Aafiaga e Aoao ai 11

Filifili Pe Faapefea ona Aoao Atu: Fesoasoani i Tamaiti Aoga e Faataunuu la Latou Matafaioi

Vaaiga Aoao

O lenei aafiaga e aoao ai e aofia ai manatu nei:

• Filifili pe faapefea ona aoao atu

• Malamalama i le matafaioi a tamaiti aoga i le aoaoina

• Fesoasoani i tamaiti aoga e faataunuu la latou matafaioi

fua paleni

Manatu Autu

Ao e saunia lesona, e taua le faapaleni o le filifili po o a mea e aoao atu ma pe faapefea ona aoao atu.

I le aafiaga e aoao ai 10, na e aoao ai pe faapefea ona faaaoga le mataupu aoaoina pe a filifili po o a mea e aoao atu i le poloka mau. Ua e saunia nei e filifili pe faapefea ona aoao atu tamaiti aoga.

O Le Matafaioi a le Tamaitiiti Aoga i le Faagasologa o le Aoaoina

Afai e tatau ona aafia tamaiti aoga i le tuputupu ae faaleagaga, o le a e manaomia ia malamalama i la latou matafaioi i le faagasologa o le aoaoina ma saunia gaoioiga e aoao ai na o le a fesoasoani ia i latou e faataunuu lelei la latou matafaioi.

I lenei aafiaga e aoao ai atoa lava, tusi soo se uunaiga po o manatu e te maua mo le fesoasoani i au tamaiti aoga e faataunuu la latou matafaioi i le faagasologa o le aoaoina.

Aoao Atu ma le Aoaoina Mai o le Talalelei Tusitaulima o Gaoioiga

faavaa o le tusitaulima

Suesue le vaega 1.3.3 (itulau 7-8) ma palakalafa muamua e tolu o le vaega 4.3.4 (itulau 62) o le Aoao Atu ma le Aoaoina Mai o le Talalelei mo Faiaoga ma Taitai i Seminare ma Inisitituti o Mataupu Faalelotu (2012). Ao faitau, vaavaai mo tali i fesili nei:

• O le a le matafaioi a le tamaitiiti aoga i le faagasologa o le aoaoina?

• O le a sou lagona i mea e aupito taua e mafai ona e faia e fesoasoani ai i au tamaiti aoga e faataunuu la latou matafaioi?

Tusi au tali i nei fesili i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai mo aoaoga faafaiaoga po o le vaega.

Fautuaga Faavaloaga i le Matafaioi a le Tamaitiiti Aoga

O le tele o Pulega Aoao ua faamamafaina le taua o le fesoasoani i tamaiti aoga e faataunuu la latou matafaioi i le faagasologa o le aoaoina.

Maimoa le vitio “Prophetic Teaching about the Student’s Role in Learning” (4:14), e maua i le LDS.org. I lenei vitio, o ni nai taitai o le Ekalesia ua molimau mai i le taua o le matafaioi a le tamaitiiti aoga i le faagasologa o le aoaoina.

Mafaufauga Patino

Mafaufau i se taimi na saunia ai e le faiaoga o se vasega na e auai ni gaoioiga na e aafia ai i le faagasologa o le aoaoina. Mafaufau nei i se taimi e lei faaaafia lelei ai e se faiaoga tagata o le vasega. Faatusatusa ma fuafua le eseesega o aafiaga e lua.

• O le a le eseesega na ia faia ina ua valaaulia oe ma isi e auai i le faagasologa o le aoaoina?

• O le a le mea na fai e le faiaoga e fesoasoani ai ia te oe e faataunuu lau matafaioi o se tagata aoao?

Tusi au tali i nei fesili i se api o talaaga e suesue ai po o se isi nofoaga e mafai ona e toe maua ai ma faasoa atu i lau taitai mo aoaoga faafaiaoga po o le vaega.

tamaiti aoga i le potuaoga a le lotu

Fesoasoani i Tamaiti Aoga e Faataunuu la Latou Matafaioi

E mafai e tamaiti aoga ona faataunuu la latou matafaioi i le aoaoina i le talalelei ao e valaaulia i latou e faamalamalama, faasoa, mamolimau i aoaoga faavae ma mataupu faavae o le talalelei. Faamalamalama atu, faasoa atu, ma molimau atu i aoaoga faavae ma mataupu faavae o le talalelei e faamanino ai le malamalama o tamaiti aoga, faaleleia lo latou mafaia e aoao atu le talalelei i isi, ma faamalosia la latou molimau o mea latou te faaleoina. (Tagai Aoao Atu ma le Aoaoina Mai o le Talalelei, vaega 2.6 [itulau 35–37].)

• E mafai e tamaiti aoga ona faamatala se fuaitau o se mau po o se mataupu faavae ia latou lava upu. E mafai ona e valaaulia tamaiti aoga e faamatala i paga, i vaega laiti, i le vasega atoa, e ala i le faatinoina o tala, po o le tusitusi.

• E mafai e tamaiti aoga ona faasoa mai ni manatu, aafiaga, po o lagona e fesootai i se mau po o se mataupu faavae. E mafai ona e valaaulia tamaiti aoga e faasoa mai ni lagona po o aafiaga patino talafeagai na latou oo i ai i le aoaoga faavae ma le mataupu faavae. E mafai foi ona latou faasoa mai ni aafiaga sa latou molimauina i olaga o isi. O lenei mea e mafai ona faia i upu po o le tusitusi.

• E mafai e tamaiti aoga ona molimau i aoaoga faavae ma mataupu faavae latou te iloa e moni. E mafai ona e valaaulia i latou e molimau i mea latou te lagonaina ma iloa e moni ma le eseesega na ia faia i o latou olaga. E manaomia e tamaiti aoga le aua le amataina i le “Ou te fia tuuina atu lau molimau” po o “Ou te iloa.” O le faia o soo se faamatalaga e faamaonia pe molimau patino i le upumoni e fausia ai le molimau.

O Le Auai e Faaleleia ai le Aoaoina

Maimoa le vitio “Explain, Share and Testify: Students’ Testimonies” (2:28), e maua i le LDS.org. I lenei vitio, ua talanoa tamaiti aoga e uiga i le faataunuuina o la latou matafaioi ao latou faamatalaina, faasoa atu, ma molimau atu i le seminare.

Faatotonugalemu le Potuaoga i Tamaiti Aoga:

Maimoa le vitio “A Student-Centered Classroom: An Example” (6:51), e maua i le LDS.org. I lenei vitio, ua fesoasoani Sister Weller i tamaiti aoga e faataunuu la latou matafaioi i le aoao mai tusitusiga paia. Vaavaai pe faapefea ona ia faataunuuina lenei faamoemoega.

Maimoa le vitio “A Student-Centered Classroom: A Teacher’s Reflections” (3:01), e maua i le LDS.org. I lenei vitio, ua talanoaina e Sister Weller le taua o le fesoasoani i tamaiti aoga e auai i le faagasologa o le aoaoina.

Tusi Lesona o Gaoioiga a le Faiaoga

O lesona taitasi i lau tusi lesona a le faiaoga e i ai fesili, gaoioiga, ma metotia na e mafai ona fesoasoani i au tamaiti aoga ia auai malosi ao aoao mai tusitusiga paia. Tatala lau tusi lesona a le faiaoga i soo se lesona pe faaaoga le pepa e tufa atu ua faaautu “Lesona Faataitai—3 Nifae 11:1–17” lena ua saunia i le faaopoopoga o lenei tusi lesona. Vaavaai mo fesili, gaoioiga, ma metotia na e mafai ona e faaaoga e valaaulia ai tamaiti aoga e faataunuu la latou matafaioi i le faagasologa o le aoaoina.

Tusi ni nai fesili, gaoioiga, po o metotia na e maua i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai mo aoaoga faafaiaoga po o vaega.

Aoaoina o Tamaiti i La Latou Matafaioi

O tamaiti aoga o le a sili atu le auai atoatoa ao latou malamalama i la latou matafaioi i le aoaoina o le talalelei. O se tasi o lesona muamua i le tele o tusi lesona a le faiaoga seminare ua saunia ni faamatalaga i le aoaoina o tamaiti aoga i la latou matafaioi. Iloilo puupuu le lesona 1, “O le Matafaioi a le Tagata Aoao,” i le Tusi a Mamona Tusi Lesona a le Faiaoga Seminare ma mafaufau pe faapefea ona e faaaoga mataupu faavae mai le lesona ao e aoaoina au tamaiti aoga e uiga i la latou matafaioi i le faagasologa o le aoaoina.

Maimoa le vitio “Teaching Students Their Role” (6:27), e maua i le LDS.org. I lenei vitio, ua aoao e Brother Howell ana tamaiti aoga e uiga i la latou matafaioi i le amataga o le tausaga aoga.

Tusi ni manatu atonu e te manao e faaaoga ao e aoao atu au tamaiti aoga e uiga i la latou matafaioi i le amataga ma le tausaga aoga atoa. Tusi ou manatu i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai mo aoaoga faafaiaoga po o vaega.

Aotelega ma le Faaaogaina

Mataupu Faavae ia Manatua

• E mafai ona e fesoasoani ia i latou ia malamalama, talia, ma faataunuu la latou matafaioi i le aoaoina o le talalelei.

• E taua mo oe le aoao o au tamaiti aoga e uiga i la latou matafaioi i le aoaoina o le talalelei i le amataga ma le tausaga aoga atoa.

• E mafai ona e fesoasoani i tamaiti aoga e faataunuu la latou matafaioi i le faagasologa o le aoaoina, e ala i le valaaulia o i latou e faamalamalama, faasoa, ma molimau i aoaoga faavae ma mataupu faavae.

• O le tusi lesona a le faiaoga e mafai ona fesoasoani ia te oe e saunia gaoioiga na o le a aafia ai au tamaiti aoga i le faagasologa o le aoaoina.

Elder Richard G. Scott

“O le faaiuga [a tamaiti aoga] e auai, o se faatinoga lea o le faitalia e faataga ai le Agaga Paia e fesootai mai se savali patino e fetaui ma o latou lava manaoga taitoatasi. O le fatuina o se siosiomaga o le auai e faaleleia ai le avanoa o le a aoao mai ai e le Agaga ni lesona e sili atu le taua nai lo mea e mafai ona e talanoa atu ai.

“O lena auai o le a aumaia i o outou olaga le taitaiga a le Agaga” (Richard G. Scott, “To Learn and to Teach More Effectively” [Faigalotu a le Education Week, Aok. 21, 2007], 4–5, speeches.byu.edu).

“Ona, a lea?”

Ina ia faaiu lenei aafiaga e aoao ai, tusi i lalo ni mea o le a e faia e faalagolago i mataupu faavae na e aoaoina i le aso.