Pene 37
Nephi ’e o Lehi i roto i te fare tāpe’ara’a
E mau tamaiti Nephi ’e ’o Lehi nā Helamana. ’Ua hina’aro Helamana ia rāua ’ia riro ’ei mea parau-ti’a mai ia Lehi ’e ’o Nephi tei fa’aru’e ia Ierusalema.
’Ua ha’api’i Helamana i tāna nā tamaiti ’ia ti’aturi ia Iesu Mesia. ’Ua ha’api’i mai rāua ē e tae mai te fa’a’orera’a hara nā roto i te fa’aro’o ’e te tātarahapa.
’Ua haere Nephi ’e ’o Lehi e ha’api’i i te parau a te Atua i te ’āti Nephi ’e te ’āti Lamana. Rahira’a tauatini mau ta’ata tei bāpetizohia.
I tō Nephi ’e ’o Lehi haerera’a i te fenua i Nephi, ’ua tu’u te hō’ē nu’u ’āti Lamana ia rāua i roto i te fare tāpe’ara’a ’e ’aita i hōro’a i te mā’a e rave rahi mahana.
’Ua haere te ’āti Lamana i te fare tāpe’ara’a nō te taparahi pohe ia Nephi ’e ia Lehi, ’aita rā rātou e nehenehe nō te mea ’ua pāruruhia rāua e te hō’ē tīpe’a auahi, te ta’ata e tāpe’a ia rāua e ’ama ïa i te auahi.
’Aita ’o Nephi ’e ’o Lehi i ’ama i te auahi. ’Ua parau rāua i te ’āti Lamana ē tē pāruru ra te mana ’o te Atua ia rāua.
’Ua ha’amata te repo ’e te mau papa’i i te ’āueue. ’Ua ha’a’ti te ata pōiri i te mau ta’ata i roto i te fare tāpe’ara’a, ’e ’ua ri’ari’a rātou.
’Ua parau te hō’ē reo i ni’a a’e te pōiri. Mai te hō’ē muhumuhu, e nehenehe rā te mau ta’ata ato’a e fa’aro’o.
’Ua parau te reo i te mau ta’ata ’ia tātarahapa ’e ’ia fa’aea i te tāmata e taparahi pohe ia Nephi ’e ia Lehi.
’Ua parau te reo e toru taime, ’e ’ua tāmau noa te repo ’e te mau papa’i o te fare tāpe’ara’a i te ’āueue. E’ita te ’āti Lamana e nehenehe e horo i rāpae nō te pōiri ’e e ri’ari’a rahi tō rātou.
’Ua ’ite te hō’ē ’āti Nephi tei riro na ’ei melo nō te ’Ēkālesia ē ’ua ’ana’ana te hōho’a mata o Nephi ’e o Lehi i roto i te pōiri.
Nephi ’e ’o Lehi e hi’o ra i ni’a i te ra’i ’e tē paraparau ra. ’Ua parau hō’ē ta’ata i te ’āti Lamana ’ia hi’o. ’Ua māere rātou ’o vai ra tā Nephi ’e Lehi e paraparau ra.
’Ua parau te hō’ē ta’ata, ’o Aminadaba te i’oa, i te ’āti Lamana ē te paraparau ra Nephi ’e ’o Lehi i te mau melahi.
’Ua ani te ’āti Lamana ia Aminadaba nāhea ’ia ha’ape’e ’ē atu i te ata pōiri. ’Ua parau ’oia ia rātou ’ia tātarahapa ’e ’ia pure e tae roa ’ia roa’a tō rātou fa’aro’o ia Iesu Mesia.
’Ua pure te ’āti Lamana e tae roa ’ua pe’e ’ē te ata pōiri.
I te pe’e-’ē-ra’a te pōiri, ’ua ’ite te nuna’a i te hō’ē pou auahi e ha’a’ati ra ia rātou. ’Aita rātou i ’ama i te auahi ’aore rā te mau papa’i o te fare tāpe’ara’a.
’Ua ’ite te ’āti Lamana i te ’oa’oa rahi, ’e ’ua fa’a’ī te Vārua o te Atua i tō rātou ’ā’au.
’Ua muhumuhu mai te hō’ē reo, ma te parau ē e tāmahanahanahia rātou nō tō rātou fa’aro’o ia Iesu Mesia.
’Ua nānā a’era te ’āti Lamana nō te hi’o nō hea mai te reo. ’Ua ’ite rātou i te mau melahi i te poura’a mai nā te ra’i mai.
Fātata e 300 ta’ata tei ’ite ’e tei fa’aro’o i te mea tei tupu i roto i te fare tāpe’ara’a. ’Ua haere rātou ’e ’ua parau ia vetahi ’ē.
Te rahira’a o te ’āti Lamana tei ti’aturi ia rātou ’e ’ua ha’apae i tā rātou mau mauiha’a tama’i.
’Ua fa’aea te ’āti Lamana i te vāhia i te ’āti Nephi ’e ’ua fa’aho’i i te mau fenua tā rātou i haru mai. E mea parau-ti’a a’e te ’āti Lamana i te ’āti Nephi.
E rave rahi ’āti Lamana tei haere atu nā muri ia Nephi ’e ia Lehi ’e ’ua ha’api’i i te ’āti Nephi ’e te ’āti Lamana.