« ពួកសាសន៍អាន់តៃ‑នីហ្វៃ‑លីហៃ » ដំណើររឿងព្រះគម្ពីរមរមន ( ឆ្នាំ ២០២៣ )
ពួកសាសន៍អាន់តៃ‑នីហ្វៃ‑លីហៃ
មនុស្សដែលជ្រើសរើសស្រឡាញ់មារសត្រូវរបស់ពួកគេ
សាសន៍លេមិនជាច្រើនបានរៀនអំពីព្រះ មកពីអាំម៉ូន និងបងប្អូនរបស់លោក ។ សាសន៍លេមិនទាំងនេះមានសេចក្ដីជំនឿយ៉ាងខ្លាំងលើព្រះអម្ចាស់ ហើយបានធ្វើតាមព្រះបញ្ញត្តិរបស់ព្រះ ។ ពួកគេចង់បានឈ្មោះថ្មី ដូច្នេះពួកគេបានហៅខ្លួនឯងថា ពួកសាសន៍អាន់តៃ‑នីហ្វៃ‑លីហៃ ជំនួសឲ្យសាសន៍លេមិន ។
ពួកសាសន៍អាន់តៃ‑នីហ្វៃ‑លីហៃ បានផ្លាស់ប្តូរពីព្រោះសេចក្តីជំនឿរបស់ពួកគេលើព្រះ ។ ពួកគេបានប្រែចិត្តពីអំពើអាក្រក់ទាំងឡាយដែលពួកគេធ្លាប់ធ្វើ ។ ពួកគេដឹងថាព្រះស្រឡាញ់ពួកគេ ហើយបានអត់ទោសឲ្យពួកគេ ។
ពួកសាសន៍លេមិនបានខឹងសម្បា ហើយកំពុងត្រៀមខ្លួនដើម្បីវាយប្រហារពួកសាសន៍អាន់តៃ‑នីហ្វៃ‑លីហៃ ។ ជំនួសឲ្យការប្រយុទ្ធ ពួកសាសន៍អាន់តៃ‑នីហ្វៃ‑លីហៃ បានធ្វើសេចក្តីសន្យាចំពោះព្រះ ។ ពួកគេបាននិយាយថា ពួកគេនឹងមិនធ្វើបាបមនុស្សទៀតទេ ។ ដើម្បីជាភស្តុតាង ពួកគេបានកប់អាវុធរបស់ពួកគេ ។ ពួកគេបានជ្រើសរើសស្រឡាញ់ពួកខ្មាំងសត្រូវរបស់ពួកគេ ជាជាងធ្វើបាប ឬសម្លាប់ពួកគេ ។
ពួកសាសន៍លេមិនដែលមិនជឿលើព្រះបានវាយប្រហារពួកសាសន៍អាន់តៃ‑នីហ្វៃ‑លីហៃ ។
ពួកសាសន៍អាន់តៃ‑នីហ្វៃ‑លីហៃ មានជំនឿថា ប្រសិនបើពួកគេត្រូវគេសម្លាប់នោះពួកគេនឹងរស់នៅជាមួយនឹងព្រះ ។ ពួកគេបានគោរពការសន្យារបស់ពួកគេចំពោះព្រះ ហើយមិនបានប្រយុទ្ធនឹងសាសន៍លេមិនទេ ។
ជំនួសឲ្យការប្រយុទ្ធ ពួកសាសន៍អាន់តៃ‑នីហ្វៃ‑លីហៃ បានអធិស្ឋាន ។ នៅពេលសាសន៍លេមិនបានឃើញដូច្នេះ ពួកគេជាច្រើនបានឈប់វាយប្រហារ ។ ពួកគេមានអារម្មណ៍មិនល្អចំពោះការសម្លាប់មនុស្ស ។ ពួកសាសន៍លេមិនទាំងនោះក៏បានជ្រើសរើសនឹងមិនធ្វើបាបមនុស្សផ្សេងទៀតម្ដងទៀតឡើយ ។ ពួកគេបានចូលរួមជាមួយពួកសាសន៍អាន់តៃ‑នីហ្វៃ‑លីហៃ ។
កាលដែលពេលវេលាកន្លងទៅ មនុស្សកាន់តែច្រើនបានវាយប្រហារ ។ អាំម៉ូន និងបងប្អូនរបស់គាត់សោកស្តាយដែលពួកសាសន៍អាន់តៃ‑នីហ្វៃ‑លីហៃ បានរងទុក្ខ ។ ពួកគេបានទូលសុំស្ដេចឲ្យនាំប្រជាជនរបស់ទ្រង់ទៅរស់នៅជាមួយនឹងពួកសាសន៍នីហ្វៃ ។ ស្តេចបានមានបន្ទូលថា ពួកគេនឹងទៅបើព្រះអម្ចាស់សព្វព្រះទ័យឲ្យគេទៅ ។ អាំម៉ូនបានអធិស្ឋាន ។ ព្រះអម្ចាស់មានព្រះបន្ទូលថា ពួកគេគួរតែទៅហើយថាទ្រង់នឹងការពារពួកគេ ។
សាសន៍នីហ្វៃបានប្រគល់ដែនដីទៅឲ្យពួកអាន់តៃ-នីហ្វៃ-លីហៃ រស់នៅ ហើយការពារពួកគេ ។ ជាការតបស្នង ពួកសាសន៍អាន់តៃ‑នីហ្វៃ‑លីហៃ បានជូនស្បៀងអាហារដល់សាសន៍នីហ្វៃ ។ ពួកសាសន៍អាន់តៃ‑នីហ្វៃ‑លីហៃ មានសេចក្តីជំនឿ និងសេចក្តីស្រឡាញ់លើព្រះយ៉ាងខ្លាំង ។ ពួកគេស្មោះត្រង់នឹងមនុស្សគ្រប់គ្នា ហើយបានរក្សាការសន្យាថានឹងមិនច្បាំងទៀតឡើយ ។ ពួកគេទាំងអស់គ្នាស្មោះត្រង់ពេញមួយជីវិតពួកគេ ។