Ke Fos ko Yam’
Yesus Kristus ni gel ko yam’ nifan ko gubin e gidii’
Pi gachalpen Yesus e rited downgin ngalan fare low ko yam’. Yad baadag ni ngar ayuweged downgin, machane ke chugur ko ngiyal’ fare ran ko Madnom. Ra duugliyed ni ngar sulod biyay u tomuren fare ran ko Madnom.
Kakadbul riy ko fare bin dalip e ran nike yim’ Yesus, me yan Maria Magdalene nge boche gidii’ ko fare low ko yam’.
Napan e rabra tow gad, mar guyed ni fare gaf i malang ni bay u langan fare low ko yam’ e kan lulubiy ke chuw. Ranod ngalan fare low ko yam’, ma dogur ku Yesus e daki moy u rom.
Mary e mil ngani yoeg ku Peter nge John nike fek be’ e dogur ku Yesus. Peter nge John era mil gow ko fare low ko yam’.
Napan rataw gow ko fare low ko yam’, me yan Peter nge John ngalan. Miyow gow ni daki moy e dogur rok Yesus u rom. Ma fare yungi mad nikan bibchiy ngay e kabay u rom.
Peter nge John nra sulow nga tabinaew, me par Maria u rom u barba’ fare low ko yam’ nga’i yoer. Sap ngalan fare low ko yam’ me guy l’agruw i engel. Miyow fith ko mange ran’en nibe yoer nag. Ke yoeg nike fek be’ e dogur ku Yesus, ma de nang ko gin nibay riy.
Yesus e yib, machane de pow rok ni Ir. Me fith Yesus ngak ni ga’ar, “Bpin, mang ni ga be yor?” Finey Maria ni Chan’em e be’ nima milaey’. Me fith Ngak ko fa’anra manang ko gin nikanan tay e dogur rok Yesus ngay.
Me ga’ar Yesus, “Maria.” Me changar. Me nang ni ireram Yesus! Me ga’ar Ngak, “Rabboni.” Me l’oeg Yesus ni ngan ni yoeg ngak pi gachalpen nike guy Somol mab t’uf ni nge sul ngak e Chitamangin nga Tharmiy. Maria ni pire’g pi gachalpen Somol me yoeg ngorad nike guy Yesus nike fos ko yam’!
Kore balayal’ nem, me mukun boch pi Gachalpen Somol nga tabang. Miyad ning e mad rorad, ya yad be rus nag ni ri runga’g fapi tiyugong’ ko Jews min gay egin ni yad bay riy. Mar gin gad ngay, miyad guy Yesus nib sak’iy nga fithik’rad. Som’on riy, e yib e tamdag ngorad. Yad be fineyed ni yad be guy ba kan. Me ga’ar Yesus ngorad, “Nge yib e gapas ngomed.”
Pining Yesus pi gachalpen ni ngar math gad nga pa’ ni ruw raba’ nge rifrif u ay. Baadag ni ngar naged ni bay e dogur rok, ma gathi kemus ni ya’el. Maki un ngorad ko abich ni kay e nig nge honey nib athibthib. Pi gachalepn e ri fal’falan’ gad napan nirguyed!
Me ayuweg Yesus pi Gachalpen ni ngar nanged fan fapi babyor nib thothup ni weliy mornga’agen e yam’ ni ra yib Ngak nge Fos ko Yam’. Baadag Somol ni nge machib nag pi gachalpen mronga’agen, ni rayog ni ngar kalngaen’ gad min na’g fan e denen rorad. Pi Gachalpen Somol e yadra mang e micheg riy.
Thomas ni Gachalpen Somol e de moey urom ko ngiyal’ ni yib Yesus. Yoeg ni dabi michwan’ nib fos Yesus makemus ni fa’anra guy fathan pa’ ko gin nrichibiy.
Meruk e ran nga tomuren, meyib pi gachalpen Somol nga taabang. Meyibi m’ug Yesus biyay. Ngiyal’ ney ni buch e bay Thomas u rom.
Yesus ni pining Thomas ni nge math ko fath ulan nruw raba’ i pa’ nge p’eyon. Me fulweg ngak Thomas, “Mu tal ko toruruw nggu mich u wun’um.” Me fulweg Thomas ngak ni ga’ar, “Somol rog nge Got rog!” Ke nang Thomas ni ke fos Yesus ko yam’. Ke yoeg Yesus ni rib felan’ e pi’in ndar guyed gag mu gu mich u wun’rad.