1:

Ko e Moʻui Fakafalala Pē Kiate Kitá Ko Ha Tefitoʻi Moʻoni ia ʻo e Fakamoʻuí

Kimuʻa pea kamatá, lau ʻa e “Founga ke Ngāue ʻAki ʻa e Tohi Lēsoni Ko ʻEní” ʻi he tafaʻaki ki loto ʻo e takafi muʻá.

Fakalaulauloto:Sione 10:10 (ʻi he toʻomataʻú)

“Kuó u haʻu au ke nau maʻu ʻa e moʻuí, pea ke nau maʻu ia ʻo lahi ʻaupito.”

Sione 10:10

Aleaʻi:Ko e hā ʻa e moʻui mohu tāpuekina?

Mamataʻi:“Naʻá ne Fakangingilaʻi hoku Motuʻa Vaʻé (He Polished My Toe),” maʻu ʻi he srs.lds.org/videos. (ʻIkai ha vitiō? Lau ʻa e peesi 5.)

Naʻá Ne Fakangingilaʻi Hoku Motuʻa Vaʻé

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

mei he Naʻá ne Fakangingilaʻi Hoku Motuʻa Vaʻé

ʻEletā Enrique R. Falabella: ʻI heʻeku kei tupu haké, ne ʻikai maʻu haʻamau meʻa. ʻOku ou manatuʻi ha ʻaho ʻe taha naʻá ku ʻalu ai ki heʻeku tangataʻeikí peá u talaange, “Papa, ʻoku ou fie maʻu haʻaku sū foʻou. Kuo fuʻu motuʻa e sū ko ʻení.” Naʻá ne tuʻu peá ne vakai ki hoku suú ʻo ne sio kuo fuʻu motuʻa ʻaupito. Naʻá ne pehē, “ʻOku ou tui te ta lava pe ʻe kitaua ʻo fakaleleiʻi eni.” Naʻá ne toʻo ha meʻi meʻa fakangingila sū ʻo ne olo ʻaki hoku suú pea naʻe ngingila mo fakaʻofoʻofa ia. Naʻá ne pehē mai, “Foha, kuo sai ia.” Naʻá ku tali ange, “Teʻeki ai. ʻOku kei ʻasi hake pē hoku motuʻa vaʻé ki tuʻa mei he suú.” Naʻá ne pehē mai, “Te ta lava pē ʻo fakaleleiʻi mo ia!” Naʻá ne toe toʻo mo ha meʻi meʻa fakangingila sū pea fakangingilaʻi ʻaki hoku motuʻa vaʻé!

Naʻá ku ako ʻi he ʻaho ko iá ʻoku ʻi ai pē ʻa e fakaleleiʻanga ʻo e palopalema kotoa. ʻOku ou tui ko e tefitoʻi moʻoni mo e polokalama ko ʻeni ʻo e moʻui fakafalala pē kiate kitá ko ha founga ia ke fakavaveʻi ai e ngāue ʻa e ʻEikí. Ko ha konga ia ʻo e ngāue ʻo e fakamoʻuí. Te tau lava kotoa ke toe lelei ange ʻi hotau tuʻunga lolotongá. Kuo pau ke ke tukuange ʻa e fakafiefiemālié. ʻOku tau fiemālie he taimi lahi, pea ʻoku fakaʻauha ʻe he meʻá ni ʻetau fakalakalaká. Te u lava ʻo fakalakalaka ʻi he ʻaho kotoa pē ʻo kapau te u fili ke fai ha meʻa kehe ke fakaleleiʻi e meʻa ne ʻikai ke u fakahoko lelei ʻi he kuohilí. Kapau te ke fai ia ʻi he tui, ʻo ngāue ʻaki hoʻo tui mo e ʻamanaki lelei kia Kalaisí te Ne tokoniʻi koe, te ke ʻilo e founga ke fakalakalaka ai ʻi he ngaahi meʻa fakatuʻasinó mo fakalaumālié. ʻOku hoko ʻeni koeʻuhí ʻoku moʻui ʻa e ʻOtuá pea ko Hono foha pe ʻofefine koe.

Foki ki he peesi 4.

Aleaʻi:ʻOkú ke tui nai ʻoku ʻi ai ha tali ki hoʻo ngaahi palopalemá? Te tau lava fēfē ʻo feʻunga mo e mālohi ʻo e ʻEikí ke tokoniʻi kitautolú?

Lau:ʻA e fakamatala ʻi he Tohi Tuʻutuʻuni Fika 2 mo e lea ʻa ʻEletā Dallin H. Oaks (ʻi he toʻomataʻú). ʻOku ʻikai ʻuhinga ʻa e moʻui fakafalala pē kiate kitá te tau lava ʻo fai pe maʻu ha faʻahinga meʻa pē ʻoku tau fakakaukau ki ai. Ka, ko e tui ia te tau lava ʻo maʻu e ngaahi fie maʻu fakalaumālie mo fakatuʻasino kotoa pē ʻo e moʻuí ʻoku tau fie maʻu maʻatautolu mo hotau fāmilí, ʻo fakafou ʻi he ʻaloʻofa, pe mālohi fakaivia ʻo Sīsū Kalaisí mo ʻetau ngaahi ngāué. Ko e moʻui fakafalala pē kiate kitá ko ha fakamoʻoni ia ʻo ʻetau falala pe tui ki he mālohi ʻo e ʻOtuá ke fakahoko ha ngaahi mana ʻi heʻetau moʻuí pea ʻomi kiate kitautolu ha mālohi ke ikunaʻi e ngaahi ʻahiʻahí mo e ngaahi faingataʻá.

“Ko e moʻui fakafalala pē kiate kitá ko e malava ia, mo e tukupā, pea mo e feinga ke tokonaki ʻa e ngaahi fie maʻu fakalaumālie mo fakatuʻasino ʻo e moʻuí maʻata pea mo e fāmilí. ʻI he lava ke moʻui fakafalala pē ʻa e kāingalotú kiate kinautolú, ʻoku nau toe malava lelei ange ai ke tokoni mo tauhi ha niʻihi kehe.”

Tohi Tuʻutuʻuni Fika 2: Ko Hono Puleʻi ʻo e Siasí (2010), 6.1.1

“Ko e hā pē ha meʻa ʻokú ne ʻai ke tau fakafalala ki ha taha kehe ʻi he ngaahi fili pe ngaahi maʻuʻanga tokoni te tau lava ʻo tokonaki maʻatautolú, ʻokú ne fakavaivaiʻi fakalaumālie kitautolu mo fakatuaiʻi ʻetau tupulaki ki he meʻa ʻoku taumuʻa e palani ʻo e ongoongoleleí ke tau aʻusiá.”

Dallin H. Oaks, “Repentance and Change,” Ensign pe Liahona, Nov. 2003, 40

Aleaʻi:Kuo tokoniʻi fēfē koe ʻe he ʻaloʻofa ʻa Kalaisí ke ke maʻu ʻa e ngaahi fie maʻu fakalaumālie mo fakatuʻasino ʻo e moʻuí?

ʻEkitivitií

Sitepu 1: Fili ha hoa ngāue pea lau ʻa e tefitoʻi moʻoni takitaha ʻi laló.

Sitepu 2: Aleaʻi ʻa e ʻuhinga ʻe lava ke tokoniʻi ai koe ʻe he tui ki he ngaahi moʻoni ko ʻení ke ke moʻui fakafalala ange aí.

Ngaahi Tefitoʻi Moʻoni Fakatokāteline ʻo e Moʻui Fakafalala Pē Kiate Kitá
Ko e moʻui fakafalala pē kiate kitá ko ha fekau ia.	“ʻOku fekau ʻe he ʻEikí ki he Siasí mo hono kāingalotú ke nau moʻui tauʻatāina mo fakafalala pē kiate kinautolu” (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 144).
ʻE malava pea ʻe tofa ʻe he ʻOtuá ha hala maʻa ʻEne fānau angatonú ke nau moʻui fakafalala ange kiate kinautolu.	“Pea ko ʻeku taumuʻá ke tauhi ʻa ʻeku kau māʻoniʻoní, he ʻoku ʻaʻaku ʻa e ngaahi meʻa kotoa pē” (T&F 104:15).
ʻOku taha pē ʻa e fakatuʻasinó mo e fakalaumālié ki he ʻOtuá.	“Ko ia, ko e moʻoni ʻoku ou pehē kiate kimoutolu, ʻoku fakalaumālie kiate au ʻa e ngaahi meʻa kotoa pē” (T&F 29:34).

Aleaʻi:Lau ʻa e kupuʻi lea ʻa Palesiteni Marion G. Romney (ʻi he tafaʻaki toʻomataʻú). ʻE anga fēfē haʻo ʻiloʻi ʻokú ke moʻui fakafalala lahi ange pē kiate koe?

“Kapau ʻoku ʻikai moʻui fakafalala ha taha kiate ia pē, he ʻikai te ne lava ʻo fakahoko ʻa e ngaahi holi ʻo e lotó ne fanau’i mai pē mo ia ke tokoní. ʻE lava fēfē ke tau foaki kapau ʻoku ʻikai ke tau maʻu ha meʻa? He ʻikai ke lava ʻo ʻomi ha meʻakai maʻanautolu ʻoku fiekaiá mei ha ngaahi kōpate ʻoku hala ha meʻakai ai. He ʻikai lava ke maʻu ha paʻanga ke tokoniʻi ʻaki e faingataʻaʻiá mei ha kato ʻoku ʻikai ai ha paʻanga. He ʻikai lava ke maʻu ha tokoni mo ha loto mahino meiate kinautolu ʻoku ʻi ai honau ngaahi faingataʻaʻia fakaelotó. He ʻikai lava ke faiako ʻa kinautolu ʻoku ʻikai potó. Pea mahuʻinga tahá, he ʻikai lava ke maʻu ha tataki fakalaumālie meiate kinautolu ʻoku vaivai fakalaumālié.”

Marion G. Romney, “The Celestial Nature of Self-Reliance,” Ensign, Nov. 1982, 93

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha.

• Lau ʻa e tohi mei he Kau Palesitenisī ʻUluakí he peesi 3, pea laineʻi e ngaahi tāpuaki ʻoku talaʻofa maí. Ko e hā kuo pau ke ke fai ke maʻu ai kinautolú? Hiki hoʻo ngaahi fakakaukaú ʻi lalo.

• Vahevahe mo hoʻo fāmilí pe ngaahi kaungāmeʻá e meʻa kuó ke ako he ʻahó ni fekauʻaki mo e moʻui fakafalala pē kiate kitá.