Pene 14
Abinadi ’e te ari’i Noa
E ari’i parau-ti’a o Zenifa nō te hō’ē pupu ’āti Nephi. I te pa’arira’a ’oia, ’ua riro mai tāna tamaiti o Noa ’ei ari’i.
E ’ere o Noa i te ari’i maita’i mai tōna metua tāne. E ta’ata ’ino ’oia ’e ’aita e ha’apa’o i te mau fa’auera’a a te Atua.
’Ua fa’ahepo ’oia i tōna nuna’a ’ia hōro’a nāna i te tuha’a o tā rātou huero, te mau aninara ’e te ’ario.
’Ua nā reira ’oia nō te mea e ta’ata hupehupe ’oia. ’Ua rave ’oia ’ia hōro’a te ’āti Nephi nāna i te mau mea ato’a tāna i hina’aro nō te ora.
’Ua mono ’oia i te tahu’a maita’i tā tōna metua tāne i pi’i i te mau tahu’a ’ino. ’Ua ha’api’i teie mau tahu’a ’ino i te nuna’a i te hara.
’Ua fa’ahāmani te ari’i Noa e rave rahi mau fare patu nehenehe, ’oia ato’a hō’ē aora’i rahi ’e hō’ē terōno. ’Ua fa’a’una’uhia te mau fare patu i te ’auro, te ’ario, ’e i te rā’au moni rahi.
’Ua here te ari’i Noa i te mau faufa’a tao’a tāna i rave nā roto mai i tōna nuna’a. E ha’amāu’a ’oia ’e tāna mau tahu’a i tō rātou taime nō te inu i te uaina ’e ’ia riro ’ei ta’ata ’ino.
’Ua tono te Atua i te hō’ē peropheta o Abinadi te i’oa i te nuna’a o Noa. ’Ua fa’aara Abinadi ia rātou, mai te mea ’aita rātou e tātarahapa, e riro rātou ’ei tītī nā te ’āti Lamana.
I te fa’aro’ora’a te ari’i Noa i te mea tā Abinadi i parau, ’ua riri ’oia. ’Ua tono ’oia i te mau ta’ata ’ia ’āfa’i ia Abinadi i te aora’i ’ia ti’a i te ari’i e taparahi pohe iāna.
’Ua ’āfa’ihia Abinadi i mua i te ari’i. ’Ua ui te ari’i Noa ’e tāna mau tahu’a e rave rahi mau uira’a iāna. ’Ua tāmata rātou i te fa’ahema iāna ’ia parau ’oia i te hō’ē mea hape.
’Ua mata’u Abinadi i te pāhono i tā rātou mau uira’a. ’Ua ’ite ’oia ē e tauturu te Atua iāna. ’Ua māere te mau tahu’a i te mau pāhonora’a a Abinadi.
’Ua riri te ari’i Noa ’e ’ua fa’aue i tāna mau tahu’a e taparahi pohe ia Abinadi. ’Ua parau Abinadi mai te mea e tāpe’a rātou iāna, e taparahi pohe te Atua ia rātou.
’Ua pāruru te Vārua Maita’i ia Abinadi, nō reira ’ua fa’aoti ’oia i te parau i te mea tā te Fatu i hina’aro e ti’a ai iāna. ’Ua ’ana’ana te hōho’a mata o Abinadi. ’Ua mata’u te mau tahu’a ’ia tāpe’a atu iāna.
Ma te mana o te Atua, ’ua parau Abinadi i te nuna’a nō tō rātou ’ino. ’Ua tai’o ’oia i te mau fa’auera’a a te Atua ia rātou.
’Ua parau ’oia ia rātou e fānauhia Iesu Mesia i ni’a i te fenua nei. E fa’ati’a Iesu ’ia tātarahapa te mau ta’ata, ’ia ti’afa’ahou ’e ’ia ora i pīha’i iho i te Atua.
’Ua parau Abinadi i te nuna’a ’ia tātarahapa ’e ’ia ti’aturi ia Iesu Mesia ’aore rā, e’ita rātou e fa’aorahia.
’Aita te ari’i Noa ’e tāna mau tahu’a ato’a i hina’aro e ti’aturi ia Abinadi, māori rā hō’ē o rātou. ’Ua parau Noa i te mau tahu’a e taparahi pohe ia Abinadi. ’Ua ru’uru’u rātou iāna ’e ’ua tu’u i roto i te fare tāpe’ara’a.
Hō’ē tahu’a tei ti’aturi ia Abinadi o Alama te i’oa. ’Ua ani ’oia i te ari’i Noa ’ia tu’u ia Abinadi ’ia haere.
’Ua riri te ari’i ia Alama ’e ’ua a’ua’u iāna. I muri iho ’ua tono te ari’i i tāna mau tāvini e taparahi pohe iāna. ’Ua horo Alama ’e ’ua tāponi, ’e ’aita ’oia i ’itehia e te mau tāvini.
I muri a’e e toru mahana i roto i te fare tāpe’ara’a, tei mua fa’ahou Abinadi i te ari’i Noa. ’Ua parau te ari’i ia Abinadi ’ia fa’ahiti fa’ahou i te mea tāna i parau nō ni’a iāna ’e tōna nuna’a.
’Ua parau te ari’i Noa ia Abinadi ē, mai te mea ’aita ’oia e fa’a’ore i te mau parau tāna i parau, e taparahi pohe ’oia iāna.
’Ua ’ite Abinadi ’ua parau ’oia i te parau mau. ’Ua ineine ’oia nō te pohe ’eiaha ra e huna i te mea tā te Atua i fa’aue iāna e parau.
’Ua fa’aue te ari’i Noa i tāna mau tahu’a ’ia taparahi pohe ia Abinadi. ’Ua ru’uru’u rātou iāna, ’ua tā’iri iāna, ’e ’ua tāauahi iāna. Hou ’oia ’a pohe ai, ’ua parau Abinadi e pohe ato’a te ari’i Noa i te auahi.
’Ua ’aro te tahi pae o te ’āti Nephi i te ari’i Noa ’e ’ua tāmata i te taparahi pohe iāna. ’Ua haere ato’a mai te nu’u ’āti Lamana e ’aro i te ari’i ’e tōna mau ta’ata.
’Ua horo te ari’i ’e tōna mau ta’ata i mua i te mau ’āti Lamana, ’ua haruhia mai rā rātou ’e te ’āti Lamana ’e ’ua ha’amata i te taparahi pohe ia rātou. ’Ua parau te ari’i i tōna mau ta’ata ’ia fa’aru’e i tō rātou mau ’utuāfare ’e ’ia horo ’ē atu.
E rave rahi mau ta’ata tei ’ore i fa’aru’e. ’Ua haruhia rātou e te ’āti Lamana.
’Ua pe’ape’a te rahira’a o te mau ta’ata tei horo ’ē nā muri i te ari’i Noa. ’Ua hina’aro rātou e ho’i ’e e tauturu i tā rātou mau vahine fa’aipoipo ’e te mau tamari’i e tō rātou nuna’a.
’Aita te ari’i Noa i hina’aro i te mau ta’ata ’ia ho’i i tō rātou ’utuāfare. ’Ua fa’aue ’oia ia rātou ’ia fa’aea i pīha’i iho iāna.
’Ua riri te mau ta’ata i te ari’i Noa. ’Ua tūtu’i rātou iāna i te auahi nō te taparahi pohe iāna, mai tei tohuhia e Abinadi. I muri iho ’ua haere rātou i tō rātou mau ’utuāfare.