Lesona 15 Anomea mo le Sauniuniga o le Vasega: O Le Fuafuaga a le Tama Faalelagi ma Lo Tatou Gafatia Faalelagi
“Lesona 15 Anomea mo le Sauniuniga o le Vasega: O Le Fuafuaga a le Tama Faalelagi ma Lo Tatou Gafatia Faalelagi,” Anomea a le Faiaoga O Faavae o le Toefuataiga (2019)
“Lesona 15 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Ata
se alii o loo tilotilo atu i mauga
Lesona 15 Anomea mo le Sauniuniga o le Vasega
O Le Fuafuaga a le Tama Faalelagi ma Lo Tatou Gafatia Faalelagi
Na folafola mai e Perofeta Iosefa Samita e faapea, “O le ata maoae o le faaolataga o se autu ua tatau ona mataituina ma le toto’a, ma ia avea o se tasi o meaalofa sili mai le lagi i tagata” (Aoaoga a Peresitene o le Ekalesia: Iosefa Samita [2007], 208). E ala mai i faaaliga ma faaaliga vaaia, na malamalama ai Iosefa Samita i le fuafuaga a le Atua mo Lana fanau i auala o le a suia ai olaga o le miliona o tagata i le lalolagi atoa. O lenei lesona o le a fesoasoani ia te oe e malamalama atili ai po o ai oe ma lou gafatiaga faalelagi.
Vaega 1
Ua aafia faapefea lo’u olaga i upumoni toefuata’i e faatatau i le fuafuaga o le faaolataga a le Atua?
Vaai faalemafaufau i le avea ma se tagata fou liliu mai i le Ekalesia toefuatai a le Alii i le taimi o Iosefa Samita. Atonu o le a le atoa lou vaai i le fuafuaga a le Tama Faalelagi. Afai na e ola a’e o se tagata Kerisiano, atonu na i ai ni ou talitonuga vavalalata ma vaega ia: (1) O le Atua, Iesu, ma le Agaga Paia o le Atua e tasi, e leai se tino, vaega, po o tuinanau[lagona]; (2) e le’i i ai tagata i luma atu o lenei olaga, ma e leai se mea na faaaogaina e le Atua e foafoaina ai i latou; ma (3) e le iloa e se isi le Atua—o le manatu o tagata o Ana fanau o se tala faatusatusa.
E ala i faaaliga, na oo ai ina malamalama Iosefa Samita ma le Au Paia anamua i le natura o lo tatou Tama Faalelagi ma Lana fuafuaga paia o le faaolataga. Vaai faalemafaufau i lagona na latou mauaina ao latou aoaoina nisi o upumoni toefuataiina o loo tatou faapelepele i ai i aso nei e faatatau i le fuafuaga a le Tama Faalelagi.
O le tele o le malamalama o Iosefa i le fuafuaga o le faaolataga na auala mai i lana galuega i le Tusi a Mamona ma lana faaliliuga musuia o le Feagaiga Tuai ma le Feagaiga Fou. Ao faaliliuina le tusi o Kenese i le 1830, na aoao ai le Perofeta o Iosefa, o Mose sa aveina i se mauga maualuga ma faaalia i ai le lautele o foafoaga a le Atua. O lenei faaaliga ua tatou iloa nei o le mataupu muamua o le tusi a Mose i totonu o le Penina Tau Tele. Na fetalai atu le Alii ia Mose o ia o se atalii o le Atua. Na aoao atu foi e le Atua se upumoni taua o loo maua i le Mose 1 e faatatau i faamoemoega o Lana galuega.
Ao talanoa e uiga i le tino ola pea ma le ola e faavavau, na aoao mai Elder Robert D. Hales o le Korama a Aposetolo e Toasefululua:
Ata
Elder Robert D. Hales
O le meaalofa o le ola e faavavau e matuai aoga lava mo soo se taumafaiga e suesue, aoao, ma faaaoga le fuafuaga o le faaolataga. O le a toetutu tagata uma ma maua faamanuiaga o le tino ola pea. Ae ina ia ausia le ola e faavavau — le ola o loo taitaia e le Atua—e taua le ola ai i le fuafuaga o le faaolataga ma lo tatou loto atoa, mafaufau, agaga, ma le malosi. (Robert D. Hales, “O le Fuafuaga o le Faaolataga: O Se Oa Paia o le Malamalama e Taialaina i Tatou,” Ensign po o le Liahona, Oke. 2015, 25)
Ia maitau na faamatalaina e Elder Hales le ola e faavavau o “le ola o loo taitaia e le Atua.” Mafaufau po o le a le uiga o le fuafuaga[galuega] a le Tama Faalelagi mo oe e toe aumai ai oe i Lona [afioaga]silafaga ina ia e maua ai le fiafia i le tino ola pea ma le ola e faavavau.
I se faaaliga na mauaina i le aso 6 o Me, 1833, na faamauina ai e Iosefa Samita, “Sa i ai foi le tagata i le amataga faatasi ma le Atua” (Mataupu Faavae ma Feagaiga 93:29). O le faaliliuga a Iosefa o le tusi a Aperaamo, lea na lolomiina i le 1842, na maua ai le malamalama tele i le tatou olaga i le muai-olaga ma tatou taunuuga pe a mavae le olaga nei.
O le sou manatu na faapefea ona aafia le Au Paia anamua i le iloa ai e uiga i le tatou muai olaga ma le tatou faamoemoega i le olaga nei? E tosina faapefea ou manatu, faaiuga ma gaoioiga i lea malamalama i le asō ?
Vaega 2
O a aoaoga e uiga i le Atua na toefuatai mai i le Perofeta o Iosefa Samita?
I le 1844, i ni nai masina ao lei maliu, na lauga ai Iosefa Samita i se konafesi na avea ma ana konafesi mulimuli. O lana uo, o King Follett, e lei leva ona maliu i se faalavelave faafuasei, ma na fesiligia e le aiga ia Iosefa e lauga i le maliu. Na aoao atu ma le totoa Iosefa e faatatau i le Atua ma le tatou gafatia e avea ai e faapei o Ia. Na folafola atu Iosefa, i le mea o le a mulimuli faaigoa o le tala ia King Follett:
Ata
o le Perofeta o Iosefa Samita
E matua toaitiiti lava ni tagata i le lalolagi o e malamalama tonu i uiga o le Atua. … Afai e le malamalama tagata i uiga o le Atua, latou te le malamalama ia i latou lava. …
O le Atua lava Ia na avea o ia e pei o i tatou nei, ma o se tagata faaeaina, ma o loo nofotupu o ia i le lagi! … Afai e mafai ona e vaai ia te Ia i le aso, o le a e vaai ia te Ia e foliga i se tagata—e pei o oe lava. …
Pe a tatou malamalama i uiga o le Atua, ma iloa le auala e o atu ai ia te Ia, e amata ona Ia tatala mai le lagi ia i tatou, ma ta’u mai ia i tatou mea uma e faatatau i ai. …
… O le Atua lava ia, i le silafia ai ua i ai o Ia i le lotolotoi o agaga ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava. O lo tatou sootaga ma le Atua ua tuuina ai i tatou i se tulaga e alualu ai i luma i le poto. …
O iinei, la, le ola e faavavau—ia iloa le Atua poto ma le moni; ma ia e iloa ona aoao e avea oe lava ma atua, ma avea ma tupu ma faitaulaga i le Atua [ma masiofo ma faitaulaga fafine] i le Atua, … e ala i le amata mai i se tulaga laitiiti i le isi, ma amata mai i se vaega laitiiti i se vaega tele, mai lea alofa tunoa i lea alofa tunoa, mai lea faaeaina i lea faaeaina. (Aoaoga: Iosefa Samita, 39–40, 210, 221)
Faamatalaga: O le tala atoa ia King Follet, e mafai ona maua i le “Classics in Mormon Thought: The King Follett Sermon,” Ensign, Apr. 1971, 12–17.
Na aoao mai Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
O le faamoemoega o le Atua, ia mafai e i tatou o Lana fanau ona oo i le olioli sili, e mafuta ma Ia e faavavau, ma oo ai ina avea e pei o Ia. (D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Ensign po o le Liahona, Me 2011, 97)
Ata
aikona, tusifaamaumau
Faamaumau i totonu o le Sauniuni mo le Vasega
Tali fesili nei i totonu o lou api o talaaga po o le avanoa ua saunia: O a upumoni na e iloaina i totonu o le tala a Iosefa Samita e faatatau ia King Follett? E mafai faapefea e nei upumoni ona faatosinaina le auala e te vaai ai ia te oe, tagata o loo siomia oe, ma lou sootaga ma le Atua?
Vaega 3
E mafai faapefea ona ou maua le ola e faavavau i le malo selesitila?
Vaai faalemafaufau o oe o se tasi o e na uluai liliu mai i le Ekalesia toefuataiina. E tele le avanoa e te talitonu ai ma le toatele o tagata Kerisiano i lea taimi ma pe a maliu se tagata, e alu o ia i le lagi po o seoli. O le tele o tagata i aso o Iosefa Samita o ni tagata Faapotopotoga po o ni Faalelalolagi. Afai o ia te oe se vaaiga a le “faapotopotoga”, e te talitonu e toaitiiti tagata e sao i le lagi. Afai o ia te oe se vaaiga “faalelalolagi” atonu e te talitonu e manaomia e le Atua se faasalaga mo tagata agasala ae i le iuga e o uma lava tagata i le lagi.
Ia Fepuari 1832, na mauaina ai e Iosefa Samita ma Sini Rikitone se faaaliga lea na fesoasoani ia tatou malamalama atili ai i le olaga i tala atu o le oti. Na galulue nei alii e toalua i le Faaliliuga a Iosefa Samita o le Feagaiga Fou i le fogafale pito i luga o le maota o John Johnson ma na malolo e mafaufau loloto i le Ioane 5:29, lea e faatatau i le toetutu o e amiolelei ma le toetutu o e amioleaga. Na i ai nisi alii i totonu o le potu ma Iosefa ma Sini ao iloa e i laua le faaaliga ma na faamatalaina mea na la vaaia. O lenei faaaliga, o loo famaumauina i le Mataupu Faavae ma Feagaiga 76, e fesoasoani ia tatou malamalama atili i le fuafuaga a le Tama Faalelagi. Mafaufau e maka upumoni mai lenei vaega e faalautele ai le tatou malamalama o le olaga pe a uma lenei olaga ma faaalia ai le finagalo o le Tama Faalelagi e faamanuia Ana fanau uma:
E faapefea ona e vaai faalemafaufau i le malamalama ua faaalia i le vaega 76 ona aafia ai oe pe afai o oe o se tagata liliu mai i le Ekalesia anamua? O le a se mea e mafai ona tatou aoao e uiga i le Tama Faalelagi ma Iesu Keriso mai lenei faaaliga?
