Moises 1; Abraham 3: Leksiyon 5

Moises 1:12–26

“Pahawa Gikan Dinhi, Satanas”

Kitang tanan nakasulay nang tentalon ni Satanas. Pero, sama kang Moises, samtang atong hinumdoman kon kinsa gayod kita, makakuha kita og kusog gikan sa Dios aron mabuntog si Satanas ug ang iyang mga tentasyon sa atong kinabuhi. Ang katuyoan niini nga leksiyon mao ang pagtabang sa mga estudyante nga makakuha og kusog gikan sa Dios aron makabuntog sa ilang personal nga mga tentasyon.

Pagpangandam sa estudyante: Dapita ang mga estudyante sa pagpamalandong sa usa sa mga tentasyon nga personal nilang giatubang ug pagsulod sa klase nga andam sa pagkat-on kon unsaon kini pagbuntog.

Mga Posibleng Kalihokan sa Pagkat-on

Pag-atubang sa tentasyon

Aron makapangandam ang mga estudyante nga makakat-on mahitungod sa pagbuntog sa mga tentasyon, ikonsiderar ang pagpakigbahin sa mosunod nga pamahayag ug mga pangutana.

Si Presidente Jeffrey R. Holland sa Korum sa Napulog Duha ka Apostoles mitudlo:

Maisogon kaming mamulong tungod kay si Satanas usa ka tinuod nga binuhat ug siya nagtagana sa paglaglag kaninyo, ug nag-atubang kamo sa iyang impluwensya sa mas batan-ong mga edad. (“Apil Kitang Tanan,” Liahona, Nob. 2011, 45)

• Unsay imong gibati kabahin niini nga kinutlo gikan ni Presidente Holland?

• Unsa ang pipila sa mga tentasyon nga giatubang sa mga tin-edyer nga Santos sa Ulahing mga Adlaw?

Makatabang tingali ang pagsulat sa pisara sa mga tentasyon nga isulti sa mga estudyante. Hangyoon nimo ang mga estudyante nga hunahunaon kini sa ulahing bahin sa leksiyon.

Alang sa mosunod nga mga pangutana, pwede nimong ikonsiderar ang pagdapit sa mga estudyante nga isulat ang ilang mga tubag diha sa ilang journal sa pagtuon.

Pamalandongi ang usa ka tentasyon nga imong naatubang o tingali ikaw nakigbisog. Ikonsiderar ang mosunod:

• Unsay nakapalisod nimo sa pagdaog sa tentasyon?

• Unsay imong gihimo aron makapangayo og tabang ug kusog aron makadaog?

• Para nimo, unsa ka kaepektibo sa pagbuntog sa imong tentasyon?

Samtang imong tun-an ang Moises 1:1-26 karon, tinguhaa ang giya gikan sa Espiritu Santo aron mailhan ang mga kamatuoran nga makapalig-on nimo samtang nag-atubang kag tentasyon.

Gitental ni Satanas si Moises

Dapita ang mga estudyante nga ipakigbahin ang unsay ilang nahimdoman gikan sa miaging leksiyon, o pwede nilang rebyohon kadali ang Moises 1:1–10 ug sa paghunahuna unsa ang ilang nakat-onan. Kon kinahanglan, pahinumdomi sila nga si Moises “nakakita sa Dios nawong sa nawong, ug siya nakigsulti uban kaniya” (Moises 1:2) ug katulo gitudloan sa Dios si Moises nga Iya siyang Anak (tan-awa sa mga bersikulo 4, 6, ug 7).

Bisan tuod bantogang propeta si Moises, nakaatubang usab siya og grabeng tentasyon. Wala madugay human sa kasinatian ni Moises uban sa Dios, lisod kaayo ang iyang nasinatian dihang “si Satanas miabot nga nagtental kaniya” (Moises 1:12). Tungod sa nahibaloan ug gihimo ni Moises, nakadaog siya. Basaha ang Moises 1:12–22, nga mangita kon unsay nakatabang kang Moises nga mabuntog ang mga tentasyon ni Satanas. Ikonsiderar ang pagmarka sa imong makit-an.

Pwede nimong ikonsiderar ang pagpasalida sa bidyo nga “I Am a Son of God” gikan sa time code 2:50 hangtod 6:30, o ang tibuok bidyo kon wala nimo gipasalida ang unang bahin sa miaging leksiyon. Human sa bidyo, pwede nimong dapiton ang mga estudyante nga basahon ang mga bersikulo, nga mangita kon unsay nakatabang kang Moises sa pagbuntog sa mga tentasyon. Dayon pwedeng hisgotan sa mga estudyante ang mosunod nga mga pangutana nga uban sa ilang kapares o sa gagmayng mga grupo:

• Unsay imong nakat-onan sa kasinatian ni Moises nga makatabang nato sa pagbuntog sa atong mga tentasyon?

Ikonsiderar ang pagsulat sa mosunod nga dili kompletong baroganan sa pisara: Makadawat sa tabang sa Dios aron mabuntog ang mga tentasyon pinaagi sa … Dapita ang mga estudyante sa pagduol sa pisara ug taposon ang baroganan gamit ang kaugalingon nilang mga pulong. Kon nagkinahanglan og tabang ang mga estudyante, pwede nimo silang giyahan pinaagi sa pagpangutana og sama sa mosunod:

• Unsa ang tawag ni Satanas kang Moises sa bersikulo 12, ug giunsa pagtubag ni Moises sa bersikulo 13?

• Unsay nahinumdoman ni Moises gikan sa iyang espirituwal nga kasinatian uban sa Dios nga nakatabang niya dihang nag-atubang siya og tentasyon?

Pwedeng tiwason sa mga estudyante ang baroganan sa lainlaing paagi, lakip ang pipila sa mosunod:

… paghinumdom nga mga anak kita sa Dios

… paghinumdom sa nangaging espirituwal nga mga kasinatian

… pagtawag sa Dios alang sa kalig-on

Human mailhi ang daghang baroganan, Ikonsiderar ang paggamit sa mosunod nga kinutlo ug mga pangutana aron matabangan nga mapalawman ang pagsabot sa mga estudyante sa mga kamatuoran nga ilang nadiskobrehan.

Gipakigbahin ni Presidente Russell M. Nelson ang mosunod bahin sa gahom sa paghinumdom nga mga anak kita sa Dios:

Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa “Ako Anak sa Dios.” Apan kana ba nga mahangtoron nga kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tentasyon? (“Mga Pagpili alang sa Kahangtoran” [tibuok kalibotan nga debosyonal para sa mga young adult, Mayo 15, 2022])

• Sa imong hunahuna unsa kahay ipasabot sa pagsilsil sa imong kasingkasing nga ikaw anak sa Dios?

• Sa unsang paagi ang paghinumdom nga mga anak kita sa Dios makalig-on nato dihang mag-atubang kita og tentasyon?

• Sa imong hunahuna nganong kinahanglan nato ang tabang sa Dios aron mabuntog ang tentasyon?

Dapita ang mga estudyante sa pagpakigbahin og mga ehemplo dihang gipalig-on sa Dios ang usa ka tawo batok sa tentasyon. Pwedeng gikan kini sa kasulatan, mga tawo nga suod nila, o ilang kaugalingon mismo. Samtang personal ang mga tentasyon, pahinumdomi ang mga estudyante nga dili ipakigbahin ang bisan unsang piho nga tentasyon.

Pagbuntog sa personal nga mga tentasyon

Aron tabangan ang imong mga estudyante nga masabtan kon unsaon nila paggamit ang mga baroganan nga gihisgotan karon, dapita silang mopili og usa o duha ka tentasyon nga gisulat sa pisara sa sinugdanan sa leksiyon. Isip usa ka klase o gagmayng mga grupo, dapita ang mga estudyante nga maghunahuna og praktikal nga mga paagi nga magamit kini nga mga baroganan sa tawong nag-atubang og tentasyon aron mabuntog ang tentasyon.

Ikonsiderar ang pagdapit sa mga estudyante nga isulat ang ilang mga ideya sa pisara, o pwede nimong ipakita ang pipila sa mosunod nga mga ideya.

Mga paagi aron maggamit unsa ang atong nakat-onan sa Moises 1:12–26:

• Irekord sa imong journal ang usa ka panahon dihang nabati nimo ang gugma sa Ginoo ug nasayod nga anak ka sa Dios. Pwede nimong rebyohon kini atol sa panahon sa tentasyon.

• Sag-uloha ug praktisi ang makapadasig nga mga kasulatan, mga himno, o ang mga pag-ampo sa sakramento aron imong balikbalikon sa imong kaugalingon dihang tentalon ka. (Mao kini ang gihimo nga stratihiya sa Manluluwas diha sa Mateo 4:1–11.)

• Pag-ampo kada adlaw para sa kusog ug gahom sa Ginoo aron mabuntog ang mga tentasyon. Report kada gabii ngadto sa Langitnong Amahan aron pasalamatan Siya, ilhon ang bisang unsang mga kahuyang, mangayog pasaylo, ug manumpa nga padayong maningkamot (tan-awa ang 3 Nephi 18:15, 18).

• Hinumdomi ang imong nangaging espirituwal nga mga kasinatian ug isulat kini sa usa ka journal. Baliki kini kon moabot ang tentasyon.

• Hisgoti uban sa mga ginikanan o sinaligang hamtong o mga higala kon sa unsang paagi nakatabang nila kini nga mga baroganan ug mga pamaagi nga ilang marekomendar kon unsaon nimo kini paggamit.

Dapita ang mga estudyante nga maghimo og lano aron mabuntog nila ang mga tentasyon nga ilang giatubang. Mahimo nimo kini pinaagi sa paghatag sa mosunod nga mga instruksiyon:

Hinumdomi ang tentasyon nga imong gipamalandongan sa sinugdanan sa leksiyon o uban pa nga imong gipakigbisogan.

Ipakigbahin ang imong pagpamatuod mahitungod sa gahom ug kusog sa Ginoo nga imong nasinati sa imong kinabuhi ug sa Iyang kagustohan nga tabangan ang imong mga estudyante sa pagbuntog sa ilang mga tentasyon. Ipahayag ang imong pagsalig nila ug sa ilang abilidad nga mabuntog ang ilang mga tentasyon sa tabang sa Dios.

Mangayo og giya sa Langitnong Amahan, kompletoha ang mosunod nga pamahayag sa imong journal sa pagtuon o sa imong hunahuna: “Aron matabangan kong makapangandam batok niini nga tentasyon, ako mag .”

Dugang nga mga Kapanguhaan

Sa unsang paagi makatabang ang paghinumdom sa gugma sa Dios para nako isip Iyang anak dihang gitental ko?

Si Presidente M. Russell Ballard (1928–2023) sa Korum sa Napulog Duha ka Apostoles miingon:

Palihog hinumdomi nga, una, gimahal ka sa imong Langitnong Amahan, ug, ikaduha, gimahal ka sa imong Manluluwas, ang Ginoong Jesukristo. Isilsil kini nga mga kamatuoran sa imong hunahuna ug ibutang kini sa ilalom imong kasingkasing. Mahimo kini nimong kompas kon unsay angay nimong himoon ug kon unsaon nimo pagtratar ang uban, ug mohatag kini nimog kusog nga mabuntog ang tentasyon ug magpabilin sa dalan sa pakigsaad sa Simbahan. (“Children of Heavenly Father” [Brigham Young University nga debosyonal, Mar. 3, 2020])

Sa unsang paagi makatabang ang paghinumdom sa atong nangaging espirituwal nga mga kasinatian aron mabuntog ang tentasyon?

Si Presidente Jeffrey R. Holland sa Korum sa Napulog Duha ka Apostoles miawhag:

Sa mga higayon sa kahadlok o pagduha-duha o sa malisod nga mga panahon, gamita ang hugot nga pagtuo nga napalambo na ninyo, bisan og limitado kini. … Kon kini nga mga higayon moabot ug mogawas ang mga problema, ang kasulbaran dili dayon moabot, panggunit og hugot sa unsay inyo nang nahibaloan ug barog nga malig-on hangtod moabot ang dugang nga kahibalo. … Ang gidak-on sa inyong pagtuo o sa inyong kahibalo dili mao ang importante—kondili ang kaligdong nga inyong gipakita ngadto sa inyong pagtuo ug sa kamatuoran nga inyo nang nahibaloan. (“Nagatuo Ako,” Liahona, Mayo 2013, 94)

Nganong sagad moabot ang mga tentasyon dihang naningkamot kong mouswag sa espirituwal o human ko makabaton og espirituwal nga mga kasinatian?

Si Propeta Joseph Smith (1805–44) mitudlo:

Dihang mas maduol ang usa ka tawo ngadto sa Ginoo, mas maningkamot ang kaaway aron mababagan ang pagpatuman sa Iyang mga katuyoan. (sa Orson F. Whitney, Kinabuhi ni Heber C. Kimball [Siyudad sa Salt Lake: Bookcraft, 1967], 132)

Si Presidente Jeffrey R. Holland mipatin-aw:

Gusto nakong dasigon kamong tanan karon bahin sa oposisyon nga sagad moabot human makahimog hustong mga desisyon, human ang mga pagpadayag ug kombiksyon nga nakahatag natog kalinaw ug pasalig nga abi nato og dili na mawala. …

Dili kita mahimong moapil sa higayon nga ingon ka mahangtoron ang kaimportante ug walay kataposang sangputanan nga walay kasayoran nga usa kini ka bugno—maayong pakigbugno ug bugno sa kadaogan, apan pakigbugno bisan pa. (“Cast Not Away Therefore Your Confidence” [Brigham Young University nga debosyonal, Mar. 1999], 2–3)

Unsaon nato pagsukol sa gahom ni Satanas?

Gipakigbahin ni Elder Ulisses Soares sa Korum sa Napulog Duha ka Apostoles ang mosunod bahin sa pagbuntog sa tentasyon:

Ang pagpakigbatok sa tentasyon nagkinahanglan og tibuok kinabuhi nga kakugi ug kamatinud-anon. Apan palihog sayri nga ang Ginoo andam nga moabag kanato sa atong personal nga mga paningkamot ug nagsaad og maanindot nga mga panalangin kon kita molahutay hangtod sa kataposan. (“Pagtinguha kang Kristo sa Matag Hunahuna,” Liahona, Nob. 2020, 83)

Dugang nga mga Kalihokan sa Pagkat-on

Tinuod nga ehemplo sa pagbuntog sa tentasyon

Aron tabangan ang mga estudyante nga nadala sa tentasyon o nakigbisog sa adiksyon, ikonsiderar ang pagpasalida sa bidyo nga “Let God Guide You: From Weakness to Strength” (6:07), ang istorya sa usa ka tawo nga nakadawat sa gahom ug kusog sa Ginoo aron mabuntog ang iyang mga tentasyon ug adiksyon sa pornograpiya. Kini nga bidyo mahimong makatabang ilabina sa mga estudyante nga nadala na sa tentasyon. Human sa bidyo, pangutan-a ang mga estudyante kon unsay ilang nadawat nga panabot bahin sa pagbuntog sa tentasyon ug sa papel sa Dios sa atong abilidad sa pagdaog niini. Ikonsiderar ang pagpasalida sa bidyo sa dili pa ang seksiyon nga “Pagbuntog sa personal nga mga tentasyon” sa leksiyon.

Moises 1 sa Perlas nga Labing Bililhon imbes ang basahon sa Genesis

Kon sa imong hunahuna makabenepisyo ang mga estudyante sa paghisgot kon nganong ang Moises 1 wala sa basahon sa Genesis, dapita silang basahon ang Moises 1:23, nga mangita sa rason nganong wala kini giapil. Ikonsiderar ang pagpangutana sa mosunod nga mga pangutana:

• Sa imong hunahuna nganong dili gusto si Satanas nga kini nga asoy nga anaa“diha taliwala sa mga katawhan” (Moises 1:23)?

• Sa unsang mga rason ka malipayon nga gibalik sa Ginoo kini nga kapitulo pinaagi ni Joseph Smith?

Pagtandi sa kasinatian ni Moises sa kasinatian ni Joseph Smith

Aron tabangan ang mga estudyante nga mas masabtan kon unsaon pagbatok ang mga tentasyon ni Satanas ug ang mga panalangin nga moabot sa paghimo niini, dapita ang mga estudyante nga itandi ang mga kasinatian ni Moises ug ni Joseph Smith.

Sa ilang mga journal sa pagtuon, pwedeng magdrowing ang mga estudyante og usa ka tukog nga giporma og tawo nga nganlan og Moises ug laing lipak nga tawo nga nganlan og Joseph Smith. Pwede nilang ikompara ang Moises 1:12–22 ug Joseph Smith—Kasaysayan 1:13–16, nga mangita sa importanteng mga detalye sa kada engkuwentro kang Satanas, ug unsay gihimo ni Moises ug ni Joseph Smith aron mabuntog siya. Pwede nilang ilista kini nga mga detalye ilawom sa kada drowing.

Kon kinahanglag tabang ang mga estudyante, ikonsiderar ang pagpakita og mga pangutanang sama sa:

• Unsang espirituwal nga kasinatian ang imong mahinumdoman nga nabatonan sa propeta sa wala pa ang iyang engkuwentro uban ni Satanas?

• Sa kataposan giunsa pagbuntog sa Propeta si Satanas?

• Unsay nahitabo isip resulta sa pagbuntog sa Propeta kang Satanas (tan-awa sa Moises 1:24-25; Joseph Smith—Kasaysayan 1:17)?

Mag-anam ka wala ang tentasyon samtang tinguhaon nato si Kristo sa tanan natong hunahuna

Aron tabangan ang mga estudyante nga makita ang kaimportante sa pagtutok kang Kristo panahon sa tentasyon, tabangi silang makita nga nagtutok si Moises kang Kristo atol sa iyang engkuwentro ni Satanas (tan-awa sa Moises 1:13, 16–18). Ipasalida ang bidyo nga “Temptation Fades as We Seek Christ in Every Thought” (2:57), ug hangyoa ang mga estudyante nga ipakigbahin ang ilang dugang nakat-onan bahin sa pagbuntog sa tentasyon.