Mwakoro 23
Amon Te Toro Ae Korakora
Natin Motiaea aika aman mwaane a kitana Taraemera n reireiniia Reimwanaite te euangkerio. A nakon kaawa aika kakaokoro n tatabeman.
Amon e nako aban Itimaera. Ngke e rinako n te kaawa, tenaan Reimwanaite a kabaea ao a uotia nakon aia uea, ae Ramonaai.
Amon e tuanga Te Uea ae Ramonaai bwa e kan maeka ibuakoia Reimwanaite. E kukurei Ramonaai ao e tuangiia ana aomata bwa a na aki kabaea.
E taku Amon bwa e na riki bwa temanna ana toro te uea. E kanakoa te uea bwa e na tararuai taian nanai.
N te bong teuana ngke Amon ao tabeman tooro ake a kairiia nanai ni karekea te ran, Reimwanaite aika taan iraa a kauamaea te nanai ao a na kataia ni iraei.
Tooro ake raon Amon a maaku. Te Uea ae Ramonaai e a tia n tiringiia tooro ake tabeman ake a tia ni kabuai maan man aia mwakuri taan iraa.
E ataia Amon bwa aio ana tai ni kamanena mwaakan te Uea n anai nanoia Reimwanaite. Bwa a onga ni kan ongora ana reirei.
E tuangiia tooro Amon bwa ngkana a boboti maan, e na aki tiringiia te uea.
Amon ao tooro ake tabeman a waetata ni kuneia maan ao ni kairia rikaki nakon te tabo ni kamoi n te ran.
A manga oki Reimwanaite aika taan iraa. Amon e tuangiia tooro ake tabeman n tararuaia nanai ngkai e un ma taan iraa.
Reimwanaite aika taan iraa aki maaka Amon. Aia iango bwa e aki kangaanga kamateana.
Mwaakan te Atua e mena iroun Amon. E oreiia ao man tiringiia tabeman taan iraa n taian atibu, are e a karika uniia nikiraia taan iraa.
A kataia n tiringa Amon n aia kai ni kamate, ma ni katoa te tai are te tia iraa e tabeka baina n orea Amon, e kakibanakoa bain te tia iraa. A maaku, taan iraa ao a birinako.
Tenaan toro a uota te bai are kakibanakoaki nakon te Uea ae Ramonaai ao n tuanga te bwai are e tia ni karaoia Amon.
E mimi te uea ni korakoran mwaakan Amon. E kan noora Amon ma e maaku ibukina bwa e kantaaningaia bwa Amon bon te Tamnei ae Korakora.
Ngke e rinnako Amon bwa e na nooria, te Uea ae Ramonaai e aki ataa te bwai ae na taekinna. E aki taetae inanon teuana te aoa.
Te Tamnei ae Raoiroi e buoka Amon n ataa te bwai ae iangoia te uea. E kabwarabwaraa Amon bwa tiaki ngaia te Tamnei ae Korakora. Bon te aomata ngaia.
Te uea e na angan Amon te bwai ae tangiria ngkana e tuanga bwa tera te mwaaka are kabongana ni konaiia taan iraa ao n ataa ana iango te uea.
E taku Amon bwa tii te bwai ae tangiria ibukin te Uea ae Ramonaai bwa e na kakoaua are e na taekinna. E taku te uea bwa e na kakoauai bwaai ni kabane are tuangaki iroun Amon.
E titiraki Amon nakon te uea ae Ramonaai ngkana e kakoaua te Atua. Te uea e kakoaua iroun te Tamnei ae Korakora.
E taku Amon bwa te Tamnei ae Korakora bon te Atua, are kariki bwaai ni kabane i aonaaba, ao e atai aia iango aomata.
Amon e taku bwa a karikaki aomata ni katotongan te Atua. E taku naba bwa te Atua e weteia bwa e na reirei nakon Ramonaai ao ana aomata.
E kamanenai koroboki aika tabu, Amon e reireina te Uea ae Ramonaai aron te Karikibwai, Atam, ao Iesu Kristo.
Te Uea ae Ramonaai e kakoaua Amon ao e tataro bwa a na kabwaraaki ana bure. Ngkanne e bwaka nako aontano ao e taraa ni mate.
Tooro a uota te uea nakon buuna ao a kawenea i aon te kainiwene. Imwiin uoua te bong a taku tooro bwa e a mate ao a baireia bwa a na taunna.
Te uea n aine e aki kakoaua bwa e mate buuna. Ngke e a tia n ongo mwaakan Amon ae korakora, e bubuti bwa e na buoka te uea.
Amon e ataa Ramonaai bwa e mena iaan mwakan te Atua. E tuanga te uea n aine bwa Ramonaai e na uti n te bong are imwiina.
Neiei e mena irarikin Ramonaai n te tairiki. N te bong are imwiina e teirake Ramonaai ao e taku bwa e a tia n noora Iesu Kristo. Te uea ao buuna ae te uea n aine a kaonaki n te Tamnei ae Raoiroi.
E reireiniia ana aomata Ramonaai aron te Atua ao Iesu Kristo. Ake a kakoaua a na rairinanoia man aia bure ao ni bwabetitoaki.