Pene 34
Helamana ’e nā 2 000 fa’ehau ’āpī
I tō te mau ’enemi o te nuna’a o Amona ’arora’a i te ’āti Nephi, ’ua hina’aro te nuna’a o Amona e ’ōfati i tā rātou fafaura’a ’e e tauturu i te ’āti Nephi ’ia ’aro.
’Aita Helamana ’e te tahi mau feiā fa’atere ’āti Nephi i hina’aro ’ia ’ōfati te nuna’a o Amona i tā rātou fafaura’a i te Atua.
’Aita te mau tamaiti ’āpī a te nuna’a o Amona i rave i te fafaura’a. ’Ua hina’aro rātou e tauturu i te nu’u ’āti Nephi ’ia ’aro nō te ti’amāra’a.
E piti tauatini o teie mau feiā ’āpī tamāroa tei mā’iti i te pāruru i tō rātou fenua. ’Ua ani rātou ia Helamana ’ia riro ’ei fa’atere nō rātou.
E mau feiā ’āpī tamāroa itoito, te ’aito ’e te pūai teie. E feiā parau-ti’a ato’a ’e te ti’aturihia ’e te ha’apa’o i te mau fa’auera’a a te Atua.
’Ua arata’i Helamana i tāna nā 2 000 fa’ehau ’āpī i roto i te ’arora’a. ’Ua pi’i ’oia ia rātou tāna mau tamaiti, ’e ’ua pi’i rātou iāna tō rātou metua tāne.
Noa atu ē ’aita te mau tamaiti a Helamana i ’aro a’enei, ’aita rātou i taiā. ’Ua ha’api’i tō rātou mau metua vahine ia rātou ’ia vai te fa’aro’o i te Atua ’e ’ia ’ite ē, e tauturu ’oia ia rātou.
E rave rahi ’arora’a i te ’āti Lamana tā Helamana ’e tōna nu’u i ’aro nā. ’Ua ha’apa’o maita’i teie mau feiā ’āpī tamāroa i te mau fa’aue a Helamana.
’Ua ’aro rātou ma te ’aito ’e ’ua tauturu i te tīahi atu i te ’enemi. I muri a’e i te ’arora’a, ’ua ’ite Helamana ē ’ua pēpē noa tāna mau tamaiti ato’a ’aita rā hō’ē i pohe.
E temeio teie. ʼUa ’oa’oa roa Helamana. ’Ua ’ite ’oia ē ’ua pāruruhia teie mau feiā ’āpī tamāroa nō tō rātou fa’aro’o rahi i te Atua.