« ពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់
របៀបដែលព្រះដឹកនាំបុត្រាបុត្រីរបស់ទ្រង់ត្រឡប់ទៅផ្ទះវិញ
ស្រមៃថាអ្នកកំពុងតែនៅលើដំណើរមួយដ៏វែងឆ្ងាយ ។ ផ្លូវនោះគឺតូចចង្អៀត ហើយពេលខ្លះពិបាកក្នុងការស្វែងរក ប៉ុន្ដែអ្នកដឹងថាអ្នកកំពុងតែដើរទៅក្នុងទិសដៅដែលត្រឹមត្រូវដោយសារតែសញ្ញាសម្គាល់ជាក់លាក់ដែលមាននៅតាមផ្លូវនោះ ។ នៅពេលដែលអ្នកទៅដល់កន្លែងដែលមានសញ្ញាសម្គាល់នីមួយៗ អ្នកកាន់តែខិតជិតទៅដល់គោលដៅរបស់អ្នកហើយ ។ នៅទីបំផុត នៅចុងបញ្ចប់នៃការធ្វើដំណើររបស់អ្នក អ្នកមើលត្រឡប់ក្រោយ ហើយឃើញពីរបៀបដែលសញ្ញាសម្គាល់ទាំងនោះបានជួយដឹកនាំអ្នកឲ្យទៅកាន់គោលដៅរបស់អ្នក ។
នៅក្នុងដំណឹងល្អ ពិធីបរិសុទ្ធនៃអំណោយទានពិសិដ្ឋផ្ទាល់ខ្លួន និងការផ្សារភ្ជាប់ គឺដូចជាសញ្ញាសម្គាល់ដែលនៅតាមផ្លូវតូចចង្អៀតនោះដែរ ។ ពិធីបរិសុទ្ធទាំងពីរនេះគឺចាំបាច់ដើម្បីជួយអ្នកក្នុងការធ្វើដំណើររបស់អ្នកនៅក្នុងជីវិត នាំអ្នកខិតទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ ពិធីបរិសុទ្ធនីមួយៗនាំអ្នកត្រឡប់ទៅផ្ទះនៃទ្រង់ទាំងទ្វេវិញ ជួយអ្នកឆ្លងកាត់បញ្ហាប្រឈមនានាដែលអ្នកជួបប្រទះនៅលើផែនដី និងរៀបចំអ្នកសម្រាប់ពរជ័យដ៏អស់កល្បជានិច្ចដែលមានសម្រាប់អ្នកនៅជីវិតបន្ទាប់ ។
តើពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់គឺជាអ្វី ?
ពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់គឺជាផ្នែកដ៏ចាំបាច់នៃផ្លូវនៃសេចក្ដីសញ្ញាដែលនាំយើងត្រឡប់ទៅកាន់ព្រះវិញ ។ យើងចូលរួមក្នុងពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់នៅក្នុងព្រះវិហារបរិសុទ្ធ ។ ក្នុងអំឡុងពិធីបរិសុទ្ធទាំងនេះ យើងចុះសេចក្តីសញ្ញា ឬការសន្យាជាមួយនឹងព្រះ ។ ប្រសិនបើយើងស្មោះត្រង់ចំពោះសេចក្តីសញ្ញាដែលយើងធ្វើទាក់ទងនឹងពិធីបរិសុទ្ធទាំងនេះ នោះយើងអាចទទួលបានជីវិតដ៏នៅអស់កល្បជានិច្ចតាមរយៈដង្វាយធួនរបស់ព្រះយេស៊ូវគ្រីស្ទ ។
ទិដ្ឋភាពទូទៅនៃប្រធានបទ ៖ អំណោយទានពិសិដ្ឋ ការផ្សារភ្ជាប់
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្ដីសញ្ញា និងពិធីបរិសុទ្ធ ព្រះវិហារបរិសុទ្ធ ការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្ដិ
ផ្នែកទី ១
ក្នុងអំឡុងពិធីបរិសុទ្ធនៃអំណោយទានពិសិដ្ឋ យើងធ្វើសេចក្ដីសញ្ញាដ៏ពិសិដ្ឋជាមួយនឹងព្រះ
ពិធីបរិសុទ្ធមួយក្នុងចំណោមពិធីបរិសុទ្ធដែលយើងទទួលនៅក្នុងព្រះវិហារបរិសុទ្ធ ហៅថាអំណោយទានពិសិដ្ឋ ។ អំណោយទានពិសិដ្ឋគឺជាអំណោយមួយមកពីព្រះ ។ ក្នុងអំឡុងពិធីបរិសុទ្ធ ឬពិធីដ៏ពិសិដ្ឋនេះ យើងរៀនអំពីផែនការនៃសេចក្ដីសង្គ្រោះរបស់ព្រះ និងតួនាទីដ៏សំខាន់របស់ព្រះអង្គសង្គ្រោះនៅក្នុងផែនការនោះ ។ យើងក៏ចុះសេចក្ដីសញ្ញាជាមួយនឹងទ្រង់ផងដែរ ។ ព្រះវរបិតាសួគ៌បានប្រទានពរដល់យើងសម្រាប់ការចុះ និងរក្សាសេចក្ដីសញ្ញាទាំងនេះ ដោយការប្រទានដល់យើងនូវការទាញយកព្រះចេស្ដារបស់ទ្រង់បានកាន់តែច្រើន ។ សេចក្ដីសញ្ញាដែលយើងធ្វើដែលជាផ្នែកមួយនៃអំណោយទានពិសិដ្ឋ ផ្ដល់ដល់យើងនូវឱកាសដើម្បីលូតលាស់ និងផ្លាស់ប្ដូរ ។ តាមរយៈសេចក្ដីសញ្ញាទាំងនេះ យើងអាចក្លាយកាន់តែដូចជាព្រះយេស៊ូវគ្រីស្ទ និងមានអារម្មណ៍នៃសេចក្ដីសុខសាន្ដ ទំនុកចិត្ត និងសេចក្តីអំណរ ។
បន្ទាប់ពីយើងទទួលបានអំណោយទានពិសិដ្ឋសម្រាប់ខ្លួនយើងហើយ យើងអាចចូលរួមក្នុងពិធីបរិសុទ្ធនៃអំណោយទានពិសិដ្ឋជំនួសមនុស្សដទៃដែលបានស្លាប់ ។ នៅក្នុងពិភពវិញ្ញាណ អ្នកទាំងឡាយដែលបានស្លាប់អាចជ្រើសរើសទទួលយកដំណឹងល្អរបស់ព្រះយេស៊ូវគ្រីស្ទ ក៏ដូចជាពិធីបរិសុទ្ធដែលបានធ្វើសម្រាប់ពួកគេ និងទទួលបានសេចក្ដីសង្គ្រោះ និងភាពតម្កើងឡើង ។
រឿងទាំងឡាយដែលត្រូវពិចារណា
-
ក្នុងអំឡុងពេលទទួលអំណោយទានពិសិដ្ឋ យើងធ្វើសេចក្ដីសញ្ញាថានឹងរស់នៅតាមក្រឹត្យវិន័យចំនួនប្រាំផ្សេងៗគ្នា ។ សូមអានអំពីក្រឹត្យវិន័យទាំងនេះនៅក្នុងផ្នែកទី ២៧.២ នៅក្នុង ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( បណ្ណាល័យដំណឹងល្អ ) ។ តើអ្នកកំពុងរស់នៅតាមក្រឹត្យវិន័យទាំងនេះរួចហើយដោយរបៀបណា ? តើអ្នកអាចធ្វើអ្វីខ្លះ ដើម្បីរស់នៅតាមក្រឹត្យវិន័យទាំងនេះបានកាន់តែពេញលេញ ? តើព្រះយេស៊ូវគ្រីស្ទធ្វើជាគំរូដល់ការរស់នៅតាមក្រឹត្យវិន័យទាំងនេះយ៉ាងដូចម្ដេច ? ពិចារណាពីរបៀបដែលការរស់នៅតាមក្រឹត្យវិន័យនីមួយៗអាចជួយអ្នកឲ្យក្លាយកាន់តែដូចជាទ្រង់ ។
-
យើងមានសំណាងដែលបានរស់នៅក្នុងអំឡុងពេលដែលព្រះវិហារបរិសុទ្ធត្រូវបានសាងសង់នៅជុំវិញពិភពលោក ។ អែលឌើរ ដេវីឌ អេ បែដណា បានបង្រៀន ៖ « ដោយយល់ច្បាស់ ការប្រកាសអំពីព្រះវិហារបរិសុទ្ធថ្មីនីមួយៗគឺជាប្រភពនៃអំណរដ៏អស្ចារ្យ និងជាមូលហេតុមួយដើម្បីថ្លែងអំណរគុណចំពោះព្រះអម្ចាស់ ។ ប៉ុន្ដែ ការផ្ដោតចម្បងរបស់យើងគួរតែទៅលើសេចក្ដីសញ្ញា និងពិធីបរិសុទ្ធ ដែលអាចផ្លាស់ប្ដូរដួងចិត្តយើង ហើយបង្កើនការលះបង់របស់យើងចំពោះព្រះអង្គសង្គ្រោះ ហើយមិនមែនតែលើទីតាំង ឬសម្រស់នៃអគារនោះឡើយ » ។ តើអ្នកជឿថាសេចក្ដីសញ្ញា និងពិធីបរិសុទ្ធទាំងឡាយនៃអំណោយទានពិសិដ្ឋអាចផ្លាស់ប្ដូរដួងចិត្ដរបស់អ្នកបានដោយរបៀបណា ? តើសេចក្ដីសញ្ញា និងពិធីបរិសុទ្ធទាំងឡាយនេះអាចបង្កើនការទុកចិត្ដរបស់អ្នកចំពោះព្រះអង្គសង្គ្រោះដោយរបៀបណា ? សូមពិចារណាពីរបៀបដែលការផ្តោតលើសេចក្ដីសញ្ញា និងពិធីបរិសុទ្ធនៃអំណោយទានពិសិដ្ឋនៅក្នុងរបៀបនេះ អាចជួយរៀបចំអ្នកសម្រាប់ភាពតម្កើងឡើងបាន ។
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងសុន្ទរកថារបស់លោក « ហេតុអ្វីជាផ្លូវនៃសេចក្តីសញ្ញា » អែលឌើរ ឌី ថត គ្រីស្តូហ្វឺសិន បានប្រៀបធៀបការរស់នៅតាមដំណឹងល្អរបស់ព្រះយេស៊ូវគ្រីស្ទទៅនឹងការជៀសវាង « កំហុសកំសោយ » នៅក្នុងកីឡាវាយកូនបាល់ ។ សូមអានអំពីការប្រៀបធៀបនេះនៅក្នុងសារលិខិតរបស់លោក ហើយពិភាក្សាអំពីអ្វីដែល « កំហុសកំសោយ » ដែលយើងជៀសវាងដោយការរក្សាសេចក្តីសញ្ញាទាំងប្រាំដែលយើងធ្វើក្នុងអំឡុងពេលទទួលអំណោយទានពិសិដ្ឋ ( សូមមើល ក្បួនខ្នាតទូទៅ២៧.២ ) ។ អ្នកក៏អាចមើលវីដេអូនៃកាប្រកួតកីឡាវាយកូនបាល់ ឬក៏អាចលេងកីឡាវាយកូនបាល់ក៏បានដែរ ដើម្បីមើលថាតើកំហុសកំសោយគឺជាអ្វី ។ បន្ទាប់មកពិភាក្សាអំពីពរជ័យផ្សេងៗទៀតនៃការរក្សាសេចក្តីសញ្ញាដែលអែលឌើរ គ្រីស្តូហ្វឺសិន ចែកចាយនៅក្នុងសារលិខិតរបស់លោក ។ តើពរជ័យទាំងនេះពង្រឹងបំណងប្រាថ្នារបស់អ្នកដើម្បីដើរតាមផ្លូវនៃសេចក្ដីសញ្ញា និងទទួលបានអំណោយនៃអំណោយទានពិសិដ្ឋ ឬរក្សាសេចក្តីសញ្ញាដែលអ្នកបានធ្វើរួចហើយនៅក្នុងព្រះវិហារបរិសុទ្ធដោយរបៀបណា ?
-
ផ្នែកនៃអំណោយទានពិសិដ្ឋរួមមានការពាក់សម្លៀកបំពាក់ដ៏ពិសិដ្ឋ នៅពេលយើងធ្វើសេចក្តីសញ្ញា និងទទួលពិធីបរិសុទ្ធ ។ ចូរពិចារណាពិភាក្សាអំពីឧទាហរណ៍មួយចំនួននៃឱកាសផ្សេងទៀតនៅពេលដែលយើងស្លៀកសម្លៀកបំពាក់ពិសេស និងហេតុអ្វីបានជាសម្លៀកបំពាក់នោះមានសារៈសំខាន់ចំពោះបទពិសោធន៍នៅក្នងព្រះវិហារបរិសុទ្ធ ។ បន្ទាប់មកអ្នកអាចមើលវីដេអូ « Sacred Temple Clothing » ( នាទី ៤:១២ ) ដែលពន្យល់ពីអ្វីដែលសម្លៀកបំពាក់ព្រះវិហារបរិសុទ្ធតំណាងឲ្យ និងហេតុអ្វីបានជាសមាជិកដែលទទួលបានអំណោយទានពិសិដ្ឋពាក់សម្លៀកបំពាក់ព្រះវិហារបរិសុទ្ធនៅក្រោមសម្លៀកបំពាក់របស់ពួកគេជារៀងរាល់ថ្ងៃ ។ និយាយអំពីរបៀបដែលសម្លៀកបំពាក់ដ៏ពិសិដ្ឋជួយយើងបង្ហាញអារម្មណ៍នៃភក្ដីភាពចំពោះព្រះ និងជួយយើងឲ្យខិតកាន់តែជិតទ្រង់ ។ អ្នកក៏អាចពិនិត្យមើលសុន្ទរកថារបស់ស៊ីស្ទើរ ចេ អាណែត ដិននីស « ត្រូវប្រដាប់ខ្លួនដោយព្រះអម្ចាស់យេស៊ូវគ្រីស្ទវិញ » ដើម្បីស្វែងយល់បន្ថែមអំពីសម្លៀកបំពាក់ព្រះវិហារបរិសុទ្ធ ។ ឬអ្នកអាចរុករកជាមួយគ្នានៅលើទំព័រ « ព្រះវិហារបរិសុទ្ធ » នៅលើគេហទំព័រ ChurchofJesusChrist.org ដើម្បីស្វែងរកធនធានមានប្រយោជន៍បន្ថែមទៀតអំពីព្រះវិហារបរិសុទ្ធ រួមទាំងធនធានដែលបង្ហាញដល់អ្នកពីផ្នែកខាងក្នុងនៃដំណាក់របស់ព្រះអម្ចាស់ ។ តើអ្នកអាចប្រើធនធានទាំងនេះដើម្បីជួយអ្នកដទៃដែលអាចមានសំណួរអំពីព្រះវិហារបរិសុទ្ធ និងសម្លៀកបំពាក់ព្រះវិហារបរិសុទ្ធដោយរបៀបណា ?
ស្វែងយល់បន្ថែមទៀត
-
ដាល្លិន អេក អូក « សេចក្ដីសញ្ញា និងការទទួលខុសត្រូវ » លីអាហូណា ខែឧសភា ឆ្នាំ២០២៤ ទំព័រ ៩៣–៩៦
-
មគ្គទេសក៍សិក្សាដំណឹងល្អដែលជាប់ទាក់ទងបន្ថែមទៀត ៖ ការគោរពប្រតិបត្ដិ ការពលិកម្ម ព្រហ្មចារីភាព ការថ្វាយ
-
« អំពីអំណោយទានពិសិដ្ឋក្នុងព្រះវិហារបរិសុទ្ធ » បណ្ណាល័យដំណឹងល្អ
-
Church History Topics « Temple Endowment » នៅលើបណ្ណាល័យដំណឹងល្អ
-
« We Will Prove Them » ជំពូក ៣៧ នៅក្នុង Saints: The Story of the Church of Jesus Christ in the Latter Days ភាគ ១ The Standard of Truth, 1815–1846 ( ឆ្នាំ២០១៨ ) ទំព័រ ៤៥៣–៤៥៥ ។
ផ្នែកទី ២
ពិធីបរិសុទ្ធនៃការផ្សារភ្ជាប់ចងភ្ជាប់យើងទៅនឹងគ្រួសារនៃព្រះ និងគ្រួសារនៅលើផែនដីរបស់យើងជារៀងរហូត
ពរជ័យដ៏អស្ចារ្យបំផុតមួយចំនួនរបស់ព្រះសម្រាប់បុត្រាបុត្រីរបស់ទ្រង់អាចកើតមានតាមរយៈពិធីបរិសុទ្ធនៃការផ្សារភ្ជាប់ ។ ក្នុងអំឡុងពិធីបរិសុទ្ធនេះបុរស និងស្ត្រីម្នាក់ចូលទៅក្នុងសេចក្តីសញ្ញាអាពាហ៍ពិពាហ៍ថ្មី និងអស់កល្បអស់កាលជានិច្ច នៅពេលដែលពួកគេធ្វើសេចក្តីសញ្ញាដ៏ពិសិដ្ឋជាមួយគ្នា និងជាមួយនឹងព្រះអម្ចាស់ ( សូមមើល គោលលទ្ធិ និងសេចក្ដីសញ្ញា ១៣១:១–៤ ) ។ ប្រសិនបើគូសា្វមីភរិយាមានភាពស្មោះត្រង់ចំពោះសេចក្ដីសញ្ញារបស់ពួកគេ ពួកគេអាចត្រូវបានចងភ្ជាប់ទៅនឹងគ្រួសាររបស់ព្រះ និងគ្រួសារនៅលើផែនដីរបស់ពួកគេសម្រាប់ភាពអស់កល្បជានិច្ច ។ ពួកគេក៏ទទួលបានការសន្យាពរជ័យដ៏អស្ចារ្យដែលនឹងមកដល់នៅក្នុងជីវិតបន្ទាប់ផងដែរ ។
ការផ្សារភ្ជាប់អាចត្រូវបានធ្វើជំនួសអ្នកដែលបានស្លាប់ហើយ ដូច្នេះពួកគេក៏អាចទទួលបានពរជ័យដ៏អស់កល្បជានិច្ច និងបានជួបជុំគ្នាជារៀងរហូតជាមួយគ្រួសាររបស់ពួកគេ និងគ្រួសាររបស់ព្រះផងដែរ ។ ដូចជាពិធីបរិសុទ្ធបព្វជិតភាពទាំងអស់ផ្សេងទៀតដែរ ពិធីបរិសុទ្ធនៃការផ្សាភ្ជាប់ត្រូវបានធ្វើឡើងតាមរយៈដង្វាយធួនរបស់ព្រះយេស៊ូវគ្រីស្ទ ហើយអាចនាំមកនូវសេចក្ដីសុខសាន្ដ និងគោលបំណងនៅក្នុងជីវិតនេះ ។
រឿងទាំងឡាយដែលត្រូវពិចារណា
-
នៅពេលដែលព្រះយេស៊ូវគ្រីស្ទបានប្រទានអំណាចដល់ពេត្រុស « កូនសោនៃនគរស្ថានសួគ៌ » ទ្រង់បានប្រទានអំណាចផ្សារភ្ជាប់ឲ្យទៅលោក—អំណាចដើម្បីផ្តល់ពរជ័យនៅលើផែនដីដែលនឹងបន្តនៅលើស្ថានសួគ៌ ( សូមមើល ម៉ាថាយ ១៦:១៩ ) ។ សូមអាន គោលលទ្ធិ និងសេចក្ដីសញ្ញា ១១០:១៣–១៦; ១៣២:៧, ៤៥–៤៦ ដើម្បីស្វែងយល់អំពីរបៀបដែលកូនសោទាំងនេះត្រូវបានស្តារឡើងវិញដល់ព្យាការី យ៉ូសែប ស្ម៊ីធ នៅថ្ងៃចុងក្រោយ ។ ឥឡូវនេះកូនសោទាំងនេះត្រូវបានកាន់កាប់ដោយព្យាការីបច្ចុប្បន្នរបស់យើង ហើយកូនសោទាំងនេះបង្រួបបង្រួមគ្រួសារសម្រាប់ភាពអស់កល្បជានិច្ច ។ ប៉ុន្ដែអំណាចនៃការផ្សារភ្ជាប់ « អាចមើលទៅជាគោលលទ្ធិមួយដ៏ធំដុំណាស់ » ( គោលលទ្ធិ និងសេចក្ដីសញ្ញា ១២៨:៩ ) ។ ហេតុអ្វីបានជាវាហាក់ដូចជាដូច្នោះ ? តើវានាំមកនូវសេចក្ដីសង្ឃឹមយ៉ាងដូចម្ដេចក្នុងការដឹងថាទំនាក់ទំនងគ្រួសារដែលត្រូវបានផ្សារភ្ជាប់នៅលើផែនដី ក៏ត្រូវបានផ្សារភ្ជាប់នៅលើស្ថានសួគ៌ផងដែរនោះ ?
-
ប្រធាន រ័សុល អិម ណិលសុន បានបង្រៀន ៖ « សេចក្តីសញ្ញានៃអាពាហ៍ពិពាហ៍ដែលបានធ្វើនៅក្នុងព្រះវិហារបរិសុទ្ធ ត្រូវបានចងភ្ជាប់ដោយផ្ទាល់ទៅនឹង[ សេចក្តី ] សញ្ញារបស់អ័ប្រាហាំ ។ នៅក្នុងព្រះវិហារបរិសុទ្ធគូស្វាមីភរិយាត្រូវបានណែនាំឲ្យស្គាល់ពីពរជ័យ ទាំងអស់ ដែលបានរក្សាទុកសម្រាប់កូនចៅរបស់អ័ប្រាហាំ អ៊ីសាក និង យ៉ាកុប ដែលស្មោះត្រង់ » ។ សូមអានអំពីពរជ័យមួយចំនួននៃពរជ័យទាំងនេះនៅក្នុង គោលលទ្ធិ និងសេចក្ដីសញ្ញា ៧៦:៥០–៦០; ១៣២:១៩ ។ តើអ្នកអាចនៅ « សុចរិត ហើយពិត » (គោលលទ្ធិ និងសេចក្ដីសញ្ញា ៧៦:៥៣ ) ចំពោះសេចក្តីសញ្ញារបស់អ្នកជាមួយនឹងព្រះដើម្បីអ្នក និងមនុស្សជាទីស្រឡាញ់របស់អ្នកអាចទទួលបានការសន្យាដ៏អស្ចារ្យបំផុតរបស់ទ្រង់ដោយរបៀបណា ? សរសេរចំណាប់អារម្មណ៍ណាមួយដែលអ្នកទទួលបាន ហើយបន្ទាប់មកធ្វើសកម្មភាពលើចំណាប់អារម្មណ៍ទាំងនោះ ។
-
ពិធីបរិសុទ្ធនៃការផ្សារភ្ជាប់ត្រូវបានទទួលនៅអាសនាដ៏បរិសុទ្ធនៅក្នុងព្រះវិហារបរិសុទ្ធ ។ តើអ្នកគិតថាអាសនាអាចតំណាងឲ្យអ្វី ? បទគម្ពីរទាំងនេះអាចដឹកនាំការគិតរបស់អ្នក ៖ លោកុប្បត្តិ ៨:២០; ២៦:២៣–២៥; នីហ្វៃទី១ ២:៧; ម៉ូសេ ៥:៥–៩ ។ តើនិមិត្តសញ្ញានៃអាសនាបានណែនាំអ្វីខ្លះដល់អ្នកអំពីពិធីបរិសុទ្ធនៃការផ្សារភ្ជាប់ និងទំនាក់ទំនងគ្រួសារ ?
សកម្មភាពសម្រាប់ការរៀនសូត្រជាមួយអ្នកដទៃ
-
តាមប្រពៃណី ត្រាត្រូវបានប្រើសម្រាប់ឯកសារស្របច្បាប់ សញ្ញាប័ត្រ ឬលិខិតសំខាន់ៗ ដើម្បីបង្ហាញថាឯកសារទាំងនេះគឺស្របច្បាប់ ។ ប្រហែលជាអ្នកអាចមើលរូបភាពត្រាប្រភេទផ្សេងគ្នាមួយចំនួន ឬបង្កើតត្រាផ្ទាល់ខ្លួនរបស់អ្នក ។ បន្ទាប់មកមើលសុន្ទរកថា « អំណាចនៃការផ្សារភ្ជាប់ » ដោយអែលឌើរ ឌី ថត គ្រីស្តូហ្វឺសិន ជាមួយគ្នា ឡើងវិញ ។ តើអ្វីខ្លះជាភាពខុសគ្នារវាងត្រានៅលើផែនដី និងអំណាចនៃការផ្សារភ្ជាប់របស់ព្រះ ? តើពរជ័យអ្វីខ្លះដែលអាចកើតមានតាមរយៈអំណាចនៃការផ្សារភ្ជាប់របស់ទ្រង់ ? ប្រសិនបើអ្នកបានទទួលពិធីបរិសុទ្ធនៃការផ្សារភ្ជាប់នៅក្នុងដំណាក់របស់ព្រះអម្ចាស់សម្រាប់ខ្លួនអ្នក ឬសម្រាប់បុព្វការីជន សូមពិចារណាចែកចាយបទពិសោធន៍របស់អ្នក ។ តើអ្នកបានដឹងដោយរបៀបណាថា ព្រះអម្ចាស់ទទួលស្គាល់ពិធីបរិសុទ្ធនៃការផ្សារភ្ជាប់របស់អ្នកថា « ស្របច្បាប់ » ឬត្រឹមត្រូវ ?
-
ពេលខ្លះ ស្ថានភាពគ្រួសារលំបាក ឬមិនមានភាពវិជ្ជមានធ្វើឲ្យវាពិបាកក្នុងការចង់រស់នៅជាមួយគ្រួសាររបស់យើងសម្រាប់ភាពអស់កល្បជានិច្ច ។ ឬប្រហែលជាសមាជិកគ្រួសារមិនគោរពសេចក្ដីសញ្ញានៃអាពាហ៍ពិពាហ៍របស់ខ្លួនគាត់ ដូច្នេះយើងសង្ស័យថាគ្រួសាររបស់យើងនឹងរឹងមាំជារៀងរហូតឬអត់ ។ អំពីករណីបែបនេះ អែលឌើរ ដេវីឌ អេ បែដណាបានបង្រៀន ៖ « ចំពោះបងប្អូនដែលបានជួបការឈឺចាប់ដោយសារការលះលែងគ្នានៅក្នុងគ្រួសាររបស់បងប្អូន ឬឈឺចាប់ដោយសារការបំពានទំនុកចិត្ត សូមចាំថា វាចាប់ផ្ដើមជាថ្មីម្ដងទៀតជាមួយនឹងបងប្អូន ! ចំណងភ្ជាប់មួយនៅក្នុងតំណភ្ជាប់នៃជំនាន់ទាំងឡាយរបស់បងប្អូនអាចនឹងត្រូវផ្ដាច់ ប៉ុន្តែចំណងភ្ជាប់សុចរិតផ្សេងទៀត និងអ្វីដែលនៅសេសសល់នៃតំណភ្ជាប់នោះគឺមានសារៈសំខាន់ដ៏នៅអស់កល្ប ។ បងប្អូនអាចបន្ថែមកម្លាំងដល់តំណភ្ជាប់របស់បងប្អូន ហើយប្រហែលជាជួយស្ដារចំណងដែលដាច់នោះឡើងវិញផង ។ កិច្ចការនោះអាចសម្រេចបានម្ដងមួយៗ » ។ សូមអានប្រសាសន៍របស់អែលឌើរ បែដណា ជាមួយគ្នា ហើយបន្ទាប់មកបង្កើតច្រវ៉ាក់ធ្វើពីក្រដាស ។ បន្ទាប់មកអ្នកអាចសរសេរម្នាក់ម្តងៗនៅលើតំណភ្ជាប់មួយអំពីអ្វីដែលអ្នកនឹងធ្វើ ដើម្បីក្លាយជាតំណភ្ជាប់ដ៏រឹងមាំនៅក្នុងគ្រួសាររបស់អ្នកតាមរយៈអំណាចនៃការផ្សារភ្ជាប់របស់ព្រះអង្គសង្គ្រោះ ។
ស្វែងយល់បន្ថែមទៀត
-
រ័សុល អិម ណិលសុន « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » Liahona ខែវិច្ឆិកា ឆ្នាំ២០២១ ទំព័រ ៩៣–៩៦ ។
-
ឌែល ជី រិនឡាន់ « Family History and Temple Work: Sealing and Healing » Liahona ខែឧសភា ឆ្នាំ២០១៨ ទំព័រ ៤៦–៤៩
-
« អំពីការផ្សារភ្ជាប់ក្នុងព្រះវិហារបរិសុទ្ធ » បណ្ណាល័យដំណឹងល្អ
-
Church History Topics « Sealing » នៅលើបណ្ណាល័យដំណឹងល្អ