Paghisgot ngadto sa mga Miyembro mahitungod sa Kinatawhan

Usahay ang mga miyembro adunay mga pangutana kalabot sa ilang mga pagbati mahitungod sa kinatawhan. Sila lagmit adunay mga sakop sa pamilya o mga higala nga nag-atubang sa ingon nga mga pangutana. O tingali sila maghunahuna mahitungod sa mga mensahe nga ilang nadungog sa kalibotan mahitungod sa pagkalalaki o pagkababaye.

Kon ang mga miyembro moduol kanimo sa pagtinguha og tambag mahitungod sa mga butang nga may kalabotan sa kinatawhan, mainampoon nga tinguhaa ang giya sa Espiritu. Tabangi sila sa pagkonsiderar sa ilang mga pangutana gikan sa panglantaw sa mahangtoron nga mga kamatuoran sa plano sa Langitnong Amahan alang sa Iyang mga anak. Maminaw nga adunay gugma ug kaluoy, tabangi sila sa pagsalig sa Manluluwas alang sa pagsabot ug espirituwal nga kalig-on.

Samtang ikaw maninguha sa pagsabot ug pagtabang niini nga mga indibidwal, magmanggihunahunaon sa panginahanglan sa pagsuporta sa pamilya ug gamita ang mga kapanguhaan nga anaa. Tan-awa sa “Transgender: Supporting Others [Transgender: Pagsuporta sa Uban]” diha sa Tabang sa Kinabuhi diha sa Librarya sa Ebanghelyo.

Mubo nga sulat: Ang kinatawhan dili sama sa sekswal nga oryentasyon. Ang ubang tawo nga nagkonsiderar sa ilang kaugalingon nga transgender wala makasinati og pagkaibog sa sama og sekso. Sa samang paagi, kadtong kinsa nakasinati og pagkaibog sa sama og sekso wala magpasabot nga nagkwestiyon sa ilang kinatawhan. Alang sa tabang bahin sa mga panag-istoryahanay mahitungod sa sekswal nga oryenstasyon, tan-awa sa “Pagkaibog sa Sama og Sekso” diha sa Mga Kapanguhaan sa Pagpanambag.

Mahangtoron nga mga Kamatuoran

Kita hinigugmang mga anak nga lalaki ug mga anak nga babaye sa langitnong mga ginikanan—kini mao atong labing importante nga kailhanan.

Nagpuyo kita uban sa Dios sa wala pa kita matawo. Isip Iyang mga anak, kita dunay potensyal nga mamahimong sama Kaniya.

Ang atong kailhanan isip usa ka anak sa Dios mao atong labing taas nga prayoridad.

Tan-awa usab sa Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), Librarya sa Ebanghelyo, ilabi na sa seksiyon nga giulohan og “Una, Hibaloa ang kamatuoran mahitungod kon kinsa kamo.”

Ang atong lalaki ug babaye nga mga lawas gihimo subay sa panagway sa Dios.

Ang mga kalainan tali sa mga anak nga babaye sa Langitnong Amahan ug sa Iyang mga anak nga lalaki importante diha sa Iyang mahangtorong plano. Kadto nga mga kalainan nagtugot kanato sa pagmugna og kinabuhi, ingon man sa malipayon, mahangtoron nga mga pamilya. Alang niini nga rason, Siya nagsugo nga tagdon nato ang atong mga lawas ug ang gahom sa paglalang isip sagrado nga mga gasa pinaagi sa pagsunod sa balaod sa kaputli.

Tan-awa usab sa Genesis 1:27; 1 Mga Taga-Corinto 11:11.

Ang matag usa kanato adunay usa ka lawas ug usa ka espiritu, ug ang atong mga lawas gisunod sa pagkasama sa atong mga espiritu.

“Ang [kinatawhan] usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay katapusan nga pag-ila ug katuyoan” (“Ang Pamilya: Usa ka Pamahayag ngadto sa Kalibotan”).

Ang kahulogan sa mga pulong nga kinatawhan diha sa pamahayag sa pamilya mao ang “biyolohikanhon nga sekso sa pagkatawo.”

Ang ubang mga tawo mibati nga ang ilang kailhanan sa kinatawhan (unsa ang ilang gibati sa sulod) ug ang ilang biyolohikanhon nga sekso wala magtugma. Ang ingon nga mga pagbati dili makasasala, apan kini makapaugtas ngadto niadtong nakasinati niini.

Si Presidente Dallin H. Oaks mitudlo nga ang kalibog mahitungod sa kailhanan sa kinatawhan “pweding mosangpot sa lainlaing matang sa lainlaing panahon sa kinabuhi sa tawo.” Kadto nga adunay mga pangutana kinahanglang “magbaton og taas nga panglantaw ug mosalig ug molihok basi sa mahangtorong mga baroganan” (“Barogan ang Kamatuoran” [tibuok kalibotan nga debosyonal alang sa mga young adult, Mayo 21, 2023], newsroom.ChurchofJesusChrist.org). Kinahanglang dili nila tugotan si Satanas nga mogamit sa kalibog mahitungod sa kinatawhan aron sa pagpalayo kanila gikan sa Manluluwas o sa pagpahuyang sa ilang hugot nga pagtuo diha sa plano sa Langitnong Amahan alang sa ilang mahangtoron nga kalipay.

Ang kalinaw sa panghunahuna, espirituwal nga kalig-on, ug ang usa ka mahangtoron nga panglantaw makita diha ni Jesukristo, sa Iyang ebanghelyo, ug sa Iyang Simbahan, bisan kon ang pipila ka pangutana dili hingpit nga matubag niini nga kinabuhi.

“Kon kamo, usa ka sakop sa pamilya, o usa ka higala nagsagobang niini nga mga isyu sa kalibog sa pagkatawo [identity], moawhag ko ninyo sa paggamit sa balaod sa ebanghelyo ug sa gugma ug kalooy sa atong Manluluwas ug Manunubos, kinsa motabang ug mogiya kaninyo kon mapailobon kamong mosubay sa Iyang mga dalan. Si Jesukristo … nagtudlo kanato sa dalan nga angay natong subayon aron makab-ot ang labing pinili nga mga panalangin sa atong Langitnong Amahan. … Iya kitang gihigugma ug mogiya kanato kon tinguha nato ang pagsunod kon asa Niya kita paadtoon ” (Dallin H. Oaks, “Barogan ang Kamatuoran”).

Tan-awa usab sa Ether 3:16; Doktrina ug mga Pakigsaad 77:2; 88:15.

Ang Dios nahigugma sa tanan Niyang mga anak, ug ang tanan takos sa gugma ug pagtahod.

Ang mga tawo nga adunay mga pangutana mahitungod sa ilang mga pagbati nga may kalabotan sa kinatawhan kasagaran maghunahuna mahitungod sa ilang relasyon sa Ginoo o sa ilang dapit diha sa Iyang Simbahan. Bisan kon kita “wala masayod sa kahulogan sa tanan nga mga butang,” makasalig kita sa Dios ug “nasayod nga siya nahigugma sa iyang mga anak” (1 Nephi 11:17).

Ang tanan giabiabi sa simbahan. Dili igsapayan sa atong mga pagbati mahitungod sa kinatawhan, kitang tanan nagkinahanglan og maayo nga mga higala kinsa mga ehemplo sa Kristohanon nga gugma. Kita gitudloan sa mosunod mahitungod sa paghigugma sa tanang anak sa Dios:

“Si bisan kinsa nga dili motratar niining mga indibidwal nga nagsagobang sa mga hagit sa pag-ila sa sekso uban sa gugma ug dignidad wala masubay sa mga pagtulon-an sa una ug ikaduhang dako nga sugo. Sa ingon niana, mahitungod sa balaod sa Dios, kinahanglan kitang mohinumdom nga ang Dios balik-balik nga mipadayag nga Siya milalang og lalaki ug babaye. Ug mahitungod sa atong katungdanan sa paghigugma sa atong isigkatawo, angay natong hinumdoman nga gisugo kita sa Dios sa paghigugma bisan niadtong wala magtuman sa [tanang] mga sugo. …

“… [Hinumdomi] nga bisan unsay atong mga kalahian sa mga nilalang sa atong Langitnong Amahan, Siya nahigugma kanatong tanan, ug ang Iyang hingpit nga plano sa kalipay adunay dapit para sa tanan. Atong mapakita ang atong gugma Kaniya pinaagi sa pagtuman sa Iyang mga sugo, lakip ang paghigugma sa Iyang mga anak” (Dallin H. Oaks, “Barogan ang Kamatuoran”).