Ang buhat ug himaya sa Langitnong Amahan

Basaha ang Moises 1:30, nga mangita ug markahan ang duha ka pangutana ni Moises samtang iyang nakita ang yuta ug ang mga anak sa Dios.

Ang Moises 1:39 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Moises 1:31–33, 39, nga mangita kon sa unsang paagi gitubag sa Ginoo ang mga pangutana ni Moises.

• Unsang mga kamatuoran ang atong makat-onan gikan sa mga tubag sa Dios niini nga mga bersikulo?

Sa mga kamatuoran nga makaplagan sa mga estudyante, tabangi sila sa pag-ila sa buhat ug himaya sa Dios ang pagpahinabo sa pagka-imortal ug kinabuhing dayon sa Iyang mga anak.

Aron mahibaloan kon unsay nasabtan sa mga estudyante bahin sa pagka-imortal ug kinabuhing dayon, pwede nimo silang hangyoion nga ipakigbahin kon sa unsang paagi nila kini ihulagway. Kon makatabang, pwedeng pangitaon sa mga estudyante ang “Imortalidad” ug “Kinabuhing Dayon” sa Giya sa Kasulatan o Mga Hilisgotan ug mga Pangutana sa ChurchofJesusChrist.org. Sa laing pamaagi, pwede pod nimong ipakigbahin ang mosunod nga kahulogan:

Ang pagka-imortal nagpasabot nga walay kataposang pagkinabuhi isip nabanhaw nga tawo. “Ang kinabuhing dayon, o kahimayaan, mao ang pagkahimong nahisama sa Dios nga pagkinabuhi sa iyang presensya sa walay kataposan ingong pamilya” (Kinatibuk-ang Tamdanan nga Basahon: Pagserbisyo sa Ang Simbahan ni Jesukristo sa mga Santos sa Ulahing mga Adlaw, 1.1, Librarya sa Ebanghelyo).

• Sa unsang paagi makatabang ang kamatuoran nga makita sa Moises 1:39 aron masabtan nimo kon nganong gilalang sa Dios ang yuta?

Si Presidente Dieter F. Uchtdorf, kanhi sa Unang Kapangulohan, mipasabot sa katuyoan sa mga linalang sa Dios.

Ug samtang magtan-aw kita sa kadako sa uniberso ug moingon, “Unsa ra man ang tawo kon itandi sa kanindot sa gilalang?” Ang Dios mismo nag-ingon nga kita ang hinungdan nga Iyang gilalang ang uniberso! Ang Iyang buhat ug himaya—ang katuyoan niining nindot nga uniberso—mao ang pagluwas ug paghimaya sa katawhan. Sa laing pagkasulti, ang kalapad sa kahangtoran, ang mga himaya ug mga misteryo sa walay kinutuoban nga gidak-on ug panahon tanan gimugna alang sa kaayohan sa ordinaryo nga mortal sama ninyo ug nako. Ang atong Langitnong Amahan milalang sa uniberso aron atong makab-ot unta ang atong potensiyal isip Iyang mga anak. (“Kamo Importante ngadto Kaniya,” Liahona, Nob. 2011, 20)

• Sa unsang paagi makatabang kini nga pamahayag aron masabtan nimo ang kabahin sa Langitnong Amahan?

• Sa unsang paagi makatabang kini nga pamahayag aron masabtan nimo ang kabahin sa imong kaugalingon?

Tabangan kita sa Langitnong Amahan nga makadawat sa pagka-imortal ug kinabuhing dayon

Ikonsiderar ang pagbutang sa mga estudyante sa gagmay nga mga grupo alang sa mosunod nga kalihokan. Pwede nimong hatagan ang kada grupo og papel ug dapita ang mga estudyante nga isulat ang mosunod nga mga pangutana sa ibabaw nga bahin sa ilang papel. Pwedeng isulat sa mga estudyante ang ilang tubag ubos sa mga pangutana. Kon mahimo, pwede nimong dapiton ang mga estudyante nga mangitag kasulatan nga nagpamatuod sa pipila o tanan nilang tubag.

• Unsay gihimo sa Langitnong Amahan ug ni Jesukristo aron matuman ang atong pagka-imortal?

• Unsay Ilang gibuhat ug padayong buhaton aron mabatonan nato ang kinabuhing dayon?

Aron matabangan ang mga estudyante nga makakat-on nga sila-sila ra, hatagi sila og igong panahon nga tubagon ang naunang mga pangutana. Dayon hangyoa sila nga dugangan ang ilang lista pinaagi sa pagbasa sa Juan 3:16 ug ang mosunod nga pamahayag ni Presidente Dieter F. Uchtdorf.

Gipakigbahin ni Presidente Dieter F. Uchtdorf sa Unang Kapangulohan ang dugang mga paagi nga tumanon sa Langitnong Amahan ang atong pagka-imortal ug kinabuhing dayon.

Gihatagan kita sa [ Langitnong Amahan] og ebanghelyo ug ang Simbahan ni Jesukristo. Gihatagan Niya kita sa plano sa katubsanan, ang plano sa kaluwasan, gani sa plano sa kalipay. …

• Gihatagan Niya kita sa bililhong gasa sa Espiritu Santo. …

• Gihatagan Niya kita og 24/7 nga access ngadto Kaniya pinaagi sa mga pag-ampo uban sa hugot nga pagtuo ug pagpangamuyo uban sa tinuod nga katuyoan.

• Gihatagan Niya kita og modernong mga apostol ug propeta, kinsa nagpadayag sa pulong sa Dios sa atong panahon. …

• Gipahiuli niya ang Iyang Simbahan. …

• Gihatagan Niya kita sa balaang mga kasulatan—ang Iyang sinulat nga pulong ngari kanato.

• Mihatag Siya og dili maihap nga mga himan sa modernong teknolohiya sa pagtabang kanato nga mahimong mga disipulo. …

Nganong ang atong Langitnong Amahan mihatag man kanato og daghan kaayong tabang? Tungod kay Iya kitang gihigugma. Ug tungod kay, sama sa Iyang giingon Mismo, “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39). (“Atong Amahan, Atong Tigtudlo,” Liahona, Hunyo 2016, 5)

Dapita ang mga estudyante nga mopili og pipila ka paagi ngalabing makahuloganon para nila samtang tubagon nila ang mosunod nga mga pangutana.

• Sa unsang paagi makatabang kini kanato sa pag-uswag ngadto sa kinabuhing dayon?

• Sa unsang paagi nakatabang nimo ang pipila niini nga mga paagi aron mas mahisama sa Langitnong Amahan?

Dapita ang mga estudyante nga ipakigbahin ang usa ka paagi nga ilang gipili og ang ilang mga tubag sa mga pangutana sa ibabaw. Pangita og mga paagi aron pasalamatan ug suportahan sila alang sa ilang mga tubag. Kon dili natural nga makatutok ang mga estudyante sa Manluluwas, hisgoti ang Juan 3:16 ug Mosiah 4:2, ug hangyoa ang mga estudyante nga ipakigbahin kon giunsa sila pagtabang sa Manluluwas nga mouswag ug mahimong mas nahisama sa Langitnong Amahan.

Pagpasalamat para sa Langitnong Amahan

Aron tabangan ang mga estudyante nga mas mapasalamaton sa Langitnong Amahan ug ang Iyang buluhaton aron ipatuman ang ilang imortalidad ug kinabuhing dayon, dapita silang tinguhaon ang tabang sa Ginoo samtang ilang tubagon ang mosunod nga mga pangutana sa ilang mga journal sa pagtuon. Sa laing paagi pwede maghimog entry sa ilang journal ang mga estudyante nga nagpahayag sa ilang pagpasalamat sa Langitnong Amahan para sa Iyang gibuhat para nila.

• Unsay imong nakat-onan o gibati karon nga gusto nimong hinumdoman?

• Unsay imong gibati bahin sa Langitnong Amahan ug ni Jesukristo ug sa Ilang gibuhat aron mobalik ka Kanila?

Sag-uloha

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang importante nga hugpong sa mga pulong sa kasulatan mao ang “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Sa unsang paagi Ang Simbahan ni Jesukristo sa mga Santos sa Ulahing mga Adlaw nakatabang sa pagtuman sa imortalidad ug kinabuhing dayon sa tawo?

Si Sister Reyna I. Aburto, kanhi sa Kinatibuk-ang Kapangulohan sa Relief Society, mipasabot:

Gikan sa sinugdanan, ang Dios nagtinguha sa pagpundok ug paghan-ay sa Iyang mga anak “sa pagpahinabo sa [atong] pagka-imortal ug kinabuhi nga dayon” (Moises 1:39). Niana nga katuyoan diha sa hunahuna, Siya misugo kanato sa pagtukod og mga dapit sa pagsimba diin kita makadawat og kahibalo ug mga ordinansa sa kaluwasan ug kahimayaan; mohimo ug mosunod sa mga pakigsaad nga mobugkos kanato ngadto ni Jesukristo; gitugahan sa “gahom sa pagka-diosnon” (Doktrina ug mga Pakigsaad 84:20); ug kanunay nga magpundok aron hinumdoman si Jesus ug lig-onon ang usag usa diha Kaniya. Ang organisasyon sa Simbahan ug ang mga gambalay niini anaa alang sa atong espirituhanong kaayohan. (“Kita Mao Ang Simbahan ni Jesukristo sa mga Santos sa Ulahing mga Adlaw,” Liahona, Mayo 2022, 11)

Unsaon nako pagkahibalo nga gimahal ko sa Langitnong Amahan ug ni Jesukristo?

Si Presidente Henry B. Eyring sa Unang Kapangulohan mipakigbahin:

Ang Langitnong Amahan ug si Jesukristo nakaila ug nahigugma kaninyo. Gusto Nila nga mobalik kamo Kanila ug mahimong sama Kanila. Ang inyong kalamposan mao ang Ilang kalamposan. Inyong nabati kana nga gugma nga gikumpirmahan sa Espiritu Santo sa dihang inyong nabasa o nadungog kini nga mga pulong: “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.” (“Nasulayan, Napamatud-an, ug Nahashasan,” Liahona, Nob. 2020, 97)

Dugang nga mga Kalihokan sa Pagkat-on

Laing paagi sa pagsugod

Aron matabangan ang mga estudyante nga maghunahuna bahin sa Langitnong Amahan ug sa Iyang buhat, pwede nimong dapiton ang mga estudyante nga maghimo og lista sa mga gibuhat sa mga tawo nga ganahan nila. Pwedeng apil ani ang mga trabaho, ganahang buhaton, mga tahas, ug uban pa. Pwedeng hisgotan sa mga estudyante kon sa unsang paagi nakahatag kini og kalipay niini nga mga hamtong.

Dayon pwede nimong ipangutana ang mosunod:

• Unsay imong nahibaloan bahin sa buluhaton sa Langitnong Amahan?

• Sa imong hunahuna unsay nakapalipay Niya sa Iyang buluhaton? (Tan-awa sa 3 Nephi 17:20–21; Doktrina ug mga Pakigsaad 18:11–13.)

Dayon pwedeng pamalandongan sa mga estudyante ang ilang mga tubag sa mosunod:

• Unsa ka lawom ang akong pagsabot sa gihimo sa Langitnong Amahan para nako?

• Unsa ka dako ang akong pag-ila ug pagpakita og pasalamat sa gihimo sa Langitnong Amahan sa akong kinabuhi?

Gipasig-uli ni Joseph Smith ang mga nawalang kamatuoran

Aron matabangan ang mga estudyante nga mailhan ang importanteng papel ni Joseph Smith sa Pagpasig-uli sa ebanghelyo, pwede nilang basahon ang Moises 1:40–41. Pwede nilang ilhon kon unsay gipabuhat sa Ginoo kang Moises (isulat ang mga kamatuoran sa usa ka basahon, ang Biblia), kon unsay nahitabo sa iyang sinulat (mga kamatuoran nga gikuha gikan sa Biblia; tan-awa sa 1 Nephi 13:24–28; Moises 1:23), ug sa unsang paagi mihatag ang Ginooog paagi aron maabot kanato ang maong mga kamatuoran sa atong adlaw (pinaagi ni Joseph Smith ug sa Basahon ni Mormon [tan-awa sa 2 Nephi 3:6–15; Moises 1:41]).

Mga kapilian nga Media

“A Great Work.” Ang ikatulong bersikulo niining kantaha naghisgot sa buhat sa Ginoo ug himaya ingon man ang koneksyon sa mga batan-on niini.

“What is the Purpose and Meaning of Life? Now You Know.” Pwede kang motan-aw gikan sa time code 0:23 hangtod 0:58 aron tudloan ang mga estudyante bahin sa koneksiyon sa Moises 1:39 ug sa plano sa Langitnong Amahan sa kaluwasan .

“Earthly Father, Heavenly Father” (3:59). Kini nga bidyo makatabang sa mga estudyante nga makasabot unsa atong makat-onan kabahin sa Langitnong Amahan pinaagi sa panglantaw sa yutan-ong mga amahan.