Mësimi 170: Aftësitë e Studimit të Shkrimeve të Shenjta

Gjetja e të Vërtetave të Ungjillit në Shkrimet e Shenjta

Të Mësuarit se si t’i Dallojmë Doktrinën dhe Parimet

Në shkrimet e shenjta, Zoti ka ruajtur të vërteta të ungjillit – doktrinën dhe parimet e përjetshme të ungjillit të Tij – që na sjellin më pranë Tij dhe janë thelbësore për përparimin dhe shpëtimin tonë. Ky mësim mund të ndihmojë që të rritet aftësia jote për t’i gjetur të vërtetat e ungjillit në shkrimet e shenjta dhe për të ardhur më pranë Atit Qiellor dhe Shpëtimtarit.

Veprimtari të Mundshme të të Mësuarit

Shëmbëlltyra e margaritarëve

Nëse materiali filmik vijues nuk është në dispozicion, merreni parasysh ta filloni orën mësimore duke paraqitur figurat e mësipërme dhe duke u kërkuar nxënësve të imagjinojnë dikë që kërkon dhe gjen margaritarë në rërën e një plazhi. Pyesni: “Si mund të ngjasojë kërkimi në shkrimet e shenjta si kërkimi për margaritarë në rërë?”

Shiko materialin filmik “The Parable of the Gems” [“Shëmbëlltyra e Margaritarëve”] (6:47; shiko nga kodi kohor 2:13 deri në 4:20) dhe përsiat se si historia mund të jetë si studimi ynë i shkrimeve të shenjta.

Nëse nuk qetë në gjendje ta shfaqnit materialin filmik, kapërcejeni të parën nga pyetjet vijuese. Mund edhe ta ndryshoni pyetjen e fundit në “Çfarë mund të bëjë dikush për t’i këqyrur dhe vlerësuar margaritarët?”

• Çfarë të bëri përshtypje në këtë material filmik?

• Çfarë mund të përfaqësojë rëra? Çfarë mund të përfaqësojnë margaritarët?

• Çfarë bëri vajza për të mësuar rreth margaritarëve që gjeti ose për t’i vlerësuar ata?

Merreni parasysh ta shpjegoni sa vijon me vetë fjalët tuaja:

Doktrina dhe parimet e ungjillit mund të jenë si margaritarët në analogji. Një nga qëllimet kryesore të shkrimeve të shenjta është të na mësojnë doktrinat dhe parimet e ungjillit. Doktrina është një e vërtetë themelore, e pandryshueshme e ungjillit të Jezu Krishtit. Një parim i ungjillit është një orientim i bazuar në doktrinë që individët mund ta përshtatin që t’i ndihmojë për marrjen e vendimeve. Doktrina dhe parimet më të rëndësishme që mësojmë nga shkrimet e shenjta, na ndihmojnë të njohim Atin Qiellor dhe Jezu Krishtin dhe të kuptojmë se si të rikthehemi në praninë e Tyre.

Në këtë manual, ndonjëherë do të shihni ftesa për nxënësit që të përcaktojnë “të vërteta”. Kjo është një mënyrë më e thjeshtë për të thënë parimet ose pohimet e doktrinës. Ftojini nxënësit të vlerësojnë se sa me lehtësi mund t’i përcaktojnë të vërtetat (parimet ose pohimet e doktrinës) nga shkrimet e shenjta.

• Cili nga pohimet vijuese e përfaqëson më së miri faktin se sa i/e sigurt ndihesh në aftësinë tënde për të gjetur të vërtetat e ungjillit në shkrimet e shenjta?

  • Aspak i/e sigurt

  • Disi i/e sigurt

  • Shumë i/e sigurt

Dëgjojini me kujdes përgjigjet e nxënësve. Merreni parasysh t’i pyesni pse ndihen në atë mënyrë. Kërkoni mënyra gjatë gjithë mësimit për t’i ndihmuar ata të ndihen më të sigurt te vetja ndërsa orvaten të gjejnë të vërteta të ungjillit.

Përkufizo

Jepuni nxënësve fletushkën shoqëruese. Lexojeni këtë së bashku si klasë. Jepni ndonjë shpjegim tjetër që mendoni se mund të jetë i nevojshëm për ta përkufizuar këtë aftësi.

Të Mësuarit se si t’i Dallojmë Doktrinën dhe Parimet

Disa doktrina dhe parime të ungjillit pohohen qartë në shkrimet e shenjta. Doktrina dhe parime të tjera mund të nënkuptohen në rrjedhën e ngjarjes dhe të gjenden vetëm me anë të studimit të një libri të tërë të shkrimit të shenjtë, të një kapitulli ose një vargu të vetëm. Mund t’i ushtrosh hapat e rëndësishëm vijues sa herë që po studion shkrimet e shenjta, që të të ndihmojnë t’i përcaktosh të vërtetat e ungjillit:

1. Lexo ngadalë dhe me kujdes.

2. Kërko të vërteta që pohohen qartë. Këto tregohen ndonjëherë kur autori përdor fjalët “kështu ne shohim”, “prandaj”, “si rrjedhim” ose “vër/vini re”.

3. Kërko të vërtetat që nënkuptohen. Mund t’i gjesh këto të vërteta duke i bërë vetes pyetje si vijueset:

   1. A ka ndonjë ide, fjalë ose frazë të rëndësishme – veçanërisht ndonjë që të ndihmon të arrish ta njohësh më mirë Atin Qiellor dhe planin e Tij ose Jezu Krishtin dhe ungjillin e Tij?

   2. Cila është marrëdhënia shkak dhe pasojë në këtë histori?

   3. Cili është morali ose thelbi i historisë?

   4. Përse mendon se autori i ka përfshirë këto ndodhi ose fragmente?

4. Shkruaje me vetë fjalët e tua atë që gjete dhe shenjoji fjalët në shkrimet e shenjta që e japin mësim atë.

5. Përsiat pse e vërteta është e rëndësishme për ty. Plaku Xhefri R. Holland, i Kuorumit të Dymbëdhjetë Apostujve, dha mësim:

   

   “Meditojeni [dhe] shqyrtojeni çdo fjalë, çdo gur të çmuar të shkrimit të shenjtë. … Mbajeni lart drejt dritës dhe kthejeni për të parë se çfarë pasqyrohet ose përthyhet atje. … Një shqyrtim i tillë mund të zbulojë një thesar të fshehur në një fushë: një perlë me vlerë të madhe; një perlë përtej çdo vlere.” (“Students Need Teachers to Guide Them” [fjalim drejtuar mësuesve të fesë të Sistemit Arsimor të Kishës, 20 qershor 1992], f. 4)

Jepni Modelin

Merreni parasysh të jepni modelin se si bëhet kjo si klasë duke ndjekur hapat në fletushkë. Bëjuani të ditur nxënësve se do të kenë mundësi më vonë që ta provojnë në mënyrë të pavarur. Merreni parasysh të vizatoni një margaritar në tabelë. Pranë tij, shkruajini të vërtetat që përcaktojnë nxënësit. Përdorimi i fjalëve që përdorin nxënësit, është një mënyrë e shkëlqyer për të krijuar vetëbesim tek ata për pjesëmarrjen në orën mësimore.

1. Lexo te Doktrina e Besëlidhje 18:10–11 me ngadalë dhe kujdes.

2. Kërko të vërteta që pohohen qartë.

   Nxënësit mund të gjejnë një doktrinë si vlera e shpirtrave është e madhe në sytë e Perëndisë.

3. Kërko të vërteta që nënkuptohen duke bërë disa nga pyetjet e renditura në fletushkë.

Si përgjigje për pyetjen e parë të fletushkës, nxënësit mund të gjejnë këtë të vërtetë: Ne mund të pendohemi dhe të vijmë te Krishti sepse Ai vuajti për mëkatet dhe dhembjet tona dhe përfundimisht vdiq për ne.

Nëse nxënësit e vënë re shkakun dhe pasojën te vargjet 10 dhe 11, ata mund të jenë në gjendje ta shohin këtë të vërtetë: Për shkak se vlera e shpirtrave është aq e madhe në sytë e Perëndisë, Jezu Krishti vuajti me gatishmëri që ne të mund të pendohemi dhe të vijmë tek Ai.

Nëse nxënësit e marrin parasysh pyetjen e fundit, ata mund të shohin këtë të vërtetë: Jezu Krishti, Shëlbuesi ynë, dëshiron që ne të dimë sa të rëndësishëm jemi për Të.

Shkruaje të vërtetën që gjete në një copë letër, në anë të faqes të shkrimeve të tua të shenjta ose si një shënim në programin Gospel Library [Biblioteka e Ungjillit]. Nëse dëshiron, mund edhe t’i shenjosh fjalët që ta mësojnë atë në shkrimet e shenjta.

Shpenzo ca kohë për të përsiatur pse e vërteta që gjete mund të jetë e rëndësishme ose kuptimplotë për ty. Ndalu një çast për të përsiatur për të vërtetën që përcaktove. Tri pyetjet vijuese mund të ndihmojnë:

1. Pse kjo e vërtetë mund të konsiderohet një margaritar?

2. Çfarë të mëson kjo rreth Atit Qiellor dhe Jezu Krishtit?

3. Si mund të të ndihmojë ajo sot?

Ftojini disa nxënës të japin mendimet e tyre. Ndërsa e dëgjojnë atë që mendojnë shokët e tyre të klasës dhe përsiatin, kjo mund t’i inkurajojë ata të mendojnë më thellësisht rreth të vërtetave në shkrimet e shenjta.

Ushtrohu

Ftojini nxënësit të bëjnë veprimtarinë vijuese individualisht. Nxënësit mund ta plotësojnë veprimtarinë vijuese në ditarët e tyre të studimit ose, nëse do të donit mund t’ua tregojnë atë që gjetën nxënësve të tjerë në veprimtarinë e mëposhtme, në copa të veçanta letrash. Ata mund të përdorin fletushkën e dhënë për t’i ndihmuar.

Për t’u ushtruar, bëj veprimtarinë vijuese:

1. Bëj një vizatim të dy margaritarëve.

2. Ndërsa studion të paktën dy nga fragmentet vijuese, ose fragmente të tjera sipas zgjedhjes sate, rendit një “margaritar” të vërtete që gjete për secilin: Doktrina e Besëlidhje 1:30; 8:2–3; 18:15–16; 19:16–19; 21:4–6; 49:15–17; 58:42–43; 76:22–24; 131:1–4; 135:3.

3. Shkruaj pse secila e vërtetë është një margaritar shpirtëror për ty. Përfshi atë që të mëson ajo rreth Atit Qiellor dhe Jezu Krishtit dhe mënyrën se si mund të të ndihmojë ajo sot.

Nëse nxënësit e plotësuan veprimtarinë në copa të veçanta letrash, mund t’i shkëmbejnë letrat e tyre me nxënës të tjerë dhe të tregojnë atë që mësuan nga njëri-tjetri. Nxënësit mund edhe të përmendin margaritarë nga shkrimet e shenjta që ndiejnë se janë veçanërisht kuptimplota për rininë sot dhe të bëjnë një listë të këtyre në tabelë.

Nisur nga përvoja jote sot, pse mund të duash t’i gjesh dhe t’i përsiatësh të vërtetat ndërsa studion?

Shkruaj në ditarin tënd të studimit se si do të të pëlqente t’i gjeje të vërtetat ndërsa e studion ungjillin. Një mënyrë se si mund ta bësh këtë është të përcaktosh dhe të përsiatësh të paktën një të vërtetë në ditë nga studimi yt vetjak i shkrimeve të shenjta. Mund të marrësh parasysh t’i shkruash të vërtetat që zbulon, në shkrimet e tua të shenjta ose në një ditar studimi.

Merreni parasysh ta ftoni një nxënës në ditë gjatë disa mësimeve të ardhshme që të tregojë një margaritar nga shkrimet e shenjta që gjeti nga studimi i vet. Nxënësit mund ta bëjnë këtë duke dhënë një mendim nga shkrimet e shenjta si pjesë e një takimi shpirtëror. Kërkoni mundësi të tjera në mësime të ardhshme që nxënësit të vazhdojnë ta ushtrojnë këtë aftësi të rëndësishme.

Burime Shtesë

Pse duhet të përcaktoj të vërteta të ungjillit nga shkrimet e shenjta?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

“Teksa kërkoni njohuri shpirtërore, kërkoni parime. Veçojini me kujdes nga hollësitë që përdoren për t’i shpjeguar ato. Parimet janë e vërteta e përqendruar, e mbledhur për zbatim në një larmi të gjerë rrethanash. Një parim i vërtetë i bën vendimet të qarta edhe nën rrethanat më të ngatërruara dhe shtrënguese. Ia vlen përpjekja e madhe për ta organizuar të vërtetën që grumbullojmë në formulime të thjeshta parimesh.” (Richard G. Scott, “Acquiring Spiritual Knowledge”, Ensign, nëntor 1993, f. 86)

Plaku Dejvid A. Bednar, i Kuorumit të Dymbëdhjetë Apostujve, dëshmoi për sa vijon:

“Të mësuarit, të kuptuarit dhe të jetuarit e parimeve të ungjillit e forcojnë besimin tonë te Shpëtimtari, e thellojnë përkushtimin tonë ndaj Tij dhe ftojnë një shumicë bekimesh dhe dhuratash shpirtërore në jetën tonë. …

Parimet e sakta na mundësojnë të gjejmë udhën tonë dhe të qëndrojmë të vendosur, të palëkundur dhe të patundur, me qëllim që të mos e humbasim baraspeshimin dhe të biem në stuhitë e furishme të errësirës e pështjellimit në ditët e mëvonshme.” (Dejvid A. Bednar, “Parimet e Ungjillit Tim”, Liahona, maj 2021, f. 123, 126)

Presidenti Marion G. Romni shpjegoi:

“Një njeri nuk mund t’i studiojë ndershmërisht shkrimet e shenjta pa mësuar parimet e ungjillit sepse shkrimet e shenjta janë shkruar për të ruajtur parimet për dobinë tonë”. (“The Message of the Old Testament” [simpozium i Sistemit Arsimor të Kishës, 17 gusht 1979], f. 3)

Çfarë vlere ka të shpenzojmë kohë për t’i shkruar të vërtetat që gjejmë?

Plaku B. H. Roberts dha mësim:

“Që të njihet, e vërteta duhet të shpallet dhe sa më e qartë dhe e plotë të jetë kjo shpallje, aq mundësi më të mëdha do të ketë Shpirti i Shenjtë për t’iu dëshmuar shpirtrave të njerëzve se kjo punë është e vërtetë [New Witnesses for God, 3 vëll. (1909), 2:vii]”. (B. H. Roberts, në James E. Faust, “What I Want My Son to Know before He Leaves on His Mission”, Ensign, maj 1996, f. 41; Predikoni Ungjillin Tim: Një Udhëzues për Shërbimin Misionar [2004], f. 188)

Veprimtari Plotësuese të të Mësuarit

Parime të pohuara qartë

Nëse nxënësit do të kishin dobi nga të parit e shembujve të të vërtetave që vijnë pas fjalëve dhe frazave si “kështu ne shohim”, “prandaj”, “si rrjedhim” ose “vër/vini re”, mund t’i vini ata t’i shohin shkrimet e shenjta vijuese dhe të përpiqen të përcaktojnë parimin:

• Helamani 3:27: “Kështu, ne mund të shohim se Zoti është i mëshirshëm ndaj të gjithë atyre që do të thërrasin në sinqeritetin e zemrave të tyre, emrin e tij të shenjtë”.

• Alma 12:10: “Prandaj, ai që do të ngurtësojë zemrën e tij, po, ai do të marrë pjesën më të vogël të fjalës; dhe ai që nuk do ta ngurtësojë zemrën, atij i jepet pjesa më e madhe e fjalës”.

• Efesianëve 6:13: “Prandaj merreni të gjithë armatimin e Perëndisë, që të mund të rezistoni në ditën e mbrapshtë dhe të mbeteni më këmbë pasi t’i keni kryer çdo gjë”.

• Alma 41:10: “Vër re, unë të them se ligësia kurrë nuk ka qenë lumturi”.

Orientime për vlerësimin e të vërtetave

Kur mësohet se si të përcaktohen të vërtetat nga shkrimet e shenjta, është e lehtë të përcaktohen pohime ose të shkruhen parime që nuk janë të vërteta dhe që nuk janë ato që kishte për qëllim autori origjinal. Mund t’ia vlejë t’u jepni nxënësve pyetjet e renditura më poshtë për t’i ndihmuar të vlerësojnë saktësinë e parimeve që gjejnë. Pasi ta përcaktoni një parim si klasë, mund të jepni modelin se si të përdoren këto pyetje përpara se nxënësit ta provojnë në mënyrë të pavarur.

• A është ajo që përcaktove e pohuar nga shkrime të tjera të shenjta dhe mësimet e tanishme të udhëheqësve të Kishës?

• A është ajo që përcaktove në harmoni me qëllimin e frymëzuar të shkruesit origjinal me aq sa mund të kuptosh? (Mund t’i shqyrtosh vargjet përpara dhe pas së vërtetës që përcaktove dhe të përsiatësh a përputhet me atë që mendon se kishte për qëllim shkruesi origjinal.)

• A është ajo që përcaktove e vërtetë në të gjitha kohët, në të gjitha rrethanat dhe në të gjitha kulturat?

• A të ndihmon kuptueshmëria për atë që përcaktove të përmbushësh fatin tënd të përjetshëm në planin e Atit Qiellor?

• A e ndien Frymën e Shenjtë të të vërtetojë se ajo që përcaktove është e vërtetë?

Mjete të tjera për t’i ndihmuar nxënësit të përcaktojnë të vërteta

Merrini parasysh t’i përcaktoni mjetet shtesë vijuese për t’i ndihmuar nxënësit të përcaktojnë parime.

Informacion për rrethanat: Shumica e zbulesave te Doktrina e Besëlidhje u zbuluan ngaqë dikush bëri një pyetje ose ngaqë shenjtorët u përballën me një problem ose vështirësi. Njohuria për këtë informacion mund të të ndihmojë të kuptosh pse Zoti i zbuloi gjërat ashtu siç bëri. Për shembull, ftojini nxënësit të lexojnë kreun e një seksioni te Doktrina e Besëlidhje dhe të gjejnë përgjigje për këto pyetje:

• Për kë ishte kjo zbulesë?

• Cila ishte pyetja ose situata që i parapriu kësaj zbulese?

Pohime përmbledhëse: Mund të jetë e dobishme edhe të dish që poshtë kreut të seksionit në çdo seksion te Doktrina e Besëlidhje, ka një paragraf që përmbledh grupe vargjesh. Kjo mund të jetë gjithashtu e dobishme kur bën çmos të përcaktosh parime. Për shembull, lexoje paragrafin nën kreun e seksionit për seksionin që zgjodhe.

Me këtë informacion në mendje, lexoje seksionin ose një pjesë të seksionit që zgjodhe, duke kërkuar të vërteta të ungjillit.

Gjetja e të vërtetave në shkrimet e shenjta