Aafiaga e Aoao ai 1

Ola ma Aoao Atu i le Ala a le Faaola

Vaaiga Aoao

O lenei aafiaga e aoao ai e aofia ai manatu nei:

Aoao atu, o lou tiutetauave sili
Iesu Keriso, le Aoao Sili
Ola ma aoao atu e pei ona faia e le Faaola

Ata

vasega o le seminare

Manatu Autu

Afio mai i Seminare ma Inisitituti o Mataupu Faalelotu (S&I). I polokalama a le seminare ma inisitituti i le lalolagi atoa, e faitau afe faiaoga ma taitai ua fesoasoani i talavou ma talavou matutua o le Ekalesia e aoao ma faaaoga aoaoga faavae ma mataupu faavae o le talalelei a Iesu Keriso. Matou te faafetai atu mo lou naunau e auauna atu i le Alii i lenei tofiga taua.

O le Tiutetauave Sili o le Aoaoina o Fanau a le Atua

Na aoao mai e Elder Jeffrey R. Holland o le Korama a Aposetolo e Toasefululua le vaega lenei e faatatau i le tiutetauave o le aoaoina o fanau a le Atua:

Ata
Elder Jeffrey R. Holland

“Matou te faafetai tele mo i latou uma o e faiaoga. Matou te alolofa ia te outou ma talisapaia outou e sili atu mai mea e mafai ona matou fai atu ai. Matou te faatuatuaina tele outou. Ina ia lelei le aoao atu ma maua le lagona o loo sologa manuia o se galuega mamafa moni lava. Peitai e aoga. E leai se isi ‘valaauga maoae’ e mafai ona tatou mauaAoao Atu—E Leai Se Isi Valaauga E Sili Ai (anomea o punaoa mo le faaleleia o faiaoga, 1978)]. …

“Mo i tatou taitoatasi o le ‘o mai ia Keriso’ [MF&F 20:59], o le tausia o ana poloaiga ma mulimuli i lana faataitaiga e foi atu ai i le Tama, e moni o se faamoemoega aupito maualuga lea ma paia ua ola ai le tagata. O le fesoasoani i isi ia faia foi lena mea—e aoao atu, faatauanau, ma taitaia i latou ma le agaga tatalo e savalia lena ala o le laveaiina foi—e mautinoa lava o le galuega lona lua lea e sili le taua i o tatou olaga. Atonu o le mafuaaga lena na saunoa ai David O. McKay i se tasi taimi, ‘E leai se isi tiutetauave e mafai ona pau i luga o se alii [po o se tamaitai] nai lo le avea ma e e faiaoga o fanau a le Atua’ [David O. McKay, i le Conference Report, Oke. 1916, 57]” (“O se Aoao mai le Atua,” Liahona, Iulai 1998, 25).

Ata

O Keriso o loo aoao atu i le sunako

O Iesu Keriso, le Faiaoga Sili

O le a e maua le fesoasoani paia e fesoasoani ia te oe ao e saili e tuputupu ae ma atiina ae o se faiaoga o fanau a le Atua ma tauivi e mamanu lou olaga ma le aoao atu e pei o le Faaola.

Faaalu se taimi e maimoa ai le vitio “The Master Teacher” (3:51), e maua i le LDS.org. I lenei vitio, ua faamatalaina e Peresitene Boyd K. Packer (1924–2015) o le Korama a Aposetolo e Toasefululua ni vaega faapitoa o le aoaoina atu o le talalelei.

Ao e maimoa i le vitio, faalogo mo mafuaaga taua pe aisea e tatau ai ona e ola ma aoao atu e pei ona faia e le Faaola. Tusi ou manatu ma lagona i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai o le aoaoga po o le vaega.

Aoao Atu ma le Aoaoina Mai o le Talalelei Tusitaulima o Gaoioiga

Ata

faavaa o le tusitaulima

E tusa ai ma le Faaola o se faataitaiga sili mo faiaoga, na aoao mai Peresitene Boyd K. Packer o le Korama a Aposetolo e Toasefululua:

Ata
Peresitene Boyd K. Packer

“O ai se isi faataitaiga sili atu e mafai ona tatou maua? O le a se suesuega sili nai lo le iloiloina o o tatou manatu ma sini ma auala ma faatusatusa ia Iesu Keriso? (Teach Ye Diligently, rev. ed. [1991], 22).

O le gaoioiga lenei o le a fesoasoani e faaloloto lou malamalama i le ala na aoao ai le Faaola ma uunaia ai isi ma le ala na Ia fesoasoani ai ia i latou e aoao, tuputupu ae faaleagaga, ma liua i Lana talalelei.

Suesue le uputomua i itulau v-vii i le Aoao Atu ma le Aoaoina Mai o le Talalelei: O se Tusitaulima mo Faiaoga ma Taitai i Seminare ma Inisitituti o Mataupu Faalelotu (2012). Valivali pe vase upu galue na e faamatalaina auala eseese na aoao atu ai ma auauna atu ai le Faaola.

A uma ona e suesue nei itulau i le Aoao Atu ma le Aoaoina Mai o le Talalelei, tusi au tali i fesili nei i autafa o lau tusitaulima. (E uunaia oe e tusi ni faamatalaga i autafa o lau tusitaulima i le faasologa atoa o nei lesona.)

O le a se mea e te matauina e uiga i Ana ala faafaiaoga ma le taitaiga?
Na faapefea ona Ia fesoasoani i isi e aoao, tuputupu ae faaleagaga, ma liua i Lana talalelei?

Aotelega ma le Faaaogaina

O Mataupu Faavae ia Manatua

E leai se tiutetauave e sili atu e mafai ona pau i luga o soo se tagata nai lo le avea ma se faiaoga o fanau a le Atua.
O Keriso o le Faiaoga Sili. E tatau ona tatou taumafai e ola ma aoao atu e pei ona Ia faia.
Tatou te aoao atu le mea o i ai i tatou lava, o lona uiga o la tatou galuega faalesoo, o tatou uiga, a tatou molimau, ma a tatou tautinoga i le talalelei e mafai ona uunaia ai isi e pei lava o a tatou upu.

Ata
Peresitene Boyd K. Packer

“O le meaalofa e aoao atu e tatau ona galue i ai, ma o le taimi lava e maua ai, e tatau ona fafagaina pe afai e tatau ona faatumauina” (Boyd K. Packer, Teach Ye Diligently, 345).

“Ona, a lea?”

Ua iloaina Peresitene Boyd K. Packer o le Korama a Aposetolo e Toasefululua na fesili “Ona, a lea?” i le faaiuga o fonotaga ma le Korama a le Toasefululua ina ia musuia le talanoaga pe faapefea ona faaaoga le autu ua taulimaina ia suia ai olaga o tagata (tagai i le Jeffrey R. Holland, “Ona, A Lea?” [Konafesi o le OAE o le Feagaiga Fou, Aok. 8, 2000], si.lds.org). I le faaiuga o aafiaga taitasi e aoao ai, fesili ia te oe lava “Ona, a lea?” ma mafaufau pe faapefea ona e mafai ona faaaoga patino autu ma mataupu faavae ua talanoaina.

Ina ia faaiuina lenei aafiaga e aoao ai, tusi i lalo ni mea o le a e faia e faalagolago i mataupu faavae na e aoaoina i le aso.