8:

Hoko ʻo Taha, Ngāue Fakataha

Lipōtí:Vahevahe nounou mo e kulupú ha meʻa naʻá ke fai he uike kuo ʻosí ke tokoni ki hano fakaleleiʻi ha palopalema.

Fakalaulauloto:ʻOku founga fēfē hano hanga ʻe haʻaku foaki ʻeku moʻuí ke tokoniʻi ʻa e niʻihi kehé ʻo fakahaofi au?

Mamataʻi:“ʻI he Founga ʻa e ʻEikí (In the Lord’s Way),” maʻu ʻi he srs.lds.org/videos. (ʻIkai ha vitiō? Lau ʻa e peesi 21.)

ʻI he Founga ʻa e ʻEikí

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

mei he ʻI he Founga ʻa e ʻEikí

Palesiteni Henry B. Eyring: Ko e ngaahi tefitoʻi moʻoni ʻi he faʻunga ʻo e polokalama uelofea ʻa e Siasí ʻoku ʻikai ko e ʻai ke tuʻo taha pē pe ʻi ha feituʻu pē ʻe taha. ʻOku fakataumuʻa kinautolu ki he kuonga pea mo e feituʻu kotoa pē. …

… ʻOku mahino ʻa e founga ke fakahoko ʻakí. Ko kinautolu kuo nau maʻu ʻo lahí kuo pau ke nau loto fakatōkilalo ʻo tokoni kiate kinautolu ʻoku masivá. Ko kinautolu ʻoku mahutafeá kuo pau ke nau feilaulauʻi fiemālie ha niʻihi ʻo ʻenau fiemālié, taimí, potó, pea mo e ngaahi maʻuʻanga tokoní ke feau e faingataʻaʻia ʻa kinautolu masivá. Pea kuo pau ke fai ʻa e tokoní ʻi ha founga te ne fakatupulaki ai ʻa e mālohi ʻo kinautolu ʻoku maʻu tokoní ke nau tauhi kinautolu pea nau tokoni ki he niʻihi kehé. Ka fai ʻi he foungá ni, ʻa e founga ʻa e ʻEikí, ʻe lava leva ke hoko ha meʻa fakaofo. ʻOku fakatou tāpuekina ai ʻa e taha foakí mo e taha ʻokú ne maʻú. (Toʻo mei ha lea naʻe fai ʻe Palesiteni Eyring ʻi he fakatapui ʻo e Sugarhouse Utah Welfare Services Center, June 2011, LDS.org)

Palesiteni Dieter F. Uchtdorf: ʻE kāinga, ʻoku tau takitāuhi ha fatongia kuo tau fuakava ki ai, ke ongoʻi ngofua e ngaahi fie maʻu ʻa e niʻihi kehé pea tokoni ʻo hangē ko ia ne fai ʻe he Fakamoʻuí—ke tokoniʻi, faitāpuekina, mo hiki hake ʻa kinautolu ʻoku tau feohí.

ʻOku ʻikai faʻa hoko mai e tali ki heʻetau lotú lolotonga ʻetau tūʻulutuí ka ʻoku hoko ia lolotonga ʻetau tuʻu ʻo tauhi ki he ʻEikí mo tokoniʻi e niʻihi ʻoku tau feohí. ʻOku hanga ʻe he ngaahi ngāue taʻesiokitá mo e fakatapuí ʻo fakafoʻou hotau laumālié, toʻo atu e malamalaʻi ʻakaú mei hotau mata fakalaumālié pea mo fakaava mai e ngaahi matapā ʻo e langí. ʻI heʻetau hoko ko ia ko e tali ki he lotu ʻa ha tahá, ʻoku tau faʻa maʻu foki ai e tali ki heʻetau lotu ʻatautolú.

(“Ko e Tatali ʻi he Hala ki Tāmasikusí,” Ensign pe Liahona, Mē 2011, 76)

Foki ki he peesi 20.

Aleaʻi:ʻE lava fēfē ʻe he tokoni ki he niʻihi kehé ʻo fakaava e ngaahi matapā ʻo e langí ʻi hoʻo moʻuí?

Lau:ʻOku ongoʻi ʻe ha niʻihi ʻoku totonu ke nau maʻu e meʻa kuo maʻu ʻe he niʻihi kehé, ʻa ia te ne lava ʻo fakatupu ha tāufehiʻa. ʻOku ongoʻi ʻe he niʻihi ʻoku totonu ke nau maʻu ha ngaahi meʻa ne ʻikai ke nau ngāueʻi. ʻOku fakakuihi ʻe he ongo tauhele ko ʻení e kakaí mei heʻenau mamata ki ha moʻoni mahuʻinga: ko e meʻa kotoa pē ʻoku ʻa e ʻOtuá ia. ʻE lava ke ikunaʻi ʻa e tāufehiʻá mo e kumi totonú ʻaki e tokanga taha ki he ngaahi fie maʻu ʻa e niʻihi kehé. Lau ʻa e Mōsaia 2:17, Mōsaia 4:26, pea mo e lea ʻa Gordon B. Hinckley (ʻi he toʻomataʻú).

“ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”

Mōsaia 2:17

“Pea ko ʻeni, koeʻuhi … ke tauhi ha fakamolemole ʻo hoʻomou ngaahi angahalá mei he ʻaho ki he ʻaho … ʻoku ou fakaʻamu ke mou foaki mei hoʻomou ngaahi koloá ki he masivá, ko e tangata taki taha ʻo fakatatau ki he meʻa ʻokú ne maʻú, ʻo hangē ko e fafanga ʻo e fiekaiá, mo e fakakofuʻi ʻo e telefuá, mo e ʻaʻahi ki he mahakí, pea tokoni ki honau fakafiemālié, ʻi he meʻa fakalaumālie mo fakatuʻasino fakatouʻosi, ʻo fakatatau ki heʻenau ngaahi fie maʻú.”

Mōsaia 4:26

“Ko e taimi ʻoku mou taha aí, ʻoku ʻikai ha ngataʻanga homou mālohí. Te mou lava ʻo lavaʻi ha meʻa pē ʻoku mou fie ikunaʻi.”

Gordon B. Hinckley, “Your Greatest Challenge, Mother,” Ensign, Nov. 2000, 97

ʻEkitivitií

Sitepu 1: Fakakaukau mo e kulupú ki ha taha ʻoku fie maʻu tokoni.

Sitepu 2: Aleaʻi ʻa e ngaahi talēniti, fetuʻutaki, mo e ngaahi maʻuʻanga tokoni te mou lava ʻo foakí.

Sitepu 3: Fokotuʻu ha palani ke tokoniʻi e tokotaha ko iá. Hangē ko ʻení, te ke lava ʻo:

• Fakahoko ha ngāue tokoni ʻi homou koló.

  Takafi ʻo e kiʻi tohi Ko Hoku Fāmilí

• Teuteuʻi hoʻomou hisitōlia fakafāmilí ʻo fakaʻaongaʻi ʻa e kiʻi tohi Ko Hoku Fāmilí: Ko e Ngaahi Talanoa ʻOkú ne Fakatahatahaʻi Kimautolú. Hili ia pea mou ō ki he temipalé ʻo fakahoko ʻa e ngaahi ouau toputapú maʻá e kau mēmipa ʻo e fāmilí kuo nau ʻosi pekiá.

• Tokoniʻi ha taha ʻi hono hala ke moʻui fakafalala pē kiate iá.

Lau:Lea ʻa ʻEletā Robert D. Hales mo Palesiteni Thomas S. Monson (ʻi he toʻomataʻú)

“Ko e taumuʻa ʻo e moʻui fakapotopoto fakatuʻasino mo fakalaumālié, ke tau tuʻu ʻi ha tuʻunga māʻolunga ange ke tau lava ke tokoni ki he niʻihi kehe [ʻoku fie maʻu tokoní].”

Robert D. Hales, “ʻIloʻi Kitautolu: Ko e Sākalamēnití, Temipalé mo e Feilaulau ʻi he Tokoní,” Ensign pe Liahona, Mē 2012, 36

“Ko e taimi ʻoku tau ngāue fekoekoeʻi fakataha aí, … te tau lava ʻo fakahoko ha faʻahinga meʻa pē. ʻI he taimi ʻoku tau fai ai iá, ʻoku tau toʻo leva e vaivaiʻanga ʻo e tuʻu tokotaha ha taha pea fetongi ʻaki ʻa e ivi ʻo ha tokolahi ʻoku ngāue fakatahá.”

Thomas S. Monson, “Church Leaders Speak Out on Gospel Values,” Ensign, May 1999, 118

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha:

• Ngāueʻi ʻa e palani ke tokoniʻi ha taha kehé.

• Vahevahe mo hoʻo fāmilí pe ngaahi kaungāmeʻá e meʻa kuó ke ako he ʻahó ni fekauʻaki mo e ngāue tokoní.