Suporta alang sa mga Kapikas sa mga Tiggamitan og Pornograpiya

“Suporta alang sa mga Kapikas sa mga Tiggamitan og Pornograpiya,” Mga Kapanguhaan sa Pagpanambag (2020).

“Suporta alang sa mga Kapikas sa mga Tiggamitan og Pornograpiya,” Mga Kapanguhaan sa Pagpanambag.

Suporta alang sa mga Kapikas sa mga Tiggamitan og Pornograpiya

Ang paggamit og pornograpiya sa kasagaran dako gayud kaayo og epekto sa kapikas sa tiggamitan. Ang kapikas tingali mobati og kapungot, kawalay mahimo, ug giluiban sa tiggamitan. Dugang pa, ang mga pagbati sa kataranta, kalisang, labihang kasakit, kasubo, ug kaguol, ingon man kasuko o depresyon, komon. Ang mga kapikas sa kasagaran mobati og labihang kaulaw ug pagaduhaduhaan ang ilang kaugalingon nga bili. Ang ubang mga kapikas gani makasinati og pisikal nga mga sintomas, sama sa sakit, dili masabut nga mga pagsakit sa kasingkasing o dughan, mga paglabad sa ulo, o dili makatulog.

Tingali mobati usab sila nga giluiban sa Dios ug maghunahuna nganong makatugot Siya nga kini mahitabo. Dili tanang kapikas ang adunay reaksyon ug mosanong sa samang paagi. Ang ubang mga problema sa kaminyoon o ang pagkakanunay ug kadugayon sa paggamit og pornograpiya makaimpluwensya sa ilang mga reaksyon ug sa kalig-on sa ilang pagsagubang niini.

Ang mga kapikas tingali magpanagana sa pagsulti kang bisan kinsa mahitungod sa ilang emosyonal ug espiritwal nga mga panglimbasug ug usahay mopili nga itago ang pag-antos imbis mangita og tabang o suporta. Samtang mangita sila og tabang, ang mga kapikas sa kasagaran magkinahanglan og usa ka tawo nga maminaw sa mabinationg paagi ug mohatag og suporta ug kalooy. Ang mga kapikas sa kasagaran sayop sa pagtuo nga ang problema basin og ilaha ra nga sayop, mao nga tingali magkinahanglan sila og tabang sa pagsabot nga sila dili maoy responsable sa batasan sa tiggamitan.

Magtinguha sa Pagsabot

Ang pagtabang sa kapikas sa indibidwal kinsa tiggamitan og pornograpiya nga mobati nga gipaminaw ug gisabut tingali sama ra ka importante sa bisan unsa nga tambag nga imong mahatag. Ang pagpaminaw dala ang empatiya magdala og impluwensyal nga mensahe ngadto sa kapikas nga siya gihigugma, gipakabili, ug gipangga. Tinguhaa ang pagpakita og gugma ug empatiya sama sa buhaton sa Manluluwas. Sa mainampuong paagi ikonsiderar ang pagpangutana og sama niini aron matabangan ka nga mas makasabut sa sitwasyon sa kapikas ug malantaw ang iyang mga panginahanglan. Magmahimong andam nga mogahin og panahon sa pagpaminaw sa gipahungaw sa kapikas nga mga kahadlok, mga pagduha-duha, ug mga kabalaka.

Ang kapikas tingali mobati nga mas komportable sa paghisgot mahitungod sa sitwasyon kon siya adunay higala, ginikanan, o kasaligan nga lider sa Simbahan nga ikauban. Siguroa nga ang kapikas nahibalo nga siya pwedeng magbaton og tawo nga mosuporta. Ikonsiderar ang pagpangutana og sama sa mosunod pinaagi sa mabination ug mapinanggaong paagi:

Unsa ang kasamtangang sitwasyon ug unsa man ang imong nasinati?
Unsa ang makapasagmuyo kaayo nga aspeto nga bahin sa paggamit og pornograpiya sa imong kapikas?
Unsa ang imong gikabalak-an pag-ayo mahitungod sa inyong kaminyoon karon?
Sa unsang paagi ang pornograpiya nakaapekto kanimo ug sa imong pamilya (mga kasamok sa pamilya, mga problema sa panglawas, ug uban pa)?
Unsa ang mga tinubdan sa suporta nga sa kasamtangan imong gidangpan?
Unsa ka bukas ug kamatinuoron ang imong kapikas kalabut niini nga hagit sa pornograpiya?
Unsa ikaw ka bukas o ikaw ba andam na nga hisgutan kini nga problema uban sa imong kapikas?
Unsa pa ang kinahanglan nakong mahibaloan mahitungod sa sitwasyon?
Giunsa sa Ginoo pagtabang kanimo nga makalahutay niini nga pagsulay?

Kon makabantay ka nga adunay bisan unsa nga pang-abuso, pagpangdapat, o pagpanan-aw, pagpamalit, o pagpang-apud-apod og child pornography, kontaka ang sibil nga mga awtoridad. Ang mga bishop adunay dugang nga help line [numero nga tawagan alang sa tabang] nga ilang matawagan alang niini nga mga sitwasyon.

Tabangi ang Indibidwal

Samtang tabangan nimo ang kapikas, ikonsiderar ang paggamit sa pipila sa mosunod nga mga sugyot.

Ipasabut og maayo ang abilidad sa Manluluwas sa paghatag og personal nga pagkaayo alang sa kapikas sa mga tiggamitan sa pornograpiya (tan-awa sa Alma 7:11 ug sa Mateo 11:28–30).

Dapita ang kapikas sa pagtuon kon giunsa ni Kristo sa pagpangalagad niadtong nakasinati og mga kalisod ug kon sa unsang paagi Siya makatabang kaniya nga maayo.
Tabangi ang kapikas sa pagsabot ug pagbaton og hugot nga pagtuo diha sa mga ordinansa sa pagkapari, ilabi na sa mga ordinansa sa templo.
Awhaga ang kapikas sa pagpangayo og panalangin sa pagkapari.

Hatagi og suporta aron matabangan siya sa pagkontrolar sa masakit nga mga pagbati.

Ipahayag ang imong gugma ug kahingawa alang kaniya sa tinagsa-tagsa nga paagi, ingon man usab alang sa iyang kapikas ug mga anak.
Tabangi ang kapikas nga makasabot nga ang mga desisyon sa tiggamitan og pornograpiya dili makapausab kon unsay tan-aw sa Dios sa tinagsa-tagsa nga paagi diha sa kapikas.
Klaroha nga dili siya ang responsable tungod sa paggamit og pornograpiya o sa dili maayong kinaiya sa iyang kapikas ug wala paabota ang pag-antus sa mapang-abuso nga kinaiya. Kon ikaw adunay mahibaloan nga bisan unsang pag-abuso, kontaka diha dayon ang sibil nga mga awtoridad.
Pahinumdomi ang kapikas sa iyang bili ug kabililhon.
Awhaga ang kapikas sa pagpakigkita sa bishop, kon wala pa niya kini mabuhat.

Dapita ang kapikas sa pagribyu sa mga kapanguhaan alang sa mga kapikas ug pamilya diha sa “AddressingPornography” sa ChurchofJesusChrist.org.

Tabangi ang kapikas sa pagsabot nga siya makadawat og iyang kaugalingong inspirasyon aron masayud unsaon sa pagtakda og klarong mga utlanan diha sa relasyon ug sa panimalay.

Dapita siya sa pagtuon sa “Baruganan 8: Pagmalig-on ug Pagmakanunayon” diha sa Suporta nga Giya: Tabang alang sa mga Kapikas ug Pamilya sa mga Nagpaayo (nga makita diha sa “Programa aron Maulian gikan sa Pagkaadik” nga seksyon sa addictionrecovery.lds.org) aron matabangan siya nga makasabot kon unsaon pagtakda og mga utlanan nga makatabang sa pagbalik sa kahapsay sa kinabuhi ug sa iyang panimalay.
Tabangi ang kapikas nga makasabot nga siya adunay katungod sa pagbaton og hingpit nga kamatinuoron, walay pornograpiya diha sa panimalay, ug sa daghan pang lain nga mga kinaiya nga makapatunhay og kalinaw ug panaghiusa.
Tabangi siya nga makasabot nga siya mahimo nga makadesisyon ug makahisgot ngadto sa iyang kapikas kon unsay gusto niyang masayran mahitungod sa iyang paggamit og pornograpiya (sama sa kahimtang, kadugayon, ug kagrabe sa problema). Ang hingpit nga pagtug-an posibling makatampo sa iyang proseso sa pagkaayo.

Tabangi ang kapikas nga makakita og usa ka kasaligan nga higala o sakop sa pamilya kinsa makahatag og makahuluganong suporta sa mapadayonong paagi samtang magtinguha siya sa pagpangita og kalinaw ug kalig-on sa iyang kinabuhi.

Kon angay, awhaga ang kapikas nga makig-istorya ngadto sa uban kinsa dili mosulti og negatibo bahin sa tiggamitan og pornograpiya o moawhag sa kapikas sa paghimo og diha-diha nga mga paghukom o dinalian nga mga desisyon.
Kon anaa, ang mga miting sa pagsuporta sa kapikas ug sa pamilya kasagaran maoy maayo nga dapit aron mobati nga gisuportahan, gipaminaw, ug gihatagan og bili ug aron makakita og kalig-on diha kang Kristo pinaagi sa gahum sa Iyang Pag-ula.

Tabangi siya nga makasabot nga ang pagpasaylo sa iyang kapikas usa ka proseso ug nga siya makadawat sa iyang kaugalingong inspirasyon nga masayud kon sa unsang paagi ug kanus-a sugdan kini nga proseso.

Awhaga ang kapikas nga mahimong sensitibo sa iyang kaugalingong proseso sa emosyonal ug espiritwal nga pagkaayo, nga tingali molungtad og dugayng panahon ug lahi gikan niana nga pagkaayo sa tiggamitan. Ayaw pagdali-dali o diktahi ang proseso. Tugoti siya sa pagpaningkamot pinaagi sa iyang kaugalingong mga pagbati ug mga hagit kalabot sa sitwasyon sa dili pa motambag og kapasayloan.
Pahinumdomi ang kapikas nga ang paghatag og pasaylo wala kanunay magpasabut nga mohatag og pagsalig. Ang pagsalig tingali moabut sa dili madugay, o gani dili gayud, depende sa iyang mga pagpili ug mga kinaiya. Ang pagsalig mahibalik kon ang tiggamitan sa pornograpiya maningkamot sa iyang kaugalingong pagkaayo ug ang kapikas makakita sa kakugi ug pasalig sa tiggamitan nga mag-usab.

Ang mga lider sa Simbahan kinahanglang magmainampingon sa dili paghukom nga ang milabay nga suod nga relasyon sa magtiayon adunay lehitimong koneksyon sa pagkalambigit sa asawa o sa bana sa pornograpiya. Hinoon, ang paggamit og pornograpiya makadaot sa suod nga mga relasyon. Ang mga lider sa Simbahan dili gayud mohatag og tambag bahin sa pribadong mga butang ug, kon ang tabang gikinahanglan, konsultaha ang Family Services o ubang eksperto sa sosyal ug emosyonal nga suporta ug paadtoa ang magtiayon sa usa ka tukma nga propesyonal.

Suportahi ang Pamilya

Tinoa ang epekto diha sa kaminyoon ug pamilya ug sulbara ang bisan unsa nga mga problema.

Kon ang managtiayon magkinahanglan og dugang nga tabang, awhaga sila sa pagkuha og tabang nga ilang gikinahanglan sa tinagsa-tagsa nga paagi inubanan sa tabang isip managtiayon.

Kon adunay mga anak diha sa pamilya nga nahibalo sa problema, tabangi ang ilang mga ginikanan nga makasabot sa ilang responsibilidad sa pagpangalagad ngadto kanila ug tabangi ang mga bata kon gikinahanglan.

Paningkamoti nga matabangan ang tiggamitan og pornograpiya sa iyang proseso sa espiritwal nga pagkaayo. Ang mga kapanguhaan sa pagkaadik ug paggamit og pornograpiya, ang “Addressing Pornography [Pagsulbad sa Pornograpiya]” nga seksyon sa ChurchofJesusChrist.org, ug ang Programa aron Maulian gikan sa Pagkaadik nga website tingali makatabang samtang ikaw magtabang sa tawo nga nakigbisog sa pornograpiya aron makasabot sa iyang responsibilidad sa pag-usab sa kinaiya.

Tabangi ang indibidwal nga tiggamitan og pornograpiya sa pagpanubag sa iyang mga buhat ug suportahi ang iyang kapikas. Tan-awa ang kapanguhaan alang sa paggamit og pornograpiya alang sa dugang nga impormasyon

Gamita ang mga Kapanguhaan sa Ward ug Stake

Human makakuha og pagtugot gikan sa kapikas ug sa indibidwal nga tiggamitan og pornograpiya nga hisgotan ang sitwasyon ngadto sa uban, ikonsiderar ang paghangyo sa mga lider sa ward o ang ubang tawo nga kasaligan nga ipadayon ang pagsuporta, paggiya, ug pagtabang.

Pangita og tawo nga kasaligan kinsa makasuporta sa kapikas sa tiggamitan og pornograpiya. Sa kasagaran, kining tawo nga makasuporta malampuson usab nga nakaagi og susamang hagit, apan bisan kinsa nga tawo nga hingkod sa espiritwal nga paagi nga may kalooy mahimong makahatag sa mapinanggaon nga suporta.

Dapita ang kapikas sa pagtambong og lokal nga grupo sa pagsuporta alang sa mga kapikas ug mga sakop sa pamilya.

Bisitaha ang Programa aron Maulian gikan sa Pagkaadik nga website (”Addiction Recovery [Pagkaulian gikan sa Pagkaadik]” nga seksyon diha sa ChurchofJesusChrist.org) aron makakita og mga miting sa lokal nga grupo sa pagsuporta alang sa kapikas, nga ipahigayon pinaagi sa personal o pinaagi sa miting gamit ang telepono.
Kon walay makita nga mga miting, ikonsiderar ang pagkontak sa bishop aron makahangyo nga makasugod og usa niini o makagamit sa suporta nga mga grupo sa komunidad.

Ikonsiderar ang pagpaadto sa kapikas sa tiggamitan og pornograpiya ngadto sa propesyonal nga tabang o pagpatambag. Pangita og lokal nga mga kapanguhaan nga naghatag og mga serbisyo nga uyon sa mga baruganan sa ebanghelyo.