« អំពីព្រះគម្ពីរមរមន » ដំណើររឿងព្រះគម្ពីរមរមន ( ឆ្នាំ ២០២៣ )
អំពីព្រះគម្ពីរមរមន
ព្រះយេស៊ូវគ្រីស្ទ និងប្រជាជនរបស់ទ្រង់នៅទ្វីបអាមេរិក
ព្រះគម្ពីរមរមនគឺជាព្រះគម្ពីរ ។ វាបង្រៀនយើងអំពីព្រះអម្ចាស់ព្រះយេស៊ូវគ្រីស្ទ និងការយាងមករបស់ទ្រង់ទៅកាន់ទ្វីបអាមេរិកជាយូរមកហើយ ។ ចេញពីព្រះគម្ពីរមរមន យើងអាចរៀនអំពីដំណឹងល្អរបស់ព្រះយេស៊ូវបាន ។ វាបង្រៀនយើងពីរបៀបដើម្បីមានសេចក្ដីសុខសាន្តនាពេលឥឡូវនេះ និងរបៀបដែលយើងអាចរស់នៅជាមួយព្រះ និងព្រះយេស៊ូវម្ដងទៀតនៅថ្ងៃណាមួយ ។
ទំព័រចំណងជើងនៃព្រះគម្ពីរមរមន; បុព្វកថាអំពីព្រះគម្ពីរមរមន; នីហ្វៃទី៣ ១១
ព្រះគម្ពីរមរមនត្រូវបានសរសេរដោយពួកព្យាការីនៃព្រះ ។ ពួកលោកបានសរសេរនៅលើទំព័រលោហៈ ដែលហៅថាផ្ទាំងចំណារ ។ ដំណើររឿង និងទីបន្ទាល់របស់ពួកលោកជួយយើងឲ្យមានសេចក្ដីជំនឿលើព្រះយេស៊ូវ ។ ពួកលោកបានសរសេរអំពីមនុស្សជាច្រើនក្រុម ដែលរស់នៅក្នុងទ្វីបអាមេរិកជាយូរមកហើយ ។
ទំព័រចំណងជើងនៃព្រះគម្ពីរមរមន; បុព្វកថាអំពីព្រះគម្ពីរមរមន
ក្រុមមួយមកពីក្រុងយេរូសាឡិមទៅកាន់ទ្វីបអាមេរិកប្រមាណជាឆ្នាំ ៦០០ មុនពេលព្រះយេស៊ូវបានប្រសូតមក ។ ពួកគេបានក្លាយទៅជាជាតិសាសន៍ពីរដែលហៅថា ពួកសាសន៍លេមិន និងពួកសាសន៍នីហ្វៃ ។
បុព្វកថានៃព្រះគម្ពីរមរមន; នីហ្វៃទី១ ១:៤
មុននោះជាយូរ មានក្រុមមួយទៀតបានមកពីប៉មបាបិលទៅកាន់ទ្វីបអាមេរិក ។ ពួកគេត្រូវបានគេហៅថា ពួកសាសន៍យ៉ារេឌ ។
បុព្វកថានៃព្រះគម្ពីរមរមន; អេធើរ ១:៣៣–៤៣
ព្យាការីរបស់ព្រះបានបង្រៀនប្រជាជន ។ នៅពេលប្រជាជនបានស្តាប់ ហើយរក្សាបទបញ្ញត្តិទាំងឡាយរបស់ព្រះ នោះទ្រង់បានជួយដល់ពួកគេ ។ ពួកព្យាការីបានបង្រៀនអំពីព្រះយេស៊ូវ ហើយបាននិយាយថា ទ្រង់នឹងប្រសូតនៅក្រុងយេរូសាឡិម ។ ពួកសាសន៍នីហ្វៃ និងពួកសាសន៍លេមិនបានដឹងថា ព្រះយេស៊ូវនឹងយាងមកជួបពួកគេ បន្ទាប់ពីការសុគតរបស់ទ្រង់ ។
នីហ្វៃទី២ ១:២០; ២៥:១២–១៤; ២៦:១, ៣, ៩; ម៉ូសាយ ៣:៥–១១; អាលម៉ា ៧:៩–១៣; ហេលេមិន ៣
ព្រះយេស៊ូវបានយាងមក គឺដូចដែលព្យាការីបានថ្លែងប្រាប់ ។ បន្ទាប់ពីព្រះយេស៊ូវបានសុគត ហើយបានមានព្រះជន្មរស់ឡើងវិញ នោះទ្រង់បានយាងទៅជួបប្រជាជន ។ ទ្រង់បានអនុញ្ញាតឲ្យមនុស្សម្នាក់ៗពាល់ស្នាមដែកគោលនៅលើព្រះហស្ដ និងព្រះបាទារបស់ទ្រង់ ។ ពួកគេបានដឹងថា ទ្រង់គឺជាព្រះរាជបុត្រារបស់ព្រះ ។ ទ្រង់បានបង្រៀនដំណឹងល្អរបស់ទ្រង់ ហើយប្រជាជនបានកត់ត្រាការបង្រៀននោះទុក ។ ពួកគេបាននិយាយអំពីការយាងមករបស់ព្រះយេស៊ូវអស់រយៈពេលជាច្រើនឆ្នាំ ។
នីហ្វៃទី៣ ១១:៧–១៥, ៣១–៤១; ១៦:៤; នីហ្វៃទី៤ ១:១–៦, ១៣–២២
មរមនគឺជាព្យាការីមួយរូប ដែលបានរស់នៅពីរបីរយឆ្នាំ បន្ទាប់ពីព្រះយេស៊ូវបានយាងមក ។ នៅពេលមរមននៅមានជីវិត ប្រជាជនបានឈប់ធ្វើតាមព្រះអម្ចាស់ ។ មរមនបានរក្សាការសរសេររបស់ពួកព្យាការី ដែលបានរស់នៅពីមុនលោក ។ លោកបានដាក់ការសរសេរជាច្រើនរបស់ពួកលោកទៅក្នុងផ្ទាំងមួយឈុត ។ ផ្ទាំងទាំងនេះបានក្លាយជាព្រះគម្ពីរមរមន ។
បុព្វកថានៃព្រះគម្ពីរមរមន; ពាក្យសម្ដីនៃមរមន ១:២–៩; មរមន ១:២–៤, ១៣–១៧
មុនពេលមរមនបានស្លាប់ លោកបានប្រគល់ផ្ទាំងទាំងនេះទៅឲ្យកូនប្រុសរបស់លោកឈ្មោះ មរ៉ូណៃ ។ ពេលមរ៉ូណៃនៅមានជីវិត ប្រជាជនបានប្រព្រឹត្តរឿងអាក្រក់ៗយ៉ាងខ្លាំង ។ ពួកគេចង់សម្លាប់អ្នកណាក៏ដោយ ដែលបានជឿលើព្រះយេស៊ូវ ។ មរ៉ូណៃចង់ជួយប្រជាជននៅពេលអនាគត ដូច្នេះ លោកបានសរសេរបន្ថែមទៀតនៅលើផ្ទាំងទាំងនោះ ហើយបានកប់វាដើម្បីរក្សាវាទុកឲ្យមានសុវត្ថិភាព ។
បុព្វកថានៃព្រះគម្ពីរមរមន; ពាក្យសម្ដីនៃមរមន ១:១–២; មរមន ៨:១–៤, ១៤–១៦; មរ៉ូណៃ ១
ជាច្រើនឆ្នាំក្រោយមក នៅឆ្នាំ ១៨២៣ មរ៉ូណៃបានយាងមកក្នុងនាមជាទេវតាដើម្បីបង្ហាញកាយឲ្យព្យាការី យ៉ូសែប ស៊្មីធ បានឃើញ ។ មរ៉ូណៃបានប្រាប់ យ៉ូសែប ពីកន្លែងដែលត្រូវស្វែងរកផ្ទាំងនេះ ។ ដោយមានជំនួយពីព្រះ យ៉ូសែប បានបកប្រែអ្វីដែលបានកត់ត្រានៅលើផ្ទាំងទាំងនោះ ។
បុព្វកថានៃព្រះគម្ពីរមរមន; យ៉ូសែប ស៊្មីធ—ប្រវត្តិ ១
ព្រះទ្រង់បញ្ជូនព្រះវិញ្ញាណបរិសុទ្ធមកជួយអ្នកឲ្យដឹងថា នៅពេលណាមានអ្វីមួយពិត ។ នៅពេលអ្នកអានព្រះគម្ពីរមរមន អ្នកអាចអធិស្ឋាន ហើយទូលសួរព្រះថា តើវាពិតឬអត់ ។ ដូចគ្នានេះដែរ អ្នកអាចដឹងថា ព្រះយេស៊ូវគឺជាព្រះអង្គសង្រ្គោះរបស់អ្នក ហើយថាទ្រង់ស្រឡាញ់អ្នក ។