10:

Fakahaaʻi ʻa e Angatonú

Lipōtí:Vahevahe nounou mo e kulupú ha tali ki haʻo lotu ʻi he uike kuo ʻosí.

Fakalaulauloto:Ko e hā ʻoku ʻofa ai ʻa e ʻEikí ʻiate kinautolu ʻoku “angatonu honau lotó”?

Mamataʻi:“Ko e hā ʻe Foaki ʻe ha Taha ke Fetongi ki hono Laumālié? (What Shall a Man Give in Exchange for His Soul?)” maʻu ʻi he srs.lds.org/videos. (ʻIkai ha vitiō? Lau ʻa e peesi 25.)

Ko e hā ʻe Foaki ʻe ha Tangata ke Fetongi ʻaki Hono Laumālié?

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

mei he Ko e hā ʻe Foaki ʻe ha Tangata ke Fetongi ʻaki Hono Laumālié

ʻEletā Robert C. Gay: Naʻe fai ange ʻe he Fakamoʻuí ki Heʻene kau ākongá ʻa e fehuʻi ko ʻení: “Ko e hā ʻe foaki ʻe ha tangata ke fetongiʻaki hono laumālié?”

Ko ha fehuʻi ʻeni naʻe akoʻi mai heʻeku tamaí ke u fakakaukauʻi lelei he ngaahi taʻu lahi kuo hilí. ʻI heʻeku tupu haké, ne tuku mai heʻeku ongomātuʻá ha fanga kiʻi ngāue ʻi ʻapi pea totongi e ngāue ko iá. Naʻá ku faʻa ngāue ʻaki e paʻanga ko iá, ne laka siʻi hake pē he seniti ʻe 50 he uike, ke ʻalu ki he heleʻuhilá. Ko e taimi ko iá, naʻe seniti pē 25 ha taha taʻu 11. Naʻe toe heni haʻaku sēniti ʻe 25 ke fakatau ʻaki ha lole, he naʻe sēniti ʻe 5 ki he taha. Heleʻuhila mo e foʻi lole! He ʻikai lava ʻo toe lelei ange ai.

Ne lelei e meʻa kotoa kae tālunga e hoko hoku taʻu 12. Lolotonga ʻeku tuʻu laine ʻi ha efiafi ʻe taha, kuó u fakatokangaʻi ko e totongi ʻo e tikite ki he taha taʻu 12 kuo seniti ʻe 35, ʻa ia ʻe siʻi ʻaki heni ha foʻi lole ʻe ua. ʻI he ʻikai ke u mateuteu ke fai e feilaulau ko ʻení, ne u kumi ʻuhinga ai, “ʻOkú ke ʻasi tatau pē ʻo hangē ko e uike kuo ʻosí.” Naʻá ku laka atu leva ʻo kole haʻaku tikite sēniti ʻe 25. Naʻe ʻikai toe fehuʻia ʻe he tokotaha tali totongí pea ne u kumi ʻa ʻeku foʻi lole ʻe nima angamahení kae ʻikai ko e tolu pē.

ʻI heʻeku fiefia he meʻa ne u lavá, ne u fakavavevave kimui ange ai ki ʻapi ke tala ki heʻeku tangataʻeikí ʻa e meʻa lahi ne u lavaʻí. Naʻe ʻikai lea ia ʻi heʻeku fakamatala atu hono fakaikiikí. Pea ʻi heʻeku ʻosí, ne sio mai pē ia pea pehē mai, “Foha, te ke fakatau atu ho laumālié ʻaki ha sēniti ʻe nima?” Ne ongo ʻaupito ʻene leá ki hoku loto taʻu 12. Ko ha lēsoni ia kuo ʻikai toe ngalo ʻiate au.

(“Ko e hā ʻe Foaki ʻe ha Tangata ke Fetongi ʻaki Hono Laumālié?” Ensign pe Liahona, Nōvema 2012, 34.

Foki ki he peesi 24.

Aleaʻi:ʻOku ʻuhinga ki he hā ke angatonu? Ko e hā ha fanga kiʻi founga ʻoku foaki ai ʻe he kakaí honau laumālié ke maʻu ʻa e ngaahi meʻa ʻi he moʻui ko ʻení?

Lau ʻa e:Ngaahi Tefito ʻo e Tui 1:13 mo e Siope 27:5 (ʻi he toʻomataʻú)

“ʻOku mau tui ʻoku totonu ke faitotonu.”

Ngaahi Tefito ʻo e Tui 1:13

“Te u mate pē ka ʻe ʻikai te u tukuange ʻeku angatonú meiate au.”

Siope 27:5

ʻEkitivitií

Fakamaaka pē ʻe koe ʻa koe ʻi he ngaahi meʻa ko ʻení.

Fokotuʻu ha Mataʻi FIKA ʻi Muʻa he FAKAMATALA Takitaha ke Fakahaaʻi e Tuʻo Lahi Hoʻo Fai ʻEní
1 = hala ʻatā, 2 = taimi ʻe niʻihi, 3 = tuʻo lahi, 4 = maʻu pē
___1. ʻOku ou tauhi ʻeku ngaahi palōmesí, tukupaá, mo e ngaahi fuakavá kotoa.
___2. ʻOku ou lea moʻoni kakato ʻi he ngaahi meʻa ʻoku ou lea ʻakí pea ʻi he ngaahi lekooti ʻoku ou tauhí.
___3. ʻOku ʻikai ke u fakalahi ke ngali lelei ange ʻa e ngaahi meʻá ʻi honau tuʻunga totonú.
___4. ʻOku ou fakafoki ʻa e meʻa kotoa pē ʻoku ou kolé pea ʻoku ʻikai ʻave ʻa e ngaahi meʻa ʻoku ʻikai ʻaʻakú.
___5. ʻOku ou tauhi faivelenga kakato ki hoku malí ʻi heʻeku ngaahi leá mo e tōʻongá.
___6. ʻOku ʻikai ke u teitei kākā, ʻo aʻu ai pē ki he taimi ʻoku ou ʻiloʻi ai he ʻikai ke maʻu aú.
___7. Ko e taimi ʻoku ou ʻilo ai ha meʻa ʻoku ʻikai ʻaʻaku, ʻoku ou fakafoki ia ki he taha ʻoku ʻaʻaná.
___8. ʻOku ou totongi fakafoki maʻu pē ʻa e paʻanga ʻoku ou kolé.

Aleaʻi:Lau ʻa e Mōsaia 4:28 (ʻi he toʻomataʻú) pea mo e lea ʻa ʻEletā Siosefa B. Uefilini (ʻi he peesi 25). Ko e hā ʻoku hoko ai hono totongi fakafoki ha moʻua pe nō ki he pisinisí pe akó (hangē ko e PTFT) ko ha konga ʻo e angatonu fakatāutahá?

“Pea ʻoku ou loto ke mou manatu, ʻilonga ia ʻiate kimoutolu ʻoku kole mei hono kaungāʻapí ʻoku totonu ke ne fakafoki ʻa e meʻa ʻokú ne kolé, ʻo fakatatau mo e alea naʻá ne faí, ka ʻikai, te ke fai angahala ai; pea mahalo te ke fakatupu foki ha fai angahala ai ʻa ho kaungāʻapí.”

Mōsaia 4:28

“ʻOku ʻuhinga ʻa e angatonú ke fakahoko maʻu pē ʻa e meʻa ʻoku totonu mo leleí, tatau ai pē pe ko e hā hono ngaahi nunuʻá. ʻOku ʻuhinga ia ke angamāʻoniʻoni ʻo kamata mei he takele ʻo hotau lotó, ʻo ʻikai ngata pē ʻi heʻetau ngaahi ngāué, kae mahuʻinga tahá, ʻi heʻetau ngaahi fakakaukaú pea ʻi hotau lotó. … Ko e kiʻi loí, kiʻi kākaá, pe kiʻi talanoa taʻetotonu ke tau ngali leleí ʻoku ʻikai tali ia ʻe he ʻEikí. … Ko e pale taupotu taha ʻo e angatonú ko e hoko ʻa e Laumālie Māʻoniʻoní ko e takaua maʻu peé, … [ʻa ia te ne] tataki kitautolu ʻi he meʻa kotoa ʻoku tau faí.”

Joseph B. Wirthlin, “Personal Integrity,” Ensign, May 1990, 30, 32, 33

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha:

• Fakatupulaki ha taha ʻo e ngaahi ʻēlia ʻe valu naʻá ke fakafuofuaʻi ʻi ʻolungá.

• Vahevahe mo hoʻo fāmilí pe ngaahi kaungāmeʻá e meʻa kuó ke ako he ʻahó ni fekauʻaki mo e angatonú.