Moises 1; Abraham 3: Leksiyon 3

Abraham 3

Ang Kinabuhi sa Wala Pa Dinhi sa Yuta

Sa usa ka panan-awon, gipakita ni Jehova kang Abraham ang Iyang mga buhat ug mga linalang. Gipakita usab Niya kang Abraham ang kinabuhi sa wala pa dinhi sa yuta, apil ang halangdon ug bantogan nga mga espiritu nga gipili nga mahimong mga lider sa mortalidad. Kini nga leksiyon makatabang sa mga estudyante nga masabtan kon sa unsang paagi makatabang sa ilang kinabuhi ang kahibalo bahin sa kinabuhi sa wala pa dinhi sa yuta diha sa plano sa Langitnong Amahan.

Pagpangandam sa estudyante: Dapita ang mga estudyante sa pagpangutana sa usa ka higala o sakop sa pamilya kon unsay ilang nahibaloan bahin sa kinabuhi sa wala pa dinhi sa yuta ug sa unsang paagi makatabang nila ang pagkahibalo bahin sa kinabuhi sa wala pa dinhi sa yuta.

Mga Posibleng Kalihokan sa Pagkat-on

Pila ang imong edad?

Dapita ang pipila ka estudyante nga ipakigbahin ang ilang edad.

Ipasabot nga ang edad nga ilang ipakigbahin mao ang gidugayon sa panahon nga naa sila sa ilang pisikal nga lawas samtang buhi pa. Ang atong mga espiritu diha nang daan kay sa gidugayon sa atong pisikal nga mga lawas. Sa wala pa matawo, nagkinabuhi kita uban sa Langitnong Amahan ug sa Manluluwas nga si Jesukristo. Gitawag nato kini og kinabuhi sa wala pa dinhi sa yuta.

Hangyoa ang mga estudyante sa pagsulat sa ilang mga tubag sa mosunod nga mga pangutana diha sa ilang mga journal sa pagtuon.

• Unsa ang pipila ka butang nga imong nahibaloan bahin sa kinabuhi sa wala pa dinhi sa yuta?

• Sa unsang paagi ang kahibalo bahin sa kinabuhi sa wala pa dinhi sa yuta makatabang nimo karon?

Awhaga ang mga estudyante nga dugangan ang ilang mga tubag samtang nagpadayon sila niini nga leksiyon. Awhaga silang mangayog tabang gikan sa Langitnong Amahan pinaagi sa Espiritu Santo aron makakat-on kon sa unsang paagi makatabang nila ang kahibalo kabahin sa kinabuhi sa wala pa dinhi sa yuta.

Kon unsay atong makat-onan gikan kang Abraham

Aron tabangan ang mga estudyante nga mahibalo kon asa gikan ang Basahon ni Abraham, pwede nimo silang dapiton nga ipakigbahin unsa ang ilang nahibaloan, o ipakigbahin ang pipila sa mosunod sa kaugalingon nimong mga pulong.

Girekord ni Abraham ang usa ka kasinatian nga makatabang natong masabtan ang kinabuhi sa wala pa dinhi sa yuta. Natawo si Abraham mga 2,000 ka tuig sa wala pa natawo si Jesukristo. Girekord niya ang pipila ka detalye sa iyang kinabuhi apil ang mga panan-awon nga iyang nadawat gikan sa Dios nga makita sa basahon ni Abraham. Kini nga rekord naggikan sa mga linukot nga papyrus nga nadiskobrehan didto sa Ehipto ug gipalit sa mga miyembro sa Simbahan. Dayon, kini nga rekord gipadayag kang Propeta Joseph Smith pinaagi sa gasa ug gahom sa Dios.

Basaha ang Abraham 3:11–12, 21 aron makita kon unsay gitudlo sa Ginoo kang Abraham.

• Unsay mipatigbabaw diha kanimo niini nga mga bersikulo?

• Unsa nga mga kamatuoran ang imong nakat-onan bahin sa Ginoo?

  Samtang magpakigbahin ang mga estudyante, dapita sila nga ipasabot ang mga hugpong sa mga pulong o mga bersikulo kon diin gikan ang ilang mga panabot aron mamarkahan sa uban nga mga estudyante kon gusto nila.

• Sa unsang paagi ang pagsabot niini nga mga kamatuoran bahin ni Jesukristo makaimpluwensiya nimo karon?

• Sa unsang paagi nimo nasaksihan o nasinati kini nga mga kamatuoran bahin sa Manluluwas diha sa imong kinabuhi?

Ang atong kinabuhi sa wala pa dinhi sa yuta

Human makat-oni ang kabantogan ni Jesukristo sa wala pa dinhi sa yuta (tan-awa sa Abraham 3:16–21), nakat-onan usab ni Abraham ang bahin sa atong kinabuhi sa wala pa dinhi sa yuta. Sa dili pa nimo basahon kon unsay gipakita sa Ginoo kang Abraham, handurawa kon sama sa unsa kaha kon makita nimo ang imong kinabuhi sa wala pa dinhi sa yuta uban sa Langitnong Amahan ug ni Jesukristo. Pamalandongi kon unsay epekto niini kanimo.

Hatagi og igong panahon ang mga estudyante nga mahanduraw ang epekto sa pag-obserbar sa ilang kaugalingon diha sa ilang kahimtang sa wala pa dinhi sa yuta uban sa Langitnong Amahan ug ni Jesukristo.

Ang Abraham 3:22–23 mao ang usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Abraham 3:22–23, nga mangita unsay nakat-onan ni Abraham diha sa iyang panan-awon bahin sa kinabuhi sa wala pa dinhi sa yuta. Makatabang tingali sa mga estudyante nga masayod nga ang “mga binuhat” niini nga mga bersikulo nagtumong sa premortal nga mga espiritu.

• Unsa kaha nga mga kamatuoran ang nakat-onan o nasabtan og maayo ni Abraham tungod niini nga kasinatian?

  Isulat ang lainlaing kamatuoran nga gipakigbahin sa mga estudyante diha sa pisara. Kon wala kini nahisgotan sa mga estudyante, idugang ang mosunod: Gipili sa Dios ang Iyang mga halangdon ug bantogan nga espiritu nga mga anak aron mahimong mga magmamando sa wala pa sila matawo. Sagad gitawag ni og gi-ordin nang daan.

• Sa imong hunahuna, unsa ang kalahian sa kahulogan sa kalibotan sa “halangdon ug bantogan” kaysa sa Ginoo?

Apil ba ta sa mga halangdon ug bantogan?

Sa tibuok kalibotang debosyonal, gihisgotan ni Presidente Russell M. Nelson ang usa ka paagi nga magamit kanimo ang kamatuoran nga gitudlo sa Abraham 3.

Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo! … Apil kamo sa labing maayo nga gipadala sa Ginoo sukad dinhi sa kalibotan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibotan kay sa nangaging henerasyon! (“Paglaum sa Israel” [tibuok kalibotang debosyonal sa kabatan-onan, Hunyo 3, 2018], 8, 16)

Ikonsiderar ang pagdapit sa mga estudyante nga markahan ang ilang mga kasulatan sa paagi nga makatabang nilang mahinumdoman ang gitudlo ni Presidente Nelson. Human sa bersikulo 22 isulat tingali nila ang hugpong sa mga pulong nga “apil ko,” o pwede nilang isulat ang ilang ngalan ibabaw sa ngalan ni Abraham sa bersikulo 23, o pwede tingali nilang ikonektar ang Abraham 3:22–23 sa pamahayag ni Presidente Nelson sa ibabaw diha sa Librarya sa Ebanghelyo.

Kon makatabang, hatagi og pipila ka panahon ang mga estudyante nga makakat-on og dugang bahin sa kinabuhi sa wala pa dinhi sa yuta. Pwede nilang tun-an ang “kinabuhi sa wala pa dinhi sa yuta” diha sa Giya ngadto sa mga Kasulatan o sa Topical Guide. O pwedeng isulat sa mga estudyante ang mga kutay sa mga kasulatan, nga ikonektar ang mga bersikulo bahin sa kinabuhi sa wala pa dinhi sa yuta sama sa Jeremias 1:4–5; Alma 13:3–4; ug Doktrina ug mga Pakigsaad 138:55–56. Hangyoa ang mga estudyante nga ipakigbahin ang unsay ilang nakaplagan ug nganong makahuloganon kini ngadto kanila.

Himoa ang mosunod uban ang gagmayng grupo ug dayon ipresentar ang pipila sa ilang mga nahunahunaan ngadto sa klase.

Handurawa nga usa sa inyong klasmeyt ang dili segurado kon sa unsang paagi magamit kaniya ang Abraham 3:22–23.

Andama ang mosunod:

• Usa ka summary sa unsay gitudlo sa Abraham 3:22–23 ug ni Presidente Nelson.

• Mga ideya kon sa unsang paagi ka o ang ubang mga batan-on makaapekto sa uban sa maayong paagi o unsaon nimo sila nga madala paduol ni Jesukristo.

• Sa unsang paagi nabati nimo nga makatabang ang pagkasabot sa kinabuhi sa wala pa dinhi sa yuta diha sa imong kinabuhi.

Samtang magpakigbahin ang mga estudyante, pangita og nahiangayng mga paagi aron mapahimug-atan nga gipadala sila dinhi sa Langitnong Amahan aron tabangan ang uban nga mapaduol Kaniya. Usab, hatagi og sinsero nga komplementaryo ug dayega ang mga estudyante para sa ilang kaandam nga moapil. Ang paghimo niini makatabang sa mga estudyante nga mahibalo nga gihatagan nimo og bili ang ilang kontribusyon. Ang imong mga paningkamot makatabang nga mas madasig silang mopakigbahin sa ilang mga hunahuna diha sa klase sa sunod.

Para sa dugang pagbansay, tan-awa ang “Paghimo og palibot diin ang tanan gitahod ug nahibalo nga ang ilang mga kontribusyon gihatagan og bili” diha sa Pagpalambo sa mga Kahanas sa Magtutudlo.

Ikonsiderar ang pagpakigbahin sa imong pagpamatuod sa mga kamatuoran niini nga leksiyon.

Sag-uloha

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanong hugpong sa mga pulong sa kasulatan mao ang “Isip mga espiritu kita ‘nabuhat sa wala pa matukod ang kalibotan.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Asa ako makakat-on pa mahitungod sa basahon ni Abraham?

Ang pipila sa nindot nga mga kapanguhaan aron makakat-on og dugang bahin sa basahon ni Abraham mao ang:

• Ang kapitulo, “Ang Basahon ni Abraham” sa manwal sa estudyante sa institute sa Perlas nga Labing Bililhon

• Mga Hisgotanan sa Kasaysayan sa Simbahan, “Hubad sa Basahon ni Abraham”

• Mga saysay sa mga Hilisgotan sa Ebanghelyo, “Hubad ug ang Katinuod sa Basahon ni Abraham”

Abraham 3:19, 21. Unsa pay atong nahibaloan bahin sa kabantogan sa Manluluwas diha sa kinabuhi sa wala pa dinhi sa yuta?

Si Elder Neal A. Maxwell (1926–2004) sa Korum sa Napulog Duha ka Apostoles mitudlo:

Si [Jesukristo] gikaingon na nga Siya “labaw pa nga maalamon kay kanilang tanan.” (Abraham 3:19.) … Dugang pa, unsa ang nahibaloan sa Ginoo—sa pagkatinuod, mas halapad kaayo—dili lang kay daghan—kaysa pag-ipon sa tanang nahibaloan sa mga mortal. (All These Things Shall Give Thee Experience [1979], 22)

Ang atong Balaang Manunubos … nakalabaw sa tanang indibiduwal ug [sa katibuk-ang gidaghanon sa] … mga kapasaidad ug mga kalamposan niadtong tanang mga nabuhi kaniadto, karon, ug sa umaabot! (“O, Divine Redeemer,” Ensign, Nov. 1981, 8)

Dugang nga mga Kalihokan sa Pagkat-on

Paggamit sa mga bituon sa pagtudlo bahin sa kabantogan sa Manluluwas

Sa Abraham 3, migamit ang Ginoo ug lainlaing mga planeta ug mga bituon aron tudloan si Abraham bahin sa mahangtoron nga kinaiyahan sa panahon ug ang nagamandong kahan-ay sa Iyang mga linalang. Usa niini nga mga bituon, nailhan sa Langitnong Amahan nga Kolob, mahimo usab nga simbolo ni Jesukristo.

Ikonsiderar ang pagdapit sa mga estudyante sa pagbasa sa Abraham 3:2–3, nga mangita sa mga pulong ug hugpong sa mga pulong nga gigamit sa Ginoo aron ihulagway ang Kolob.

Unsa ang imong nabantayan sa paghulagway sa Ginoo sa Kolob nga pwede usab nga mahimong usa ka paghulagway kang Jesukristo?

Makakat-on kita sa pagbuhat og bisan unsa nga isugo sa Ginoo

Dapita ang mga estudyante sa pagbasa sa mosunod nga mga kinaiya ug ipakigbahin nganong daghang mga tawo ang ingong niini ang gihunahuna ug gibati.

Tawo #1: Dili ko segurado kon nganong ania ko dinhi. Wala gyod ko mahibalo kon aduna bay mas dakong katuyoan niini.

Tawo #2: Nabuhi ko aron maglingaw-lingaw. Gipahimuslan lang nako ang akong kinabuhi ug nalipay ako sa akong kaugalingon.

Sa parehas nga panan-awon gihatagan sa Ginoo si Abraham og halangdon ug bantogang mga espiritu sa kinabuhi sa wala pa dinhi sa yuta, gipadayag usab Niya ang usa sa mga katuyoan sa kinabuhi. Basaha ang Abraham 3:24-26 aron madiskubrihan kon unsa ang giingon sa Ginoo. Ang hugpong sa mga pulong nga “kinabuhi sa wala pa dinhi sa yuta [first estate]” nagpasabut sa premortal nga kinabuhi, ug ang “kinabuhi dinhi sa yuta [second estate]” nagpasabut sa mortal nga kinabuhi.

Samtang ipakigbahin sa mga estudyante unsa ang ilang nakat-onan, seguradohang klaro nga ang pagsulay sa kinabuhi nagtino kon buhaton ba nato ang bisan unsa nga isugo sa Dios kanato.

Makatabang tingali ang mosunod nga pamahayag ni Elder Dale G. Renlund sa Korum sa Napulog Duha ka Apostoles.

Ang plano sa Dios naglakip og mga direksiyon alang kanato, nga gitawag diha sa mga kasulatan isip mga sugo. Kini nga mga sugo dili panglingaw-lingaw nga pundok ni pinasulagma nga koleksyon sa ipatuman nga mga lagda aron sa pagbansay kanato nga magmasulundon. Konektado kini sa atong pagpalambo og mga kinaiya sa pagkadiosnon, pagbalik ngadto sa atong Langitnong Amahan, ug pagdawat og malungtarong kalipay. (“Magpili Kamo Niining Adlawa,” Liahona, Nob. 2018, 105)

Ikonsiderar ang pagdapit sa mga estudyante sa pagpakigbahin og mga ehemplo sa mga tawo nga kanunay nga naningkamot sa pagtuman sa mga sugo sa Dios ug kon unsay ilang nakat-onan gikan niini. Kon dili mahisgotan sa mga estudyante ang Manluluwas, pangutana kon unsay ilang nakat-onan gikan sa Iyang ehemplo sa pagkamasulundon.

Pwedeng isulat sa mga estudyante ang usa ka paagi nga ilang mapauswag ang ilang pagkamasulundon sa mga sugo sa Dios.