Lesona 1

O Le Matafaioi a le Tagata Aoao

Faatomuaga

O le faamoemoega o lenei lesona o le fesoasoani lea i tamaiti aoga ina ia faataunuu la latou matafaioi i le aoaoina o le talalelei. O nisi taimi e mafaufau ai tamaiti aoga o le tiutetauave mo le aoaoina o i latou e faalagolago lava i le faiaoga. Sa saunoa mai Peresitene Henry B. Eyring o le Au Peresitene Sili e faatatau i le manaomia uma e le tamaitiiti aoga ma le faiaoga o le sailia o le taitaiga a le Agaga Paia:

“O faafitauli ma faaosoosoga sa feagai ma tamaiti aoga i le lima tausaga talu ai e le mafaatusalia i le mea o loo tatou vaaia nei, ma o loo sili atu taimi faigata o loo lumanai. Ou te lagona … o mea ua tatou faia ma o loo faia e le lava. Tatou te manaomia se mana sili atu e tuuina atu ai i totonu o loto ma olaga o a tatou tamaiti aoga le talalelei. …

“E tatau ona i ai le Agaga e avea o sau soa tumau e aoao ai ma le mamana, ma o au tamaiti aoga e le mafai ona ola faaleagaga e aunoa ma le Agaga e avea ma a latou soa” (“The Spirit Must Be Our Constant Companion” [address to CES religious educators, 7 Fep., 2003], 1, si.lds.org).

A e aoao atu i le mana o le Agaga Paia ma fesoasoani i tamaiti aoga e aoao mai i lea lava mana, o le a e fesoasoani ia i latou e liua moni lava i le talalelei toefuataina a Iesu Keriso. Atonu e manaomia ona e toe iloiloina pea lava pea aoaoga faavae o loo aoaoina i lenei lesona e faamanatu ai i tamaiti aoga o latou tiutetauave i le vasega.

Fautuaga mo le Aoaoga

Tiutetauave a le tagata lava ia e aoao e ala i le suesue ma le faatuatua

Valaaulia mai se tamaitiiti aoga i luma o le potu aoga. Faamalamalama atu o loo e manao e fesoasoani i lena tamaitiiti aoga ia sili atu le malosi faaletino. Ona fai atu lea i se tamaitiiti aoga lona lua e sau i luma e faia ni faamalosi tino[push-ups] se lima.

A maea ona faia e le tamaitiiti aoga lona lua ni faamalosi tino, fesili atu i le tamaitiiti muamua:

• Pe na e malosi atili i na faamalosi tino?

Fesili i le vasega:

• E faapefea e lenei faataitaiga o faamalosi tino ona fesootai ma lau matafaioi i le aoaoina o le talalelei? O ai e ona le matafaioi mo lou aoaoina o le talalelei?

Valaaulia se tamaitiiti aoga e faitau leotele leMataupu Faavae ma Feagaiga 88:118.

• O le a sou manatu o le a le uiga o le “saili i le aoaoina … e ala lava lea i le suesue ma le faatuatua”? (E manaomia ona e faailoa atu o le aoaoina e ala i le suesue ma le faatuatua e manaomia ai le taumafaiga a le tagata lava ia. )

O api talaaga mo suesuega o tusitusiga paia po o api e tusi ai faamatalaga i le vasega

O se api talaaga mo suesuega o tusitusiga paia po o api o le vasega e mafai ona faaaogaina o se api faamaumau tuufaatasia, o se tamaiapi, po o ni laupepa i totonu o se faila. I totonu o api talaaga mo suesuega o tusitusiga paia, e mafai e tamaiti aoga ona tusitusi ai faamatalaga ma faamaumau ai mafaufauga i taimi o lesona, i taimi o suesuega faaletagata lava ia, ma isi sauniga a le Ekalesia. Ao latou faamaumau ma faatulaga o latou manatu ma mafaufauga, o le a saunia i latou e auai i vasega, faaleleia atili le malamalamaaga i le talalelei, ma maua faaaliga faaletagata lava ia.

Elder David A. Bednar

Na saunoa Elder David A. Bednar o le Korama o Aposetolo e Toasefululua e uiga i le faauigaina o le aoao e ala i le faatuatua. Faamalosiau i tamaiti aoga e tusia lenei faamatalaga i se mea (atonu i totonu o a latou api talaaga mo suesuega o tusitusiga paia po o api e tusi ai faamatalaga i le vasega) ina ia mafai ona latou toe tilotilo i ai i soo se taimi i le aluga o le tausaga faaseminare:

“O le aoaoina e ala i le faatuatua e manaomia ai le faaleagaga, mafaufau, ma le malosi faaletino ma e le na o le faalogo i ai. … O le tamaitiiti aoga e tatau ona faaaogaina le faatuatua ma faatino ina ia mafai ona maua le poto mo ia lava” (“Seek Learning by Faith” [address to CES religious educators, 3 Fep., 2006], 3, si.lds.org).

Suesueina o tusitusiga paia faaletagata lava ia i aso uma

Faamalamalama atu o suesuega i tusitusiga paia i aso uma o se vaega taua o le sailiga o le aoaoina e ala i le suesue ma le faatuatua.

Valaaulia se tamaitiiti aoga e faitau leotele le Helamana 3:29–30.

• O le a sou manatu o le a le eseesega i le na o le faitau lava o tusitusiga paia ma le “piimau i luga i le afioga a le Atua”?

• E tusa ai ma fuaiupu na faatoa tatou faitauina, o a faamanuiaga e ala mai i le piimau i luga i le afioga a le Atua?

• O a nisi faamanuiaga e ala mai i le suesueina o tusitusiga paia i aso uma?

• O anafea na e maua ai ni faamanuiaga e ala mai i au lava suesuega i tusitusiga paia i aso uma?

A o tali atu tamaiti aoga i nei fesili, ia mautinoa ua latou malamalama o le suesue i tusitusiga paia i aso uma e faamalolosia ai a tatou molimau, valaaulia le Agaga Paia i totonu o o tatou olaga, ma fesoasoani ia i tatou e aoao le talalelei.

Valaaulia ia tamaiti aoga e tali se tasi o fesili nei i totonu o a latou api talaaga mo suesuega i tusitusiga paia:

• E faapefea ona faaalualuina i luma lau suesuega i le Tusi a Mamona i lenei tausaga?

• O a ni auala ua aafia ai ou lagona e uiga i a Iesu Keriso i lou faitauina o le Tusi a Mamona?

Valaaulia ia tamaiti aoga e faatu se sini e suesue i aso uma le Tusi a Mamona i lenei tausaga. Valaaulia foi i latou e faatu se sini e faitau uma le Tusi a Mamona i le taimi o le tausaga o le seminare. E mafai ona e faapea atu ia i latou e tusi nei sini i totonu o a latou api talaaga mo suesuega o tusitusiga paia. Faamanatu i ai o sini e mafai ona fesoasoani i mea manaomia mo le Tiute i le Atua ma le Alualu i luma o le Tagata Lava ia.

Suesueina o tusitusiga paia i aso uma

Sa aoao mai Elder Dallin H. Oaks o le Korama a Aposetolo e Toasefululua:

“O le faitau i tusitusiga paia e tatou te ogatasi ai ma le Agaga o le Alii. … Aua tatou te talitonu o le faitauga o tusitusiga paia e mafai ona fesoasoani e maua ai faaaliga, o loo fautuaina i tatou e faitau pea lava pea ia tusitusiga paia. E ala mai lea vaega, ua tatou maua ai ma iloa le mea o loo finagalo ai lo tatou Tama oi le Lagi tatou te iloa ma faia i o tatou lava olaga i le taimi nei. O se tasi lea o mafuaaga e talitonu ai le Au Paia o Aso e Gata ai i lesuesue i tusitusiga paia i aso uma” (“Scripture Reading and Revelation,” Ensign, Ian. 1995, 8).

Aoaoina e ala i le Agaga

Kopi le ata lenei i luga o le laupapa. Aua le tusia upu o loo i le ata. O le a outou tusia upu i le ata a o faasolo le lesona.

Triangle Diagram

Valaaulia se tamaitiiti aoga e faitau leotele le Mataupu Faavae ma Feagaiga 50:17–18.

• E tusa ai ma nei fuaiupu, o le a le mea e manao ai le Alii i se faiaoga o le talalelei? (E aoao atu le upumoni e ala i le mana o le Agaga.)

Tusi le Agaga Paia ma le Faiaoga i luga o le ata, e pei ona faaalia i luga. Faasoa atu ou manatu e uiga i le sailia o le taitaiga a le Agaga Paia a o e aoao atu. Fesoasoani i tamaiti aoga ia iloa i le taimi o au sauniuniga ma aoaoga, o loo e taumafai ma le lotoatoa e taiala oe e le Agaga.

Fai atu i tamaiti aoga e tuu se faailoga tusi i leMataupu Faavae ma Feagaiga 50 (ona o le a latou toe foi atu i lea fuaitau i se taimi). Fai atu i se tamaitiiti aoga e faitau leotele le 2 Nifae 33:1.

• O le a le mea e faia e le Agaga Paia mo le tagata aoao a o aoaoina atu le talalelei?

Faamalamalama atu o le aoaoina o le talalelei i le ala a le Alii, e tatau ona tatou taliaina le matafaioi e aoao e ala i le mana o le Agaga Paia. Valaaulia tamaiti aoga e faitau lemu leMataupu Faavae ma Feagaiga 50:19–21.

• O le a le mea e tatau ona tatou tusia i lalo o le itu taumatau o le tafatolu? (Tusi le Tamaitiiti Aoga.)

• O le a sou manatu i le uiga o le mauaina o le upumoni e ala i le Agaga?

Atonu e te manao e aoao atu ni mataupu faavae e uiga i le iloaina o le aafiaga o le Agaga Paia. Fesoasoani i tamaiti aoga ia malamalama o le Agaga e masani lava ona fesootai atu le leoa ma i tatou, e ala atu i o tatou lagona ma i totonu o o tatou mafaufau (tagai i le 1 Nifae 17:45; MF&F 8:2–3). O le Agaga Paia foi na te aumaia lagona o le alofa, olioli, filemu, onosai, mataalofa, agalelei, faamaoni, ma le faamoemoe (tagai i le Kalatia 5:22–23; MF&F 11:12).

• O le a sau mea e faia i le seminare e saunia ai oe lava e aoao e ala i le Agaga?

O se vaega o lenei talatalanoaga, le fesoasoani i tamaiti aoga ia malamalama o se tasi o auala taua e aoao ai e ala i le Agaga o le fefaasoaai lea o a tatou molimau. Faasoa atu le saunoaga lenei a Elder Richard G. Scott o le Korama a Aposetolo e Toasefululua:

Elder Richard G. Scott

“ A o tauina atu e tamaiti aoga ia upumoni, [o nei upumoni] o le a faamautu i totonu o o latou agaga ma faamalosia a latou molimau faaletagata lava ia” (“To Understand and Live Truth” [address to CES religious educators, 4 Fep., 2005], 3, si.lds.org).

Faamanatu atu i tamaiti aoga o polokalama o le Tiute i le Atua ma le Alualu i Luma o le Tagata Lava Ia e aofia ai fautuaga e faasoa atu upumoni o le talalelei i isi. Faamalosiau i latou e faasoa atu o latou aafiaga i totonu o vasega seminare, i korama po o vasega i sauniga, ma i talatalanoaga ma o latou aiga ma uo. Faamamafa atu a o latou taumafai e faamalamalama, faasoa, ma molimau atu i upumoni o le talalelei, o le a faateleina e le Atua lo latou tomai e faasoa ai le talalelei i isi.

Toe foi i le ata i luga o le laupapa. Fai atu i se tamaitiiti aoga e faitau le Mataupu Faavae ma Feagaiga 50:14,–22l eotele.

• E faapefea e nei fuaiupu ona tauaofai ai matafaioi a le Agaga Paia, le faiaoga, ma le tamaitiiti aoga i le aoaoina o le talalelei? (E manaomia ona e faamalamalama atu o le Agaga Paia, e ta’ua foi o le Agaga ma le Faamafanafana i lenei fasifuaitau, e aoaoina atu upumoni. O le faiaoga e tatau ona aoao atu e ala i le mana o le Agaga, ma o le tamaitiiti aoga e aoao mai e ala i lea lava mana e tasi.)

• O le a le mea e tupu pe a aoao le tamaitiiti aoga e ala i le Agaga ma aoao atu le faiaoga i le Agaga? (E manaomia ona e faamalamalama atu o le faagaeetiaina o lona uiga o le tuuina i luga, faamalosia, faamalamalamaina, po o le faaleleia.)

I totonu o le Tusi a Mamona, o Enosa ma Alema o faataitaiga ia o tagata sa aoaoina e ala i le Agaga. Fai atu i tamaiti aoga e faitau malemu le Enosa 1:4–10 ma le Alema 5:45–47. (Atonu e te manao e tusi nei mau i luga o le laupapa.) Ona fesili lea:

• O le a le mea sa faia e Enosa (po o Alema) e aoao ai e ala i le Agaga?

• O le a le mea sa faia e le Agaga mo Enosa (po o Alema)?

Valaaulia se tamaitiiti aoga e faitau le faamatalaga lea mai i a Elder Bednar:

“E tatau ona tatou manatua pea o le Agaga Paia o le faiaoga lea, e ala i le valaaulia tatau, e mafai ai ona oo i le loto o le o loo aoao” (“Seek Learning by Faith,” 4).

• E faapefea ona faatatau nei mea ua tatou suesueina i lau matafaioi faale-tagata lava ia i le avea ai ma se tasi o lenei vasega? (A o tali tamaiti aoga, ia mautinoa o loo latou malamalama o le taimi tatou te tatala ai o tatou loto ma fesili i le Atua ma le faatuatua, o le a fesoasoani le Agaga Paia ia i tatou e malamalama i upumoni o le talalelei.)

Ina ia fesoasoani i tamaiti aoga e mafaufau i ala e mafai ai ona fesoasoani le tasi i le isi e ala i le Agaga, fesili atu:

• O a ni mea e mafai ona tatou faia e fesoasoani ai e valaaulia le Agaga i totonu o lo tatou potu aoga? (O tali e mafai ona aofia ai le usuina o se viiga amata, aumaia tusitusiga paia i le vasega ma faaaoga i aso uma, o le naunau e tali fesili ma faasoa atu ni aafiaga, tatalo mo isi, ma fesili atu mo le taitaiga a le Agaga Paia.)

Ina ia fesoasoani i tamaiti aoga ia malamalama o amio le lelei e mafai foi ona aafia ai le vasega atoa, fesili atu:

• O a ituaiga o uiga ma amioga e aveesea ai le Agaga mai le vasega seminare?

Valaaulia tamaiti aoga e mafaufau i le taua o le avea o le Agaga Paia ma o latou faiaoga.

• O anafea na e iloa ai le faatinoina e le Agaga o Lana matafaioi o se faiaoga?

Faaiu e ala i lou valaaulia o tamaiti aoga e aoao e ala i le suesue ma le faatuatua a o latou suesueina le Tusi a Mamona i lenei tausaga faaleseminare. Atonu e te manao e tulitatao au tamaiti aoga i le aluga o le tausaga ina ia faamalosia i latou e faaauau lenei taumafaiga.

Tala ma Faamatalaga o Talaaga

Suesueina o Tusitusiga Paia i Aso Uma

“Ua fautuaina i tatou e perofeta o Aso e Gata Ai e suesue i tusitusiga paia i aso uma, e le gata i le tagata lava ia ae ia faapea foi ma o tatou aiga. Ua latou fautuaina i tatou, e pei ona fautua atu Nifae i ona uso, ina ia faatatau tusi paia uma ia i tatou, saili auala e faatatau ai faamaumauga paia o anamua i o tatou olaga i aso nei (tagai i le 1 Nifae 19:23–24). Ua latou fautuaina i tatou e ‘suesue i tusi’ (Ioane 5:39) ma taumamafa ‘fiafia i afioga a Keriso’ (2 Nifae 32:3).

“O le a matua sili ona faamanuiaina oe pe a e mulimuli i lenei fautuaga. O le suesueina o tusitusiga paia i aso taitasi e fesoasoani e saunia ai oe e maua musumusuga a le Agaga Paia. E fausia ai lou faatuatua, faamalosia ai oe e tetee atu i faaosoosoga, ma fesoasoani e te latalata atu ai i lou Tama Faalelagi ma Lona Alo Pele.

“Ia faia se fuafuaga mo au suesuega o tusitusiga paia. Mafaufau e faaavanoaina se taimi i aso taitasi e suesue ai tusitusiga paia. I lena taimi, faitau ma le faaeteete, ma ia faalogo atu i musumusuga a le Agaga. Ole atu i lou Tama Faalelagi e fesoasoani mai ina ia e iloa le mea o loo Ia finagalo e te aoaoina ma faia.

“Ia faaauau pea le faitauina o tusitusiga paia, aemaise lava le Tusi a Mamona, i le gasologa o lou olaga. O le a e toe mauaina pea lava pea ia oa taua o tusitusiga paia, mauaina isi uiga fou ma ona faatatauga o loo i ai ao e suesueina i vaega eseese o le olaga” (Faamaoni i le Faatuatua: O se Tusi Taiala o le Talalelei[2004], “Tusitusiga Paia,” 191).

Na saunoa mai Peresitene Henry B. Eyring o le Au Peresitene Sili:

“Afai tatou te faatalale ia tatou suesuega o tusitusiga paia, o le a tatou faatalale foi ia tatou tatalo.

“Atonu o le a le mafai ona tatou taofia le tatalo atu, ae o a tatou tatalo o le a avea ma upu tautu, o le a sili atu ona leai se uiga. E le mafai ona faalatalata atu o tatou loto i se Atua tatou te le iloa, ma o tusitusiga paia ma afioga a perofeta soifua e fesoasoani ia i tatou ina ia iloa o Ia” (“Tatalo,” Liahona, Nov. 2001, 18).

2 Nifae 33:1. Tatalaina o o tatou loto i le Agaga Paia

O se vaega o la outou talatalanoaga o le 2 Nifae 33:1, mafaufau e faitau atu le faamatalaga lenei a Elder David A. Bednar o le Korama a Aposetolo e Toasefululua:

“Na aoao mai Nifae ia i tatou, ‘Pe a tautala atu le tagata i le mana o le Agaga Paia, e moliooina ai [le savali]i le mana o le Agaga Paia i loto o le fanauga a tagata’ (2 Nifae 33:1). “Faamolemole matau le ala e molioo atu ai e le Agaga le savali i le ae le o totonu o le loto. O se faiaoga e mafai ona faamalamalama, faatino, faatauanau, ma molimau, ma faia i se mana sili o le faaleagaga ma le aoga. Ae ui i lea, i le iuga, o le autu o le savali ma le molimau a le Agaga Paia e faatoa tuia ai lava le loto o le e mauaina pe afai na te faatagaina i latou e ulufale atu. …

“O se tagata aoao e faaaogaina lana faitalia e ala i le ola e tusa ai ma mataupu faavae sao e na te tatalaina lona loto i le Agaga Paia —ma valaaulia Ana aoaoga, mana molimau, ma le molimau faamaonia” (“Seek Learning by Faith” [address to CES Religious Educators, 3 Fep., 2006], 1, 3, si.lds.org).

Manatu Faaopoopo Faafaiaoga

Faamalamalama, faasoa atu, ma molimau atu

Faailoa atu o le taimi tatou te faamalamalama atu ai aoaoga faavae ma mataupu faavae, faasoa atu aafiaga talafeagai, ma molimau agai i upumoni paia, ua tatou faaalia lo tatou naunau e aoao e ala i le Agaga. A tatou aoao e ala i le Agaga, ua tatou tuputupu ae i le malamalama, faaleleia lo tatou tomai e aoao ai le talalelei, ma faamalolosia a tatou molimau ma molimau a isi.

• Aisea e te manatu ai e taua le faamalamalama, faasoa, ma molimau atu i upumoni o le talalelei i le vasega ma fafo o le vasega?

• O anafea na mafai ai ona e faamalamalama, faasoa po o le molimau i upumoni o le talalelei i se uo po o se tagata o le aiga?

MF&F 50:21–22. Aoaoina e ala i le Agaga

Mo le faalauaiteleina o le talanoaga a tamaiti aoga i le Mataupu Faavae ma Feagaiga 50:21–22, mafaufau i le faia o se kopi o le faamatalaga lenei mo tamaiti aoga taitoatasi. Valaaulia tamaiti aoga e auauai i le faitauina o vaega o lenei faamatalaga a o mulimuli atu isi tamaiti aoga i le faitauga. Fai atu i tamaiti aoga uma e saili ni mafuaaga e sili atu ai le faagaeetiaina o isi na i lo isi i sauniga lotu. Sa faamalamalamaina e Uso A. Roger Merrill, lea sa avea ma peresitene aoao o le Aoga Sa, le uiga o le aoao e ala i le Agaga Paia:

“E masani ona tatou taulai faalelei atu i le taua o le aoaoina e le Agaga. Ae moomia ona tatou manatua e tutusa foi le taua ua tuuina e le Alii, pe sili atu foi, i le taliaina e le Agaga. (Tagai i le MF&F 50:17–22.) …

“Ia tatou sauniga a le Ekalesia, ia tatou suesuega faaletagata ma faaleaiga o tusitusiga paia, ma e oo lava i lenei aso ao tatou faalogo atu i perofeta ma aposetolo a le Alii, o nisi o i tatou o le a tele atu mea o le taliaina nai lo isi. Aisea? Ua ou aoaoina e faapea o i latou o e taliaina moni e le itiiti ifo ma le tolu ni mea latou te faia, ia e le mafai ona fai e isi.

“Muamua, e latou te saili. Ua tatou ola nei i se lalolagi faafiafia, o se lalolagi o matamataga. E aunoa ma le iloa, e tatou te mauaina i tatou lava a o mai i le konafesi po o le alu i le lotu ma le uiga lea, ‘O lea ua ou i ai iinei; ia faagaeetia mai au.’ Ua tatou logonoa faaleagaga.

“A tatou taulai atu ae le sailia ma mauaina le Agaga, o le a tatou le popole e uiga i se faiaoga po o se failauga e taofia lo tatou mafaufau ma sili ona tatou popole i le tuuina atu o la tatou gauai i le Agaga. Manatua, mauaina o se veape. O se mataupu faavae o le faatino. O se faaaliga faavae o le faailoaina o le faatuatua.

“Lona lua, o i latou e mauaina e, lagonaina. E ui o faaaliga e oo mai i le mafaufau ma le loto, e masani lava ona lagonaina. E masani lava tatou te le iloaina le Agaga. … seiloga tatou te aoao e gauai atu i nei lagona faaleagaga.

“Lona tolu, o i latou o e taliaina e le Agaga e fuafua e faatino. E pei ona poloai mai le perofeta o Moronae, ina ia mauaina se molimau i le Tusi a Mamona, e tatau ona tatou ole atu ‘ma le manatu tonu i ai’ (Moronae 10:4). Ua aoao mai le Agaga pe afai e faamaoni lo tatou faamoemoe e faia se mea e uiga i mea na tatou aoaoina” (“Taliaina e le Agaga,” Ensign po o le Liahona, Nov. 2006, 93–94).

• E tusa ai ma le saunoaga a Uso Merill, aisea e sili atu ai mea e maua e isi nai lo isi pe a latou mauaina aoaoga o le talalelei?

• O a elemene autu e tolu ia sa faasoa mai ai Uso Merill e uiga i le aoaoina e ala i le Agaga? (Tusi tali i luga o le laupapa.)

1 Nifae 15. Taunuuga o le lē aoao e ala i le Agaga

Ina ia fesoasoani i tamaiti aoga ia iloa se faataitaiga faaletusitusiga paia pe faapefea e le lotomaaa ona taofia lo tatou tomai o le aoao e ala i le mana o le Agaga, ia fai atu i tamaiti aoga e sue a latou tusi i le1 Nifae 15. Faamalamalama atu na malamalama lelei Nifae i le va o le faiaoga, tamaitiiti aoga, ma le Agaga Paia. O loo faamatalaina i le 1 Nifae 15, se talanoaga na faia e Nifae ma ona uso ina ua maea se aoaoga a lo latou tama, o Liae, e uiga i mea sa faaalia e le Alii ia te ia. Fai atu i tamaiti aoga e faitau e le tagata lava ia le 1 Nifae 15:2–3, 7–11.

• O le a le mafuaaga o le fefinauaiga a Lamana ma Lemuelu?

• Aisea na le mafai ai e Lamana ma Lemuelu ona malamalama i upu a lo la tama? (Sa faamaaa o la loto, la te lei taumafai e aoao e ala i le Agaga, ma la te lei ole atu i le Alii.)

Atonu e te manao e faailoa atu i totonu o le 1 Nifae 15:11, na faamanatu atu e Nifae ia Lamana ma Lemuelu nisi mea e ono mafai ona la faia e maua ai faaaliga. Na faataitai taitasi ma le manuia e Nifae nei amioga ma uiga ia na ia lisiina. E na te lei faamaaaina lona loto, sa ia ole atu i le Alii ma le faatuatua, na ia talitonu o le a ia mauaina tali mai le Alii, ma sa ia tausia ma le filiga ia poloaiga.