9:

Fetuʻutaki: Kole pea Fakafanongo

Lipōtí:Vahevahe nounou mo e kulupú e founga naʻá ke tokoniʻi ai ha taha ʻi he uike kuo ʻosí.

Fakalaulauloto:Ko e fē ha taimi kuo tali ai ʻe he Tamai Hēvaní ʻeku ngaahi lotú?

Mamataʻi:“Ko e ʻAi ke Kaké (Creating Lift),” maʻu ʻi he srs.lds.org/videos. (ʻIkai ha vitiō? Lau ʻa e peesi 23.)

K O E ʻAI KE KAKÉ

Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.

mei he Ko e ʻAi ke Kaké

Palesiteni Dieter F. Uchtdorf: Ke lava ha vakapuna ʻo mavahe mei he kelekelé, kuo pau ke ke ʻai ia ke mahiki hake. ʻI he puna vakapuná, ʻoku lava ke mahiki hake ia ʻi he taimi ʻoku puhiʻi atu ai e ʻeá ʻi ʻolunga he ongo kapakaú ʻi ha founga ʻe mālohi ange ai e ʻea ʻoku puhi atu ʻi he lalo kapakaú kae ʻikai ko ʻolunga. ʻI he taimi ʻoku mālohi ai e mahiki ʻa e vakaupuná ʻo lahi ange ia ʻi he fusi ʻa e kalāvité ki laló, ʻe mavahe hake leva ʻa e vakapuná mei he kelekelé pea lava ʻo puna.

ʻI he founga tatau pē, te tau lava ʻo hikiʻi hake ʻetau moʻui fakalaumālié. ʻI he taimi ʻoku lahi ange ai e mālohi ʻokú ne teke hake kitautolu ki he langí ʻi he ngaahi ʻahiʻahi mo e ngaahi faingataʻa ʻoku nau fusi hifo kitautolu ki laló, te tau lava ʻo puna fakatuputupulangi ke aʻu ki he ʻafioʻanga ʻo e Laumālié.

Neongo ʻoku lahi ʻa e ngaahi tefitoʻi moʻoni ʻo e ongoongoleleí ʻokú ne tokoniʻi kitautolu ke tau mahiki haké, ka te u nofotaha pē ʻi he tefitoʻi moʻoni ʻe taha.

Lotu!

Ko e lotú ko e taha ia ʻo e ngaahi tefitoʻi moʻoni ʻo e ongoongoleleí ʻokú ne hikiʻi hake kitautolu. ʻOku maʻu ʻe he lotú ʻa e mālohi ke hiki hake kitautolu ke tau mavahe hake mei he ngaahi meʻa ʻo e māmaní ʻoku tau hohaʻa ki aí. ʻE lava e lotú ʻo hiki hake kitautolu ʻo tau fakalaka hake ʻi he ngaahi ʻao ʻo e siva ʻa e ʻamanakí mo e fakapoʻulí ki ha tafaʻaki langi ʻoku maama mo maʻá.

Ko e taha ʻo e ngaahi tāpuaki mo e ngaahi faingamālie maʻongoʻonga taha ʻoku tau maʻu ko e fānau ʻa ʻetau Tamai Hēvaní, ko e lava ko ia ke tau fetuʻutaki mo Ia fakafou ʻi he lotú. Te tau lava ʻo talanoa kiate Ia ʻo kau ki he ngaahi meʻa ʻoku tau aʻusia ʻi he moʻuí, ngaahi faingataʻaʻiá, mo hotau ngaahi tāpuakí. ʻE lava ke tau fakafanongo pea maʻu ha tataki fakalangi mei he Laumālie Māʻoniʻoní ʻi ha taimi pe faʻahinga feituʻu pē.

(Vakai Dieter F. Uchtdorf, “Ko e Lotú mo e Tafaʻaki-Langi Lanu Puluú,” Ensign pe Liahona, Sune 2009, 5–6)

Foki ki he peesi 22.

Aleaʻi:ʻE founga fēfē haʻatau ʻiloʻi e ngaahi tali ki heʻetau ngaahi lotú? Ko e hā ʻoku hoko ai ʻa e fakafanongó ko ha konga mahuʻinga ʻo e lotú?

Lau:Tokāteline mo e Ngaahi Fuakava 8:2 mo e lea naʻe fai ʻe Palesiteni Russell M. Nelson (ʻi he toʻomataʻú)

“Vakai te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní, ʻa ia ʻe hoko mai kiate koe pea ʻe nofo ʻi ho lotó.”

Tokāteline mo e Ngaahi Fuakava 8:2

“ʻE tāpuekina hoʻo moʻuí ʻi hoʻo ako ke fakafanongó, pea fakafanongo ke ako mei he fānaú, mātuʻá, hoá, kaungāʻapí, mo e kau taki ʻo e Siasí, ʻa ia te nau fakalahi kotoa hoʻo malava ke fakafanongo ki he faleʻi mei ʻolungá.”

Russell M. Nelson, “Listen to Learn,” Ensign, May 1991, 24

Aleaʻi:Ko e hā ʻoku hoko ai ʻa e fakafanongó ko ha taukei mahuʻingá? ʻE lava fēfē ʻa e fakafanongo tokangá ʻo tokoni ki heʻetau ngāué?

ʻEkitivitií

Sitepu 1: Lau fakakulupu ʻa e ngaahi sitepu ʻi laló pea aleaʻi nounou kinautolu.

Sitepu 2: Kole ki ha mēmipa ʻe toko taha pe toko ua ʻo e kulupú ke fakamatala ki he toengá haʻanau palopalema pe fehuʻi. ʻOku totonu ke feinga ʻa e tokotaha kotoa ke fakafanongo, mo muimui ʻi he ngaahi sitepu ko ʻení.

Sitepu 3: ʻI heʻene ʻosí, ʻeke ki he kau mēmipa ʻi he kulupú naʻe leá pe ko e hā naʻa nau ongoʻi ʻi he taimi naʻe feinga moʻoni ai ʻa e kulupú ke fakafanongó.

fakatātā ʻo e ʻeikitivitī fakafanongó

Lau:Lea ʻa Palesiteni Henry B. Eyring mo ʻEletā Robert D. Hales (ʻi he toʻomataʻú)

“ʻOku fanongo mai ʻetau Tamai Hēvaní ki he ngaahi lotu ʻEne fānaú he māmaní ʻo kole meʻakaí, vala ke tuí, pea mo e ngeia te nau maʻu ʻi haʻanau lava ke tokonaki pē maʻanatolú.”

Henry B. Eyring, “Ngaahi Faingamālie ke Fai Lelei,” Ensign pe Liahona, Mē 2011, 22

“Kuo pau ke tau kole tokoni mei heʻetau Tamai Hēvaní pea fekumi ki ha mālohi ʻo fakafou ʻi he Fakalelei ʻa Hono ʻAlo ko Sīsū Kalaisí. ʻI hono maʻu ʻo e tokoni fakalangi ko ʻení, ʻe lava ai ke tau tokonaki fakapotopoto maʻatautolu mo e niʻihi kehé.”

Robert D. Hales, “Hoko ko ha Kau Tauhi Fakapotopoto Fakatuʻasino mo Fakalaumālie,” Ensign pe Liahona, Mē 2009, 7–8

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha:

• Lotu fakafoʻituitui mo fakafāmili he pongipongi mo e efiafi kotoa. Tuku ha taimi he hili ʻa e lotu kotoa pē ke fakafanongo ʻi he loto ʻapasia ki ha fakahinohino.

• Vahevahe mo hoʻo fāmilí pe ngaahi kaungāmeʻá e meʻa kuó ke ako he ʻahó ni fekauʻaki mo e fetuʻutakí.