11: Kërkoni të Mësoni: Zgjidhni se Ku po Shkoni dhe Si të Arrini Atje
11:
Kërkoni të Mësoni: Zgjidhni se Ku po Shkoni dhe Si të Arrini Atje
Raportoni:Tregoni shkurtimisht një përvojë kur ju treguat integritet moral javën e kaluar.
Përsiatni:Si na krijon të nxënit mundësi?
Shikoni:“Education for a Better Life,” [“Arsimim për një Jetë më të Mirë”], në dispozicion te srs.lds.org/videos. (Nuk keni material filmik? Lexoni faqen 29.)
Arsimim për një Jetë më të Mirë
Nëse nuk jeni në gjendje ta shikoni materialin filmik, lexoni këtë tekst.
Plaku Jozef W. Sitati: Në moshën 13 vjeç jetoja në një pjesë tepër rurale të Kenias. Njerëzit kishin shumë pak gjëra. Por ata që dukeshin se i siguronin gjërat që të tjerët i admironin, ishin ata që kishin një arsimim të mirë. Arrita ta kuptoj se arsimi ishte një çelës për një jetë më të mirë.
Vazhdonte të më vinte mendimi që të shkoja e të flisja me drejtorin e njërës prej shkollave që dëshiroja me të vërtetë ta frekuentoja. Më nevojitej biçikleta e babait për ta bërë këtë udhëtim që më mori gjysmë dite. Nuk kisha dalë kurrë prej fshatit tim. Nuk dija se si të flisja anglisht shumë mirë dhe ky drejtor ishte një burrë i bardhë. Kurrë më parë nuk kisha takuar apo folur drejtpërdrejt me një burrë të bardhë, kështu që ky ishte një mendim që më trembi.
Diçka brenda meje vazhdonte të më shtynte dhe të më thoshte që duhej të bëja këtë, kështu që u nisa për ta takuar drejtorin. Kur e vështrova, mund të shikoja se ai qe pothuaj i befasuar ta shikonte këtë të ri që qëndronte si një ushtar përpara tij. Ai kishte sy dashamirës, kështu që më dha zemër. I thashë se doja me të vërtetë të hyja në shkollën e tij dhe do të isha shumë i lumtur nëse do të më pranonte. Pastaj ai tha: “Epo, do të shohim kur të dalin rezultatet e provimit.” I thashë: “Faleminderit, zotëri”. Në më pak se katër minuta dola nga zyra.
Ato katër minuta që kalova në atë zyrë, ishin çastet vendimtare në jetën time. Isha i vetmi nxënës nga shkolla ime fillore që u përzgjodh në një nga shkollat më të mira në zonën tonë. Fakti që ky burrë i mirë ma kishte dhënë këtë mundësi, më bëri mirënjohës dhe më frymëzoi që të përpiqesha të isha nxënësi më i mirë në klasën time.
Kjo hapi mundësi të reja për mua që të shkoja në një tjetër shkollë të mirë dhe më pas të përgatitesha për në universitet. Arsimimi im bëri të mundur që ta gjeja bashkëshorten time në universitet. Më aftësoi që të gjeja një punë në qytet. Ndërkohë që jetonim në Nairobi, ne u ndeshëm me një çift misionarësh që na ftuan në shtëpinë e tyre, ku ata kishin mbledhje me njerëz që ishin anëtarë të Kishës. Nëse nuk do kisha qenë në Nairobi në atë kohë, nuk do ta kisha gjetur kurrë ungjillin. Fakti që isha në një punë të sigurt, më mundësoi të shërbeja në Kishë.
Dëshmoj se arsimi është një çelës për mbështetjen te vetja. Do të hapë shumë rrugë që ju të mund të jeni në gjendje të siguroni për veten tuaj materialisht si edhe të bëheni të mbështetur te vetja shpirtërisht.