4:

Fakatomala pea Talangofua

Lipōtí:Vahevahe nounou mo e kulupú hoʻo fakalakalaka hono muimuiʻi hoʻo paʻanga hū mai mo e fakamole he uike kuo ʻosí.

Fakalaulauloto:Ko e hā ha founga ʻoku fehokotaki ai ʻa e fakatomalá mo e talangofuá ki he moʻui fakafalala pē kiate kitá?

Mamataʻi:“ʻOku ʻOmi ʻe he Talangofuá ʻa e Ngaahi Tāpuakí (Obedience Brings Blessings),” maʻu ʻi he srs.lds.org/videos. (ʻIkai ha vitiō? Lau ʻa e peesi 13.)

ʻOku ʻOmi ʻe he Talangofuá HA NGAAHI TĀPUAKI

Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.

mei he ʻOku ʻOmi ʻe he Talangofuá ʻa e Ngaahi Tāpuakí

Palesiteni Thomas S. Monson: Ko ha talaʻofa nāunauʻia! “Ko ia ia ʻokú ne tauhi [e] ngaahi fekau [ʻa e ʻOtuá] ʻokú ne maʻu ʻa e moʻoní mo e māmá, kae ʻoua ke fakanāunauʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28]. …

Kāinga, ko e sivi lahi taha ʻo e moʻui ní ko e talangofuá. Naʻe folofola ʻa e ʻEikí, “Pea te tau siviʻi ʻa kinautolu ʻi he meʻá ni, ke vakai pe te nau fai ʻa e meʻa kotoa pē ʻe fekau ʻe he ʻEiki ko honau ʻOtuá kiate kinautolú” [ ʻĒpalahame 3:25].

Naʻe fakahā ʻe he Fakamoʻuí: “He ko kinautolu kotoa pē ʻoku fie maʻu ha tāpuaki mei hoku nimá, te nau tauhi ʻa e fono ʻa ia naʻe fokotuʻu ki he tāpuaki ko iá, pea mo hono ngaahi tuʻunga ʻo iá, ʻo hangē ko ia naʻe fokotuʻu ʻi he teʻeki ai ke ʻai ʻa e tuʻunga ʻo e māmaní” [T&F 132:5].

ʻOku ʻikai ha faʻifaʻitakiʻanga maʻongoʻonga ange ʻi he faʻifaʻitakiʻanga hotau Fakamoʻuí. Naʻe pehē ʻe Paula kau kiate Ia:

“Neongo ko e ʻAló Ia, ka naʻe akonekina ia ke talangofua ʻe he ngaahi meʻa naʻá Ne kātakiʻí;

“Pea kuo fakahaohaoa ia, peá ne hoko ko e tupuʻanga ʻo e moʻui taʻengatá kiate kinautolu kotoa pē ʻoku talangofua kiate iá” [Hepelū 5:8–9].

Naʻe fakahaaʻi ʻe he Fakamoʻuí ʻa e ʻofa moʻoni ki he ʻOtuá ʻaki ʻEne moʻui haohaoa, fakahoko e misiona toputapu naʻe ʻAʻaná. Naʻe ʻikai fie-māʻolunga. ʻIkai ʻulupupula ʻo hīkisia. Naʻe mateaki. Naʻe loto fakatōkilalo maʻu ai pē. Loto fakamātoato maʻu ai pē. Mo talangofua maʻu ai pē. …

Ko e taimi naʻe fehangahangai ai mo e mamahi ʻi Ketisemaní, ʻa ia naʻá Ne kātekina ai ʻa e mamahí pea ko ʻEne “tautaʻá ko e taʻataʻa naʻe tō ʻi he tulutā lalahi ki he kelekelé” [Luke 22:44], naʻá Ne fakafōtunga ʻa e ʻAlo talangofuá ʻaki ʻEne pehē, “ʻE Tamai, kapau ko ho finangaló, ʻave ʻa e ipú ni ʻiate au: kae ʻoua naʻa fai hoku lotó, ka ko e finangalo ʻoʻoú” [Luke 22:42].

Hangē ko hono fakahinohino ʻe he Fakamoʻuí ʻa ʻEne Kau ʻUluaki ʻAposetoló, ʻoku pehē ʻa ʻEne fakahinohinoʻi koe mo aú: “Muimui koe ʻiate au” [Sione 21:22]. ʻOku tau loto fiemālie nai ke talangofua?

Ko e ʻilo ʻoku tau kumiá, ko e ngaahi tali ʻoku tau fakaʻamuá, pea mo e ivi ʻoku tau fie maʻu he ʻahó ni ke feau ʻaki e ngaahi faingataʻa ʻo e māmani fihituʻu mo faʻaliliuá, ʻe ʻatautolu ia ʻi he taimi te tau loto fiemālie ai ke talangofua ki he ngaahi fekau ʻa e ʻEikí. Te u toe lau mei he ngaahi folofola ʻa e ʻEikí: “Ko ia ia ʻokú ne tauhi ʻene ngaahi fekaú ʻokú ne maʻu ʻa e moʻoní mo e māmá, kae ʻoua ke fakanāunauʻiaʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28].

ʻOku ou lotua ʻi he loto fakatōkilalo ke tāpuekina kitautolu ʻaki ʻa e ngaahi pale lelei kuo talaʻofa ki he talangofuá. ʻI he huafa ʻo Sīsū Kalaisi, ko hotau ʻEiki mo e Fakamoʻuí, ʻēmeni.

(“ʻOku ʻOmi ʻe he Talangofuá ʻa e Ngaahi Tāpuakí,” Ensign pe Liahona, Mē 2013, 89, 92)

Foki ki he peesi 12.

Aleaʻi:Ko e hā ha ngaahi tāpuaki kuó ke maʻu ʻi hoʻo talangofua ki he ngaahi fono ʻa e ʻOtuá? ʻE founga fēfē hano tokoniʻi kitautolu ʻe he fakatomalá ke tau fakalakalaka?

Lau:Tokāteline mo e Ngaahi Fuakava 130:20–21 mo e lea naʻe fai ʻe he Palōfita ko Siosefa Sāmitá (ʻi he toʻomataʻú)

“ʻOku ʻi ai ha fono … ʻa ia ʻoku makatuʻunga ki ai ʻa e ngaahi tāpuaki kotoa pē—pea ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí.”

Tokāteline mo e Ngaahi Fuakava 130:20–21

“Naʻá ku ʻfokotuʻu ai ʻeni ko haʻaku lao: Ko e taimi ʻoku fekau mai ai e ʻEikí, fai ia.”

Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 183–84

ʻEkitivitií

Ko e talangofua ki he ngaahi fono paú ʻoku iku ia ki ha ngaahi tāpuaki pau.

Sitepu 1: Hiki ʻiate koe pē, ha niʻihi ʻo ha ngaahi tāpuaki ʻokú ke fakaʻamu ki ai ʻi he kōlomu toʻohemá.

Sitepu 2: Kumi pe ko e fono pe tefitoʻi moʻoni fē ʻe fie maʻu ke ke talangofua ki ai ke maʻu ʻa e ngaahi tāpuaki ʻokú ke fakaʻamuá.

Ngaahi Tāpuaki ʻOku ou Fie Maʻú		Ngaahi Fono pe ngaahi Tefitoʻi Moʻoni ke Tangofua ki aí
Māhina ʻe tolu ʻo e fakahū paʻangá		Vahehongofulú mo e ngaahi foakí (Malakai 3:10–12) Muimui ʻi ha patiseti.

Aleaʻi:Lau ʻa e Sosiua 3:5 pea mo e lea naʻe fai ʻe ʻEletā Sefilī R. Hōlani mo Palesiteni Sipenisā W. Kimipoló (ʻi he peesi 13). Ko e hā ka fie maʻu ai ke tau fakatomala, fakamāʻoniʻoniʻi kitautolu, mo feinga ke fai lelei ʻi heʻetau feinga ke moʻui fakafalala pē kiate kitautolú?

“Fakamāʻoniʻoniʻi ʻa kimoutolu: koeʻuhí ʻe fai ʻe he ʻEikí ʻapongipongi ʻa e ngaahi mana ʻiate kimoutolu.”

Sosiua 3:5

“ʻOku tāpuekina ʻe he ʻEikí ʻa kinautolu ʻoku fie fakalakalaká, ʻa kinautolu ʻoku nau tali ʻa e ngaahi fie maʻu ki he ngaahi fekaú pea feinga ke tauhi kinautolú. … Te ne tokoniʻi koe ke fakatomala, fakafoʻou, fakaleleiʻi, ha meʻa pē kuo pau ke ke fakaleleiʻi, pea hoko atu. ʻE fāifai pē pea te ke maʻu ʻa e ikuna ʻokú ke fekumi ki aí.”

Jeffrey R. Holland, “ʻE Fai ʻe he ʻEikí ha Ngaahi Mana ʻIate Kimoutolu ʻApongipongí na,” Ensign pe Liahona, Mē 2016, 126

“Kapau ʻoku tau saiʻia ʻi he koloá pe ngaahi meʻa ʻoku fie maʻú ʻo laka ange ʻi heʻetau saiʻia he talangofuá, ʻe mole meiate kitautolu ʻa e ngaahi tāpuaki ʻokú ne fie foaki mai kiate kitautolú.”

Spencer W. Kimball, ʻi he The Teachings of Spencer W. Kimball, ed. Edward L. Kimball (1982), 212

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha:

• Talangofua ki he fono naʻá ke fili ʻi he ʻekitivitī ʻi ʻolungá.

• Vahevahe mo hoʻo familí pe ngaahi kaungāmeʻá e meʻa kuó ke ako he ʻahó ni fekauʻaki mo e talangofuá.