Mga Kapanguhaan sa Pagpanambag

Unsay kinahanglan nakong masabtan mahitungod sa kagrabihon sa paggamit og pornograpiya?

Ang paggamit og pornograpiya adunay daghang elemento, ug ang proseso sa paghinulsol managlahi alang sa matag miyembro. Paminawa ang mga miyembro diin sila, nagpahayag, lakip sa ilang kinaiya (kon sila ba nasakpan o sila ba ang nagtinguha og kausaban?) sa gilapdon sa epekto sa paggamit, ug unsay ilang gitinguha sa pagpadayon.

Sugdi pinaagi sa pagpahayag og gugma ug pasalamat ngadto sa mga indibidwal tungod sa pagbaton og kaisog nga mosulti sa problema aron makapangita og tabang. Paningkamoti ang pagtabang kanila sa pagsabot nga anaay paglaom. Makahimo sila sa pagsulbad niini nga sitwasyon ug makapadayon isip mga disipulo ni Jesukristo. Pasaligi sila sa ilang balaanong pagkatawo isip mga anak sa Dios. Ang usa ka napalig-on nga pagbati kon si kinsa gayod sila makahimo kanila nga malikay sa kaulaw ug magamit kini nga sitwasyon alang sa ilang kaugalingon nga personal nga kalamboan ug kausaban.

Ang mga bishop adunay sagradong tahas sa pagtabang sa mga miyembro sa ilang proseso sa paghinulsol. Isip maghuhukom sa Israel, molihok sila ubos sa inspirasyon sa pagtabang sa mga miyembro sa pagsabot nga responsibilidad nila ug pribilehiyo ang pagtinguha og personal nga pagpadayag ug pagdawat sa mga tubag nga gikinahanglan alang sa pagbuntog sa ilang mga hagit.

Ang mga lider kinahanglang magpunting sa paglig-on sa pagkadisipulo ug pagtuo sa mga miyembro pinaagi sa pagtudlo “Isip usa ka lider sa Simbahan ni Jesukristo, ikaw mosuporta sa mga indibidwal ug mga pamilya sa pagtuman sa buhat sa Dios sa kaluwasan ug kahimayaan.” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw [2020], 2.0). (Tan-awa sa “What doctrines help individuals overcome pornography problems?”)

Pagsusi sa Pagkalambigit

Bisan og ang paghinulsol bahin sa paggamit og pornograpiya sa kaugalingon niini, wala magkinahanglan og pormal nga pagdisiplina sa Simbahan, hinumdomi nga “gipanghimaraut sa Simbahan ang bisan unsa nga matang sa pornograpiya. Ang paggamit og pornograpiya sa bisan unsa nga matang makadaot sa tagsa-tagsang kinabuhi, mga pamilya, ug katilingban. Mopalayo usab kini sa Espiritu sa Ginoo” (Kinatibuk-ang Tamdanan nga Basahon, 38.6.13). Ang imong katuyoan mao ang pagtabang sa mga indibidwal aron sa kataposan makasinati og “dako nga kausaban sa kasingkasing” (tan-awa sa Alma 5:12–14) ug mohangop sa hingpit kang Jesukristo diha sa ilang kinabuhi, ilabi na sa gahom sa Iyang Pag-ula. Ang ilang pagkadisipulo molambo samtang sila makaila sa Iyang gahom diha sa ilang kinabuhi pinaagi sa usa ka proseso sa pag-usab nga nagkinahanglan sa Iyang giya ug matugoton nga kalig-on.

Samtang mag-awhag ka sa mga indibidwal sa pagsabot sa ilang paggamit og pornograpiya isip butang nga labaw kay sa usa lamang ka timailhan sa moral nga kahuyang, sila makatino kon unsa, kon anaa man, sa dugang nga mga kapanguhaan nga ilang gikinahanglan. Sama pananglit, ang paggamit og pornograpiya sa kasagaran adunay daghang makatampo nga mga elemento (sama sa biyolohikal, sikolohikal, sosyal, ug espiritwal). Ang mga gikinahanglan nga kapanguhaan mag-agad sa kagrabihon sa kinaiya sa mao nga indibidwal ug kon giunsa niya sa pag-atubang kini nga problema.

Ikonsiderar ang mosunod nga mga ideya samtang magtinguha ka sa pagtabang sa mga miyembro ug sa ilang mga kapikas sa pagsabot sa ilang pagkalambigit sa pornograpiya ug sa epekto niini diha sa ilang kinabuhi.

Personal nga Responsibilidad

Paningkamoti ang pagtabang sa mga miyembro sa pag-ako sa personal nga responsibilidad sa mga desisyon, mga pagpili, ug mga kausaban nga nagpaabot sa unahan. Ayaw gayod hikalimti nga ang mga desisyon kabahin sa umaabot mga responsibilidad sa nagsagubang nga tawo ug sa iyang kapikas. Ang imong tahas mao ang pagtabang ug pagsuporta kanila samtang magtinguha sila og pagpadayag.

Ang Bulok sa Pornograpiya

Samtang mangutana ka og dinasig nga mga pangutana, makatabang ka niadtong mga nalambigit (mga indibidwal; mga ginikanan, sa sitwasyon sa batan-on; ug sa mga kapikas) sa pagkahibalo kon kadtong mga naggamit og pornograpiya panagsa ra bang mogamit, grabe nga tiggamit, o dili makontrolar nga mga tiggamit. Ang pagkasabot niini tingali makatabang nimo sa pagtabang kanila atol sa proseso sa paghinulsol ingon man usab sa pagkahibalo unsaon sa pagpangalagad ngadto sa kapikas o sa mga ginikanan. Usab pangutan-a kon unsa nga matang sa pornograpiya ang gigamit—ang pornograpiya magkalahilahi sa iyang kagrabihon ug ikadugtong usab ngadto sa ubang mga kinaiya.

Pagmatngon sa pagngalan sa maong mga indibidwal og mga adik; kadaghanan sa mga indibidwal nga mogamit og mga materyal sa pornograpiya dili angay nga ikonsiderar nga naadik, ilabi na niadtong mga hamtong. Ang pagtawag sa kaugalingon isip adik sa pornograpiya makahuyang kanila sa ilang paningkamot nga mag-usab. Alang sa dugang nga impormasyon bahin niini, tan-awa sa Dallin H. Oaks, “Nagpaayo gikan sa Pagkalit-ag sa Pornograpiya,” Liahona, Okt. 2015, 50–55.

Ang Paggamit og Pornograpiya Sa Kasagaran Mas Labaw pa Kay sa Moral Lamang nga Kahuyang

Ang pagkalambigit sa usa ka indibidwal diha sa pornograpiya komplikado sa kasagaran, ug importante ang pag-angkon nga ang pagtan-aw og pornograpiya sa kasagaran labaw pa kay sa usa ka sekswal nga gana. Sa daghang sitwasyon, ang paggamit og pornograpiya gilambigit ngadto sa biyolohikal, sikolohikal, sosyal, ug espiritwal nga mga hagit nga lahi sa matag indibidwal.

Ang mga hagit ni bisan kinsa o sa kombinasyon niining upat ka butang tingali mopahuyang sa mga indibidwal ug maghimong lisud sa ilang pag-undang sa paggamit og pornograpiya. Samtang magtinguha sila sa pagsabot sa kakomplikado sa ilang mga problema sa pornograpiya, tingali magsugod sila sa pag-ila sa ubang mga impluwensya nga nakaapekto kanila. Bisan og ang espiritwal nga kalig-on importante, sa kasagaran makatabang sa mga indibidwal ang pagsulbad sa biyolohikal, sikolohikal, ug sosyal nga mga butang sa ilang kinabuhi usab. Awhaga ang mga indibidwal sa pagsuhid niini nga mga butang ug sa malagmit nga impluwensya niini. Kini makagiya kanila ngadto sa mas dako nga kalamposan sa paghunong sa paggamit og pornograpiya.

Upat ka mga Elemento nga angay Ikonsiderar

Upat ka mga ilhanan ang makatabang sa mga miyembro sa pagtimbangtimbang kon unsa ang gilawmon sa ilang pagkalambigit sa pornograpiya; unsa ka kanunay, kadugayon, kagrabihon, ug kamapangahason sa risgo. Ang pagsabot niini nga mga ilhanan makatabang kaninyo, sa mga indibidwal, ug kadtong mga suod kanila makahibalo sa kakomplikado sa ilang hagit.

Pagka kanunay

Ang pagka kanunay nagpasabut kon unsa ka kanunay ang indibidwal mohimo sa mao nga binuhatan. Ang panagsang pagtan-aw og pornograpiya nagpasabot sa mas gaan nga problema, bisan og kini nga kinaiya klaro gihapon nga dili angay. Ang pagka kanunay nga pagtan-aw sa pornograpiya sa indibidwal, mas makapagrabe sa problema.

Kadugayon

Ang kadugayon nagpasabut kon unsa na kadugay nalulong ang indibidwal sa mao nga kinaiya. Kon ang usa ka indibidwal wala makahimo sa paghunong sa pagtan-aw og pornograpiya sulod sa mga katuigan, lagmit nga mas lisud kaayo alang niya ang pagbuntog sa kinaiya kay sa paggamit niya og pornograpiya sa mubo lamang nga panahon.

Kagrabihon

Ang kagrabihon nagpasabut sa matang sa materyal nga gitan-aw. Samtang ang tanang imahe sa pornograpiya ug ang sulod dili angay, ang ubang matang sa materyal mas labaw pa nga makapakubos. Kon mahibaloan ninyo ang problema sa miyembro, importante ang pagtimaan sa matang sa pornograpiya nga iyang gitan-aw.

Sama pananglit, ang media nga nagpakita og sekswal nga mga buhat mas labaw ka grabe ug kalaw-ay nga tan-awon kay sa mga litrato sa mga indibidwal nga gamay ra ang gisul-ob o walay gisul-ob. Ang ubang materyal sa pornograpiya bayolente o naglakip og mga bata. Kon nakabantay ka nga dunay nanan-aw, namalit, o nag-apud-apod og pornograpiya nga naggamit og mga bata [child pornography], kontaka ang sibil nga mga awtoridad. Usa ka help line [numero nga tawagan alang sa tabang] anaa usab alang sa bishop sa pag-atubang niini nga problema.

Pagpangahas sa Risgo

Ang mga kalagmitan sa mapangahason sa risgo o mga kinaiya nga may kalambigitan sa pornograpiya mao ang lahi nga mga ilhanan kon unsa kagrabihon ang hagit. Kon mas gustohon sa usa ka indibidwal ang risgo nga motan-aw og pornograpiya, sa kinatibuk-an mas lisod kaniya ang paghunong sa paggamit niini. Ang mapangahason sa risgo nga mga kalihokan tingali maglakip sa dili pag-adto sa eskwelahan, sa trabaho, o sa ubang mga kinahanglang buhaton; pakiglambigit sa supak sa balaod, tinagotago, o kinaiya sa pagkabakakon; o susamang mga buhat. Ang mapangahason sa risgo nga kinaiya diha sa mga hingkod na posibling mosangput sa pagkawala sa pangempleyo, diborsyo, kagubot sa pamilya, o krimen.