Aafiaga e Aoao ai 4

Atiina Ae se Siosiomaga e Aoao ai le Alofa, Faaaloalo, ma le Faamoemoega

Vaaiga Aoao

O lenei aafiaga e aoao ai e aofia ai manatu nei:

Malamalama i le uunaiga o le alofa faaKeriso
Atiina ae se siosiomaga o le alofa ma le faaaloalo
Fausia se lagona o le faamoemoega i le potuaoga

Manatu Autu

Ata
faavaa o le tusitaulima

“Pe a alolofa ma faaaloalo ia faiaoga ma tamaiti aoga i le Alii, le tasi i le isi, ma le afioga a le Atua, o le a faaleleia le aoaoina. O lagona tutusa o le faamoemoega e taulai ai taumafaiga ma faamoemoega ma tuuina atu le taitaiga i aafiaga i le potuaoga” ( Aoao Atu ma le Aoaoina Mai o le Talalelei: O se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 16).

Alofa FaaKeriso: O se Uunaiga mo le Lelei

O o tatou olaga ua sili atu le faaoaina ma sili atu le tumu i le uunaiga faaKeriso a tagata. Ao tatou mafaufau i o tatou olaga, e mafai e i tatou taitoatasi ona faailoaina ituaiga o faatinoga alofa o le tausia o tagata na uunaia i tatou mo le lelei.

Ata

vasega seminare

Mafaufau i se faiaoga, taitai, po o se isi tagata na faaalia le alofa faaKeriso ma faia se eseesega i lou olaga. Na faapefea ona ia fesoasoani ia te oe ia lagona, ma aisea? Tusi ou manatu ma lagona i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai o le aoaoga po o le vaega.

E faapei o le tagata na e mafaufau i ai na e maua ai se uunaiga lelei, i le avea ai ma ni faiaoga seminare ma le inisitituti, e mafai ona tatou faia se eseesega i olaga o a tatou tamaiti aoga. Tatou te faia lenei mea i le atiina ae o le siosiomaga o le alofa faaKeriso ma le faaaloalo i le potuaoga.

Aoao Atu ma le Aoaoina Mai o le Talalelei Tusitaulima o Gaoioiga

Ata

faavaa o le tusitaulima

O le gaoioiga lenei o le a faateleina lou malamalama i le manaomia ona atiina ae se siosiomaga e aoao ai le alofa ma le faaaloalo ma le ala e fatuina ai lena siosiomaga.

Suesue le vaega 2.2.1 (“Alofa ma le Faaaloalo”) i itulau 13–14 i lau tusitaulima Aoao Atu ma le Aoaoina Mai o le Talalelei. Vase upu po o fuaitau na e fesoasoani e faalolotoina lou malamalama (1) aisea e taua ai le i ai o se siosiomaga o le potuaoga e i ai le alofa ma le faaaloalo ma (2) le ala e atiina ae ai lena siosiomaga.

Atiina Ae se Siosiomaga e Aoao ai le Alofa ma le Faaaloalo: Aisea ma e Faapefea

O vitio nei ua faaalia ai le tele o mataupu faavae ma faataitaiga ua faailoaina i le vaega 2.2.1 (“Alofa ma le Faaaloalo”) o le tusitaulima Aoao Atu ma le Aoaoina Mai o le Talalelei. Maimoa i nei vitio ma mafaufau loloto i au tali i fesili na e mulimuli i faamatalaga o le vitio i lalo.

Maimoa le vitio “Teach with Charity” (1:44), e maua i le LDS.org. I lenei vitio, ua folafola mai e Elder Neil L. Andersen o le Korama a Aposetolo e Toasefululua faapea e taua i faiaoga le faatumuina i le alofa mama o Keriso. Ao e maimoa, vaavaai pe faapefea e le Alii ona faaalia le alofa mo i latou na Ia aoaoina.

A uma ona e maimoa i le vitio, tusi i lau api o talaaga e suesue ai ni tali pupuu i fesili nei:

Faapefea e le Faaola ona faaali Lona alofa mo e na Ia aoaoina?
Faapefea ona ou faaalia le alofa ma le migao i e ou te aoaoina?

Maimoa le vitio “Sister Egan’s Class” (2:17), e maua i le LDS.org. I lenei vitio, o Sister Egan, na valaaulia o se faiaoga seminare, ua faaalia pe faapefea ona atiina ae lelei se siosiomaga o le alofa, faaaloalo, ma le faamoemoe. Maimoa pe na faapefea ona tausia e ia ma ana tamaiti aoga le tasi ma le isi ma fatuina se siosiomaga faapena.

A uma ona maimoaina le vitio, tusi i lau api o talaaga e suesue ai tali pupuu i fesili nei:

O a mea na fai e Sister Egan ma tamaiti e atiina ae ai se siosiomaga alofa ma le faaaloalo?
O a mea ou te faia e atiina ae ai se siosiomaga e aoao ai le alofa ma le faaaloalo i lou potuaoga?

Aapa atu i Tamaiti Aoga Uma

Na aoao mai Elder Jeffrey R. Holland o le Korama a Aposetolo e Toasefululua:

Ata
Elder Jeffrey R. Holland

“Afai e le tali mai [tamaiti aoga], masalo e le mafai ona e aoaoina nei i latou, ae e mafai ona e alofa ia i latou. Ma afai e te alofa ia i latou nei, atonu e mafai ona e aoaoina i latou taeao” (“Aoao Atu ma le Aoaoina Mai i le Ekalesia,” Liahona, Iuni 2007, 56).

Atonu e tauivi tamaiti aoga ma le tele o luitau: faavauvau i le aiga, mai, le atoatoa i le aoaoina, le atoatoa faaletino, ma isi. Ia manatu i o latou tulaga taitoatasi ma manaoga. E le o tamaiti aoga uma o le a tali vave mai i au taumafaiga e atiina ae se siosiomaga o le alofa ma le faaaloalo. O le vitio lenei ua faaalia ai pe faapefea e faiaoga ona aapa atu e uunaia tamaiti aoga o e atonu o nisi taimi e foliga mai e le tali mai i le vasega.

Maimoa le vitio “Reaching the Individual” (1:28), e maua i le LDS.org. Ao e maimoa i lenei vitio, vaavaai mo le ala na valaaulia ai e le faiaoga le alofa faaKeriso ma le agalelei i totonu o le loto o se tamaitiiti aoga.

Atiina ae se Lagona o le Faamoemoega

Ata
faavaa o le tusitaulima

“O se lagona o le faamoemoega e fefaasoaai e le faiaoga ma le tamaitiiti aoga e mafai ona faateleina ai le faatuatua ma tuuina mai le taitaiga ma le uiga i le aafiaga o le potuaoga. E tatau i tamaiti aoga ona malamalama o loo latou auai i le vasega ina ia oo ina latou iloa le Tama Faalelagi ma Lona Alo, o Iesu Keriso, ma ia agai ai i le ola e faavavau e ala i le suesue i tusitusiga paia ma upu a perofeta” ( Aoao Atu ma le Aoaoina Mai o le Talalelei 15).

I le potuaoga, e tutusa lava le taua mo faiaoga ia atiina ae se lagona o le faamoemoega e pei ona latou atiina ae se siosiomaga o le alofa ma le faaaloalo.

Tusitaulima o Gaoioiga Aoao Atu ma le Aoaoina Mai o le Talalelei

Ata

faavaa o le tusitaulima

O le gaoioiga lenei o le tusitaulima o le a fesoasoani ia te oe e malamalama ai i le taua tele o le atiina ae o se lagona o le faamoemoega i lou potuaoga.

Faitau le vaega 2.2.2 (“O se Lagona o le Faamoemoega”) i le itulau 15 i lau tusitaulima Aoao Atu ma le Aoaoina Mai o le Talalelei. I lau tusitaulima, vase upu ma fuaitau na e faalolotoina lou malamalama o:

O le uiga mo oe ma au tamaiti aoga ia faasoa atu se lagona o le faamoemoega.
Pe mafai faapefea e oe ma au tamaiti aoga ona atiina ae lenei siosiomaga i le potuaoga.

O Faataitaiga e Fesoasoani e Atiina Ae se Lagona o le Faamoemoega

Maimoa le vitio “O se Lagona o le Faamoemoega” (8:32), e maua i le LDS.org. I lenei vitio, o ni nai faiaoga ma tamaiti aoga e faasoa mai faataitaiga na e fesoasoani e atiina ae se lagona o le faamoemoega i o latou potuaoga. Ao e maimoa i lenei vitio, vaavaai mo auala e atiina ae ai se lagona o le faamoemoega i lou potuaoga.

Fesili e Fesoasoani i Faiaoga e Atiina Ae se Siosiomaga e Aoao ai le Alofa, Faaaloalo, ma le Faamoemoega

Mai lea taimi i lea taimi, o le mafaufau i fesili nei ao e aoao atu au tamaiti aoga o le a fesoasoani e atiina ae ai se siosiomaga o le alofa, faaaloalo, ma le faamoemoega:

Pe ua iloa e au tamaiti aoga ou te alofa ia i latou?
Pe a ou iloa ua faigata ona popole alofa, pe ou te tatalo ina ia faatumuina i le alofa mama, le alofa le pona o Keriso (tagai i le Moronae 7:47-48)?
O a auala ua uunaia ai e aoaoga ma faataitaiga a le Faaola le ala ou te fesootai ai ma au tamaiti aoga ma le ala latou te fesootai ai i le tasi ma le isi?
O a faatinoga faigofie ou te faia ia auauna atu ai e le aunoa, faamanuia, ma tatalo mo au tamaiti aoga?
Pe ua malamalama au tamaiti aoga faapea o le faamoemoega a la tatou vasega o le faataunuuina o le Faamoemoega o Seminare ma Inisitituti o Mataupu Faalelotu—ina ia fesoasoani ia i latou ia malamalama ma faalagolago i aoaoga ma le Togiola a Iesu Keriso?
Pe o gaoioiga e aoao ai ua ou filifilia e fesoasoani e faataunuu ai lo tatou faamoemoega ae le tosina ese ai i tatou mai le ausiaina o le Faamoemoega o Seminare ma Inisitituti o Mataupu Faalelotu?
Pe ua ou faaaluina le taimi e suesue ai ma malamalama i le poloka mau ma vaai pe aisea e totonugalemu ai le Faaola i le lesona?
Pe ua ou saunia e tuuina atu le taulai tatau ai i au tamaiti aoga mai le taimi latou te taunuu ai i le taimi latou te tuua ai le potuaoga?
O a auala ou te aoaoina soo ai ma valaaulia au tamaiti aoga ia faataunuu a latou matafaioi i le aoaoina faaleagaga?

Ata

faiaoga o loo suesue

Aotelega ma le Faaaogaina

O Mataupu Faavae ia Manatua

Pe a outou alolofa ma faaaloalo ma au tamaiti aoga i le Alii, i le tasi i le isi, ma le afioga a le Atua, ua faaleleia le aoaoina.
E mafai ona e atiina ae le alofa faamaoni mo au tamaiti aoga e ala i le sailia o le meaalofa o le alofa mama i le tatalo, e pei ona faatonuina mai e le perofeta o Mamona (tagai i le Moronae 7:47-48).
O se lagona o le faamoemoega e te faasoaina atu ma au tamaiti aoga e mafai ona faateleina le faatuatua ma tuuina atu ai le taitaiga ma le uiga i le aafiaga o le potuaoga.
O se lagona o le faamoemoega e mafai ona atiina ae pe a e malamalama ma au tamaiti aoga faapea o lo latou auai i le vasega e oo ai ina latou iloa le Tama Faalelagi ma Lona Alo, o Iesu Keriso, ma agai atu ai i le ola e faavavau e ala i le suesue i tusitusiga paia ma upu a perofeta.

Ata
Peresitene Dieter F. Uchtdorf

“Mafaufau i le alofa e aupito mama, ma aupito malosi e mafai ona e mafaufau i ai. Tago laia e faatele le alofa i se aofaiga e le mafaitaulia— ma o le fuataga lena o le alofa o le Atua mo oe” (Dieter F. Uchtdorf, “O Le Alofa o le Atua,” Ensign po o le Liahona, Nov. 2009, 22).

“Ona, a lea?”

Ina ia faaiuina lenei aafiaga e aoao ai, tusi i lalo nisi o mea o le a e faia e faalagolago i mataupu faavae na e aoaoina i le aso.