Mësimi 173: Aftësitë e Studimit të Shkrimeve të Shenjta

Të Kuptuarit e Kontekstit të Shkrimeve të Shenjta

Të kuptuarit e kontekstit të shkrimeve të shenjta na ndihmon të dallojmë qëllimin e autorëve të frymëzuar. Kjo mund ta thellojë kuptueshmërinë tonë për fjalët e tyre dhe na ndihmon ta dëgjojmë fjalën e Zotit në jetën tonë. Qëllimi i këtij mësimi është t’i ndihmojë nxënësit të kuptojnë se si konteksti i shkrimeve të shenjta mund ta bëjë studimin e shkrimeve të shenjta më kuptimplotë.

Veprimtari të Mundshme të të Mësuarit

Tabloja e plotë

Fillojeni orën mësimore duke shfaqur figurat vijuese një e nga një dhe duke bërë pyetjet që vijojnë. Përndryshe, nxënësit mund të shkruajnë diçitura për figurat ndërsa ju e paraqitni secilën. Ata më pas mund të diskutojnë se si ndryshoi diçitura pasi e panë tablonë e plotë.

Në vend që të përdorin figurat më poshtë, nxënësit mund të përzgjedhin një fotografi nga katalogu i fotografive në telefonin e tyre, të zmadhojnë vetëm një pjesë të fotografisë dhe të ftojnë një partner që të gjejë atë që po ndodh në fotografi. Ata më pas mund ta zvogëlojnë fotografinë dhe të pyesin se si ndryshoi kuptueshmëria e nxënësit tjetër.

• Çfarë po ndodh në figurë?

• Si ndryshon kuptueshmëria jonë kur e kemi tablonë e plotë?

  Merreni parasysh t’i ftoni nxënësit të japin shembuj nga jeta e tyre kur të parit e një pjesë më të madhe të tablosë solli një ndryshim. Disa shembuj të mundshëm mund të përfshijnë dërgimin e mesazheve me celular ose publikimin e diçkaje përpara se t’i kemi të gjitha hollësitë, gjykimin e dikujt pa e ditur historinë e tyre, ose nxjerrjen e një përfundimi të pasaktë nga një fotografi e prerë.

• Si mund të lidhet kjo me studimin tonë të shkrimeve të shenjta?

Ndërsa nxënësit i përgjigjen kësaj pyetjeje, vlerësojeni kuptueshmërinë e tyre për kontekstin në bazë të lidhjes që ka ai me studimin e shkrimeve të shenjta. Nisur nga vlerësimi juaj për kuptueshmërinë e tyre, merreni parasysh ta përdorni të gjithë ose disa copëza të pjesës vijuese.

Përkufizo: Të kuptuarit e kontekstit

Merreni parasysh ta shkruani fjalën kontekst në tabelë.

Mund të na humbasin hollësi të rëndësishme dhe të kemi një kuptueshmëri të paplotë të asaj që po ndodh pa kontekstin.

• Si do ta përcaktoje fjalën kontekst?

Merreni parasysh t’i shkruani në tabelë përgjigjet e nxënësve. Sipas nevojës, jepni përkufizimin vijues të kontekstit:

Konteksti është sfondi, kushtet dhe mjedisi në të cilat ndodhin ngjarjet, të cilat na ndihmojnë ne ta kuptojmë më mirë atë që po ndodh.

Lexo sa vijon nga Plaku Dejvid A. Bednar në lidhje me një thënie nga Profeti Jozef Smith (1805–1844):

“Unë kam një çelës nëpërmjet të cilit i kuptoj shëmbëlltyrat. Unë pyes: Cila ishte pyetja që e solli këtë përgjigje ose që e bëri Jezusin të shprehte shëmbëlltyrën? (History of the Church, 5:261). Pra, përpjekja për të kuptuar pyetjen që i parapriu një zbulese, shëmbëlltyre ose episodi të veçantë, mund të na ndihmojë të marrim një kuptueshmëri më të thellë për shkrimet e shenjta.” (David A. Bednar, në “Witnesses of the Prophet Joseph Smith”, Ensign, janar 2009, f. 15)

• Si mund të të ndihmojë të mësuarit e kontekstit të shkrimeve të shenjta që të kuptosh mësimet që jepen aty?

Ftojini nxënësit të përsiatin se sa shpesh kërkojnë ta dinë sfondin dhe mjedisin. Merreni parasysh t’u jepni nxënësve një minutë ose dy për të përsiatur se si i ka bekuar, ose mund t’i bekojë, të mësuarit e kontekstit të shkrimeve të shenjta në studimin e tyre të shkrimeve të shenjta. Ju mund t’i ftoni disa nxënës të japin mendimet ose përvojat e tyre vetjake.

Modeli: Doktrina e Besëlidhje 121

Sa vijon është një model i mënyrës se si të kuptuarit e kontekstit mund ta bëjë studimin e shkrimeve të shenjta më kuptimplotë. Nëse do të të pëlqente, mund të zgjedhësh vargje të tjera për t’i përdorur si modelin tënd.

Lexo te Doktrina e Besëlidhje 121:7–8, duke kërkuar atë që Zoti i mësoi Jozef Smithit.

• Çfarë qe kuptimplotë për ty në këto vargje?

  Merreni parasysh t’i vendosni nxënësit në grupe të vogla për të diskutuar përgjigjet për pyetjen vijuese. Ftojini ata të bëjnë një listë burimesh që na ndihmojnë të mësojmë rreth kontekstit.

• Cilat janë disa mjete ose burime që mund të na ndihmojnë të mësojmë rreth kontekstit të këtij shkrimi të shenjtë dhe shkrimeve të tjera të shenjta?

Nxënësit mund të renditin disa nga burimet vijuese: kreret e seksioneve ose kapitujve, vargjet shoqëruese, komentet për shkrimet e shenjta, manualet, bisedat e dhëna nga udhëheqësit e Kishës dhe historitë nga shkrimet e shenjta për fëmijët.

Nëse doni, mund të përmendni se disa nga burimet specifike në dispozicion për librin Doktrina e Besëlidhje dhe historinë e Kishës përfshijnë Shenjtorët, vëllimi 1 dhe Revelations in Context. Nëse nxënësve do t’u pëlqente të dinin më shumë, mund të demonstroni se si nxënësit mund të kenë qasje te këto burime në programin Gospel Library [Biblioteka e Ungjillit]. Sigurojini nxënësit se ndonëse studimi i burimeve të ndryshme mund të jetë i dobishëm, zakoni i thjeshtë i të lexuarit të kreut të seksionit përpara se të studiojnë, mund ta bëjë më kuptimplotë studimin e shkrimeve të shenjta. Ai do të jetë fokusi i këtij mësimi.

Lexoje kreun e seksionit për seksionin 121, duke kërkuar informacion që do të na ndihmonte t’i kuptonim më mirë këto vargje. Nëse do, mund të lexosh edhe te Doktrina e Besëlidhje 121:1–6 për ide shtesë.

Rilexo te Doktrina e Besëlidhje 121:7–8 me një kuptueshmëri për kontekstin në mendje.

• Si ju ndihmon ky kontekst që ta thelloni kuptueshmërinë tuaj për mesazhin që Zoti i dha Jozef Smithit në këto vargje?

• Si i bën kjo kuptueshmëri e re më kuptimplota këto vargje për ju?

Ndërsa nxënësit përgjigjen, kërkoni mënyra për ta theksuar ose për të pyetur se çfarë na mëson ky kontekst rreth Zotit. Për shembull, Zoti i dha me dashuri Profetit Jozef Smith paqe, këndvështrim dhe një premtim për bekime të ardhshme në një kohë të vështirë. Të kuptuarit e këtij konteksti na ndihmon të dimë se Zoti mund të na japë paqe dhe drejtim në jetën tonë gjithashtu.

Ushtroje të kuptuarit e kontekstit të shkrimeve të shenjta

Për t’i ndihmuar nxënësit të ushtrojnë të kuptuarit e kontekstit, merreni parasysh paraqitjen e referencave të shkrimit të shenjtë dhe pyetjeve vijuese në tabelë. Mund t’i vini nxënësit të lexojnë një ose më shumë nga referencat e shkrimit të shenjtë në dyshe dhe të shkruajnë atë që mësojnë prej tyre në mes të një cope letre. Më pas ata mund të lexojnë kreun e seksionit së bashku me vargjet shoqëruese. Përreth asaj që kanë shkruar tashmë, ata mund të vizatojnë ose shkruajnë diçka që e rrok kontekstin (tablonë më të gjerë).

Doktrina e Besëlidhje 3:6–9

Doktrina e Besëlidhje 8:2–3

Doktrina e Besëlidhje 27:1–2

Doktrina e Besëlidhje 28:2, 7

Doktrina e Besëlidhje 46:3–5

Doktrina e Besëlidhje 49:15–17

Doktrina e Besëlidhje 98:1–3

Doktrina e Besëlidhje 109:22–23

Ftojini nxënësit të tregojnë atë që gjetën. Nëse është e dobishme, merreni parasysh të bëni pyetjet vijuese:

• Si jua thellon konteksti i seksionit kuptueshmërinë tuaj për atë që mësoni nga këto vargje?

• Si ju ndihmon konteksti për të mësuar më shumë rreth Shpëtimtarit, dashurisë së Tij, mëshirës së Tij ose fuqisë së Tij në jetën tonë?

Si ta lejojë koha, nxënësit mund ta ushtrojnë këtë aftësi duke përdorur seksionin ose kapitullin e tanishëm në studimin e tyre vetjak ose familjar të shkrimeve të shenjta.

Ftojini nxënësit të përsiatin se si studimi i kontekstit mund të sjellë një ndryshim në studimin e tyre vetjak dhe si mund ta përmirësojnë studimin e tyre të shkrimeve të shenjta duke e vënë në zbatim këtë aftësi.

Teksa nxënësit e ushtrojnë këtë aftësi të studimit të shkrimeve të shenjta në javët e ardhshme, merreni parasysh të gjeni mënyra për t’i vënë ata t’ia tregojnë klasës idetë që mësojnë si pjesë e takimeve shpirtërore të ardhshme si klasë.

Burime Shtesë

Si mund t’i kuptoj më mirë shkrimet e shenjta?

Lexoje këtë thënie nga Presidenti Tomas S. Monson (1927–2018), duke kërkuar atë që na inkurajon ai të bëjmë në studimin tonë të shkrimeve të shenjta:

“Njihuni me mësimet që na japin shkrimet e shenjta. Mësoni për mjedisin dhe rrethanat e shëmbëlltyrave të Mjeshtrit dhe paralajmërimeve të profetëve. Studioni ato sikur po ju flisnin juve, sepse kështu është e vërteta.” (Tomas S. Monson, “Të Jini më i Miri që Mundeni”, Liahona, maj 2009, f. 68)

Si më ndihmon konteksti për të marrë njohuri shpirtërore?

“Për t’i shqyrtuar konceptet doktrinore, pyetjet dhe çështjet shoqërore me një këndvështrim të përjetshëm, ne i marrim ato parasysh në kontekstin e planit të shpëtimit dhe të mësimeve të Shpëtimtarit. …

… Kjo mund të ndihmojë gjithashtu që pyetjet historike të shqyrtohen në kontekstin e duhur historik, duke marrë parasysh kulturën dhe standardet e sjelljes së periudhës kohore në vend që të japim këndvështrime dhe qëndrime bashkëkohore. …

… Ndihmojini ata me të cilët flisni, që t’i shqyrtojnë ose riformulojnë pyetjet e tyre në kontekstin e ungjillit dhe të planit të shpëtimit.” (Dokumenti Bazë i Zotërimit Doktrinor [2023], “Marrja e Njohurisë Shpirtërore”, paragrafët 8–15)

Veprimtari Plotësuese të të Mësuarit

Përdorimi i burimeve shtesë për kontekst

Për t’i ndihmuar nxënësit të shohin se si mund të na ndihmojnë burimet shtesë për ta kuptuar dhe për ta thelluar njohurinë tonë për shkrimet e shenjta, merreni parasysh të bëni sa vijon: Ftojini nxënësit të hulumtojnë disa krerë seksionesh te Doktrina e Besëlidhje, duke kërkuar atë që mendojnë se është kreu më i shkurtër i seksionit. Këta në vijim janë disa shembuj të atyre që mund të përcaktojnë nxënësit: Doktrina e Besëlidhje 4, 5, 26, 38, 65, 79, 80, 93, 114, 130, 131. Nxënësit mund të zgjedhin një seksion dhe të lexojnë disa vargje në seksion.

Për t’i ndihmuar nxënësit të mësojnë më shumë rreth kontekstit të seksionit që përzgjodhën, ata mund të përdorin burime shtesë, të tilla si Revelations in Context [Zbulesa në Kontekst] në programin Gospel Library [Biblioteka e Ungjillit]. Vërini nxënësit të kërkojnë një nga këto seksione në tabelën e përmbajtjes dhe më pas të kthehen te faqja ose faqet për të mësuar më shumë rreth kontekstit. Merreni parasysh t’i ftoni nxënësit të tregojnë gjërat që mësuan rreth seksionit dhe mënyrën se si konteksti i ndihmoi ata të mësojnë më shumë nga vargu ose vargjet që lexuan.

Jashtë kontekstit

Plaku Nil L. Andersen tregoi një histori rreth Presidentit Rasëll M. Nelson për të demonstruar se si njerëzit e marrin informacionin rreth Jozef Smithit dhe e paraqitin atë jashtë kontekstit. Merreni parasysh të shfaqni pjesën vijuese filmike. Ndërsa nxënësit e shikojnë, ftojini ata të vëzhgojnë se si nxjerrja e informacionit jashtë kontekstit mund të nxitë një përshtypje të rreme. Më pas lërini të tregojnë atë që vëzhguan. Vëreni në zbatim atë që tregojnë ata për rëndësinë e të lexuarit të vargjeve të shkrimeve të shenjta në kontekstin e tyre të duhur.

Konteksti ka rëndësi

Merreni parasysh t’u jepni nxënësve disa nga skenarët vijues. Për secilin skenar, shfaqini të dyja pohimet në të njëjtën kohë. Mund edhe të zgjidhni të përfshini një figurë të pohimit të dytë ndërsa e shfaqni atë. Mund t’ia shfaqni pohimet gjithë klasës ose t’i ndani ata mes grupe nxënësish. Diskutoni se si hollësitë që jepen në pohimet e dyta ndihmojnë që të thellohet kuptueshmëria juaj për situatën.

Imagjino një të ri duke u lutur. Tani imagjino që emri i të riut është Daniel dhe ai është në një gropë me luanë.

Imagjino një burrë në det. Tani imagjino se emri i burrit është Moisi dhe ai po shpëton popullin e vet përmes atij deti.

Imagjino një burrë duke u lutur në një kopsht. Tani imagjino se kopshti quhet Gjetseman.

Imagjino një grua që po qëndron para bashkëshortit të vet. Tani imagjino se emri i saj është Ester, bashkëshorti i saj është mbreti dhe ajo nuk mund të qëndrojë para tij pa lejen e tij.

Imagjino një të ri që ka hobe. Tani imagjino se emri i tij është David dhe ai po qëndron para Goliathit.

Imagjino një të ri duke u lutur në një korije pemësh. Tani imagjino se emri i tij është Jozef Smith dhe se Perëndia Ati dhe Shpëtimtari po i shfaqen atij.