សេចក្តីជំនឿ ៖ ចំណងនៃសេចក្តីទុកចិត្ត និងភាពស្មោះត្រង់
សេចក្តីជំនឿដុះពន្លកឡើងនៅពេលយើងទុកចិត្តលើព្រះយេស៊ូវគ្រីស្ទ ហើយរីកដុះដាលឡើងនៅពេលយើងមានភាពស្មោះត្រង់ និងភក្តីភាពចំពោះទ្រង់ ។
កាលខ្ញុំមានអាយុ១៧ឆ្នាំ ខ្ញុំបានធ្វើកិច្ចព្រមព្រៀងមួយជាមួយមិត្តរបស់ខ្ញុំឈ្មោះ ហូសេ លូអ៊ីស ដើម្បីបង្រៀនគាត់ហែលទឹក ។ ដូចនេះនៅព្រឹកមួយ យើងបានកំណត់ពេលដើម្បីហាត់រៀន ។ នៅពេលមេរៀនរបស់យើងបានបញ្ចប់ ហើយខ្ញុំបានងើបចេញពីអាងហែលទឹក នោះខ្ញុំបានឮមិត្តរបស់ខ្ញុំស្រែកសុំជំនួយ ។ គាត់កំពុងលង់ទឹកនៅចុងម្ខាងនៃអាងហែលទឹកដែលមានជម្រៅជ្រៅ ។
ខ្ញុំបានលោតចូលទៅក្នុងទឹក ហើយហែលឆ្ពោះទៅរកគាត់ខណៈពេលអធិស្ឋានទូលសូមជំនួយ ។ ពេលខ្ញុំចាប់ដៃគាត់ដើម្បីទាញគាត់ទៅលើផ្ទៃទឹក មិត្តរបស់ខ្ញុំដែលកំពុងភ័យស្លន់ស្លោបានតោងឡើងលើខ្នងខ្ញុំ ឱបកខ្ញុំជាប់ ហើយធ្វើឲ្យខ្ញុំស្ទះខ្យល់ ។ ឥឡូវនេះ យើងទាំងពីរនាក់បានលង់ទឹក ។ ដោយព្យាយាមអស់ពីសមត្ថភាពរបស់ខ្ញុំដើម្បីងើបឲ្យដល់លើផ្ទៃទឹក ខ្ញុំបានអធិស្ឋានដោយអស់ពីចិត្តរបស់ខ្ញុំសម្រាប់អព្ភូតហេតុមួយមកពីព្រះ ។ បន្ទាប់មកដោយសន្សឹមៗប៉ុន្តែខ្ជាប់ខ្ជួន នោះព្រះចេស្តារបស់ព្រះបានបង្ហាញនៅពេលដែលខ្ញុំមានអារម្មណ៍ថា មានដៃមួយអូសទាញខ្ញុំឆ្ពោះទៅខាងទឹករាក់ ដែលនាំពួកយើងទៅរកទីមានសុវត្ថិភាព ។
បទពិសោធន៍នេះបញ្ជាក់ពីមេរៀនដ៏ជ្រាលជ្រៅមួយដែលប្រធាន រ័សុល អិម ណិលសុន ធ្លាប់បានបង្រៀន « នៅពេលបងប្អូនឈោងទៅដើម្បីមានព្រះចេស្ដារបស់ព្រះអម្ចាស់នៅក្នុងជីវិតរបស់បងប្អូនដោយកម្លាំងដូចគ្នានឹងកម្លាំងរបស់មនុស្សលង់ទឹកម្នាក់ខំតោងចាប់ ហើយដង្ហក់រកខ្យល់ នោះព្រះចេស្ដាមកពីព្រះយេស៊ូវគ្រីស្ទនឹងជារបស់បងប្អូន » ។
ជូនចំពោះកុមារ និងយុវវ័យជាទីស្រឡាញ់ ថ្ងៃនេះខ្ញុំចង់និយាយជាមួយក្មួយៗអំពីគោលការណ៍ដ៏សំខាន់នៃសេចក្តីជំនឿលើព្រះយេស៊ូវគ្រីស្ទ ។
សេចក្តីជំនឿលើព្រះគ្រីស្ទមានន័យថា ការទុកចិត្តលើទ្រង់
តើការមានសេចក្តីជំនឿលើព្រះយេស៊ូវគ្រីស្ទមានន័យយ៉ាងណា ? តើវាមានន័យថាយើង ជឿលើទ្រង់ ឬមានទីបន្ទាល់ថាទ្រង់គឺពិតឬ ? នោះអាចជាការចាប់ផ្តើម ប៉ុន្តែវាមានច្រើនទៀត ។ តើក្មួយធ្លាប់គិតអំពីសេចក្តីជំនឿថាជា ការទុកចិត្ត ដែរឬទេ ? សូមគិតពីមនុស្សម្នាក់ដែលក្មួយទុកចិត្តបំផុត—អាចជាសមាជិកគ្រួសារ ឬមិត្តភក្តិ ។ តើហេតុអ្វីបានជាក្មួយទុកចិត្តពួកគេ ? វាប្រហែលជាមកពីក្មួយបានឃើញ សេចក្តីស្រឡាញ់ និង ជំនួយ ឥតឈប់ឈររបស់ពួកគេ ។
នៅពេលយើងមានសេចក្តីជំនឿលើព្រះគ្រីស្ទ នោះយើងស្គាល់ពរជ័យរបស់ទ្រង់ ហើយបង្កើតទំនាក់ទំនងនៃសេចក្ដីទុកចិត្តជាមួយនឹងទ្រង់ ។
តើក្មួយអាចបង្កើនការទុកចិត្ដរបស់ក្មួយលើព្រះគ្រីស្ទដោយរបៀបណា ?
នៅក្នុងការប្រជុំធម្មនិដ្ឋានថ្មីៗនេះ ក្មួយៗត្រូវបានអញ្ជើញឲ្យជញ្ជឹងគិតពីពេលមួយក្នុងជីវិតរបស់ក្មួយពេលដែលក្មួយបានទទួលពន្លឺមកពីស្ថានសួគ៌ ។ សូមសាកល្បងធ្វើតាមការអញ្ជើញឲ្យជញ្ជឹងគិតនេះ !
ចាប់ផ្តើមដោយការជញ្ជឹងគិតអំពីព្រះគ្រីស្ទ និងសុភមង្គលដែលដង្វាយធួន និងដំណឹងល្អរបស់ទ្រង់បាននាំយកមកក្នុងជីវិតរបស់ក្មួយ ។ ហើយសូមធ្វើកំណត់ត្រាអំពី « ការចងចាំខាងវិញ្ញាណដ៏មានអត្ថន័យ » ដែលព្រះបានគង់នៅជាមួយនឹងក្មួយ អ្នកជាទីស្រឡាញ់របស់ក្មួយ និងមនុស្សដែលនៅក្នុងបទគម្ពីរ ។ ឥឡូវនេះ ទីបន្ទាល់ទាំងនេះនឹងមិននាំមកនូវអំណាចដល់ជីវិតរបស់ក្មួយឡើយ រហូតទាល់តែព្រះវិញ្ញាណឆ្លាក់ទីបន្ទាល់ទាំងនេះនៅក្នុងចិត្ត « ខាងសាច់ឈាម » របស់ក្មួយសិន ។ ដូច្នេះសូមជញ្ជឹងគិត និងកត់ត្រារាល់ផែនការនិងសកម្មភាពដែលព្រះបានរៀបចំឡើង ដើម្បីឲ្យអព្ភូតហេតុទាំងនេះកើតឡើងនៅពេលវេលាដ៏ត្រឹមត្រូវ ។
បន្ទាប់មក ប្រើការអញ្ជើញនេះជាឱកាសដើម្បីខិតកាន់តែជិតព្រះ ។ សូមអធិស្ឋានទៅកាន់ព្រះវរបិតាសួគ៌ប្រៀបដូចជាវាជាលើកដំបូងរបស់ក្មួយ ។ សូមសម្តែងនូវសេចក្តីស្រឡាញ់ និងការដឹងគុណរបស់ក្មួយចំពោះពរជ័យរបស់ទ្រង់ ។ ក៏សូមទូលសួរដល់ទ្រង់ថា តើទ្រង់មានព្រះទ័យបែបណាចំពោះក្មួយ និងអំពីទិសដៅដែលជីវិតរបស់ក្មួយកំពុងឆ្ពោះទៅ ។
ប្រសិនបើក្មួយស្មោះត្រង់ និងបន្ទាបខ្លួន នោះក្មួយនឹងស្តាប់ឮចម្លើយរបស់ទ្រង់ ហើយចាប់ផ្តើមទំនាក់ទំនងផ្ទាល់ខ្លួន និងយូរអង្វែងជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។ មិនត្រឹមតែប៉ុណ្ណោះទេ ប៉ុន្តែទម្លាប់ខាងសាសនារបស់ក្មួយក៏នឹងកាន់តែមានអត្ថន័យដែរ ! ឧទាហរណ៍ ក្មួយនឹងទន្ទឹងចាំពេលអធិស្ឋាន ការសិក្សាផ្ទាល់ខ្លួន និងការថ្វាយបង្គំក្នុងព្រះវិហារបរិសុទ្ធរបស់ក្មួយ ថាជាឱកាសដើម្បីស្គាល់ទ្រង់ទាំងទ្វេ ហើយនឹងដើម្បីនៅជាមួយទ្រង់ទាំងទ្វេ ។
សេចក្តីជំនឿចម្រើនឡើងដោយភាពស្មោះត្រង់
សូមកត់សម្គាល់ថា សេចក្តីជំនឿដុះពន្លកឡើងនៅពេលយើងទុកចិត្តលើព្រះយេស៊ូវគ្រីស្ទ ហើយរីកដុះដាលឡើងនៅពេលយើងមានភាពស្មោះត្រង់ និងភក្តីភាពចំពោះទ្រង់ ។ ប្រសិនបើក្មួយៗចង់បានទំនាក់ទំនងពិតជាមួយនឹងព្រះគ្រីស្ទ សូមបង្ហាញទ្រង់តាមរយៈការចុះ និងគោរពតាមសេចក្តីសញ្ញាទាំងនោះដោយស្មោះត្រង់ និងភក្តីភាព ។ ការចុះសេចក្តីសញ្ញាជាមួយនឹងព្រះយេស៊ូវគ្រីស្ទស្ថាបនាសេចក្តីសង្ឃឹម ។ ការគោរពតាមសេចក្តីសញ្ញាទាំងនោះស្ថាបនាសេចក្តីជំនឿ ។
ខ្ញុំសូមប្រើឧទាហរណ៍ផ្ទាល់ខ្លួនមួយ ៖ កាលខ្ញុំនៅក្មេង នៅថ្ងៃមួយ ខ្ញុំបានឃើញម្តាយរបស់ខ្ញុំកំពុងយំតែម្នាក់ឯង ។ នៅពេលខ្ញុំសួរគាត់ថាហេតុអ្វីគាត់យំ គាត់បាននិយាយយ៉ាងទន់ភ្លន់ថា « ម៉ាក់ចង់ឲ្យកូនធ្វើជាក្មេងល្អ » ។ ទោះបីជាខ្ញុំដឹងថា ខ្ញុំមិនមែនជាមូលហេតុនៃទុក្ខកង្វល់របស់គាត់ក្ដី ខ្ញុំស្រឡាញ់ និងជឿជាក់លើម្តាយរបស់ខ្ញុំលើសនរណាៗទាំងអស់ ហើយចង់ធ្វើឲ្យជីវិតរបស់គាត់បានប្រសើរឡើង ។ ដូច្នេះ ខ្ញុំបានសន្យានឹងគាត់នៅថ្ងៃនោះដោយមានទឹកភ្នែករលីងរលោង និងដោយភាពឱឡារិកដែលក្មេងអាយុប្រាំបួនឆ្នាំអាចមានថា ខ្ញុំនឹងខិតខំជានិច្ចដើម្បីធ្វើជាកូនប្រុសដ៏ល្អបំផុត និងធ្វើឲ្យគាត់មានមោទនភាព ។
តើក្មួយអាចស្រមៃឃើញពីអំណាចដែលការសន្យានោះបានមាន—ហើយនៅតែមាន—មកលើខ្ញុំឬទេ ?
ការសន្យាជាមួយគាត់នោះនឹងដឹកនាំជីវិតរបស់ខ្ញុំ ។ មុនពេលធ្វើការសម្រេចចិត្ត ខ្ញុំនឹងពិចារណាថា តើទង្វើរបស់ខ្ញុំនឹងផ្គាប់ចិត្តគាត់ដែរឬទេ ។ ចំណងនៃការសន្យានេះ និងទំនាក់ទំនងជាមួយម្តាយរបស់ខ្ញុំ គឺជាយុថ្កាសម្រាប់ការប្រព្រឹត្តរបស់ខ្ញុំពេញមួយជីវិតរបស់ខ្ញុំ ។
ប៉ុន្មានឆ្នាំក្រោយមក ពេលខ្ញុំបានស្គាល់ព្រះយេស៊ូវគ្រីស្ទកាន់តែច្បាស់ ខ្ញុំបានដឹងរួចជាស្រចពីរបៀបដើម្បីដាក់សេចក្តីជំនឿរបស់ខ្ញុំទៅលើទ្រង់ ។ ខ្ញុំបានចុះសេចក្ដីសញ្ញាជាមួយនឹងព្រះអម្ចាស់ ហើយកាលដែលខ្ញុំបានព្យាយាមគោរពតាមសេចក្តីសញ្ញាទាំងនោះ ទ្រង់បានអភ័យទោសដល់អំពើបាបរបស់ខ្ញុំ ដឹកនាំជីវិតរបស់ខ្ញុំ ហើយ« បានបំពេញចិត្តខ្ញុំ ដោយសេចក្ដីស្រឡាញ់របស់ទ្រង់ »យ៉ាងពេញលេញ ។ ព្រះគ្រីស្ទបានបណ្តុះនៅក្នុងខ្ញុំនូវសេចក្តីស្រឡាញ់ ការគោរព និងភក្តីភាពដ៏ជ្រាលជ្រៅចំពោះទ្រង់ ។
តើក្មួយយល់ទេថា ហេតុអ្វី « បានជាសេចក្តីជំនឿគឺជាគោលការណ៍នៃសកម្មភាព » ហើយថា « តែបើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យ[ ព្រះ ]បានឡើយ » ?
ពេលក្មួយៗព្យាយាមធ្វើអ្វីដែលគាប់ព្រះហឫទ័យទ្រង់ ក្មួយនឹងនិយាយដូចយ៉ូសែបនៅស្រុកអេស៊ីព្ទដែរពេលដែលលោកត្រូវបានល្បួងដោយភរិយារបស់ប៉ូទីផារ « តើធ្វើដូចម្តេចឲ្យខ្ញុំប្រព្រឹត្តការ ដែលអាក្រក់យ៉ាងធំនេះទៅបាន ធ្វើយ៉ាងនោះនឹងមានបាបនៅចំពោះព្រះផង ? » ហើយនៅពេលប្រឈមមុខនឹងការប្រឆាំង នោះក្មួយនឹងនិយាយដូចព្យាការីយ៉ូសែប កាលនៅវ័យក្មេង « ហើយខ្ញុំដឹងថា ព្រះទ្រង់ក៏ដឹងថាខ្ញុំបានឃើញការនិមិត្ត ហើយខ្ញុំពុំអាចបដិសេធរឿងនេះ … ខ្ញុំបានដឹងថា បើខ្ញុំធ្វើដូច្នោះ នោះខ្ញុំនឹងជំទាស់ព្រះ » ។
ដូច្នេះសេចក្តីជំនឿលើព្រះយេស៊ូវគ្រីស្ទ គឺជាចំណងនៃសេចក្ដីទុកចិត្តដែលបានបង្កើតឡើងដោយភក្តីភាព និងសេចក្តីស្រឡាញ់ ។ ឬនិយាយម៉្យាងទៀតថា នៅក្នុងការដឹងគុណចំពោះសេចក្តីស្រឡាញ់មេត្តាករុណារបស់ព្រះ ( hesed ហេសិដ ) យើងបង្ហាញនូវភក្តីភាពនៃសេចក្តីស្រឡាញ់របស់យើង ( emunah អេម៉ូណា ) តាមរយៈការគោរពព្រះបញ្ញត្តិរបស់ទ្រង់ ។
ព្រះគ្រីស្ទសន្យាថា « អ្នកណាដែលមានបញ្ញត្តរបស់ខ្ញុំ ហើយកាន់តាម … នោះជាទីស្រឡាញ់នៃព្រះវរបិតាខ្ញុំហើយ ខ្ញុំនឹងស្រឡាញ់អ្នកនោះដែរ ក៏នឹងសម្តែងខ្លួនឲ្យអ្នកនោះស្គាល់ផង » ។ ប្រសិនបើក្មួយប្តេជ្ញាចិត្តក្នុងការស្មោះត្រង់ចំពោះទ្រង់ នោះទ្រង់នឹងបើកបង្ហាញនូវសេចក្តីស្រឡាញ់ដល់ក្មួយផងដែរ ។
សេចក្តីជំនឿក្នុងការប្រឈមមុខនឹងទុក្ខលំបាក
ប៉ុន្តែតើក្មួយៗគួរឆ្លើយតបទៅនឹងស្ថានភាពលំបាកដែលទាមទារឲ្យមានអព្ភូតហេតុរបស់ទ្រង់ដោយរបៀបណាទៅ ? ខណៈពេលដែលបញ្ហាប្រឈមគឺមិនអាចចៀសវាងបាន ហើយពេលខ្លះគួរឲ្យភ័យខ្លាច ចូរគ្រាន់តែដើរដោយមិនភ័យខ្លាច ឆ្ពោះទៅរកទ្រង់ ដូចការអញ្ជើញក្នុងបាវចនានៃសន្និសីទ ដ.ក.យ. ឆ្នាំ២០២៥ ៖ « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ ចូរកុំខ្លាចឡើយ » ។
តើក្មួយអាចដើរដោយមិនភ័យខ្លាចឆ្ពោះទៅរកទ្រង់ដោយរបៀបណា ?
សូមស្រមៃថា ក្មួយជាអ្នករុករកម្នាក់នៅក្នុងដែនដីដែលមិនស្គាល់មួយ ។ ដើម្បីយកឈ្នះឧបសគ្គខាងមុខ នោះក្មួយត្រូវការប្រភពនៃពន្លឺមួយ ។ ភាពស្មោះត្រង់របស់ក្មួយចំពោះព្រះ និងការប្រាស្រ័យទាក់ទងដ៏ខ្ជាប់ខ្ជួនជាមួយទ្រង់ គឺជាប្រេងសម្រាប់ចង្កៀងរបស់ក្មួយ ។ ដូច្នេះនៅពេលក្មួយៗជួបប្រទះស្ថានភាពងងឹត និងគ្រោះថ្នាក់ ជំនួសឲ្យការដើរឆ្ពោះទៅរកទ្រង់ទាំងទ្វេដោយងងឹតងងល់ ក្មួយៗនឹងអុចចង្កៀងរបស់ក្មួយដែលពោរពេញដោយប្រេងនៃសេចក្តីជំនឿលើព្រះគ្រីស្ទ ដើម្បីបញ្ចេញពន្លឺនៃសេចក្តីសង្ឃឹមនៅលើផ្លូវដែលមិនប្រាកដប្រជានោះ ។ បទពិសោធន៍ពីអតីតកាលរបស់ក្មួយនឹងបង្កើនសេចក្តីសង្ឃឹមរបស់ក្មួយ ថាព្រះអម្ចាស់នឹងទ្រទ្រង់ក្មួយនៅក្នុងដំណើររបស់ក្មួយ ។
តើក្មួយៗនឹងរីកចម្រើនប៉ុនណាជាមួយនឹងសេចក្តីសង្ឃឹម និងសេចក្តីជំនឿរបស់ក្មួយលើព្រះគ្រីស្ទ ?
តើនៅចាំរឿងរបស់ខ្ញុំនៅឯអាងហែលទឹកដែរឬទេ ? ក្នុងគ្រានៃភាពអស់សង្ឃឹមនោះ អព្ភូតហេតុបានកើតឡើងនៅក្នុងរបៀបមួយដែលខ្ញុំបានរំពឹងទុក ប៉ុន្តែព្រះមិនធានាថា វានឹងកើតឡើងតាមឆន្ទៈរបស់យើងជានិច្ចនោះទេ ។ សេចក្តីជំនឿរបស់យើងត្រូវតែផ្តោតលើព្រះគ្រីស្ទ និងសេចក្តីសង្ឃឹមរបស់យើងនៅក្នុងពរជ័យរបស់ទ្រង់ ដូចដែលទ្រង់ជ្រើសរើសដើម្បីបញ្ជូនពរជ័យទាំងនោះមក ។ « រំពឹងថាមានអព្ភូតហេតុ » ប៉ុន្តែ « សូមទុកឲ្យព្រះឈ្នះនៅក្នុងជីវិតរបស់យើង » ។
ការសន្យារបស់ព្រះទៅកាន់រាស្ត្រដ៍ស្មោះត្រង់របស់ទ្រង់
មិត្តវ័យក្មេងរបស់ខ្ញុំអើយ យើងស្រឡាញ់ និងទុកចិត្តលើក្មួយៗខ្លាំងណាស់ ! ក្មួយៗ មានចំណែក ក្នុងគ្រួសារនៃព្រះ និងជាបុត្រាបុត្រីក្នុងសេចក្តីសញ្ញា ។ សូមជឿ និងទុកចិត្តលើព្រះយេស៊ូវគ្រីស្ទ ។ ទ្រង់នឹងធ្វើឲ្យក្មួយ ក្លាយជា សិស្សរបស់ទ្រង់ពិត ។
ខ្ញុំសូមអញ្ជើញក្មួយៗឲ្យចាប់ផ្តើមពីថ្ងៃនេះ ដើម្បីចិញ្ចឹមបីបាច់ទំនាក់ទំនងរបស់ក្មួយជាមួយនឹងព្រះយេស៊ូវគ្រីស្ទ ។ ចូរតាំងចិត្តថា នឹងមិនបោះបង់ទ្រង់ចោលឡើយ ។
ភាពស្មោះត្រង់ សេចក្តីស្រឡាញ់ និងការទុកចិត្តរបស់ក្មួយលើព្រះគ្រីស្ទនឹងកំណត់បុគ្គលិកលក្ខណៈ និងអត្តសញ្ញាណរបស់ក្មួយ ទៅតាមបុគ្គលិកលក្ខណៈ និងអត្តសញ្ញាណរបស់ទ្រង់ ។ ក្មួយនឹងទទួលបានទំនុកចិត្ត និងកម្លាំងដើម្បីយកឈ្នះលើការវាយប្រហាររបស់សាតាំង ។ ហើយនៅពេលក្មួយមានកំហុស នោះក្មួយៗនឹងប្រាថ្នាចង់បានការអភ័យទោសរបស់ទ្រង់ ។ នៅទីបំផុត សេចក្តីសង្ឃឹមរបស់ក្មួយសម្រាប់អនាគតនឹងភ្លឺត្រចះត្រចង់ ។ ទ្រង់នឹងទុកចិត្តលើក្មួយៗជាមួយនឹងអំណាចរបស់ទ្រង់ ដើម្បីសម្រេចនូវអ្វីៗដែលទ្រង់រំពឹងទុកពីក្មួយ រួមទាំងអំណាចដើម្បីត្រឡប់ទៅទីវត្តមានរបស់ទ្រង់វិញដែរ ។
ខ្ញុំសូមធ្វើទីបន្ទាល់ទៅដល់ក្មួយៗអំពីសេចក្តីអំណរដែលបានមកពីការច្រៀង « ចម្រៀងនៃសេចក្ដីស្រឡាញ់ដែលប្រោសលោះ » និង ការ« ត្រូវបានឱបក្រសោបជាអង្វែងតទៅ ដោយព្រះពាហុនៃសេចក្ដីស្រឡាញ់របស់ទ្រង់ » ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។