Pene 22
Te misiōni a Alama i Amoniha
’Ua pe’ape’a Alama nō te ’ino o ’āti Nephi, nō reira ’ua fa’aoti ’oia e poro i te ’evanelia i te toe’a o tōna pu’e mahana. ’Ua mā’iti ’oia ia Nephiha ’ia mono iāna ’ei ha’avā rahi.
’Ua ha’api’i Alama i te ’evanelia nā te mau fenua. ’A tāmata ai ’oia i te poro i Amoniha, ’aita te nuna’a i fa’aro’o. ’Ua fa’aru’e atu ’oia i te ’oire.
’Ua ’oto roa Alama nō te ’ino rahi o te nuna’a o Amoniha. ’Ua fa’aru’e atu ’oia nō te haere i te tahi atu ’oire.
’Ua fā mai te hō’ē melahi ’e ’ua tāmahanahana ia Alama. ’Ua parau te melahi iāna ’ia ho’i fa’ahou i Amoniha ’e ’ia poro fa’ahou. ’Ua ho’i vitiviti atu Alama.
’Ua po’ia roa Alama. ’A tomo ai ’oia i roto i te ’oire, ’ua ani ’oia i te hō’ē ta’ata i te tahi mā’a. ’Ua parau te hō’ē melahi i te ta’ata ē e haere mai Alama ’e e peropheta Alama nā te Atua.
’Ua rave teie ta’ata, ’o Amuleka, ia Alama i tōna fare ’e ’ua fa’atāmā’a iāna. ’Ua fa’aea Alama ia Amuleka ra ’e tōna ’utuāfare e rave rahi mahana. ’Ua ha’amāuruuru ’oia i te Atua nō te ’utuāfare o Amuleka ’e ’ua ha’amaita’i ia rātou.
’Ua parau Alama ia Amuleka nō ni’a i tōna pi’ira’a ’ia ha’api’i i te feiā nō Amoniha. ’Ua haere o Amuleka nā muri ia Alama nō te ha’api’i i te nuna’a. ’Ua tauturu te Vārua Maita’i ia rāua.
’Ua parau Alama i te nuna’a ia tātarahapa ’aita ana’e, e ha’amou te Atua ia rātou. ’Ua parau ’oia e haere mai Iesu Mesia ’e e fa’aora i te feiā e fa’aro’o tō rātou iāna ’e e tātarahapa.
’Ua ha’amata te nuna’a o Amoniha i te riri. ’Ua tāmata rātou e tu’u ia Alama i roto i te fare tāpe’ara’a, ’ua pāruru rā te Fatu iāna.
I muri iho ’ua ha’amata Amuleka i te ha’api’i. E mea rahi te mau ta’ata tei mātau ia Amuleka ; e ’ere ’oia i te ta’ata ’e’ē mai ia Alama. ’Ua parau ’oia ia rātou nō ni’a i te melahi tāna i ’ite.
’Ua parau Amuleka ē e hō’ē peropheta ’o Alama nā te Atua ’e ’ua parau ’oia i te parau mau. ’Ua māere te mau ta’ata i te fa’aro’ora’a i te ’itera’a pāpū o Amuleka.
’Ua ha’amata vetahi mau ta’ata i te riri, te ta’ata ’ino ihoa ra o Zeezeroma te i’oa. ’Ua tāmata rātou i te fa’ahema ia Amuleka ma te mau uira’a, ’ua parau rā ’oia ia rātou ’ua ’ite ’oia i tā rātou ’ōpuara’a.
’Ua hina’aro Zeezeroma e ha’amou i te mau mea maita’i ato’a. E fa’atupu ’oia i te fifi, i muri iho e aufau te mau ta’ata i te moni iāna nō te tātā’i i te mau fifi tāna i fa’atupu.
’Aita i nehenehe ia Zeezeroma e ha’avare ia Amuleka, nō reira ’ua pūpū ’oia e hōro’a nā Amuleka te moni, ’ia parau ’oia ē e ’aita e Atua. ’Ua ’ite Amuleka ē tē ora nei te Atua ’e ’ua parau ē ’ua ’ite ato’a Zeezeroma i te reira mea here a’e rā nāna te moni i te Atua.
I muri iho ’ua ha’api’i Amuleka ia Zeezeroma nō ni’a ia Iesu ’e nō ni’a i te ti’afa’ahoura’a ’e te ora mure ’ore . ’Ua māere te ta’ata. ’Ua ha’amata Zeezeroma i te rūrū i te ri’ari’a.
’Ua ’ite Zeezeroma ē e mana o te Atua tō Alama ’e tō Amuleka nō te mea ’ua ’ite rāua i tōna mau mana’o. ’Ua ui Zeezeroma i te mau uira’a ’e ’ua fa’aro’o ’a ha’api’i ai Alama iāna i te ’evanelia.
’Ua ti’aturi vetahi mau ta’ata ia Alama ’e ia Amuleka ’e ’ua ha’amata i te tātarahapa ’e ’ia tuatāpapa i te mau pāpa’ira’a mo’a.
’Ua hina’aro rā te rahira’a o te mau ta’ata e taparahi pohe ia Alama ’e ia Amuleka. ’Ua ru’uru’u rātou i nā ta’ata to’opiti ’e ’ua ’āfa’i i mua i tō rātou ha’avā rahi.
’Ua tātarahapa Zeezeroma i te rirora’a ’ei ta’ata ’ino ’e i te ha’api’ira’a i te ha’avare i te nuna’a. ’Ua tāparu ’oia i te nuna’a ’ia vaiiho ia Alama ’e ia Amuleka ’ia haere.
’Ua tīahihia Zeezeroma ’e vetahi mau ta’ata tei ti’aturi i te mau ha’api’ira’a a Alama ’e ’a Amuleka i rāpae te ’oire. ’Ua tāora te feiā ’ī’ino ia rātou i te ’ōfa’i.
I reira ’ua ha’aputuputu te feiā ’ino i te mau vahine ’e te mau tamari’i tei ti’aturi ’e ’ua tāora ia rātou i roto i te auahi ’e te mau pāpa’ira’a mo’a.
’Ua fa’ahepohia Alama ’e ’o Amuleka ’ia hi’o i te mau vahine ’e te mau tamari’i e pohe ra i roto i te auahi. ’Ua hina’aro Amuleka e fa’a’ohipa i te mana o te Atua nō te fa’aora ia rātou.
’Ua parau rā Alama ia Amuleka ’eiaha ’oia e tāpe’a i te taparahira’a ta’ata, nō te mea te feiā e pohe ra e rave mai te Atua ia rātou ’e te feiā ’ī’ino ra e fa’a’utu’ahia ïa rātou.
’Ua pō’ara te ha’avā rahi ia Alama ’e ia Amuleka e rave rahi taime ’e ’ua fa’a’o’ō’o ia rāua nō te mea ’aita rāua i fa’aora i te mau vahine ’e te mau tamari’i i te auahi. I muri iho, ’ua tāpe’a ’oia ia rāua i roto i te fare tāpe’ara’a.
’Ua haere mai te tahi atu mau ta’ata ’ī’ino i roto i te fare tāpe’ara’a ’e ’ua hāmani ’ino ia Alama ’e ia Amuleka e rave rahi taime, ma te ’orera’a e hōro’a i te mā’a ’e te tūtuhara’a i te huare i ni’a ia rāua.
’Ua parau te ha’avā rahi ē mai te mea e fa’a’ohipa Alama ’e o Amuleka i te mana o te Atua nō te fa’aora ia rāua, e ti’aturi ’oia. ’Ua pō’ara fa’ahou ’oia ia rāua.
’Ua ti’a Alama ’e ’o Amuleka. ’Ua pure Alama ’e ’ua ani i te Atua ’ia ha’apūai mai ia rāua nō tō rāua fa’aro’o.
’Ua ’ī Alama ’e ’o Amuleka i te mana o te Atua, ’e ’ua ’ōfati i te mau taura i ru’uru’uhia ai rāua. ’Ua ri’ari’a te mau ta’ata ’ī’ino ’e ’ua tāmata i te horo ’ua ma’iri rā i raro.
’Ua ’āueue te fenua, ’e ’ua topa te mau papa’i o te fare tāpe’ara’a i ni’a i te feiā ’ī’ino. ’Ua pāruru te Fatu ia Alama ’e ia Amuleka, ’e ’aita roa rāua i pēpē.
’Ua haere mai te mau ta’ata nō Amoniha e hi’o i te ’ohipa e tupu ra. I tō rātou ’itera’a ia Alama ’e ia Amuleka i te haerera’a mai i rāpae i te fare tāpe’ara’a, ’ua ri’ari’a rātou ’e ’ua horo haere.
’Ua parau te Fatu ia Alama ’e ia Amuleka e haere i Sidoma. I reira ’ua ’ite rāua i te mau ta’ata parau-ti’a. Tei reira ato’a Zeezeroma ’e ’ua ma’ihia.
’Ua ’oa’oa Zeezeroma i te ’itera’a ia Alama ’e ia Amuleka. ’Ua pe’ape’a ’oia ’ia taparahi-pohe-hia rāua nō te ’ohipa tāna i rave. ’Ua ani ’oia ia rāua ’ia fa’aora iāna.
’Ua ti’aturi Zeezeroma ia Iesu Mesia ’e ’ua tātarahapa i tāna mau hara. I te purera’a Alama nōna, ’ua ora ’oi’oi mai ’oia.
’Ua bāpetizohia o Zeezeroma ’e ’ua ha’amata i te poro haere i te ’evanelia. E rave rahi ato’a mau ta’ata tei bāpetizohia.
’Ua taparahi-pohe-hia te mau ta’ata ’ī’ino nō Amoniha e te nu’u ’āti Lamana, mai tā Alama i tohu.