កូរិនថូស ទី១ ១០
ការចៀសផុតពីការល្បួង
តើអ្នកធ្លាប់ប្រាថ្នាថា អ្នកអាចចៀសផុតពីការល្បួងដែលអ្នកប្រឈមមុខដែរឬទេ ? សាវកប៉ុលបានបង្រៀនគោលការណ៍ដ៏មានតម្លៃមួយ ដែលអាចជួយយើង នៅពេលយើងប្រឈមមុខនឹងការល្បួង ។ គោលបំណងនៃមេរៀននេះ គឺជួយអ្នកឲ្យពឹងផ្អែកទៅលើព្រះយេស៊ូវគ្រីស្ទដើម្បីយកឈ្នះការល្បួង ។
ការល្បួង
ប្រសិនបើអាចធ្វើបាន សូមរកមេដែក និងដែក ហើយគិតអំពីរបៀបដែលអ្នកអាចប្រើវា ដើម្បីពន្យល់ពីគោលគំនិតនៃការទប់ទល់នឹងការល្បួង ។
សូមអានសេចក្ដីថ្លែងការណ៍ខាងក្រោមដោយអែលឌើរ អូលីសេស សូរ៉េស ក្នុងកូរ៉ុមនៃពួកសាវកដប់ពីរនាក់ ឬមើលវីដេអូ « Seek Christ in Every Thought » ចាប់ពីនាទីទី ២:៤៤ ដល់នាទីទី ៣:២៣ ដែលមាននៅលើគេហទំព័រ ChurchofJesusChrist.org ។
និយាយជាពាក្យប្រៀបធៀប ការងាកទៅរកការល្បួង គឺប្រៀបបានទៅនឹងការកាន់ដែកដើរទៅរកមេដែកដូច្នោះដែរ ។ ថាមពលមើលមិនឃើញរបស់មេដែកស្រូបយកវត្ថុដែលមានជាតិលោហៈ ហើយទាញលោហៈនោះឲ្យទៅជាប់នឹងវា ។ មេដែកបាត់បង់ថាមពលរបស់វា នៅពេលដែលវត្ថុដែលមានជាតិលោហៈនៅឆ្ងាយពីវា ។ ដូច្នេះហើយ ពេលយើងមិនចុះចូលនឹងការល្បួង នោះវារសាយបាត់ ហើយថាមពលរបស់វាឈប់មានមកលើគំនិត និងចិត្តរបស់យើងហើយ វាប្រៀបដូចជាមេដែកដែលមិនអាចមានឥទ្ធិពលមកលើលោហៈដែលនៅឆ្ងាយដូច្នោះដែរ ហេតុដូច្នេះហើយ វាគ្មានឥទ្ធិពលលើសកម្មភាពរបស់យើងបានឡើយ ។
( អូលីសេស សូរ៉េស « Seek Christ in Every Thought » Liahonaខែ វិច្ឆិកា ឆ្នាំ ២០២០ ទំព័រ ៨៣ )
នៅពេលអ្នកសិក្សា កូរិនថូស ទី១ ១០ សូមស្តាប់ការបំផុសគំនិតពីព្រះវិញ្ញាណបរិសុទ្ធ ដែលនឹងជួយអ្នកដឹងពីអ្វីដែលអ្នកអាចធ្វើដើម្បីទប់ទល់នឹងការល្បួងដែលអ្នកប្រឈមមុខ ។
គោលបំណងមួយនៃព្រះគម្ពីរ គឺជួយយើងឲ្យរៀនពីជីវិត និងការតស៊ូរបស់អ្នកដែលបានចែកឋានទៅហើយ ( សូមមើល កូរិនថូស ទី១ ១០:៦, ១១; មរមន ៩:៣១ ) ។ ដូចដែលបានកត់ត្រានៅក្នុង កូរិនថូស ទី១ ១០ ប៉ុលបានប្រើគំរូនៃការឆ្លងកាត់សមុទ្រក្រហមរបស់សាសន៍អ៊ីស្រាអែល និងការធ្វើដំណើរក្នុងទីរហោស្ថាន នៅពេលលោករំឭកពួកកូរិនថូសអំពីរបៀបដែលព្រះអម្ចាស់គង់ជាមួយសាសន៍អ៊ីស្រាអែលក្នុងការធ្វើដំណើររបស់ពួកគេ ( សូមមើល កូរិនថូស ទី១ ១០:១–៤ ) ។
សូមកត់ចំណាំនូវអ្វីដែលព្រះអម្ចាស់បានធ្វើសម្រាប់សាសន៍អ៊ីស្រាអែល និងព្រះបរមងារដែលបានប្រើ ដើម្បីពិពណ៌នាអំពីទ្រង់នៅក្នុង ខទី ៤ ។
-
តើអ្នកអាចរៀនអ្វីខ្លះ អំពីព្រះអង្គសង្គ្រោះចេញមកពីព្រះបរមងារដែលប៉ុលបានប្រើនៅក្នុង ខទី ៤ ?
ទោះជាព្រះអម្ចាស់បានជួយជ្រោមជ្រែងសាសន៍អ៊ីស្រាអែលដោយអព្ភូតហេតុក៏ដោយ ក៏នៅពេលខ្លះ ពួកគេបានចុះចាញ់នឹងការល្បួងដែរ ។ សូមអាន កូរិនថូស ទី១ ១០:៥–១១ ដោយរកមើលការល្បួងដែលបណ្តាលឲ្យសាសន៍អ៊ីស្រាអែលងាកចេញពី « ថ្មដាខាងព្រលឹងវិញ្ញាណ » របស់ពួកគេ គឺព្រះយេស៊ូវគ្រីស្ទ ។
-
តើអ្នកគិតថាស្ថានភាពរបស់យើងស្រដៀងនឹងសាសន៍អ៊ីស្រាអែលតាមរបៀបណាខ្លះ ?
-
តើយុវវ័យប្រឈមមុខនឹងការល្បួងជាទូទៅអ្វីខ្លះ ដែលអាចនឹងធ្វើឲ្យពួកគេងាកចេញពីព្រះអង្គសង្គ្រោះ ?
សូមគិតអំពីការល្បួងដែលអ្នកកំពុងប្រឈមមុខនាពេលបច្ចុប្បន្ន និងរបៀបដែលវាមានអានុភាពខ្លាំងដើម្បីបង្វែរអ្នកចេញពី « ថ្មដា » គឺព្រះយេស៊ូវគ្រីស្ទ ។ សូមគិតអំពីរបៀបដែលជីវិតរបស់អ្នកនឹងទទួលឥទ្ធិពល ប្រសិនបើអ្នកអាចយកឈ្នះលើការល្បួងទាំងនេះ ។
ព្រះអង្គសង្គ្រោះនឹងជួយយើងឲ្យយកឈ្នះលើការល្បួង
សូមចាំថា ការកំពុងត្រូវបានល្បួងមិនមែនជាអំពើបាបទេ ប៉ុន្តែការចុះចាញ់នឹងការល្បួងទើបជាអំពើបាប ។ សូមអាន កូរិនថូស ទី១ ១០:១២–១៤ ដោយស្វែងរកគោលការណ៍ដែលអាចជួយអ្នកឲ្យយកឈ្នះលើការល្បួង ។
១. សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សារបស់អ្នក ៖
-
តើព្រះសន្យាថាទ្រង់នឹងធ្វើអ្វីខ្លះ ដើម្បីជួយអ្នកឲ្យយកឈ្នះលើការល្បួង ?
-
តើពាក្យ និងឃ្លាអ្វីខ្លះនៅក្នុងខគម្ពីរទាំងនេះ ពិពណ៌នាអំពីអ្វីដែលព្រះរំពឹងឲ្យយើងធ្វើ នៅពេលយើងប្រឈមមុខនឹងការល្បួង ?
-
តើគោលការណ៍អ្វីខ្លះ ដែលអ្នកបានរកឃើញ ?
អ្នកប្រហែលជាបានរកឃើញគោលការណ៍មួយដូចជា ព្រះនឹងប្រទានផ្លូវមួយសម្រាប់យើងដើម្បីចៀសផុតពីការល្បួង ប៉ុន្តែយើងត្រូវតែជ្រើសរើសញែកខ្លួនយើងចេញពីការល្បួងសិន ។
តាមរយៈព្រះគម្ពីរ និងតាមរយៈព្យាការីសម័យបច្ចុប្បន្នរបស់ទ្រង់ នោះព្រះអង្គសង្គ្រោះបានបង្រៀនយើងអំពីរបៀបដើម្បីយកឈ្នះលើការល្បួង ។ សូមអានបទគម្ពីរខាងក្រោម និងសេចក្តីថ្លែងការណ៍ប្រកបដោយការព្យាករណ៍ ដោយរកមើលអ្វីដែលអ្នកអាចធ្វើ ដើម្បីងាកទៅរកព្រះអង្គសង្គ្រោះ ហើយចៀសផុតពីការល្បួង ។ អ្នកអាចនឹងចង់ភ្ជាប់វាទៅ កូរិនថូស ទី១ ១០:១២–១៤ ។
-
ហេព្រើរ ៤:១៥–១៦ ( កំណត់ចំណាំ ៖ សង្ឃជាន់ខ្ពស់ដែលបានថ្លែងក្នុងខគម្ពីរទាំងនេះ គឺសំដៅលើព្រះយេស៊ូវគ្រីស្ទ )
-
ប្រធាន ហិនរី ប៊ី អាវរិង ក្នុងគណៈប្រធានទីមួយ ៖
រូបភាពរូបថតផ្លូវការរបស់ប្រធាន ហិនរី ប៊ី អាវរិង ដែលបានថតនៅឆ្នាំ ២០១៨ ។សេចក្តីជំនឿរបស់យើងទៅលើព្រះយេស៊ូវគ្រីស្ទ នាំយើងទៅរកការប្រែចិត្ត និងដើម្បីរក្សាបទបញ្ញត្តិរបស់ទ្រង់ ។ យើងគោរពតាម ហើយយើងទប់ទល់នឹងការល្បួងដោយធ្វើតាមការបំផុសគំនិតទាំងឡាយរបស់ព្រះវិញ្ញាណបរិសុទ្ធ ។ យូរៗទៅ ធម្មជាតិរបស់យើងនឹងផ្លាស់ប្តូរ ។ យើងនឹងក្លាយទៅជាក្មេងតូច ស្តាប់បង្គាប់ព្រះ និងមានសេចក្ដីស្រឡាញ់កាន់តែខ្លាំង ។ ការផ្លាស់ប្ដូរនោះ ប្រសិនបើយើងធ្វើអស់ពីសមត្ថភាពដែលយើងត្រូវរក្សាវា នោះនឹងធ្វើឲ្យយើងមានលក្ខណៈគ្រប់គ្រាន់ ដើម្បីរីករាយនឹងអំណោយទានដែលមកតាមរយៈព្រះវិញ្ញាណបរិសុទ្ធ ។ បន្ទាប់មកយើងនឹងមានសុវត្ថិភាពនៅលើថ្មដាតែមួយគត់ ។
( ហិនរី ប៊ី អាវរិង « As a Child » Liahonaខែ ឧសភា ឆ្នាំ ២០០៦ ទំព័រ ១៦ )
-
តើអ្នកបានរៀនអ្វីខ្លះពីបទគម្ពីរទាំងនេះ និងសេចក្តីថ្លែងការណ៍នេះ ដែលជំរុញចិត្តអ្នកឲ្យងាកទៅរកព្រះអង្គសង្គ្រោះ ដើម្បីគេចចេញពីការល្បួង ?
-
តើមានវិធីណាខ្លះដែលព្រះនឹងប្រទានផ្លូវមួយដើម្បីគេចចេញពីការល្បួង ?
-
តើយើងអាចធ្វើអ្វីខ្លះ ដើម្បីស្គាល់ និងប្រើការគេចចេញដែលព្រះប្រទានឲ្យ ?
សូមឆ្លើយសំណួរពីរ ឬច្រើនខាងក្រោមនេះ ។
-
សូមសរសេរ កូរិនថូស ទី១ ១០:១៤ ឡើងវិញ ដោយបញ្ចូលឈ្មោះរបស់អ្នកតាមក្រោយ « ឱ ពួកស្ងួនភ្ងាខ្ញុំអើយ » ហើយជំនួស « ការថ្វាយបង្គំរូបព្រះ » ដោយការល្បួងមួយដែលអ្នកកំពុងជួបប្រទះ ។
-
សូមកត់ត្រាបទពិសោធន៍មួយដែលព្រះអង្គសង្គ្រោះ បានជួយអ្នកឲ្យគេចចេញពីការល្បួង ។ តើបទពិសោធន៍នេះ អាចជួយអ្នកឲ្យគេចចេញពីការល្បួងបច្ចុប្បន្នរបស់អ្នកដោយរបៀបណា ?
-
សូមកត់ត្រាជំហានជាក់លាក់ដែលអ្នកនឹងធ្វើ ដើម្បីពឹងផ្អែកលើព្រះយេស៊ូវគ្រីស្ទ ហើយទប់ទល់នឹងការល្បួងដែលអ្នកកំពុងប្រឈមមុខ ។
សូមឆ្លើយសំណួរខាងក្រោមនេះ ។ អ្នកមិនចាំបាច់ចែកចាយការល្បួងជាក់លាក់របស់អ្នកទេ ។
២. សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សារបស់អ្នក ៖ អ្នកមិនចាំបាច់ចែកចាយការល្បួងជាក់លាក់របស់អ្នកទេ ។
-
តើអ្នកបានរៀន ឬទទួលអារម្មណ៍អ្វីខ្លះអំពីព្រះអង្គសង្រ្គោះ នៅពេលអ្នកសិក្សា កូរិនថូស ទី១ ១០ ?
-
តើការណ៍នេះជួយអ្នកឲ្យគេចចេញពីការល្បួងដែលអ្នកប្រឈមមុខដោយរបៀបណា ?
ជម្រើស ៖ តើចង់រៀនសូត្របន្ថែមទៀតទេ ?
តើព្រះយេស៊ូវគ្រីស្ទ និងព្រះវិញ្ញាណបរិសុទ្ធ អាចជួយខ្ញុំឲ្យយកឈ្នះលើការល្បួងដោយរបៀបណា ?
អែលឌើរ អូលីសេស សូរ៉េស ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ការវាយតបប្រឆាំងនឹងការល្បួង ត្រូវការភាពឧស្សាហ៍ព្យាយាម និងសេចក្តីស្មោះត្រង់ពេញមួយជីវិត ។ ប៉ុន្តែ សូមដឹងថា ព្រះអម្ចាស់គឺត្រៀមព្រះកាយដើម្បីជួយយើងនៅក្នុងកិច្ចខិតខំផ្ទាល់ខ្លួនរបស់យើងជានិច្ច ហើយសន្យាប្រទានពរជ័យដ៏អស្ចារ្យ ប្រសិនបើយើងតស៊ូដល់ទីបញ្ចប់ ។…
បងប្អូនប្រុសស្រីជាទីស្រឡាញ់របស់ខ្ញុំអើយ ខ្ញុំសូមថ្លែងទីបន្ទាល់ថា ពេលយើងពឹងផ្អែកទៅលើថ្មដានៃសេចក្តីសង្រ្គោះ ជាអង្គសង្រ្គោះនៃព្រលឹងរបស់យើង … នោះសមត្ថភាពដើម្បីគ្រប់គ្រងគំនិតរបស់យើងនឹងចម្រើនឡើងយ៉ាងខ្លាំង ។ ខ្ញុំអាចអះអាងនឹងបងប្អូនថា ភាពចាស់ទុំខាងវិញ្ញាណរបស់យើងនឹងចម្រើនឡើងយ៉ាងខ្លាំង ដោយធ្វើឲ្យដួងចិត្តយើងផ្លាស់ប្ដូរ ហើយធ្វើឲ្យយើងកាន់តែដូចជាព្រះយេស៊ូវគ្រីស្ទ ។ លើសពីនេះទៅទៀត ឥទ្ធិពលនៃព្រះវិញ្ញាណបរិសុទ្ធនឹងមានកាន់តែជិតស្និទ្ធ ហើយនឹងបន្តស្ថិតនៅក្នុងជីវិតរបស់យើងជានិច្ច ។ បន្ទាប់មក ការល្បួងរបស់ខ្មាំងសត្រូវនឹងបាត់បង់អំណាចរបស់វាបន្តិចម្តងៗ ដែលជាលទ្ធផល ធ្វើឲ្យយើងជីវិតកាន់តែរីករាយ និងកាន់តែបរិសុទ្ធ ។
សម្រាប់ជនទាំងឡាយណា ដែលបានធ្លាក់ក្នុងការល្បួង ហើយកំពុងតែធ្វើសកម្មភាពទុច្ចរិត ទោះបីក្នុងហេតុផលណាក៏ដោយ ខ្ញុំសូមបញ្ជាក់ដល់អ្នកថា អ្នកអាចត្រឡប់មកវិញបាន នៅក្នុងព្រះគ្រីស្ទយើងមានក្តីសង្ឃឹម ។
( អូលីសេស សូរ៉េស « Seek Christ in Every Thought » Liahonaខែ វិច្ឆិកា ឆ្នាំ ២០២០ ទំព័រ ៨៣–៨៤ )
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានបង្រៀន ៖
គោលការណ៍មួយនៃការរីកចម្រើនដ៏អស់កល្បជានិច្ចគឺ ការអនុវត្តន៍ការគ្រប់គ្រងខ្លួនឯង និងការរស់នៅដោយសុចរិត ជួយពង្រឹងសមត្ថភាពយើងដើម្បីទប់ទល់នឹងការល្បួង ។ នេះជាការពិត ទាំងរឿងខាងវិញ្ញាណ និងខាងសាច់ឈាម ។ …
ជាផ្នែកនៃផែនការដ៏ទេវភាពនៃព្រះ យើងត្រូវបានប្រទានពរឲ្យមានអំណោយទាននៃព្រះវិញ្ញាណបរិសុទ្ធ ។ … ទ្រង់ក៏ជាសំឡេងនៃការព្រមានទាស់នឹងអារក្ស និងជាសំឡេងនៃការការពារទាស់នឹងគ្រោះថ្នាក់ផងដែរ ។ ពេលយើងធ្វើនាវាចរណ៍លើសមុទ្រជីវិត នោះការធ្វើតាមការបំផុសគំនិតនៃព្រះវិញ្ញាណបរិសុទ្ធគឺចាំបាច់ណាស់ ។ ព្រះវិញ្ញាណនឹងជួយយើងឲ្យចៀសផុតពីការល្បួង និងគ្រោះថ្នាក់នានា ហើយលួងលោម ព្រមទាំងដឹកនាំយើងឆ្លងកាត់ឧបសគ្គទាំងឡាយ ។
( ឃ្វីនថិន អិល ឃុក « Shipshape and Bristol Fashion: Be Temple Worthy—in Good Times and Bad Times » Liahonaខែ វិច្ឆិកា ឆ្នាំ ២០១៥ ទំព័រ ៤១–៤២ )
តើខ្ញុំអាចរៀបចំទុកជាមុនដោយរបៀបណា ដើម្បីគេចចេញពីការល្បួង ?
ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) បានបង្រៀន ៖
ការសម្រេចចិត្តត្រឹមត្រូវ គឺងាយធ្វើណាស់ នៅពេលយើងសម្រេចចិត្តយ៉ាងល្អទុកជាមុន ដាក់វាជាគោលដៅសំខាន់នៅក្នុងគំនិត ពេលធ្វើដូចនេះ វាជួយមិនឲ្យមានការថប់អារម្មណ៍ [ អំឡុងពេលត្រូវសម្រេចចិត្ត ] នៅពេលយើងនឿយហត់ ឬត្រូវល្បួងយ៉ាងខ្លាំងនោះ ។ …
ចូរដាក់វិន័យខ្លួនឯងដើម្បីកុំឲ្យអ្នកត្រូវសម្រេចចិត្ត ហើយត្រូវសម្រេចចិត្តឡើងវិញអំពីអ្វីដែលអ្នកនឹងធ្វើ នៅពេលអ្នកជួបនឹងការល្បួងដដែលៗម្ដងហើយម្ដងទៀត ។ អ្នកត្រូវសម្រេចចិត្តធ្វើអ្វីមួយ តែម្ដងប៉ុណ្ណោះ ! …
ពេលវេលាដែលត្រូវចេញឲ្យឆ្ងាយពីផ្លូវរបស់អារក្ស គឺជាពេលមុនដែលផ្លូវនោះចាប់ផ្ដើម ។ រឿងអាថ៌កំបាំងនៃជីវិតល្អ គឺការការពារ និងការទប់ស្កាត់ ។ ជនទាំងឡាយណាដែលបណ្ដោយខ្លួនទៅតាមអារក្ស ជាធម្មតាគឺជាជនដែលបានដាក់ខ្លួនឲ្យនៅក្នុងស្ថានភាពងាយរងគ្រោះ ។
( ការបង្រៀនរបស់ប្រធានសាសនាចក្រ ៖ ស្ពែនស៊ើរ ដបុលយូ ឃឹមបឹល [ ឆ្នាំ ២០០៦ ] ទំព័រ ១០៨–១០៩ )