Kanus-a Magkonsiderar og Propesyonal nga Tabang

Ang mga lider sa Simbahan wala laomi ni giawhag nga mahimong mga eksperto sa kahimsog sa pangisip. Apan ang mga indibidwal nga nag-antos gikan sa maong mga kahimtang sa kasagaran modangop sa ilang mga lider alang sa tabang aron mahibalo unsay buhaton.

Samtang hapit tanan makasinati og pipila ka aspeto sa mga hagit sa kahimsog sa pangisip sa managlahing panahon sa kinabuhi, ang mga hagit makaluya. Ang mga tawo nga adunay dili grabing mga matang sa hagit kasagaran mosanong sa mga sugyot nga gilatid diha sa gimantala nga Pagpahiuyon sa Kinabuhing Misyonaryo (pampleta, 2013). Bisan og kini nga kapanguhaan giandam alang sa mga misyonaryo, kini makatabang sa pagpangita og mga paagi diin si bisan kinsa makasanong sa mga hagit. Agig dugang, ang mabinationg suporta gikan kanimo, sa mga sakop sa pamilya, ug sa uban makatabang sa maong indibidwal sa paglatas sa mga hagit sa kahimsog sa pangisip.

Hinoon, kon ang maong tawo dili mosanong niini nga pamaagi, ang usa ka propesyonal alang sa kahimsog sa pangisip tingali nagkinahanglang mohatag og tukma nga paghiling.

Sa ubos mao ang pipila ka mga problema sa kahimsog sa pangisip nga tingali nagkinahanglan og pagtimbang-timbang gikan sa usa ka propesyonal alang sa kahimsog sa pangisip ug posibling masugatan sa mga miyembro, mga lider sa Simbahan diha sa ilang mga ward o mga branch:

• Mga hunahuna o pagsulay og hikog

• Molungtad og dugay nga masulub-ong buot

• Dili makalihok sa importanting inadlaw-adlaw nga mga tahas

• Kaguol, kawala sa paglaom, kapungot sa kaugalingon

• Pagsamad, pagputol, pagpasakit sa kaugalingon

• Nanubrang kahadlok sa pagtubo sa timbang; grabe o labihang paggamay sa timbang o pagbug-at sa timbang

• Dili makontrolar nga pagpamugos o pabalik-balik nga mga lihok o pagpanulti

• Dili mahunong o pabalik-balik nga panghunahuna o pagdali-dali nga mga lihok

• Balik-balik nga pagtug-an sa gagmayng mga problema

• Dili makontrolar nga mga kahadlok, kataranta, o mabalak-ong mga hunahuna

• Pagkahilayo

• Nanubra nga kaaktibo o dali nga pagkausab sa personalidad o taras

• Madudahon, mobati nga gilimbongan, makadungog og mga tingog

• Peligro nga sekswal nga kinaiya

• Dili masabot nga mga kinaiya (masuko, bayolente, agresibo)

Niini ug sa ubang problemadong mga sitwasyon, ikonsiderar ang propesyonal nga pagpatambag isip posible nga kapilian (tan-awa sa “Professional Counseling and Therapy [Propesyonal nga Pagpanambag ug Terapiya],” Kinatibuk-ang Tamdanan nga Basahon, 31.2.6). Ang mga lider sa Simbahan mahimong mokonsulta sa Family Services (kon anaa) o sa opisina sa area aron mahibalo unsaon sa pagtabang ang maong indibidwal ug makakita og mga kapanguhaan.