Unsaon nako sa pagsuporta og kausaban?

Ang mga bishop adunay sagradong responsibilidad sa pagkahimong mga maghuhukom sa Israel, sa pagtabang sa mga miyembro sa pagpalig-on sa ilang mga relasyon sa Dios, ug sa paglihok isip espirituhanong mga magtutudlo. Ang mga indibidwal maoy responsable alang sa pagpalig-on sa ilang relasyon uban sa Dios pinaagi sa paghinulsol ug sa kapasayloan. Ang mga indibidwal, dili ang mga lider sa Simbahan maoy responsable sa pagkaplag kon unsa ang gikinahanglan sa pag-usab sa ilang dili maayo nga kinaiya. (Tan-awa sa “Identifying and Understanding Influences [Pag-ila ug Pagsabot sa mga Implewensya]” nga anaa sa “Addressing Pornography [Pagsulbad sa Pornograpiya]” nga seksyon sa ChurchofJesusChrist.org.) Kini tingali manginahanglan og personal nga pagpadayag nga madawat pinaagi sa pagtuon ug pag-ampo. Ang mga miyembro mao usab ang responsable sa pagsabot ug pagsulbad sa sakit nga namugna tungod sa ilang paggamit og pornograpiya diha sa ilang kaugalingon ug sa uban.

Samtang magtabang ka sa mga miyembro alang sa kapasayloan, ipunting ang pagtudlo ug sa pagpasabot og maayo sa:

Doktrina
Kabubut-on ug Pagkamay-tulubagon
Padayon nga Pag-ugmad og Hugot nga Pagtuo
Pagkaporsigido

Doktrina

Ang doktrina sa Pag-ula ni Jesukristo mahinungdanon alang sa pagkasabot kon unsaon sa paghinulsol ug mapasaylo. Ang pagtabang sa mga miyembro sa pagsabot ni Jesukristo ug sa Iyang tahas diha sa ilang mga kinabuhi importante sa kausaban. Ikaw giyahan kon sa unsang paagi kini ug ang ubang mga kamatuoran matudlo sa labing maayo. Kining susama nga mga konsepto mahinungdanon usab diha sa pagpangalagad ngadto sa mga kapikas ug sa ubang mga nasakitan tungod sa binuhatan. Ikonsiderar ang pagribyu sa mosunod nga mga pahina diha sa mga Hilisgotan sa Ebanghelyo:

Pag-ula ni Jesukristo
Pagpasaylo
Paghinulsol

Kabubut-on ug Pagkamay-tulubagon

Awhaga ang maong indibidwal sa pagkahimong may tulubagon sa iyang mga pagpili. Ang maong indibidwal nagkinahanglan nga makasabot kon kanus-a gikinahanglan ang pagkumpisal. Ang pagkumpisal ngadto sa iyang kapikas, sa mga ginikanan (kon menor de edad nga nagpuyo sa panimalay), o sa bishop sa kasagaran motabang alang sa pagpadayon. Tingali mokabat og pipila ka pagsulay ang pagpaambit sa dili pa ang indibidwal maandam sa hingpit sa pagtug-an ug sa pagka matinuoron bahin sa milabay nga mga binuhatan. Ugmara ang pailob atol niini nga proseso, nga magpakita og kasensitibo, gugma ug kamainiton sa pagdasig ug pag-awhag sa maong mga indibidwal aron mahingpit ang kamatinuoron. Ayaw pakaulawi o pugsa ang usa ka tawo sa pagtug-an kon dili pa siya andam.

Ang mga bishop ug ang mga presidente sa branch kinahanglang moribyu sa Kinatibuk-ang Tamdanan nga Basahon, 32.8.2, alang sa dugang nga tabang. Tabangi ang maong indibidwal sa pagsabot nga siya anak sa Dios ug nga ang paggamit og pornograpiya usa ka kinaiya nga wala mahiuyon niana nga balaang pagkatawo.

Ugmara ang Hugot nga Pagtuo

Ang regular nga pag-ampo ug pagtuon sa kasulatan mga mahinungdanon sa pagpalambo og pagtuo diha sa Langitnong Amahan ug ni Jesukristo. Ang pag-ugmad og pagtuo diha ni Jesukristo gikinahanglan aron masinati ang dako nga kausaban sa kasingkasing. Ang mga pag-ampo nga gihalad inubanan sa tinuod nga katuyoan modala sa mga indibidwal ngadto sa pagtinguha og kapasayloan gikan sa Dios ug gikan niadtong ilang napasakitan. Ang maong mga indibidwal makadawat usab og dakong kalig-on pinaagi sa pagtuon sa mga instruksyon gikan sa kinatibuk-ang komperensya ug mga artikulo nga anaa sa mga magasin sa Simbahan nga naghisgot niini nga mga hilisgotan.

Ang maong indibidwal kinahanglan gayod nga motuo nga siya pwedeng mausab. Pagpositibo ug ribyuha ang mga baruganan sa hugot nga pagtuo diha sa Langitnong Amahan ug ni Jesukristo. Awhaga sa pagsimba sa Igpapahulay, pagserbisyo sa uban, ug ubang mga buhat nga haum sa kinaiya ni Kristo.

Pagkaporsigido

Ang maong indibidwal kinahanglan nga magtinguha og personal nga pagpadayag sa pagpalambo og mga plano alang sa pagsulbad sa paggamit og pornograpiya. Ang matag indibidwal kinahanglang mokonsiderar sa iyang lahi nga mga panginahanglan sa pagtino og mga solusyon ug kon unsa nga buluhaton ang himoon. Samtang ang paghunong sa paggamit og pornograpiya usa ka importante nga tumong, awhaga ang maong indibidwal nga ipunting ang pagtinguha diha sa sama kang Kristo nga mga hiyas ug sa pagkahimong usa ka nakabig nga mga disipulo ni Jesukristo. Ang mosunod nga mga pahina bahin sa Paghisgot sa Pornograpiya nga website tingali makatabang sa mga miyembro niini nga proseso:

Ipadayon ang pagpahinumdom sa mga miyembro nga ang pag-usab usa ka proseso nga nagkinahanglan og panahon. Ikaw tingali usab nagkinahanglan nga mopasabot nga ang pagdawat og personal nga responsiblidad, pagbutang og makanunayong paningkamot, ug pagkahibalo sa kasakit nga mamugna tungod sa paggamit og pornograpiya ang tanan mga bahin sa pagtukod og balik sa pagsalig uban sa iyang kapikas, mga ginikanan, o ubang mga sakop sa pamilya. Ang mga pagkapakyas komon nga mga kasinatian. Awhaga ang maong indibidwal sa pagmatinuoron sa pag-report niini nga mga pagkapakyas ngadto sa ilang kapikas o mga ginikanan, aron makakat-on gikan kanila, ug makabalik dayon ngadto sa maayong mga buhat.